Dia 1 di december 2025 a tuma lugar un caso sumario unda Andrew Hoo a reta e decision di Minister di Husticia mr. drs. Arthur Dowers, kende a mand’e riba un proyecto na oficina di “examen rijbewijs” den Cuerpo Policial Aruba. Di e forma ey a move for di su puesto di Director di Inmigracion Aruba. Dia 15 di December ultimo Corte a dicta cu Andrew Hoo tin razon y cu pa su mañan e por regresa den su puesto di Director na Inmigracion Aruba atrobe.

Minister mr. drs. Arthur Dowers n’e momento di e sentencia a bisa di no a lesa esaki ainda.  E mandatario a laga sa di lo repasa e decision di Huez y mira a base di ki argumento e Magristrado a uza pa manda Andrew Hoo bek den su puesto original. 

Tabata durante pandemia cu Andrew Hoo, e tempo ey como Alto Comisario di Polis, a manda un voicenote pa un periodista, locual e Minister e tempo ey no a aprecia y a kit’e di su funcion. A mande e tempo ey pa bira Hefe Cuerpo di Bombero di Aruba y finalmente a bin termina na Inmigracion Aruba. Awor apenas e Gobierno nobo a sinta, cu ya caba Minister Dowers a dicidi di move un banda. Kico exactamente a sosode e biaha aki p’e kita Andrew Hoo for di su funcion, no ta conoci.  

Hoo tin un trayectoria largo den husticia. Hoo ta un persona profesional y dedica na su trabou. Despues di a bay forma parti di e famia di Marriott Hotel Aruba como Complex Director of Loss Prevention and Risk Management, el a bolbe su cas bek na unda el a sirbi su pais cu honor y pasion, pero e biaha aki e ta cla pa fungi den e posicion di Korpschef di Cuerpo Policial Aruba di aña 2018 pa 2020. El a ocupa un rato cu maneho diario di Brandweer Aruba y desde 2021 ta na cabes di Migracion Aruba. 

Inmigracion Aruba ta consisti di mas o menos 60 empleado y tabatin Andrew Hoo na cabes. Desde aña 2024, temporalmente a pasa e maneho di Guarda nos Costa tambe bou di e maneho diario di Migracion Aruba, pero cu cambio di gobernacion, a draai e decision aki bek.

Corte Superior di Husticia a dicta sentencia contra e sospechoso Izak M. Principaal den e caso penal Last Call. E procedimento a trata unicamente e parti di castigo.

Izak M. Principaal a wordo condena na 2023 pa homicidio di e mucha muher di 19 aña, Sayuri Petronia cometi riba 4 di juni 2021. Na 2024, Hoge Raad a anula e decision aki di Corte Superior, pero solamente pa loke t’e parti di castigo. Esey a nifica cu Corte Superior mester a dicidi di nobo tocante e castigo y e medida cu lo wordo impone riba e sospechoso.

Diarazon ultimo Corte Superior a condena e sospechoso pa un castigo incondicional di 6 aña di prison y e imposicion di e medida di TBS cu condicionnan. Un di e condicionnan ta cu e ta wordo interna den un Clinica Forensico Psiquiatrico, sigui pa un tratamento ambulante. Tur esey mester bay bao supervision di Reclassering. Logicamente tata di e victima, Mike Petronia no ta satisfecho cu e castigo. Ora bo mata un persona, bo merece un castigo mas halto, maske e sa cu esaki lo no debolbe su yiu bek na bida. E lo sigui lucha contra casonan asina, pero e dolor lo keda. Izak Principaal a sinta 4 aña caba den prison y si e mester haya VI (Libertad condicional), loke nifica cu pronto Izak Principaal por ta liber. No por!!, segun Mike Petronia.

Castigo di prision so no ta suficiente den e caso aki. Tratamento forensico specialisa ta necesario pa preveni cu despues di cumpli su castigo, e sospechoso bolbe forma un peliger pa sociedad. Cu e sentencia aki, sociedad ta wordo proteha contra e riesgo significativo di recidiva cerca e sospechoso aki.

Pa yega na su decision, Corte Superior a wak e gravedad di e hechonan castigabel y a tene cuenta cu e conseho di e expertonan (un psiquiatra y un psicologo) pa aplica ley pa adulto, aunke e sospechoso tabata menor di edad ainda tempo di e hecho. E expertonan a constata cu por papia di un trastorno cu ta haci cu e sospechoso tin responsabilidad limita pa su actonan, y cu tratamento ta necesario.

E tratamento aki por tuma lugar unicamente via e medida di TBS. E expertonan ta considera cu tratamento forzoso no ta necesario tanten cu e sospechoso cumpli cu e condicionnan. N’e momento cu e keda sin cumpli, e medida por wordo cambia den TBS cu internacion forzoso.

Ta pesey mes cu Corte Superior a dicidi pa TBS cu condicion, Banda di e castigo di prison maximo posibel cu un duracion di 6 aña. TBS ta nifica terbeschikkingstelling: Un medida den cual un persona cu tin un trastorno mental mester wordo trata obligatoriamente, pa evita cu despues di su castigo e sigui di forma un peliger.

E citacion den e caso “New York” a keda entrega siman pasa n’e sospechoso di inicialnan N.M.Q.C.d.A. (Nota di Red: Mihor conoci como Nelson (Speed) Andrade. Den e caso penal aki un total di cinco persona a wordo condena pa malversacion, violacion di secreto profesional, abuso di funcion y soborno. Cuatro di nan a dicidi pa acepta nan condena. Ministerio Publico tambe a dicidi pa retira su apelacion den e cuatro casonan aki, loke ta nifica cu e sentencia di Huez den Prome Instancia a bira irevocabel y por wordo ehecuta. 

Ministerio Publico kier haci uso eficiente di e espacio limita pa trata caso cu Corte Comun di Husticia ta dispone di dje . Door cu e cuatro casonan aki no mester bin dilanti mas, tin espacio pa otro casonan penal, p.e. di violacion of homicidio, cu pa motibo di esaki Corte Comun di Husticia por trata nan mas liher.

Pa motibo di e espacio limita pa trata caso cu Corte Comun di Husticia ta dispone di dje, Ministerio Publico a manda carta p’e sospechosonan cu lo por bin na remarke pa apelacion, pa por sa di antemano si nan ta desea pa sigui cu nan caso den apelacion (hoger beroep).

Asina cos a bay den e caso aki tambe y a resulta cu solamente e sospechoso Cabral de Andrde a dicidi pa no acepta su condena. Pesey e caso lo wordo trata den forma di Regie-Zitting den Corte Comun di Husticia dia 9 di februari 2026. Expectativa ta cu e tratamento den su contenido lo tuma lugar den e prome mitar di 2026. Na un Regie-Zitting Corte Comun di Husticia ta tuma solamente desicion riba e pregunta si tin mester di investigacion adicional..

SECRETO PROFESIONAL

E caso penal “New York” ta trata di corupcion den funcion publico y violacion di secreto profesional door di un agente policial y varios periodista den e periodo di januari 2021-maart 2023.

Corte den Prome Instancia a condena e agente policial, Robert Vos na december 2023 pa malversacion, violacion di secreto profesional, abuso di funcion y soborno pa un castigo di prison di 16 luna, di cual 8 ta condicional, y un prohibicion pa eherce su funcion pa un periodo di 3 aña. E otro personanan a wordo condena na castigonan di prison y castigo di trabou comunitario na december 2024 pa corupcion y complicidad den violacion di secreto profesional.

E sospechoso Speed Andrade (C.d.A.) a haya un castigo di prison di 18 luna, di cual 12 ta condicional, y un tempo di prueba di 3 aña.

PERCEPCION MEDIATICO

E caso aki a nifica un periodo dificil den percepción mediático, mirando cu cuatro di e cinco sospechosonan ta periodista. A surgi e impresion cu lo tabata trata di un atake contra libertad di prensa y di e derecho di periodista pa haci investigacion di noticia.

Sinembargo, en realidad e caso ta trata di e agente policial, Robert Vos cu den su funcion tabatin aceso na radio di polis y na comunicacion interno di Cuerpo Policial. E tabata sa cu e comunicacion aki ta destina solamente pa polis y no tabata mag di cay den mannan robes. No obstante, el a duna e sospechoso y e otronan envolvi aceso. Nan a scucha durante un periodo di casi dos aña tur comunicacion cu tabata pasa via radio di polis.

Segun Huez den Prome Instancia e scuchamento aki tabata tuma lugar unicamente pa beneficio personal, bentaha financiero of buscamento di sensacion. Huez a bisa cu esaki no solamente a viola privacidad di ciudadanonan di Aruba, sino tambe e confiansa cu e ciudadano por tin den Cuerpo Policial y den e forma cu polis ta trata cu informacion sensitivo di privacidad.

Huez a tuma cuenta na ora di disidi e castigo pa Nelson Speed Andrade cu e hecho cu e sospechoso aki a cega di wordo condena den pasado caba pa hechonan similar na un castigo maximo di trabou comunitario y un castigo di prison condicional. Es mas, e hechonan den e caso ‘New York’ el a comete durante su tempo di prueba mara n’e castigo condicional. Huez ta considera cu esaki ta mustra cu Nelson Speed Andrade no a siña di e condena anterior y a bolbe viola ley.

Durante e Hoger Beroep, e Corte Comun di Husticia lo evalua si e hechonan pa cua a wordo condena na Corte di Prome Instancia por wordo proba. Den e mesun proceso lo wordo contesta tambe e pregunta si por papia di ‘participacion den un organisacion criminal’, y finalmente cua pena ta adecua.

LIBERTAD DI PRENSA

Libertad di prensa ta un derecho fundamental cu mester wordo respeta y proteha, pero e tin limitenan hopi cla. E no por sirbi nunca como un licencia pa haci cosnan contra ley. Solamente den casonan excepcional, ora ta imposibel pa expone un maldad grandi sin kibra ley, lo por hustifica un apelacion riba e derecho aki. Den e caso “New York”, Huez a wak specificamente si por papia di algo asina, y a huzga cu no tin ningun indicacion di esaki.

Gobierno a haci entrega di concepto di ley, un handicapten uitkering, pa mayornan cu muchanan special. Esaki a tuma lugar den Sala di Conseho di Minister, na man di Prome Minister mr. Mike Eman y colega Minister di Asunto Social drs. Mervin Wyatt-Ras. Ambos Minister a cuminsa e tema aki for di su comienso, na inicio for di Parlamento, a traha hunto un concepto di ley pa introduci un cambio den e sistema di bijstand pa muchanan cu cierto limitacion/deshabilidad cu nan y/of nan mayornan por haya un compensacion, como cu na e momentonan aki nan no ta cubri den e bijstand landsverordening di Aruba.

Esaki ta necesario mirando e necesidad cu ta constata cerca mayornan, ta locual cu Premier Eman a indica. Gasto envolvi cu muchanan cu limitacion ta hopi mas grandi cu locual comunidad ta mira. E ta un reto grandi. Na momento cu a haci entrega di e concepto di ley aki, e tempo ey den Parlamento, ambos Minister a keda pusha y manda diferente carta p’e Minister concerni e tempo ey pero e ley no tabata avansa.

Di momento cu a drenta gobernacion 28 di maart (diabierna), p’e siguiente dialuna a inicia e trabounan y bou direccion di Minister Wyatt-Ras, hunto cu un comision, a traha riba e ley y awor por haci entrega di esaki. Premier Eman a expresa di ta sumamente contento di por bisa cu den e presupuesto 2026 aproba den Parlamento, tin un suma caba poni pa por introduci e ley aki riba fecha di prome di juni 2026.

Deseo di Minister Wyatt-Ras tabata di ricibi e concepto di ley aki como regalo di Pasco, si ta logra e por a bira un regalo di Sinterklaas y tin di bisa cu Jill Bangert a cumpli, pa dia 5 di december e draft concept tabata riba mesa. E concepto final a pasa den Conseho di Minister y cu aprobacion y su landsbesluit, ademas di suma disponibel den presupuesto, ta haci entrega awe di e concepto di ley na Dienst Wetgeving en Juridische Zaken (DWJZ) den man di George Croes. Tin cu pasa su proceso, den analisis, conseho y duna contesta p’asina e ley por cana su caminda pa Raad van Advies, pa despues drenta Parlamento pa aprobacion.

“Un momento hopi emocionante”, ta locual cu Minister Mervin Wyatt-Ras a expresa. Un concepto di Ley cu a bay liher. E ley aki lo beneficia nos mucha/hobennan special inmensamente. E ley anteriormente tabata basa riba edad di 16 aña bay ‘riba, mientras cu e concepto nobo aki lo ta di edad di 0 te cu 18 aña. Na momento cu e mayor haya un yiu y cu a constata cu e tin cierto limitacion, e por haci peticion pa yega n’e handicapten uitkering, particularmente na muchanan special cu mester di cuido intensivo.

Pa locual ta trata e suma, Ministernan a informa cu esaki lo bira un suma basico di 500 florin pa cada mucha y na tur mucha cu haci peticion di e uitkering. E ta un base como

inicio, mirando cu esaki lo tin cu bay mira e registro pa prome biaha. Adaptacion di e suma lo ta den evaluacion y si ta necesario lo tin adaptacion segun e cantidad di mucha cu lo drenta.

Un stap grandi pa inclusion. Hopi di e muchanan no por yega scol, recrea, ta parti den comunidad como cu transporte, mobilisacion y/of necesidad a pone cu e no tabata posibel, pero cu e sosten aki e lo yuda pa cada mucha ta inclui den nos sociedad.

Entrada di e famia aki ta bira un reto aun mas grandi, peso financiero ta cay hopi pisa riba nan. E compensacion aki sigur lo bay yuda hopi. Na momento cu tin yiu special na cas, e reto cu ta bin acerca ta for di dokter special, logopedista, psikiatra, psicologo, cual ta gastonan cu den nan mayoria no ta wordo cubri door di AZV, caminda cu e ayudo aki lo ta uno sumanete importante p’e famianan.

Ta spera di haya reaccion y registracion manera e ley aki drenta na vigor entrante 1 di juni 2026, cu e mayornan aplica n’e uitkering aki y asina poco poco haya un bista mas amplio di cantidad y necesidad p’asina den e siguiente presupuesto tene cuenta cu e cifranan real, cu n’e momento aki ta basta dificil pa calcula pa motibo di e diversividad y complicacionnan cu por tin cerca e grupo aki.

Tabata dia 18 december 2025, a keda anuncia cu pa fortalece e laso economico y social entre Aruba y Corsou. Tabata Minister Roderick Middelhof (Minister di Desaroyo Economico di Corsou) y Minister Geoffrey Wever (Minister di Finansa, Asunto Economico y Sector Primario di Aruba) a duna formalmente e inicio p’e desaroyo di un conexion ferry entre e dos islanan. 

E iniciativa aki ta representa un paso esencial pa integracion regional, mobilidad y un cooperacion maritimo mas amplio. Conseho di Minister di e dos paisnan, Corsou y Aruba a aproba e Plan di Accion. Cu esaki, Hulanda tambe a aproba e peticion pa financiamento via e Landspakket, loke ta pone disponibel un suma di subsidio p’e prome fase di e trayecto.

E proyecto ta inclui un estudio di factibilidad conhunto, cu tin den su alcanse preparacion y ehecucion di un destaho publico. Meta final ta pa atrae un operador di ferry competente cu por ofrece un conexion confiabel y futuro-resistente entre Aruba y Corsou.

Den e siguiente periodo, lo tuma lugar un serie di analisis tecnico, economico y ecologico, tambe un dialogo structural cu stakeholdernan. Si e resultado ta positivo, lo sigui cu e proceso di destaho publico, cu meta final pa otorgacion na un operador den 2026.

“E proyecto aki ta refleha nos ambicion pa fortalece y amplia nos cooperacion economico y turistico den region. Un conexion cu ferry entre nos islanan no ta solamente un medio di transporte, pero un brùg pa crecemento duradero y un laso regional mas fuerte,” segun Minister Roderick Middelhof di Corsou.

Minister Geoffrey Wever di Aruba a expresa: “Mi ta particularmente satisfecho cu e Proyecto aki cu nos ta desaroya hunto cu Corsou y Hulanda. Un bon conexion entre Aruba y Corsou, pa persona y pa carga, lo trece beneficio directo pa nos economia y pa nos ciudadano. Cooperacion regional ta bira cada biaha mas importante, specialmente mirando e desaroyonan geopolitico den nos region.”

Nos tin cu bisa, cu no ta prome biahe ta tende di e proyecto di ferry entre Aruba y Corsou. Tabata tempo di Gobierno di MEP, su Minister Chris Romero hasta a invita su colega di Corsou, unda a firma un MoU, y te hasta a anuncia cu e haf di e ferry lo bira e haf di San Nicolas. Hulanda tambe a sostene e proyecto aki, te cu Rafael Estrada a keda nombra como e persona cu lo guia e proyecto, cu no a resulta den nada. Awe atrobe ta tende cu un biahe mas lo bin un ferry entre Corsou y Aruba.

No ta awor, pero for di algun aña caba, esnan cu a bin ta maneha Cas di Cultura a yuda den recauda fondo pa renoba Cas di Cultura. T’asina cu recientemente Minister di Turismo, Transporte y Labor, mr. Wendrick Cicilia, a aproba alocacion di 1 miyon florin for di Aruba Tourism Authority (ATA) pa sostene renobacion aki, Cas di Cultura ta un di Aruba su puntonan di referencia cultural mas tesoro.

E contribucion aki ta representa un inversion significativo den e herencia cultural di nos isla y ta refleha e compromiso continuo di Gobierno pa sigura cu ta re-inverti e beneficionan di turismo den preserva y celebra e identidad autentico di Aruba.

“Turismo no ta solamente tocante cifra, e ta tocante historianan, hende y e alma di nos isla”, Minister Cicilia a expresa. E mandatario a continua bisando cu: “Dor di restaura Cas di Cultura, nos no ta djis renoba un edificio. Nos ta honra generacionnan di artista, educador y pioneronan cultural cu nan trabou ta sigui defini kico ta haci Aruba unico.”

Cas di Cultura pa hopi tempo tabata un facilidad yena cu historia, sirbiendo como un cas creativo pa talento local y un simbolo di expresion cultural. Pa medio di e asociacion aki, Minister Cicilia y CEO di ATA, Ronella Croes conhuntamente ta re-afirma nan vision di turismo cu ta duna bek na comunidad, uno cu ta balora autenticidad y ta salvaguardia e herencia cultural di e isla p’e futuro generacionnan.

“E herencia cultural di Aruba t’e batimento di curason di nos turismo,” asina Minister Wendrick Cicilia a bisa. E mandatario a continua bisando cu: “Inverti den espacio manera Cas di Cultura ta garantisa cu e bishitantenan ta experencia no solamente nos beachnan, pero tambe e profundidad di nos historia y creatividad.”

E iniciativa aki ta parti di e vision turistico mas amplio di Minister Cicilia enfoca riba sostenibilidad y creacion di balor cultural, re-eforsando cu crecemento di turismo y preservacion cultural por y mester bay man den man.

Minister di Educacion, Gerlien Croes a firma un otro MoU mas cu un otro universidad di Merca pa brinda studiantenan mas opcion pa studia na Merca. Esaki ta amplia e opcionnan pa studiantenan di Aruba ainda mas. Recientemente Minister Gerlien Croes a firma acuerdonan cu SUNY New Paltz na New York, cu Husson University na Maine y cu Monroe University na New York. Esaki ta amplia e opcionnan na mas estado na Merca.

Siguientemente lo elabora un tiki mas riba e acuerdonan cu tin caba cu universidadnan na Merca p’asina studiantenan por tin esaki na nan alcanse. Gobierno actualmente tin acuerdonan cu Coastal Carolina University y University of South Carolina. E dos universidadnan aki na South Carolina ta Brinda studiantenan di Aruba “in-state tuition” cu ta ensera un descuento compara cu loke ta cobra studiantenan internacional.

Wayne State College ta situa na Nebraska y actualmente tin 7 studiante full-time haciendo diferente programa di Bachelor. Wayne State College ta un opcion menos caro por medio di e acuerdo cu ta otorga “in-state tuition”. Wayne State College por habri opcion pa transfer pa otro universidadnan mas grandi.

Na Maryland, Gobierno tin un acuerdo desde 2016 cu St. Mary’s College. E aceso na Washington DC y tur loke e ta ofrece ta haci esaki interesante pa un studiante cu ta studia na St. Mary’s. Aunke no hopi, St. Mary’s den pasado a atrae studiantenan Arubiano pa nan bachelor-program. Actualmente Gobierno ta den combersacion cu St. Mary’s pa un descuento cu por haci cu e Arubalening por cubri e gastonan di estudio y vivienda.

Estado di New York ta un estado cu ta hopi popular bou di studiantenan Arubiano. Un total di 10% di studiantenan cu Arubalening ta scoge pa un universidad of college na New York State. Recientemente Gobierno a sera un acuerdo cu SUNY New Paltz. Den corto tempo Gobierno a firma un acuerdo cu Monroe University na New Rochelle tambe, un universidad cu ta 30 minuut leu di New York City. Esaki ta un universidad na cua studiantenan di Aruba y Corsou ta combinando nan estudio cu deporte.

Den e estado mas nort cu ta Maine, Gobierno recientemente a sera un acuerdo cu Husson University. Husson University lo duna studiantenan di Aruba un descuento p’e Arubalening por cover gastonan di estudio y vivienda. Husson ta reconoci pa su enfasis riba experiential learning. Husson ta ofrece mas di 100 programa pa bachelor’s, master’s y PhD. Specificamente, Husson ta ofrece pa studiantenan cu kier sigui den audio, video of graphic design, estudionan manera Audio Engineering, Video Film Production y Graphic Visual Design. Ademas Husson University ta un Division III den NCAA pa studiantenan cu kier combina un estudio cu deporte.

Por ultimo, tin e estado di Florida. Den e estado di Florida tin un promedio di 35 studiante cu Arubalening, sin conta studiantenan cu ta bai riba nan mes. E estado di Florida pa hopi aña a brinda studiantenan di Aruba e posibilidad pa “in-state tuition” na su universidadnan publico, manera University of Central Florida. Banda di esaki hopi studiante di Aruba ta scoge un community college cu ta mas barata cu un university y ademas ta yuda e studiante drenta mas liher den un universidad renombra.

Community Colleges popular bou di studiantenan di Aruba ta Valencia College cu ta traha hunto cu University of Central Florida y Tallahassee Community College cu ta traha hunto cu Florida State University. Door di e ambiente politico, e Gobierno di Florida a pone un pausa n’e “in-state tuition” pa studiantenan internacional. Asina mes universidadnan ta brinda otro tipo di scholarship p’asina keda atrae studiantenan di Aruba. 

Pa studiantenan interesa den STEM of aviacion, Aruba tin un acuerdo cu Florida Institute of Technology cu ta duna 50% di descuento riba su tuition. Esaki ta haci cu e Arubalening ta cubri mayoria di e gastonan di estudio y vivienda.

Banda di e acuerdonan aki, gran cantidad di studiantenan cu Arubalening ta scoge pa otro estadonan na Merca. Motibonan p’esaki ta pasobra a haya un athletic scholarship, of por a transfer pa un mihor tuition, tin studiante cu ta haci nan Master caminda nan a haci nan stage of tin cu kier descubri lugarnan nobo.

Cu e MoU-nan actual y e presencia di Education USA cu Minister Gerlien Croes a renoba, Gobierno di Aruba ta sigui guia y haci e esfuerzo pa brinda studiantenan di Aruba otro opcionnan banda di studia na Hulanda of den region.

Minister di Finansas, Geoffrey Wever a informa cu e di dos cambio di Presupuesto 2025 di Gabinete AVP-FUTURO a wordo aproba pa Parlamento di Aruba. Ta premira un resultado financiero pa sector colectivo di 300 miyon florin of 3.9% di Producto Interno Bruto. Cu esaki e di dos cambio di Presupuesto 2025 di Gabinete AVP-FUTURO a cumpli cu e ley di supervision financiero.

Meta primordial di Gabinete AVP-FUTURO ta un finansa publico duradero segun normanan di presupuesto ancra den ley y duna e beneficio di e desaroyo economico bek na comunidad. Riba e mesun dia cu e Gobierno nobo a wordo huramente, Gabinete AVP-FUTURO via un nota di cambio a duna bek di biaha na comunidad. Cu aprobacion di e nota di cambio di Gabinete AVP-FUTURO a baha e tarifa di Inkomstenbelasting di 10% pa 0%, a hisa e suma di Reparatietoeslag pa 21 mil pensionado cu 250 florin extra tur luna desde 1 di mei y a baha e accijnzen riba gasoline y diesel pa tur usuario cu 10 cent tambe desde 1 di mei.

E di dos cambio di Gabinete AVP-FUTURO ta cumpli cu un saldo financiero di minimo 1% p’e sector colectivo manera e Landsverordening Aruba Financieel Toezicht ta prescribi. Ta premira un surplus di 300 miyon florin p’e sector colectivo of 3.9% di Producto Interno Bruto. Di esaki, ta premira pa Gobierno un surplus di 135 miyon florin of 1.7% di Producto Interno Bruto. P’e demas entidadnan cu ta forma parti di e sector colectivo, SVB, AZV, ATA, Stichting EPB, Serlimar y Universidad di Aruba ta premira un surplus di 175 miyon florin of 2,2% di e Producto Interno Bruto.

E nivel di debe ta premira di baha pa 61% di Producto Interno Bruto. Gastonan personal y goederen en diensten ta keda den e margen di e cuadro financiero. Entradanan di Gobierno ta proyecto pa crece cu casi 30 miyon como resultado di e desaroyo positivo di Aruba su economia. Cu esaki Gabinete AVP-FUTURO ta cumpli cu ley. Banda di hiba un maneho financiero responsabel y prudente ta duna e beneficio di desaroyo economico bek.

Gabinete AVP-FUTURO tin e compromiso cu hunto cu sector publico y sector priva sigui traha riba desaroyo di nos pais basa riba un maneho financiero responsabel y prudente na beneficio di nos pais segun Minister di Finansas, Geoffrey Wever.

Aruba Bank N.V. a anuncia cu sra. Sharon Fränkel-de Cuba lo retira como Managing Director dia 31 di december 2025, despues di 15 aña di liderazgo den e rol y mas cu tres decada di servicio den e sector bancario den e region.

Sharon a drenta Aruba Bank na 2004 y a bira Managing Director na 2010. E ta conoci pa ta un lider calmo cu ta guia cu claridad y cu curason. El a brinda stabilidad durante e pandemia di COVID-19 y a guia e adquisicion y integracion exitoso di e portafolio di CIBC Aruba, un di e multiple logronan di e banco.

Su influencia a yega mas leu cu e banco. Como Presidente di Aruba Bankers Association (2020–2022), el a brinda liderazgo firme durante desafionan social y economico y a fortalece colaboracion entre partnernan.

Sharon a termina su periodo di liderazgo brindando e mihor di su mes. Su legado ta biba den e sistemanan y den e hendenan cu e a inspira. Hunta Comisario di Aruba Bank ta expresa su profundo aprecio pa su vision, dedicacion y e impacto duradero riba e banco y e comunidad.

For di prome di januari 2026, Hunta Comisario di Aruba Bank a nombra sra. Marleen van der Borgt, Executive Director di Finance & Asset Liability Management (ALM), como Managing Director di Aruba Bank. Cu mas di 12 aña di experiencia n’e banco y un base fuerte den finanza strategico, risk management y liderazgo organisacional, sra. van der Borgt ta bon posiciona pa guia Aruba Bank den su siguiente era di crecemento sostenibel, innovacion y servicio na cliente.

Nos ta gradici sra. Sharon Fränkel-de Cuba pa su servicio remarcabel y ta duna un bon bini caluroso na sra. Marleen van der Borgt den su rol nobo.

Presupuesto 2026 a keda aproba siman pasa! “Henter comunidad por hala un rosea di alivio, cu definitivamente e cambio cu a vota p’e 6 di december 2024, ta den realisacion n’e momentonan aki”, ta locual cu Prome Minister di Pais Aruba mr. Mike Eman a expresa diaranson anochi.

Premier Eman ta convenci cu desde awor e sufrimento di nos comunidad, oprimi pa hopi aña largo, a cuminsa termina. E alivio cu votadornan a expresa durante eleccion, Aruba por cuminsa mira mehoracion manera e.o. e posicion di nos pensionadonan. Den menos di 1 aña di gobernacion a mira aumento di 500 florin.

Un suma di 250 florin duna directamente n’e pensionadonan manera cu a sinta 8 luna pasa y diaranson anochi a pasa un presupuesto cu un siguiente 250 florin adicional di adelanto na tur pensionado. Te na e momento aki un suma di 500 florin di adelanto pa 22mil pensionado den menos di 1 aña di gobernacion.

Si tin algo cu ta refleha prioridad, duna pueblo, e pais aki y henter nos comunidad e prioridad cu e merece, t’e posicionnan cu a tuma den e presupuesto 2026. Adelanto pa nos grandinan, maestronan, esnan riba bijstand, esnan cu salario minimo. Cambionan grandi pa cual Aruba a vota, diaranson anochi durante presupuesto 2026, cu a caba di pasa, a haya su refleho, a haya su base pa e por yega na cada hogar di nos pais.

Aruba ta conoce un Gobierno cu a tuma e pasonan pa tur locual a wordo ranca, por bay bek na nos comunidad, segun Prome Minister Mike Eman.

Si nos por remarca, cu durante e tratamento di presupuesto 2026, no a keda demostra cu nos politico/parlamentarionan a cambia. E enfoke tabata riba e biahe di Minister Gerlien Croes pa Corsou den un avion priva, Si el a paga of Gobierno a paga of el a haye como regalo. Si oposicion t’asina sigur di un que otro violacion, bai denuncia e mandatario na Ministerio Publico.

Fuera di e parti aki, pueblo a bin haya sa di e cantidad di acoso sexual cu tabatin den Gabinete Wever Croes, denuncia a wordo haci, pero ningun accion a tuma lugar. Manera p.e. cu esposo di ex Prome Minister hasta a pone arma di candela na cabez di ex-Minister Plenipotenciario, Ta kico a pasa anto, pero tur hende a keda keto. Pues durante tratamento di presupuesto aki, enbes di demostra cu politico/parlamentarionan a cambia di mentalidad, ta mas baho nan a bai.

Loke nos por bisa ta, cu e unico Parlamentario cu a bin cu un amienda, cu na nos opinion ta su partido AVP mester a bin cune, ta Mike de Meza. Cu si inclui e amienda den nos leynan, tur futuro mandatario sospechoso ta haya un trato diferente di loke t’e caso te awe. Mike de Meza a keda califica como un sospechoso (di kico), sin te awe a keda interroga, pero si ta sufri un atake mental. No por!! Parlamento mester tuma accion den esaki, unda 2 alto funcionario a acuse, sin por comproba Mike de Meza, kico el a haci malo pa haya castigo.

Minister di Finansas Geoffrey Wever ta informa cu e Presupuesto 2026 di Gabinete AVP-FUTURO a wordo aproba pa Parlamento di Aruba, cu voto di confiansa di tur Parlamentario di coalicion AVP-FUTURO. Ta premira un resultado financiero pa sector colectivo di 216 miyon florin of 2,7% di Producto Interno Bruto. Mescos cu presupuesto supletorio 2025, e presupuesto 2026 Gabinete AVP-FUTURO ta cumpli cu e ley di supervision financiero.

E nivel di debe ta premira di baha pa 57% di Producto Interno Bruto. Gastonan personal y goederen en diensten ta keda den e margen di e cuadro financiero. Cu un proyeccion di crecemento economico di 2,6% den 2026, entradanan di Gobierno ta proyecto pa crece cu 50 miyon florin.

Hiba un maneho financiero responsabel y prudente ta keda nos punto di salida y sigui duna e beneficio di desaroyo bek na nos hendenan segun Minister di Finansas Geoffrey Wever.

E autoridad di aviacion di Merca, Federal Aviation Administration (FAA), a (bolbe) declara oficialmente henter e espacio aereo Venezolano como un area di halto riesgo pa aviacion civil. Den e aviso di seguridad renoba NOTAM A0015/25, ‘FAA’ ta indica cu den e Maiquetía Flight Information Region, cu ta cubri henter e espacio aereo di Venezuela, tin un deterioro claro den seguridad y un aumento evidente di actividad militar. E aviso di seguridad ta valido for di 16 di december 2025 te cu 19 di februari 2026.

FAA ta adverti cu e menazanan ta aplica pa tur halto, for di tera te sin limite, y no solamente pa avionnan cu ta pasa riba e area. Segun e autoridad, avionan tambe ta core riesgo durante e fase di yega y salida, riba aeropuertonan y incluso ora cu avionnan ta para riba tera. 

Den e texto di e NOTAM ta wordo declara claramente cu e aumento di actividad militar, den y rond di Venezuela ta representa menazanan potencial pa operacionnan di aviacion civil.