Fin di siman cu ta tras di lomba, a biaha pa Hulanda un delegacion di Gobierno di Aruba, forma pa e.o. Prome Minister Mike Eman, y otro funcionarionan cu a bin ta negocia e Rijkswet. Awe dialuna Minister Geofrey Wever lo uni su mes n’e delegacion di Aruba.

Segun algun observador, deseo ideal lo tabata si Aruba yega Hulanda cu un “frente uni fuerte”, un bloke cu ta demostra cu Aruba ta riba un solo liñea di pensamento y negocia cu Hulanda riba un solo posicion. Maske cu al momento Hulanda tin un Gabinete temporario, ya cu na October awor tin eleccion, cu por trece cambio (si nan kier) riba e concepto cu tin di nos Rijkswet.

Awor Gabinete AVP-Futuro a duna di conoce cu nan a hereda e concepto di “Rijkswet” for di Gabinete Wever-Croes II. T’asina cu na juni 2024 ex-Minister Presidente Evelyn Wever-Croes a firma un acuerdo cu Hulanda, e asina yama “Bestuurlijk Akkoord”. Den e Bestuurlijk Akkoord aki ex-Prome Minister, den nomber di Gobierno di Aruba, a acorda cu lo bin un Rijkswet pa regula supervision financiero y tambe cu lo bin un ley local di supervision financiero cu ta re-emplasa e ley di supervision financiero actual. 

Segun Minister Geofrey Wever, kende te ultimo a forma parti di Gabinete Wever Croes II, cu ora Gabinete AVP-Futuro a huramenta fin di maart 2025, nan a haya un splicacion di e team di profesional cu ex-Minister Presidente Evelyn Wever-Croes a instala pa negocia Rijkswet pa supervision financiero na Aruba. E profesionalnan a splica Gabinete AVP-Futuro cu nan tin mas o menos un aña caba ta negocia y ta den e fase final di yega na un acuerdo cu Hulanda riba e contenido di e Rijkswet y e ley local cu mester reemplasa e ley di supervision financiero (LAFT) cu tin actualmente. 

Tur esaki nan a bin ta haci bao di instruccion di ex-Premier Evelyn Wever-Croes, basa riba e acuerdo di aña 2024. Gabinete AVP-Futuro berdad a drenta den dialogo cu Hulanda y laga e mesun team di profesional cu ex-Prome Minister Evelyn Wever-Croes a instala, continua cu e negociacionnan cu tabata 90% cla caba y cu recientemente a yega na su final. Awor e 10% cu falta di e Rijkswet, e mesun ex Prome Minister Wever Croes ta bisa ta yen di Veneno, cu ta motibo di no por sostene e Rijkswet aki. 

A presenta tanto e Rijkswet como tambe e ley local di supervision financiero na Parlamento di Aruba y tambe a present’e na Conseho di Minister di Reino p’asina inicia un proceso di haya conseho di diferente instancia manera e.o. Raad van Advies y Raad van State, pero mas importante, pa Parlamento di Aruba por revisa esaki y por evalua pa su mes si nan ta di acuerdo cu e Rijkswet y e ley local di supervision financiero nobo. 

Sin aprobacion oficial di un mayoria den Parlamento di Aruba, e Rijkswet y e ley local di supervision financiero nobo no por drenta na vigor. Awor ta na Parlamento di Aruba pa haci su trabou y ta solamente si un mayoria den Parlamento di Aruba ta di acuerdo, e Rijkswet y e ley di supervision financiero local nobo, por drenta na vigor, segun Minister Geofrey Wever.  Manera por nota, e proceso pa yega n’e contenido final di ambos ley, tanto esun di consenso di Reino como esun local, a cana un trayecto largo bou di dos periodo di gobernacion. 

Hecho ta cu e acuerdo haci pa Gabinete Wever-Croes II cu Gobierno di Hulanda, no ta duna mucho espacio p’e Gobierno nobo, Gabinete AVP-Futuro por maniobra y/of adapta of haci cambio. Asina mes den e proceso di negociacion despues di instalacion di Gabinete AVP-Futuro, a logra algun cambio pa a suavisa e areglo y condicionnan cu tabatin riba mesa.

Forma un solo bloke di AVP-Futuro-PPA y MEP, lo logra cambio tog e cambionan desea, e.o. cu mescos cu Hulanda a haci pa Corsou y St. Maarten a duna dispensacion di tur nan debe, loke no a haci cu Aruba, ora nos a bira pais den Reino Hulandes.

Diamars siman pasa, tabata un dia grandi pa Parlamento di Aruba, na momento cu a tuma lugar e ceremonia pa duna inicio na un Aña Parlamentario nobo y ta un momento elegante, hopi serio y cu ta brinda respet na loke Parlamento di un pais merece di tin.

Riba mesun aki, tur hende, fuera di Parlamentarionan, a bisti bunita, elegante y hopi representativo ya cu esaki sin duda ta loke e Conseho Legislativo mas halto di pais Aruba merece.

Sinembargo tin cu remarca cu desaroyonan “politico” den sala di Parlamento di ultimo simannan, no ta cuadra cu e scenario elegante y serio cu pueblo a mira diamars ultimo caminda entre otro presencia di Su Excelencia Gobernador Alfonso Boekhoudt, acompaña pa militarnan bisti tur na blanco,  ta duna e ceremonia aki, un toke ainda mas super special.

Na momento cu Parlamentario Endy Croes dicidi di entrega un mocion pa Gobierno nombra abogado Desiree Croes como Minister Plenipotenciario na Den Haag, el a pone hopi hende cuestiona e nivel di integridad di Parlamento, e nivel di “common sense” di un instituto asina prestigioso.

Endy Croes algun luna atras, a wordo retira pa mesun Parlamento aki den cual e tin asiento awe pa motibo di un rapport cu a ser publica di desaroyonan cu no tabata cuadra cu aspectonan legal y no solamente esey, ora cu tuma nota cu algun luna atras tambe, e ex Minister Plenipotenciario, Guilfred Besaril cu tabata riba lista di MEP, a keda sentencia pa actonan financiero fraudulento den su capacidad di Minister, ningun  miembro di fraccion di MEP mester tribi di haci un sugerencia asina.

Minister di MEP a mancha e puesto aki, t’e lider di MEP, kende a permiti e situacion aki escala apesar cu el a wordo adverti riba e comportacion financiero di Besaril cu fondonan di Arubahuis.

Endy Croes ta sinta den Parlamento caminda por bisa cu su dianan ta conta, ya cu ainda Gobierno actual di AVP-Futuro, tin cu inicia cu investigacion riba asuntonan di otorgamento di subsidio caminda el e hunga un rol masha dudoso mes segun e rapport cu a keda publica.

Sinembargo henter e bruhameneto cu Endy Croes a crea den nomber di su fraccion, a haya un nificacion politico adicional, na momento cu varios miembro di fraccionnan di AVP y Futuro, a dicidi di ehecuta nan voto dor di vota contra di e mocion aki.

No tabata necesario pa vota mes p’e mocion aki, ya cu e lo a crea un situacion di confrontacion den propio seno di partido AVP, caminda na final di dia, Desiree Croes a dicidi di bin dilanti y distancia su mes di e organisacion politico (pa di dos biaha) cu su omo den feliz memoria a dirigi pa varios aña.

Pa añanan largo tin fraccionnan cu a bandona sala di Parlamento na momento cu mester a vota pa un mocion of cualkier otro punto y ta di spera cu e grupo di parlamentarionan di e politica nobo di AVP y Futuro, siña e les politico aki caminda a permiti un grupo di politiconan di oposicion, manipula henter e aspecto politico di e mocion aki.

Ultimo tempo tin masha reclamo na casi tur Servicio Telefonico na tur departamento di Gobierno. No solamente na departamentonan di Gobierno, pero tambe n’e telefonnan di consultorionan di dokter, di specialista, unda maske cu nan tin asistente of secretaria, nan ta nenga di contesta cualkier yamada cu drenta.

For di dia cu a introduci e Sistema Telefonico, cu ta mas bien un answer machine, cu ta bisa e.o. “Bo yamada ta importante pa nos, keda na telefoon y un operador lo contestabo”. Of tin tambe: “bo ta nr. 3 den rij di yamadanan, keda warda, nos lo yudabo”. Tin departamentonan di Gobierno, cu mas bien no ta contestabo mes, manera e.o. DIMP.

Bo ta keda warda, warda, warda y si bo pasenshi caba, despues di como 5 minut bo ta dal e telefoon sera. Y asina nos mesun hendenan ta birando a-social, no tin cortesia mas. Machine ta dirigi nos bida. E lo por cambia ainda, of pronto laga tur cos den man di un cantidad di robot, ya cu nos hendenan no ta interesa pa duna Servicio, loke Aruba tabata masha conoci p’e.

For di absolutamente nada e funcionario di Departamento di Salud Publico, mr. drs. Jayburtt Dijkhoff a dicidi di entrega un tipo di carta cu lo ta contene varios acusacion den direccion di e maneho di salud publico aki na Aruba.

Esaki ta un derecho di tur ciudadano, pero e persona aki cu ta mustra cu e ta un mr. y drs. como profesional ta dicidi di cuestiona henter e maneho cu a bin ta tumando lugar y caminda lo tin cosnan tumando lugar cu no ta corecto y cu lo ta perhudicando salud di hende.

Pa hopi e accion aki a ser considera como un tipo di haci politica barata y e punto cu mayoria ta trece dilanti, t’e hecho cu Jayburtt aki, trahando den cooperacion cu e Gobierno anterior, nunca a dicidi di bin dilanti, presenta su pensamentonan y tampoco a cuestiona  hechonan cu e ta haya cu ta bon.

For di luna di maart 2025 tin un Gobierno nobo na mando, cu lo cumpli dentro di algun dia, 6 luna na poder y a lanta e duda henter e accion di mr. drs. Jayburtt Dijkhoff ta kico ta su meta tras di su acusacionnan, of mihor bisa cu conclusionnan cu el a forma.

Tabata  mas cu claro cu Minister di Salud, drs. Mervin Wyatt Ras a dicidi di suspende e funcionario aki,  te ora cu caba di haci un investigacion riba su propio forma di proceder, ya cu den publicacion cu a ser presenta pa medionan di comunicacion, Dijkhoff ta ofrece su servicio na tur hende cu ta desea esaki y tambe ta ofrece varios otro tipo di ayudo loke un funcionario publico no por haci.

Si por a compronde bon, e decision di Minister Wyatt Ras lo no tin nada di haber cu loke Dijkhoff a considera como actonan di corupcion cu lo a bin ta tumando lugar den servicio di salud publico, pero mas tanto p’e hecho cu su persona como funcionario publico, ta viola reglanan di trabou caminda ningun funcionario publico ta ser permiti pa tin of por haci negoshi siendo trahado den servicio di Gobierno.

Esey t’e motibo principal di suspension di e funcionario aki cu hopi ta puntra ta unda e tabata tur e ultimo ocho (8) añanan, siendo cu e tabata trahando hopi cerca cu tanto e Gobierno como e Minister anterior di e Gobierno y no a sali dilanti di haci e denuncianan aki.

E accion di Dijkhoff aki ta duna cierto indicacion cu lo tin mas di e tipo di accionnan aki cu lo por cay den e categoria di  “accionnan politico”,  mirando cu ya el a duna caba e impresion di lo ta parti di un proceso cu a lanta cabes ultimo simannan, caminda tin cu crea duda den un Gobierno cu tin apenas 173 dia na poder.

El e entrega loke su persona mes a yama di ta un “carta” na Ministerio Publico, pero no a duna publicidad na contenido di su carta den cual e lo ta papia di su ponencianan cu e lo a descubri durante di su trabou na Departamento di Salud.

Pa awor e tin cu sinta na cas y formula su acusacionnan ya cu e ta suspendi pa tempo indefini!!, pero mientrastanto a dicidi di entrega su retiro como empleado publico na DVG. El a tuma honor na su mes, pero investigacion di su denuncianan lo sigui.

Loke a hala nos atencion despues di Aña Parlamentario nobo, ta manera a duna bendicion pa algun Parlamentario biaha su dia siguiente pa Panama, pa atende (atrobe) un reunion di Parlatino. Cu ki agenda pa nos no ta conoci, pasobra Parlamento den su totalidad ta ni informa meta di un otro reunion di Parlatino.

Den pasado y pa varios aña, mi persona a bin ta yama e reunionnan aki “Paranda Latino”. Te awe mi no ta mira e balor agrega di e reunionnan aki, pasobra e forma di traha di nos Parlamento no a cambia. Semper ta zundramento tin y no ta logra nada concreto.

Den fin di siman mi a topa cu ex-Presidente di Parlamento, Edgard Vrolijk y a puntra pakico e no a forma parti di e delegacion p’e reunion di Parlatino y su contesta tabata, “tin hopi trabao pa haci na Aruba. Mi ta perde mi tempo cu Parlatino. Aki na Aruba tin hopi trabao pa haci, y esnan cu a bai a prefera di biaha so”.

Reunion di Parlatino ta caba, ata un delegacion di Parlamento lo sali pa Hulanda pa atende un otro reunion di IPKO, unda e.o. lo discuti concepto di ley di Reino cu tin riba mesa, pa cual no por haya otro ainda. P.e. e concepto di ley pa un Geschillenregeling, cu ta data pa hopi aña. Hasta Aruba, Corsou y St. Maarten a forma un solo frente, pero Hulanda, cu ta bisa di reconoce e islanan aki como “partnera igual”, kier semper e ultimo palabra.

Ta ki partner igual Hulanda kier ta? Pakico sigui perde tempo y discuti e ley aki, si tog Hulanda no kier yega na un acuerdo. Atrobe tempo perdi cu reunion di IPKO.

Ta bon pa sa cuanto e reunionnan di Parlatino y IPKO ta costando y a bira tempo pa Parlamento di Aruba den e caso aki tuma decision pa corta nan gastonan cu tog no ta duna e fruto desea.

Atencion n’e necesidad di comunidad ta algo cu Gabinete AVP-Futuro tin ancra den nan acuerdo di gobernacion. Durante accion di limpiesa na Mabon Complex, e habitantenan a acerca Prome Minister mr. Mike Eman cu nan preocupacionnan, pero tambe ta propone posibel solucionnan p’e retonan cu nan ta enfrenta den nan bario.

Tabata no mucho siman pasa, durante accion di bario, Sharisa Ras, habitante di Mabon Complex, a vocifera su preocupacion riba un pasada cu tin masha tempo descuida. E tabatin un peticion na Prome Minister Eman, si tabata posibel cu por haci un limpiesa, pero tambe un adaptacion n’e area aki p’asina e por bira accesibel, den un forma mas sigur, n’e habitantenan cu ta haci uzo di e pasada aki.

Prome Minister Eman a acerca e departamento concerni, cual ta DOW, p’asina hunto yega na un solucion p’e incomodidad diario cu e habitantenan ta pasa aden. Mesora nan a presenta y brinda un opcion pa soluciona e pasada den Mabon Complex.

A opta pa un trapi, traha di palo duradero, hancho den forma di plataforma. Habitante tambe a sugeri algo cu por tin stepnan hancho y largo p’esnan di mas edad por baha sin dificultad. E idea nan a tume cu man habri.

Pa locual ta iluminacion, esaki tambe ta peticion cu a haya oido y pronto e pasada di Mabon Complex lo haya un bista nobo y teniendo na cuenta e necesidad di su habitantenan.

Mientras cu miembronan di fraccion di MEP awendia ta trata di convence nan mes y tambe nan sostenedonan cu Evelyn Wever Croes y su Gobierno no ta firma e acuerdo p’e Rijkswet di supervision, ta surgi otro asuntonan cu ta confirma e gran incapacidad di e hendenan aki.

Diabierna ultimo Prome Minister Mike Eman a sorprende tur hende, hasta e sector politico na momento cu el a entrega un carta di Presidente di Parlamento di Aruba, Marlon Sneek, den cual tin e concepto di e Rijkswet Koningskrijkgeschillen” na Tweede Kamer y den cual tin e peticion na Tweede Kamer manda esaki pa Rijksministerraad p’asina e ley por sigui cana e caminda p’e bira realidad.

Ta un ley cu ta riba caminda pa bira realidad despues di mas cu tres decada cu tin discusion ariba entre Gobiernonan Hulandes y esnan di Aruba, Corsou y Sint Maarten.

Hulanda semper a pretende cu nan mester tin e ultimo palabra ora cu tin un diferencia di opinion entre e partnernan den Reino, caminda semper no a duna rason n’e islanan CAS.

Dia 24 di juni di 2024 ‘Vaste Commissie Koninkrijksaangelegenheden en Buitenlandse Betrekkingen” a atende y bay di acuerdo cu e concepto cu a ser presenta a base di palabracionnan cu a yega na dje durante di  e Tripartite Overleg cu ta tuma lugar na Den Haag, dia 6 di juni 2024.

Parlamento di Sint Maarten a actua mesora y ya 28 di juni 2024, a dirigi un carta na Presidente di Parlamento di Aruba, Edgard Vrolijk den cual ta confirma cu Parlamento di e isla a aproba e concepto di Rijkswet aki.

Mesun cos a sosode cu Parlamento di Corsou cu dia 21 di juni caba, a manda e carta di Parlamento di e isla aki, informando cu a aproba e concepto di ley aki y tambe a dirigi e carta na Presidente Vrolijk di Aruba.

Sinembargo a dura te dia 1 di november p’e Comision Fiho di Parlamento di Aruba, sostene y aproba loke e otronan a haci caba, pero for di e fecha ey bin dilanti, e esfuerso di Edgard Vrolijk tabata nulo y e asunto importante aki, a keda drumi den un lachi na su oficina.

Un aña despues tras Parlamento di e islanan a aproba e concepto, dia 12 di juni, e Presidente nobo di Parlamento di Aruba, Marlon Sneek a dirigi e carta di aprobacion di tur tres Parlamento pa Prome Minister di Aruba, Mike Eman, kende na su turno a entrega esaki diabierna ultimo na Tweede Kamer p’asina esaki wordo trata p’e diferente instancianan pa conseho.

Un triunfo sin duda algun, ya cu ta un asunto cu tin hopi tempo andando caba y caminda apesar cu tin politiconan ta sigui papia di autonomia, en realidad riba asuntonan di vital importancia, e decision tabata keda pa Conseho di Minister di Reino na Den Haag of na Gobierno Hulandes.

Atrobe Gobierno di Aruba ta haña bon di laga di invita e expertonan cientifico y NGO’s pa un workshop tocante adaptacion pa cambio climatico, asina Milton Ponson a duna nos di conoce.

Gobierno di Aruba no ta bay ni conferencia di Nacionnan Uni pa tanto cambio climatico y oceano,  cual porcierto TUR DOS tin cambio climatico como tema principal. Ta na Aruba ta malinforma nos pueblo y tur stakeholder,  pero na nivel internacional no ta presenta, pasobra den e arena internacional di profesionalnan no por duna cara cu cuentos de hadas (sprookjes), di acuerdo cu Milton Ponson.

Minister di Turismo, Transporte y di Trabao, Wendrick Cicilia tabata reciente na Bogota, Colombia pa un bishita di trabao. Y asina e.o. a reuni cu varios compania di aviacion, pero a haci un apelacion serio riba ehecutivonan di Wingo, un aerolinea cu no ta ofrece conectividad solamente, sino tambe tarifa accesibel p’e publico local. 

Wingo a reafirma su compromiso cu Aruba y a expresa nan intencion pa aumenta buelo for di destinacionnan nobo na Colombia. Actualmente, e aerolinea ta opera buelo for di Bogota, Medellin y Cali, pero tin un evaluacion pa considera frecuencia adicional for di otro ciudadnan, manera Baranquilla y Bucaramanga. 

Minister Cicilia mes a haci un peticion special cu den bista di e interes di nos comunidad, specialmente p’e pashentnan cu ta busca cuido medico, pashentenan cu AZV ta manda, pa habri e destinacion pa Bucaramanga, cu un buelo directo, enbes di bai via Bogota.

Aruba tin masha bon reputacion cu e industria di aviacion Latino Americano. E Minister a splica cu no solamente Wingo, sino tambe otro aerolineanan principal manera Avianca, Latam y Copa Holding (e operador mas grandi den cual Wingo ta forma parti) tin un bon impression di Aruba y un compromiso firme cu e isla. 

Turismo ta keda e pilar economico di Aruba y un sector di cual nos ta depende. P’e motibo aki, e ta considera conservacion di e relacionnan cu socionan clave manera Wingo como un prioridad. Adicionalmente, Wendrick Cicilia a referi n’e vision nobo pa turismo di Aruba, cual ta enfoca riba e crecemento di turismo afluente. E mandatario ta convenci cu Latino America tin e potencial pa yuda realisa e obhetivonan strategico aki.

AEROLINEAS ARGENTINA

Otro bon noticia ta, cu ainda no a keda anuncia cu e proximo aerolinea cu lo cuminsa cu buelo directo pa Aruba ta, Aerolineas Argentina. Manera nos di Den Noticia a ser informa cu entrante 1 di januari awor, 2026 e compania aereo di Argentina lo cuminsa cu buelonan directo pa Aruba. Esaki ta otro logro di e team di AAA N.V., encabesa pa Jo-Ann Arends pa habri un otro gate-way pa Aruba for di Latino Americano.

Di e forma aki, for di America Latina, Aruba ta recibi buelonan for di Argentina (Aerolineas Argentina) for di Brazil, nos tin Gol Brazil, nos tin LATAM Chile for di Peru y Chile, sin lubida Avianca y Wingo for di Colombia. Nos por agrega tambe COPA for di Panama. Pues Aruba ta bon cubri for di mercado Sur Americano, cu sigur ta contribui na deversificacion di mercado turistico di Aruba. 

En berdad esaki ta hopi serio y delicado, ya cu politiconan cu tin e ambicion pa dirigi e pais un dia pa sirbi interes di pueblo, pero e situacion ta bira mucho mas serio, ora cu tin politiconan cu nan sa cu pueblo sa cu nan ta gaña, pero den cara di pueblo nan ta sigui purba di tuma pueblo haci.

Mas ainda tin cu tuma nota ora c’un persona, kende tabata Prome Minister di e pais aki manera Evelyn Wever Croes, ta sigui insisti pa ‘changa’ opinion di henter un pueblo, sabiendo cu su persona sa, cu pueblo sa cu loke e ta bida no ta berdad.

Tin accion andando di partido MEP, pa acumula mas tanto firma posibel pa mustra cu nan ta contra di e ley di RAft, cu lo bay bira oficial dentro di algun luna y ta un ley cu e arkitecto di esaki, ta nada mas y nada menos cu e lider di MEP, Evelyn Wever Croes, kende na tres ocasion a firma den nomber di Aruba, p’e Rijkswet aki drenta na vigor.

No solamente tin cu cuestiona e esfuerso di e lider di MEP, pero na momento cu tin asina hopi prueba, grabacionnan na momento cu el a firma na Hulanda,  grabacion di su yegada na aeropuerto internacional di Aruba, caminda el a anuncia su triunfo di bari ley di RAft for di mesa pa un otro nomber, ainda Evelyn ta para cu cara serio y ta acusa e actual Gobierno cu t’esun cu a bende autonomia financiero di e pais na Hulanda.

Tin foto caminda Evelyn a para na kelder di Betico Croes prome cu el a subi avion pa bay Hulanda pa firma p’awor bin bisa mesun pueblo aki, cu su persona no a firma pa Rijkswet y ta trata di hinca esaki den bariga di politiconan cu n’e momentonan aki ta dirigiendo e pais.

Na Hulanda el a wordo considera un politico cu no ta respeta su propio decisionnan y ta cambia di opinion na momento cu esaki ta cumbini su persona, pero e gañamento aki a y ta marcando e caracter di su carera politico caminda e ta pretende cu e por tuma henter un pais haci di kens, pero e solo hecho cu e t’a sinta den banki di oposicion for di luna di maart di e aña aki, ta confirma cu pueblo ya no ta tumando e tipo di mentiranan aki!!