Ningun hende por a biba pensa, cu dos dia despues di un tremendo concierto den Renaissance Convention Center, cu esaki tabata e ultimo presentacion di Robert Jeandor cu su Solo Banda Show. Con na final, despues di canta (sinta) un di su maximo cancionnan, compone pa Grupo Los Laga Bai, di cual Robert Jeandor t’e Director Musical pa varios aña.

E forma cu el a gradici e fannan presente bisando: “Mi ta gradici cada uno di boso, specialmente mi agrupacion, Solo Banda Show, cu lo tey pa largo rato mas”, despues bendiciona tur hende y tambe su agrupacion” pa diarazon mainta e pueblo aki ta lanta cu e noticia cu Robert Jeandor a laga nos. Noticia cu a conmove henter pueblo, pero tambe e pueblo di Santo Domingo y otro paisnan den Caribe.

“Muere el merenguero Robert Jeandor, el arubeño más dominicano del siglo XX” ta un di e titularnan cu a hala nos atencion, comprobando cu Robert Jeandor tabata un di e grandinan. 

No tin suficiente palabra pa expresa nos dolor pa cu su famia, comunidad Arubiano y sigur na tur musico pe perdida grandi aki. Y sigur nos di Los Laga Bai, cu manera menciona tabata Director Musical di e grupo. Durante varios aña celebrando Carnaval, tabata p’e forma cu Solo Banda tabata trece su musica, a haci cu Los Laga Bai a gana varios biaha tras di otro e Premio di e Grupo Mas Anima den Carnaval. Los Laga Bai lo haya su falta sigur. 

No ta mi intencion di bay den ripiticion di tur loke tur media a scirbi y papia di e legendario Robert Jeandor.  Na nomber di tur dirigente di Los Laga Bai, di tur participante, mi ta expresa nos condolencia, forza na su señora, yiunan, rumannan y na demas famia. Laga nos keda recorda Robert Jeandor, como e gran musico, gran maestro, p’e por ta un role model pa nos hobennan, sigur esnan cu kier ta un musico grandi. Laga Robert ta boso inspiracion. Robert, sosega na paz.

Despues di mas cu 5 aña di persecucion, Otmar Oduber a anuncia cu e ta distancia su mes di Parlamento di Aruba temporalmente pa atende cu e caso cu tin contra dje den Corte di Apelacion, cu el a califica como abuso y humiyacion. E caso aki lo ser trata na luna di November awor, como “Tom Zitting”.

“Mi a demostra cu no solamente tur e acusacionan inicial contra mi persona tabata falso, pero tambe mi a logra haya e confianza, apoyo y sosten di e pueblo di Aruba durante e ultimo eleccion un biaha mas. P’esaki mi ta y lo keda semper humildemente agradecido. Sinembargo, Ministerio Publico, cu tin otro meta, no a keda satisfecho cu e ultimo sentencia y a dicidi di apela e caso den Corte Superior. Mi tambe a dicidi di apela y asina cu tur confiansa lo mi bai prueba mi inocencia completo y demostra cu loke a bin ta tuma lugar durante mas di 6 aña ta simplemente un abuso di poder di parti di Ministerio Publico y forsanan politico cu nunca lo por a haci e mesun cos aki cu un Minister of ex-Minister na Hulanda. 

Mi a tuma e desicion di bay tur cu tin contra e abuso y persecucion na un forma contundente y definitivo, respetando e trias politica y dunando respet n’e organo mas halto di nos Pais. P’e motibo aki mi a dicidi di tuma retiro temporalmente como miembro di Parlamento p’asina actua y duna contenido n’e palabranan ariba menciona”, asina Otmar Oduber a declara.

“Mi principio y respet p’e funcion di honor aki, ta exigi pa mi duna mi mes e espacio pa atende cu e caso y asina esaki termina, lo mi asumi e responsabilidad bek, representando nos pueblo cu tur honra y fervor. Cu mi posicion y decicion tuma, mi ta spera di por contribui na un Parlamento mas respeta, contrario na hechonan di otronan den pasado.”

Otmar Oduber a declara cu e no lo haci uzo di e derecho pa “Overbruggings toelage” y ademas lo sigui sostene e fraccion di PPA y apoya e candidato Eduard Pieters como e proximo miembro di Parlamento cu den opinion di Otmar Oduber ta bon prepara y ta haciendo un excelente trabao den e fraccion oraño. 

“Martin Luther King Jr a yega di bisa: “The time is always right to do what is right” y e momento husto pa mustra respet na nos organo di Parlamento y e Trias Politica cu t’e pilar di nos democracia, ta awor! Cu esaki mi kier t’e ehempel di con ta duna honor n’e organo mas halto di nos pais y cu no mester tin ley pa regula loke mester ta “fatsoen”. No mester ley pa por haci loke ta spera di un bon lider,” asina Otmar Oduber a sigui bisa.

Segun e lider di PPA; e lucha pa restaura respet y dignidad pa cu e organo principal di nos pais ta cuminsa cu e decicion y accion aki cu su persona a tuma, pero tambe cu e decicion di “principio” di su persona pa a bai Corte contra un acto cu den su concepto ta anti constitucional y anto democratico. E decision tuma pa Parlamento ta strob’e di eherce su funcion conforme nos constitucion y ta limita e miembro di Parlamento den su trabao y responsabilidadnan di representa e votador di Partido Patriotico di Aruba y e pueblo di Aruba engeneral conforme nos “kiesverordening”.

“E hecho cu Hues den su sentencia ta confirma e hecho cu e medida tuma pa mayoria den Parlamento ta “stroba” e trabao di mi persona pa representa mi pueblo, pero cu respetando e trias politica, ta prefera di laga e tres organonan mes regula nan mes, NO ta cambia e conviccion cu cual nos lo sigui vocifera, den nomber di e mas di 3500 votonan cu a pone PPA bek den Parlamento despues di 20 aña di ausencia, e opinion y interes di e pueblo Arubano”.

“Cu nos bon Dios sigui bendiciona nos pais y nos comunidad den su totalidad,” palabranan di Otmar Oduber anunciando su decision pa retira temporalmente di Parlamento. Asina mes, diadomingo ultimo Otmar Oduber y Eduard Pieters a sali pa Hulanda pa atende e reunion di IPKO, sin por forma parti di e delegacion Arubano, pe kendenan tur cos ta paga. PPA mes tin cu cubri e gastonan di miembronan di PPA.

Despues di tende e decision tuma aki di Otmar Oduber, di biaha a cuestiona su decision. Pasobra segun un acuerdo di PPA mes, firma pa tur candidato, Otmar Oduber a laga sa prome cu eleccion, cu e candidatonan cu mas voto lo representa PPA den Parlamento. Awor ta sali na cla cu Kevin Yee tin mas voto cu Eduard Pieters, pero awor Eduard Pieters lo re-emplaza Otmar Oduber, temporalmente. Pues Otmar Oduber mes a viola un acuerdo cu e mes a laga tur candidato firma. Ki bal firma, siendo tal acuerdo a resulta di no tin ningun validez.

E chauffeur di ex Prome Minister Evelyn Wever Croes, a presenta dilanti Hues diabierna y sin duda cu loke a bin dilanti den e caso aki contra di e homber Siki Koolman di 50 aña di edad,  ta cosnan hororoso cometi contra di criaturanan inocente, kendenan no tabata sa mes kico bida tin pa nan.

Siki a marca nan bida, a comete actonan deplorabel y bergonsoso contra di e pober  criaturanan aki y e daño cu el a comete contra di e muchanan aki, lo keda algun cicatriz pa resto di nan bida.

Ta cosnan cu a inicia for di aña 2015 y e abusador aki a traha di cerca cu Prome Minister di Aruba, kende semper a bisa di ta confia solamente hendenan cu integridad, hendenan honesto y tur e tempo ey, e lider di MEP a ser acompaña pa un criminal sin gevoel y sin nocion di kico ta criaturanan di Dios.
Na Spaño tin un dicho cu ta bisa: “Dime con quien andas y te dire quien eres” y sin duda cu e caso horibel aki, mester por mishi cu honor y dignidad di e lider di MEP, pero analisando e grupo di coordinadornan cu el a traha cu nan pa casi ocho aña,  ta como si fuera cu Evelyn ta manera un magnet pa tipo di abusadornan aki.

Un criatura di cinco aña tin ora no tin nocion di kico ta mucha homber of mucha muher ya ainda nan fisico ta formando  y ta mas cu claro cu ora un abusador manera Siki Koolman ta probecha di inocencia di e muchanan aki, e ta culpabel di un crimen atros pa cual no por tin misericordia cu su persona y e tin cu ricibi e castigo maximo pa loke el a comete.

Scuchando tata di un di e victimanan describi con nan bida a cambia drasticamente ora cu e asunto di abusor di su yiu a sali na claridad, tabata bisto e gran dolor den su alma, den su mente caminda e no por caba di compronde kico Siki a haci cu su yiu muher.

Pues e abuso di Siki no solamente a mishi cu e criaturanan inocente aki, pero tambe a habraca confiansa di e mayornan cu nunca a spera di wordo confronta cu e tipo di abuso aki contra di nan yiu inocente sigur n’e edad cu e criaturanan tabatin y ainda tin.

E caso cu a ser trata dilanti di Hues diabierna ultimo lo ta dificil p’e dos criaturanan aki compronde nificacion di esakinan ya cu nan inocencia lo no permiti esey y esaki a haci cu nan tabata indefenso contra di e abusador Siki Koolman.

Fiscal a pidi 10 aña di prizon, pero ora cu analisa loke e acusado aki a haci cu yiunan di hende,  a lanta e pensamento cu e cantidad di tempo aki simplemente no ta suficiente  pa loke el a haci y cu e merece un castigo pa bida largo, ya cu el a marca bida di e criaturanan aki pa semper hunto cu nan mama y tata.

Ta un hecho sin duda cu e homber Siki aki, no por wordo permiti di cana liber den pueblo mas ya cu e no a respeta criaturanan inocente y a marcanan bida pa semper, loke ta pone cu e merece un castigo pa bida largo!!

Manera ta conoci, Gobierno AVP/Futuro a bin cu cambio den maneho di otorgamento di permiso di residencia. Tur Gobierno, bao di Ministerio di Husticia dirigi pa e.o. mr. Andin Bikker, Rocco Tjon a haya e idea di legalisacion di esnan ilegal na Aruba, p’asina por forma parti di e cuerpo laboral na Aruba p’asina participa na pago di nan debernan financiero cu nos pais. Andin Bikker y Rocco Tjon, apesar di tur conseho positivo, no a risca di ehecuta e consehonan emiti.

Tabata e actual Minister di Husticia, mr. drs. Arthur Dowers a laga sa cu mester di trahador pa varios vacatura na Aruba. Si un trahador sin permiso tin un dunador di trabao dispuesto pa firma p’e, e lo haya dicho permiso inmediatamente. Asina ey, ata de pronto tin sigur un 10 mil trahador ilegal cu kier bira legal y proceso a inicia exitosamente.

DIMAS a hay’e man yen di trabao y mester a haya e manpower pa yuda cu e trabao di regla e permisonan. DAO y DPL, ta dos departamento cu no ta eficiente, a laga pasa su empleadonan pa DIMAS. Pero ata Censo den problema. Nan si no a haya manpower suficiente y ta tuma masha tempo, hasta luna pa dicho trahador keda registra na Censo pa despues reclama su Seguro Medico na AZV.

Ata a surgi algun sabi, algun persona cu contra pago ta logra cita (fake naturalmente) na Censo. Tin di e “ladronnan” aki ta cobra 100 y/of hasta 200 florin pa logra un cita na Censo. Censo logicamente ta blokea, pasobra asina no ta traha un cita y Censo, tampoco DIMAS ta cobra p’esaki. Actualmente DIMAS y Censo ta deliberando con por haci e trabao di registracionnan aki mas facil.

Un situacion serio, pasobra manera menciona, Censo no tin suficiente empleado pa atende e registronan. Pero varios hotel, empresario mester di trahador of tin di nan trahando caba, sin por paga nan obligacionnan financiero pa cu Gobierno. 

Durante su bishita di trabao na Hulanda, Prome Minister mr. Mike Eman a reuni cu Presidente di Tweede Kamer sr. Martin Bosma. Apenas algun luna atras, un delegacion di Tweede Kamer a bishita Prome Minister na Aruba, den cual e delegacion a haya un bista di e reto- y problemanan cu Gobierno di Aruba a pasa aden.

Pa Premier Eman, e ta di gran importancia pa hiba combersacion cu politiconan den cierto funcion, specialmente di Tweede Kamer, mirando cu gran mayoria di decision importante ta keda tuma den Tweede Kamer. Ta di sumo importancia pa reenforsa e laso cu pais Aruba.

Hulanda tin atencion p’e islanan den Reino Hulandes, pero no tin un bista con e miembronan di Tweede Kamer ta pensa riba e tematica aki, pero ta sigur si cu Tweede Kamer completo lo tin miras riba e desaroyo n’e islanan den Caribe Hulandes. Tin tur confiansa den Pais Aruba y den su hendenan y ta spera cu atende cu tur e retonan debidamente.

Durante e reunion den Tweede Kamer tambe a saluda diferente miembro prominente di e parlamento Hulandes. E.o. e lider di VVD, Geert Wilders, kende ta ser considera di bolbe gana eleccion na October awor. Wilders no tin mucho interes p’e islanan di Caribe Hulandes y ta kere cu Aruba mester por para riba su propio pia.

E delegacion di Aruba a forma parti di e reunion den Tweede Kamer, consecuentemente lo continua cu diferente reunion mas di igual importancia y sigui inverti den e relacionnan den Reino.

Ademas di e reunion cu Bosma, Prome Minister Eman, a reuni cu Presidente di Eerste Kamercommissie voor Koninkrijksrelaties mr. Paul Rosenmöller, kende ta forma parti di GroenLinks-PvdA. Rosenmöller ta haya e concepto di un fondo di inversion interesante y lo comparti esaki cu su coleganan di Eerste Kamer. 

“Peace Pole” ta un iniciativa global respalda pa Rotary International, alinea cu e compromiso permanente di Rotary cu paz y prevencion/resolucion di conflictonan como un di su shete (7) areanan di interes. Den cuadro di esaki, Rotary Club of Aruba a instala un “Peace Pole” na Tres Trapi.

Presidente di Rotary Club of Aruba, Rubiela Lampe a indica cu e “Peace” Pole aki ta un simbolo di paz, pa paz mundial. Rond mundo tin diferente peace pole instala pa recorda tur hende pa biba na paz den harmonia y dor di instala uno na Aruba, p’e ta un simbolo di paz pa nos tambe na Aruba. 

Rubiela Lampe a subraya cu e meta di Rotary ta di yuda comunidad y nan ta haci esaki dor di organisa diferente actividad p’asina recauda fondo pa nan por sigui yuda esnan cu mas mester di nan. 

Ken no ta gusta e conocido Fiesta Rotaria teni anualmente na luna di maart, tambe nan ta tene un torneo di golf den luna di december y e famoso rifa di auto. Cu e fondonan recauda aki nan ta e.o. yuda Club Kibrahacha.

Rotary International tin un meta di ‘Peace Building , unda nan ta traha pa sigui pusha rib’e concepto di paz riba mundo. Asina Diego Acevedo, di Rotary Club of Aruba a cuminsa bisa. Actualmente rond mundo tin un movemento di instala peace pole, cu ta monumento di paz unda cu ya caba tin mas di 250 Peace Pole registra rond mundo. Y na Aruba nan lo instala e prome Peace Pole, bou di awa. 

E motibo pa cual a hacie na Tres Trapi ta pa crea conscientisacion pa tur e bishitantenan pa recorda con ‘sagrado’ e luga aki, pa por trece paz bek na Tres Trapi. 

Durante su reciente bishita di trabao na Hulanda, Minister di Husticia mr. drs. Arthur Dowers a haci un bishita di cortesia na centro di EUROJUST situa na Den Haag. Aki Minister Dowers a haya un splicacion amplio di e tarea di EUROJUST den continente Europeo.

E desaroyo mundial ta exigi cooperacion entre paisnan pa por contraaresta crimen organisa. Desde cu a forma Union Europeo, crimen organisa a crea un red di cooperacion criminal hopi avansa. Esaki ta netamente pa cual a bin cu EUROJUST den cual e sistemanan hudicial di cada pais ta bin hunto na momento cu un caso criminal ta regarda mas cu un pais Europeo. 

E cooperacion entre e fiscalianan Europeo sinta hunto na Den Haag, ta yuda prepara intercepcionnan hudicial den casonan criminal. Eurojust ta un organisacion Europeo cu ta yuda paisnan den Union Europeo pa traha hunto contra delitonan serio cu ta crusa frontera, manera crimen organisa, terorismo, traficacion di hende, y fraude.

Minister Dowers a keda basta impresiona cu e operacion di EUROJUST, pero tambe di e personal cu ta traha den e organisacion importante aki. Asina Minister Arthur Dowers a topa cu un Arubiano, kende lamentablemente su nomber no a keda menciona den e comunicado, trahando pa EUROJUST y a topa tambe cu ex Procurador General Alexander van Dam cu desde januari 2022 ta miembro nacional Hulandes di EUROJUST.

Diamars ultimo, Gobierno demisionario di Hulanda, a presenta e asina yama “miljoenennota” cu t’e presupuesto pa 2026 y cu a ser presenta pa Su Alteza Real,Su Mahestad Rey Willem-Alexander.

“Troonrede” t’e mensahe di tur aña unda Rey Willem-Alexander ta repasa e presupuesto di Hulanda y ta participa e pensamento di e Gobierno na mando, loke e biaha aki a bira un problema sumamente interesante, mirando cu Gabinete Dick Schoof cu a huramenta dia 2 di juli di 2024, a cay na momento cu partido PVV di Wilders, a dicidi di bandona e coalicion lagando e Gobierno cu 51 miembro di Tweede Kamer cu tabata sostene e Gobierno.

Tabata dia 22 di augustus di e aña aki, fraccion di NSC tambe a dicidi di retira su sosten na Gabinete Schoof lagando e partido c’un minoria di solamente 32 asiento den Tweede Kamer, pero loke a resta di e gobierno demisionario di Premier Schoof, a duna continuidad pa gobernacion y a presenta e presupuesto 2026 diamars ultimo na Tweede Kamer.

Dia 29 di oktober di 2025, pues aki algo mas c’un luna, lo tuma luga eleccion pa Tweede Kamer caminda Hulanda lo por conoce un Gobierno nobo y den cual ta spera hopi cambio y practicamente e presupuesto presenta siman pasa den Tweede Kamer, ta un refleho cu lo tin cambionan grandi na caminda, tanto den e proximo Gobierno di coalicion, pero tambe den un posibel presupuesto supletorio di 2026.

Loke a hala atencion cu a ser considera hasta un tiki decepcionante ta despues di a scucha palabranan di Rey Willem-Alexander na momento di presenta e ‘miljoenennota’ aki, principalmente p’e hecho cu Gobierno demisionario Hulandes, no a brinda atencion algun of atencion significante na asuntonan di e islanan CAS.

Ningun momento a duna un splicacion riba nificacion berdadero di e observacion- of pensamentonan den e proximo Gobierno Hulandes loke sin duda por wordo considera como un falta di respet formal, cual ya a para bira un custumber di tur aña n’e momento asina.

Aki tin cu señala cu pa algun tempo caba tin mandatarionan como legisladonan Hulandes, ta papia di “derecho igual” pa tur partner di Reino, pero siman pasa e pensamento aki no a refleha den e discurso di Rey Willem-Alexander. Hasta e mensahe di e Gobierno demisionario, ningun momento a brinda atencion na loke t’e asunto di HOFA (Raft), esta e Rijkswet Aruba financieel toezicht, dunando e impresion cu e asunto aki a para bira un tipo di postura fuerte cu Hulanda lo kier stipula contra di Gobiernonan di Aruba cu no a respeta palabracion y acuerdonan firma entre e dos paisnan y cu a ser poni un banda.

Pa loke ta Aruba no tin ningun observacion den e discurso di Rey Willem-Alexander cu lo ta mustra cu lo tin algo no corecto tumando lugar cu ta refleha otro posibilidad pa hiba negociacionnan nobo despues cu un Gobierno nobo sinta otro aña.

Varios medio di comunicacion di islanan di Caribe ta duna un refleho grandi di e falta di interes y falta di respet di Hulanda p’e islanan di Caribe Hulandes. Sin duda cu a spera mucho mas atencion pa asuntonan di vital importancia pa Caribe Hulandes, pero na mes momento tin un situacion politico actual na Den Haag cu no ta brinda mucho espacio pa presenta un presupuesto caminda e igualdad den Reino ta wordo atende manera cu esaki mester ta.

“Nos tey pabo”, chala sumamente interesante organisa pa Koningin Wilhemina Kanker Fonds, Fundacion Contra Cancer di Prostaat, Mary Joan Foundation y Fundacion ABO, unda e Urologo drs. R. Leong tabata e orador invita.

E atendencia pa loke ta un charla asina tabata grandi y por a mira e interes bao di dama y cabayeros. Hopi bon, sigur informacionnan clave pa tur. Manera a ser bisa, “Detencion Trempan Por Salba Bida”. Mas di e charlanan aki mester keda wordo organisa, of pasa na nos planta nacional di television pa alcansa henter pueblo pa nan ta mihor educa.

Loke si a hala mi atencion ta e.o. ningun di e fundacionnan menciona ta haya subsidio di Gobierno. Esaki sigur no por. Tur e fundacionnan aki ta traha riba recaudacion di fondo nan mes, cu hopi biahe no ta logra e meta desea. Tur e fundacionnan aki, ta traha cu un cantidad di boluntario, cu no t’asina facil pa haya.

Elogio y mi respet pa tur e boluntarionan aki, cu no ta haya tin biahe ni un danki pa loke nan ta haci. Pero nan ta haci nan trabao cu amor pa nan prohimo.

Otro observacion cu mi tin ta, cu un Gobierno cu ta papia di tin un presupuesto cu SURPLUS, no por tin placa pa yuda e fundacionnan menciona. Ta un berguenza na mi opinion. No por!! Por ta, pa un di e fundacionnan aki haya subsidio, e condicion pa cumpli ta haci dificil pa cumpli cune. E fundacionnan aki kier mira accion di biahe, enbes di sinta spera riba e burocracia gubernamental pa haya tiki placa como subsidio.

Ora a puntra kico t’e cifranan di mortalidad di cancer na Aruba, a resulta cu no tin data alguno. Den era moderno aki, unda tur cos ta birando digital, mester tin un forma pa sa cifra di mortalidad di cancer na Aruba. Presidente di WKF, pa loke nan tin na cifra, pa aña e cifra di hende cu ta muri di cancer, ta yegando 90. Cu sigur ta hopi. Nan no tin registracion di e pacientenan cu ta muri den exterior. Interesante pa sa p.e. cu 2 homber a muri e aña aki di cancer di pecho, ilustrando e importancia pa hende homber haci un chequeo tambe.

Pa loke ta hende homber, e cifra di mortabilidad ta hopi halto na Aruba, pa loke ta cancer di prostaat. E por wordo combati na tempo pa cual tin testimonio di esaki. Fundacion Conra Cancer di Prostaat tey pa yudabo haci e testnan necesario. Dr. R. Leong a ilustra e diferente manera pa haci test. Esun mas comun t’e dede, cu hopi hende homber no kier esaki mes y ta prefera di muri. Tin test di sanger, tin e sistema di ultra-sound. No laga or abo haya dolor, e por ta laat, 

Personanan riba 50 aña por haci nan test sikiera un bes pa aña. Preveni ta mihor cu lamenta. E fundacionnan organisador di e charla aki, cu nan a titula: “Nos tey pabo”, sigur lo yudabo sin gasto alguno. Mi felicitacion p’e anochi asina interesante yena di informacion valioso.

 For di nada siman pasa Otmar Oduber, kende na 2022 a declara su mes ex politico,  na 2024 a dicidi di haci un come back  den mesun arena politico, pero inicialmente e no a haya oportunidad riba lista di MEP y  tampoco un regreso riba lista di AVP tabata un posibilidad.

Tampoco e kier a bolbe regresa cu e partido cu el a funda cu ta POR y pa logra di participa den eleccion di 2024, Otmar Oduber  a dicidi di  asumi liderazgo di un di e partidonan mas bieu di Aruba, cu ta PPA.

Un partido cu pueblo a mata for di masha tempo caba, pero cu a bin haya un tiki bida den eleccion di 2021 na momento cu PPA por poco a logra di haya representacion den Parlamento bou di guia di Lisette Malmberg, kende a guia  e partido na un total impresionante di 1809 voto di sosten, net nos suficiente pa un asiento.

Sinembargo tin un diferencia grandi  entre e metanan di e dos politiconan aki, ya cu pa Malmberg el a mira un posibilidad pa crea un vision nobo,  un politica nobo cu e partido oranje, mientras cu  e decision di Otmar Oduber pa encabesa e lista di PPA, tabata mas tanto un tipo di ‘boei’ di salbabida grandi den e lama politico p’e bolbe haya un posicion.

Por bisa esaki  ya cu e splicacion cu Otmar Oduber a duna siman pasa pa loke ta su retiro “temporal”  for di  posicion den Parlamento, lo tabata pa su persona bay traha riba su caso den Corte Superior, siendo cu Otmar mes no ta un abogado, e no ta hurista,  pero e tin cu bay paga hopi cen p’e profesionalnan di peso traha riba su defensa.

No ta normal cu un politico cu su sano huicio bon na su lugar, ta dicidi di convence pueblo, cu su retiro ta relaciona cu su caso den HOF pa cual e tin mester di hopi placa,  pero e ta dicidi di laga atras un bon salario como miembro di Parlamento pa trata di hustifica  su retiro temporal cu no tin splicacion.

Un anuncio hopi decepcionante mirando e hecho cu e ta papiando di un  frente nacional pa bay Hulanda y e ta riba e prome cu ta bula for di e barco aki y ta bandona e interes nacional cu e kier sirbi. “A otro perro con ese hueso.”

Ta ser anticipa cu e proximo Gobierno Hulandes, despues di proximo eleccion na Oktober, lo por ser forma un biaha mas pa PVV di Geert Wilders caminda ta anticipa cu e lo por ricibi 31 asiento cu ta 6 menos cu eleccion di 2023. 

CDA ta ser premira pa ricibi 25 asiento, cu ta un adelanto di 20 asiento compara cu 5 cu el a ricibi na 2023, GroenLinks-PvdA ta ser anticipa di lo ricibi 23 asiento cu ta 2 menos cu 25 cu e tabatin anteriormente, VVD  lo ricibi 15 asiento cu ta 9 asiento menos cu e 24 cu el a haya na 2023 y D66 lo ricibi 11 asiento cu ta dos mas cu den ultimo eleccion.

Tur cos ta mustra cu Hulanda lo bay conoce un Gobierno di coalicion forma pa PVV, CDA cu hunto lo por un mayoria limita di 56 asiento, pero kisas e biaha aki lo por tin e posibilidad pa PVV y GroenLinks-PvdA traha hunto cu lo por duna e proximo Gobierno di Hulanda, un mayoria solido di 79 asiento.

Si logra acuerdo di cooperacion cu VVD, e base di sosten den Tweede Kamer lo por sosten di un coalicion di PVV, CDA, GL-PvdA y VVD, lo ta di  94 asiento cu sin duda lo ta algo grandi, pero un biaha mas diferencianan politico cu tin, principalmente contra di Geert Wilders di PVV lo por pone cu Hulanda lo mira entre 5 pa 8 luna mas tarda, pa haya un Gobierno oficial pa dirigi e pais.

Tur cos ta indica cu e pueblo votador Hulandes ta kere den e partido VVD di Geert Wilders, cu ta nifica tambe cu Wilders mester bira e proximo Premier di Hulanda. Despues di proximo eleccion por tin mas claridad den formacion nobo, cu manera menciona por dura entre 5 pa 8 luna.