Awor cu Gobierno a cambia, por constata cu den e.o. e compania estatal, Refineria di Aruba (RDA) tin masha iregularidad cu a ser cometi. A keda constata un cantidad di sacamento di fondo di pueblo, cu a bai den man di tercera, sin aprobacion di e.o, di Conseho di Minister pa no papia mes di Parlamento di Aruba.

Hasta nos tin informacion cu casi tur stacionnan di gasoline na Aruba, cu tin diferente doño, pero cu ta ser opera bao di nomber di Citgo, cu tin un compania nobo cu lo kier cambia nomber di Citgo y lo haya nomber di PUMA. E nomber aki mas bien ta conoci pa negoshinan den benta di paña, keds, etc, pero awor de pronto un compania registra na Panama, lo inverti masha placa (pa kende?) pa haci un “branding”  nobo pa cambio di nomber.

No solamente esey, pero cu hasta e waf di San Nicolas ta casi cai aden, dado momento a haya un financiamento, cu tambe mester wordo investiga profundamente. Henter e situacion aki, ta hole masha stinki. Y ta pone nos recorda nos amigo difunto Guillermo Trinidad, kende siendo un miembro di Eilandsraad pa PPA a declara e famoso dicho: “Si cabaron bisabo cu e lodo eybao ta hole stinki kere”. E tempo e mensahe a ser manda pa dirigentenan di MEP den Eilandsraad, pa despues e mesun Guillermo Trinidad a afilia na MEP pa constata loke e tabata sospecha di dje, a resulta berdad.

Manera menciona, awor cu cambio di Gobierno, por constata un cantidad di iregularidad, cu ta hole na alto corupcion. Ta motibo cu e Parlamentario di AVP, John Hart a pidi pa yama un reunion publico di Parlamento p’e mandatarionan responsabel, e.o di Energia, di Husticia, bin duna cuenta di loke a keda constata den maneho di RDA.

Ta for di augustus ultimo, cu John Hart a entrega un mocion, unda ta demanda pa haci unn investigacion profundo di tur acontesimento di RDA for di 2018 te cu 2025. E investigacion aki mester a cuminsa den 3 luna di tempo y cu e resultado mester wordo manda pa Parlamento. Te awe Parlamento no a haya nada, pa cual John Hart (AVP)  ta demanda pa haya claridad riba acurdo y condicionnan cu tin entre RDA y Citgo, pero tambe mester tin claridad riba e acuerdo cu Eagle LNG. Pueblo kier claridad, mester di transparencia total, pa cual John Hart ta sigui demanda.

RDA su situacion financiero no ta bon y ta perdiendo 14 miyon florin pa aña y esaki ta pa algun aña caba. Y asina tin masha mencion di deterioro di henter e planta di refineria. Tin hopi puito pa sali for di bao di  e macuto, cu ta hole hopi stinki y cu esnan responsabel tinn cu carga cu e consecuencianan.

Autentico Restaurant Week ta un parti special di Autentico Aruba Culinary Festival, un iniciativa di Aruba Tourism Authority (A.T.A.), cu ta pone enfasis riba experiencia local y ta duna residente como bishitante e oportunidad pa purba e creatividad culinario di chefnan local. Segun informacion mas di 40 restaurant y hotel ta presenta menu special, descuento atractivo y evento culinario pa honra e cultura gastronomico di Aruba.

Sigur un bunita iniciativa di parti di ATA, unda bishitantenan por spera un variedad di estilo culinario, for di cushina tradicional Arubano te cu fusion internacional. Pero loke si ta trece un luz negativo riba dje ta, cu for di diabierne anochi, Polis hunto cu DOW a cuminsa sera e camindanan, unda e evento aki ta tuma lugar, manera parti di Caya Betico Croes y casi henter Wilhelminastraat.

Nos ta kere cu e organisadornan mester por a siña di e actividad anterior, pero parce cu nan. Un biaha mas, nos ta aplaudi ATA cu e evento aki, pero e no por bay a costo di otro negoshi. Nos ta cuestiona: Kico t’e motibo cu mester sera parti di Caya Betico Croes y Wilhelminastraat for di diabierna atardi caba. Perhudicando tur otro restaurantnan den e cayanan menciona.

P.e. asina El Caucho Restaurant no tin aceso facil pa su clientenan (turista), kendenan tin reservacion haci adelanta. No ta Diabierne so, pero tambe diasabra anochi e tabata peor. Durante dia e negoshinan cu no tin nada di haci cu e evento culinario, ta ser stroba di por haci nan benta, pasobra alrededornan di nan, tur caya ta sera completamente. Un evento asina no mag di strobe otro comerciantenan di haci nan negoshi. Practicamente ecomicamente nan a ser paralisa.

Masha bon, por a sera e camindanan for di diasabra merdia, enbes di Diabierne atardi. Ta di spera p’e proximo biahe tene cuenta cu e otro comerciantenan cu no tin arte ni parte den negoshi culinario. Por bisa cu Autentico tabata un exito si mira e cantidad di bishitantenan cu el a haya.

Tempo cu Gobierno (Bestuurscollege di MEP) a inicia cu e proyecto pa construi cas di pueblo, ta meramente pa haci e casnan aki pa pueblo humilde. E tempo ey tabata difunto Diputado Pedro Charro Kelly a bin cu e proyecto aki y e prome Director a bira difunto Frans Wernet. Sigur nan a haci e proyecto aki masha exitoso, mirando cuanto cas social a keda construi rond Aruba.

Segun tempo ta bay pasando, por mira cu masha poco cas a keda construi. P.e. e Gobierno saliente di Eveline Wever Croes I, ni II, no a construi ningun cas, siendo cu demanda a bira mas grandi. Tabata tempo cu Otmar Oduber tabata Minister tanto den Gobierno di AVP como di MEP despues a bin ta duna tereno pa hobennan por construi nan propio cas. E proyecto aki no a resulta, pa falta di financiamento, cu banconan no kier a duna, no tabatin confianza den esnan cu tabata busca placa pa construi nan cas.

Awendia, FCCA si a sigui cu algun proyecto, manera a bin cu e Smart-Housesnan na Kibaima, unda a construi solamente 6 cas, siendo cu tin tereno pa traha mas cas. E casnan aki FCCA a bin ta huur nan, berdad na un prijs razonable, pero awendia e prijs di huur a subi te 2500 florin pa luna, sin nada inclui. Un pensionado, hamas por bin na remarca pa huur un cas asina.

FCCA a sigui cu otro proyectonan di apartamento y cas, pa cual tabatin prijs social pa tur hende. Pero manera ta ser bisa FCCA a bira un organisacion commercial, a bira un real-estate, aunke ainda no a haya permiso pa cuminsa bende cas of apartamento. Prijsnan a sigui subi, y no ta nada social. 

Por tende awor cu Gobierno AVP-Futuro lo bai construi mas cas di pueblo, pero cu mester ta pa pueblo. Pasobra manera menciona caba, e prijsnan cu FCCA tin pa huur of kier bende, no ta nada social. Mira e condicionnan pa haci inscripcion y mira tambe e documentonan cu mester pa haci un aplicacion. Conclusion FCCA no ta nada social, pero a bira uno puro comercial.

Diahuebs mainta ultimo, a tuma lugar e ceremonia di groundbreaking p’e planta di Sea Water Reverse Osmosis (SWRO-3 BOOT). Na april 2024 WEB y Seven Seas a firma e acuerdo Build-Own-Operate-Transfer (BOOT) pa sigura suficiente produccion di awa di bebe na un prijs rasonabel pa nos isla durante e proximo 10 aña. Cu e proyecto aki pueblo lo por spera reduccion di prijs di awa sigur.

Realisacion di SWRO-3 BOOT ta hopi importante pa WEB por trata na tempo e retonan cu e facilidadnan di produccion existente. SWRO-3 BOOT ta forma parti di WEB su trayecto di proyectonan strategico di awa di bebe y ta conecta cu e “control center” nobo, di cual a haci su groundbreaking na september ultimo.

P’e ocasion aki, Minister di Energia mr. drs. Arthur Dowers a asisti n’e groundbreaking y a elogia gerente di WEB p’e logro importante aki. Cu e SWRO-3, WEB por genera y garantisa suficiente produccion di awa pa cubri Aruba. Hunto cu Seven Seas Water Group, lo inicia cu e planta nobo aki di SWRO-3 cu lo mester keda cla pa juni 2026. Esaki ta un inversion di 10 miyon florin, cu mester cumpli cu e demanda no solamente actual sino pa futuro tambe.

Director ing. Alfredo Koolman di WEB Aruba N.V. a reconoce e empleadonan di WEB pa percura pa Aruba tin awa limpi pa mas cu 93 aña. E trabao den e planta no tur ora ta bay sin problema, pero e dedicacion di e personal ta crucial pa mantene e produccion optimal. Pa atende cu e retonan, lo mester haci inversionnan substancial den e planta. 

CEO di WEB, ing. Alfredo Koolman a expresa cu financiamento di e proyectonan strategico di awa ta hopi critico y tin su atencion completo. E tin confiansa cu e financiadornan tambe lo contribui n’e obhetivo hopi importante aki, pa garantisa cu na cada momento tin suficiente awa potabel na Aruba. Koolman ta premira cu den 8 luna lo bin hunto atrobe, pero pa celebra e entrega di SWRO-3.

Henry Charrabe, CEO di Seven Seas Water Group a indica cu e planta nobo di SWRO-3 BOOT por procesa entre 16500 m3 y 19000 m3 pa dia, y tin e meta pa no solamente garantisa awa pa awor pero tambe pa futuro. E acuerdo aki tin un duracion di 10 aña y e proyecto ta conta cu 90% di personal for di e mercado laboral local.

Minister Dowers a felicita cada un den WEB pa nan trabao duro. Segun e mandatario encarga cu energia, “comedo di webo no sa e dolor di e galiña cu a pone e webo”, referiendo n’e hecho cu hopi no ta para keto pa realisa con duro e ekipo di WEB tin cu traha pa logra produccion di awa y coriente. E compromiso di Gobierno ta pa sigui traha cu e personal di e companianan aki pa sigura produccion di awa di calidad continuamente.

Recientement Dr. Bahia Tahzib-Lie a haci un bishita na Prome Minister Mike Eman den su despacho. Nan a dialogo riba cooperacion internacional y vision sostenibel pa Aruba. Dr. Bahia Tahzib-Lie ta representante Permanente Suplente di Reino Hulandes pa Nacionnan Uni na New York, Merca. Su bishita na Aruba a tuma lugar den cuadro di e conferencia di Embahadornan di Reino Hulandes cu ta tuma lugar siman pasa.

Durante e reunion, Dr. Bahia y Prome Minister Eman a comparti un dialogo profundo y constructivo riba asuntonan global y regional cu tin importancia pa Aruba. Dr. Bahia, kende conoce Prome Minister Eman pa hopi aña caba, a expresa su aprecio p’e encuentro y p’e oportunidad pa bolbe intercambia idea cu e mandatario Arubano.

Dr. Bahia a lamenta cu Prome Minister Eman no por a asisti e sesion mas recien na New York, pero a destaca e trabao positivo y representacion digno di Minister mr. Wendrick Cicilia, kende a tuma e rol di Prome Minister durante e reunionnan aki.

E Embahador tambe a pone enfoke riba e preparacionnan p’e conferencia climatico COP30, cu lo tuma lugar na Brasil na November proximo. Den esaki, a intercambia idea cu Prome Minister Eman tocante e papel importante cu Aruba por tin den promove cooperacion regional y solucion sostenibel pa camio climatico.

Durante e encuentro aki, Dr. Bahia a expresa su admiracion p’e vision di Prome Minister Eman riba reforestacion di Aruba y su compromiso cu desaroyo duradero. Pesey un invitacion a ser haci n’e mandatario si ta posibel atende e conferencia na Brazil. Dr. Bahia destaca cu e liderato di Prome Minister ta un ehempel pa otro paisnan chikito (SIDS), cu ta busca un balansa entre progreso economico y proteccion di medio ambiente.

Dr. Bahia a extende un invitacion formal na Prome Minister Eman pa bishita New York den futuro cercano, pa sigui fortalece e lasonan diplomatico y pa sigui avansa den e dialogonan internacional cu ta na interes di Aruba y di e Reino Hulandes den su totalidad.

Minister di Finansa, Asunto di Economico y Sector Primario, Geoffrey Wever, conhuntamente cu Minister di Labor sr. Wendrick Cecilia y Minister di Cuido di Adulto Mayor sra. Wyatt-Ras a haya full sosten di Conseho di Minister di Gabinete AVP-FUTURO despues di a haci un peticion pa haci un cambio di ley di Inkomstenbelasting pa introduci  un deduccion fiscal adicional pa pensionadonan 65+ cu ta traha activamente riba nos mercado laboral.

Manera ta conoci Aruba ta enfrentando un scarcedad structural di personal den diferente sector di nos mercado laboral. Nos pensionadonan, cu nan conocemento y experiencia extenso, por duna un aporte sumamente balioso na nos mercado laboral. N’e momento aki participacion den mercado laboral pa pensionadonan no ta algo atractivo debi cu e entrada adicional cu nan genera banda di nan pensioen ta hiba nan den un categoria (mas) halto di belasting.

E proposicion presenta na Conseho di Minister lo duna un deduccion fiscal adicional di Afl. 10.000 na tur persona di 65+ cu ta desea di sigui traha activamente banda di nan pensioen. Esaki ta un instrumento di maneho concreto di Gabinete AVP-FUTURO cu tin diferente efecto positivo: aumento di participacion laboral di pensionadonan cu ta desea di sigui activo den mercado laboral unda e pensionado por sigui aporta cu nan conocemento y experiencia, envolvimento social di e pensionado y un alivio riba e presion cu tin den e mercado.

Minister Geoffrey Wever a elabora: “Cu e proposicion aki nos ta duna nos pensionadonan adulto mayor un oportunidad pa sigui contribui y participa activamente na nos sociedad. Nan conocemento, habilidad y experiencia extenso ta di gran balor pa nos sociedad y e proximo generacion y tin alabes efecto positivo pa nos economia y nos mercado laboral”

Awor cu incentivo aki a wordo aproba den Conseho di Minister di Gabinete AVP-Futuro, e proceso di cambio di e ley di Inkomstenbelasting lo inicia.

Diabierna mainta den sala di Conseho di Minister, Gobierno a tene un encuentro cu representantenan di San Nicolas Business Association (SNBA) pa presenta nan vision. Errol de Freitas, Presidente di SNBA a keda satisfecho cu e reunion aki. 

Durante periodo di formacion di Gabinete AVP-Futuro, SNBA a entrega e draft di nan vision caba n’e Formadornan y a pidi Gobierno pa yuda SNBA trek diferente proyecto pa San Nicolas.

Segun de Freitas, e vision di SNBA y Gabinete AVP-Futuro ta bon alinea mirando cu e acercamento cu e.o. Minister Geofrey Wever di Economia y Finansa, nunca a cambia y ta conta cu e sosten for di e tempo di formacion caba. E ta un continuacion stabiel y mi ta sinti cu e reunion a bay hopi positivo den e sentido cu ta sinti e commitment na mesa cu ta hopi importante. Playa ta practicamente organisa, nan tin 15 mil kamber y nan tin un economia, pero mester balansa e cos aki y e Gobierno aki sa exactamente kico mester haci.

E proyectonan di Farmers Market, Carubbean, revitalisacion di Bernhardstraat etc., ta bon proyectonan cu tambe ta inclui den e vision di SNBA, pero ta bon pa considera pa trece bek incentivanan fiscal manera tabatin antes, pa duna e empresanan un sosten pa inverti y mehora nan negoshi.

Errol de Freitas ta hopi optimista pasobra na final di dia, na San Nicolas sempor por haya algo cultural y autentico locual mester trece bek.

Recientemente durante un reunion Hunta Directiva di Dr. Horacio  E. Oduber Hospital (HOH) a presenta orguyosamente na Minister di Salubridad, drs. Melvin Wyatt-Ras, e relato anual di HOH cu ta inclui tur e cifranan pa loke ta aña 2024. 

E entrega di e cuenta anual 2024 y su accesibilidad pa comunidad ta un parti esencial di transparencia y bon gobernacion. HOH su enfoke ta transparencia y claridad y asina nos como organisacion ta cumpli cu nos promesa y responsabilidad pa cu comunidad di Aruba.

“Esaki sigur tabata un momento historico pa Hunta Directiva di HOH mirando cu a encontra un retraso y pues e ultimo 5 añanan a traha duro y a logra termina un total di 19 cuenta anual di Stichting Ziekenverpleging, LabHOH y Bloedbank Aruba. Awor nos na HOH ta completamente up-to-date y esaki ta yena nos cu orguyo mirando e trabou duro cu e team di HOH a eherce pa logra e meta aki”, asina sr. Gregory Croeze, miembro di Hunta Directiva a conta.

“Nos kier a yama un danki na tur e personal di HOH cu a haci esaki posibel. Nan a traha incansablemente e ultimo añanan p’asina por a entrega e relatonan anual di calidad halto. Di parti Hunta di Directiva, un danki special na nan,” Gregory Croeze a termina bisando.

Tur e cuentanan anual a wordo debidamente controla y aproba tambe pa accountant y awor ta accesibel tambe pa publico via nos website www.arubahospital.com.

Den un mundo marca p’e retonan global creciente for di tensionnan geopolitico te n’e efectonan continuo di cambio di clima, preparacion y colaboracion ta mas importante cu nunca pa ta prepara. Siman pasa, Dr. Horacio E. Oduber Hospital (HOH) tabata anfitrion di un reunion di coordinacion clave enfoca riba reaccion di emergencia di cuido medico den henter Caribe Hulandes. 

Un reunion entre diferente representante den Reino Hulandes cu ta forma parti di e grupo di trabou cu ta hiba e nomber di Healthcare Emergency Preparedness &Response (HEPR). E sesion a trece e representantenan di Ministerio di Salud, Bienestar y Deporte (VWS) di Hulanda, Nacionnan Uni y e profesionalnan di cuido di salud di islanan bisiña hunto p’asina revisa y fortalece e strategianan di reaccion na crisis colectivo.

“Lamentablemente, crisisnan semper lo existi un caminda na mundo y como hospital, nos mester ta cla pa cualkier tipo di emergencia. Nos ta haci esaki conhuntamente, cu e partnernan local manera e organisacion di crisis di Aruba y regionalmente atraves di e grupo Healthcare Emergency Response Preparedness, conoci como HERP,” segun Jacco Vroegop, Presidente di Hunta Directiva di HOH.

HERP, estableci den colaboracion cu VWS, ta fungi como un red vital cu ta conecta e institutonan di cuido medico den henter Caribe Hulandes. E grupo ta percura pa den tempo di crisis, manera durante e pandemia di COVID-19, por coordina e recursonan, pashentnan y personal eficientemente entre e islanan.

Durante e bishita, e participantenan a repasa protocolnan conhunto y scenarionan operacional, discutiendo con Hulanda y e islanan por sostene otro mihor ora confronta un emergencia. E discucionnan a enfatisa e elementonan practico manera mudamento di pashent entre islanan, alocacion di recurso y mecanismonan di sosten mutuo.

“Ta importante pa nos tene e relacionnan aki activo y compronde kico cada un di nos por ofrece. Si un crisis yega na un isla, nos tur mester ta cla pa yuda. Hulanda ta hunga un rol esencial como nos liña di bida pa hende, suministro y remedinan y ta esencial p’e asociacion aki sigui crece.” Vroegop a agrega.

E reunion a enfatisa un compromiso comparti entre e islanan di Caribe Hulandes y Hulanda pa keda vigilante, bon coordina y resiliente pa enfrenta futuro emergencianan den cuido di salud.

Un di e prioridadnan principal di Minister di Labor, mr. Wendrick Cicilia ta pa duna atencion specifico n’e departamento encarga cu Inspeccion laboral. E ta importante pa garantisa y re-enforsa cumplimento di nos leynan laboral.

Siman pasa diarazon atardi, Minister di Labor, mr. Wendrick Cicilia a ricibi e Inspectornan Laboral acompaña pa Director Interino di DAO, Anthony Riviears. Durante nan bishita, a entrega e mandatario un plan di implementacion pa modernisa, fortifica y empodera Departamento di Inspeccion Laboral. 

Cumplimento cu nos leynan laboral ta importante y pa por garantisa cu tur dunador di trabou ta cumpli cu e leynan, ta necesario pa ekipa, aprecia y balora Departamento di Inspeccion Laboral.

Den luna di juni, Minister Wendrick Cicilia a ricibi un evaluacion haci dor di Inspeccion Laboral Hulandes cu a evalua nos sistema y tambe e departamento na Aruba. Nan a produci un rapport: “Modernisering Arbeidsinspectie op Weg naar betere Handhaving van Arbeidswetten. Den e rapport cu Minister Wendrick Cicilia a ricibi, tin un total di 25 recomendacion pa modernisa y eleva Inspeccion Laboral.

Minister Wendrick Cicilia a haci e compromiso cu lo agrega sosten huridico n’e Departamento di Inspeccion Laboral pa garantisa cu den futuro por impone multa y sanciona incumplimento di e leynan laboral.

Di acuerdo cu algun Inspector, ta te despues di 22 aña, un Minister di Labor ta sinta na mesa cu e Inspectornan Laboral, kendenan t’e defensornan di e leynan laboral di Aruba.