Diadomingo pa mas o menos 10:30 di anochi, central di polis ta wordo notifica di un accidente na altura di Cayena Mall entre un auto y un brommer.

Ta despacha polis di biaha na e sitio di e sucedido como tambe ambulance.

Na yegada di polis ta bin encontra un accidente entre un Van color blanco y un brommer BMW color preto.

E chauffeur di e brommer no tabata reaccionando. Personal di ambulance cu a yega na e sitio a brinda prome auxilio pero lamentabelmente no por a haci nada mas pa e chauffeur.

Dr. Scholten cu ta doctor forensico a presenta na e sitio y ta constata morto di e chauffeur di e brommer cu ta un hende homber yama Denny Enmanuel Leoni Davila naci na Venezuela 24 november 2003 ( 21 aña).

Lamentabelmente esaki ta bira e di 7 morto den trafico pa aña 2025.

Specialista di trafico a presenta na e sitio y polis technico pa asina haci nan investigacion. Departamento di slachtofferhulp tambe a presenta pa guia e famia den e momento dificil aki.

Conhuntamente cu altocomisario Arnhem tambe hefe di Polis Uniforma de Mey tambe a yega na e sitio pa mira e situacion y duna sosten na e sitio di incidente.

Cuerpo Policial ta manda palabra di profundo condolencia na famia di e fayecido.

Durante su bishita na Hulanda, Prome Minister Mike Eman a fortalece relacion strategico cu Royal Schiphol Group pa futuro di Aeropuerto di Aruba, pa cual a firma un MOU caba. Tabata siman pasa, cu mr. Mike Eman, a sostene un encuentro importante cu e ehecutivo mas halto di Royal Schiphol Group, sr. Pieter van Oord. Den e reunion aki, a discuti e posibilidadnan pa amplia y fortifica e colaboracion strategico cu Aruba. Schiphol Group a expresa su compromiso pa yuda desaroya un relacion mas profundo cu islanan di Caribe, compartiendo nan experticio den maneho y desaroyo di aeropuerto. RSG no a sconde su deseo di kier bira accionista minoritario den AAA N.V., loke de facto a ser bari for di mesa pa Mike Eman inmediatamente, kende a duna di conoce cu Gobierno no ta bende accion den ningun di su companianan estatal. Si ta reina e posibilidad cu RSG lo por haya un representacion den Hunta Directiva di AAA N.V., manera expresa den pasado caba, cu hasta a bira motibo cu Gobierno di MEP a kibra relacion cu RSG. Segun sr. Pieter van Oord, Aruba ta un partner clave, y e pasado cu Schiphol a mustra cu a logra hopi exito transformando Aeropuerto Internacional Reina Beatrix como un organisacion stabiel y confiabel. Esaki ta duna un base firme pa un colaboracion strategico mas amplio. E plan pa futuro ta inclui no solamente e intercambio di conocemento y experencia, pero tambe pa prepara y forma talento hoben di Aruba na Hulanda. Schiphol mes a expresa su interes pa eventualmente considera un participacion minoritario den aeropuerto di Aruba, cu lo fortifica e aliansa strategico, manera nos a anuncia. Mientras esaki a keda participa, nos a recibi noticia inoficial cu Jurgen Benschop, miembro di e actual Management Team di AAA N.V. a entrega su retiro como Accountable Manager di AAA N.V., pero lo keda den servicio di AAA N.V.. Jurgen Benschop for di basta tempo a ser mira di lo por a bira e proximo CEO di AAA N.V., pero tur biaha a keda teni afo, e.o. pa motibo ora cu Joost Meijs a haci su errornan den maneho di AAA N.V., Jurgen Benschop mester a para e mal maneho aki, y aki ta unda RSG a haci un cantidad di error, den e proyecto. Cu e.o. tabata motibo cu Gobierno di MEP no tabata kier a tende nada mas di RSG. Pero Premier Mike Eman si a enfatisa cu Gobierno di Aruba ta pone gran balor riba e relacion strategico cu Royal Schiphol Group. Aruba tin mester di aliansa strategico cu partnernan internacional cu ta brinda conocemento, inovacion y sostenibilidad. Schiphol ta un partner cu ya a demostra su mes, (Nota di Red: Bon y Malo) y Gobierno ta wak cu

optimismo riba e paso nobo pa fortalece nos aeropuerto y posicion di Aruba den region aun mas. Kende lo t’e candidato pa bira e proximo CEO di nos Aeropuerto no ta conoci ainda. Den un entrevista cu Minister Wendrick Cecilia, kende a firma e MOU cu RSG, a duna nos di conoce, cu e lo bolbe papia cu Jurgen Benschop pa determina su interes y cu e errornan cu e tambe a comete, no por ripiti mas. Ultimo palabra no ta bisa ainda. E reunion na Hulanda entre Mike Eman y Pieter van Oord a confirma e compromiso di Gobierno di Aruba pa sigui traha riba infrastructura critico pa pueblo y economia di Aruba, sigurando cu nos aeropuerto ta keda un centro regional fuerte y sostenibel.

Na Hulanda y na Merca e ta un discusion caba, caminda Gobiernonan a cuminsa pone regla pa loke ta uzo di e asina yama E-Bike y E-Step riba caminda publico, ya cu nan ta formando un peliger no solamente pa trafico, pero tambe pa peatonnan y mas ainda p’e propio doño di e aparatonan aki.

Ya caba den 2024 mes a keda registra un total di dos caso fatal caminda auto a alcansa E-Step maneha pa hendenan cu tabata riba caminda pa cas den oranan laat di anochi, sin mucho iluminacion y caminda tin cu admiti cu algun di e aparatonan aki, ta move riba un velocidad respeta.

No solamente den oranan di anochi, pero durante di dia tambe tin trahadornan cu ta move riba e  tipo di transporte aki den dia cla caminda e manehadornan ta haci uzo tambe di acera un situacion fastioso pa peatonnan cu no ta spera presencia di e tipo di transporte aki.

Ta un  hecho cu esnan cu ta maneha e step- y bikenan aki ta manehando esakinan riba un velocidad hopi halto, no asina duro manera un auto of brommer, pero esakinan ta bay sea den direccion robes of ta bira un skina sin ningun hende a spera nan presencia, ta surgi un situacion peligroso pa tanto esnan cu ta maneha e aparatonan aki, pero tambe pa tur otro persona, sea na pia of den auto.

Den ambos caso caminda e manehadornan a perde nan bida, a bin dilanti e hecho cu e chauffeurnan no a nota presencia di e aparatonan aki te ora cu tabata laat pa nan por a reacciona.

Mester bay regla e asunto aki, ya cu e E-Step y E-Bike ta core mayoria sin iluminacion  adecua den oranan di anochi  cu ta pone nan propio bienestar na peliger.

E situacion actual, ta mesun cos cu tempo cu autonan cu ‘righthand drive’ a bin na moda caminda e tempo ey ex Minister Angel Bermudez tabata trahando riba un concepto di ley pa controla e situacionnan aki, pero pa un motibo of otro Mike Eman a  para e ley aki cu nunca mas a ser trata den Parlamento.

Awor ta surgi otro situacion casi similar, pero e biaha aki e situacion a costa bida di dos persona y e momento a yega pa Parlamento atende cu e asunto aki y presenta un concepto di ley den cual ta pone exigencianan na nan lugar p’asina sigura bienestar di tur hende.

E anuncio di Gobierno diabierna ultimo caminda a anuncia cu Minister Rene Herde lo no sigui maneha e Ministerio di Energia, a cay di sorpresa loke pa poco no tabata un sorpresa ya cu tin cierto desaroyo cu tabata tumando lugar cu a conduci n’e decision di Minister Herde, kende a keda awor cu e Ministerionan di Telecomunicacion y Infrastructura.

Diabierna cu a reuni cu tur compania y otro instancianan liga na Ministerio di Energia, drs. mr. Arthur Dowers, kende a acepta di sigui cu e Ministerio di Energia, a dicidi di no sali y duna declaracion na prensa, mientras cu Minister Herde tampoco a bin dilanti y haci e declaracion riba e su decision di no sigui cu e cartera di energia.

‘Caminda tin huma, tin candela’ y aki tin cu conclui cu realmente tin “candela”  den e asunto aki caminda  Rene Herde a dicidi cu e lo no sigui atende cu asuntonan di energia, den loke ta un muestra di presion grandi cu el a wordo confronta cu’ne, for di momento cu el a acepta di bira “plaatsvervanger”  pa Mike de Meza.

Realidad di e asunto ta cu Minister Herde a bin haya su mes cu un oficina caminda ya tabatin hendenan di de Meza sinta eydenan, cla pa traha, ya cu nan tabata parti di e maneho cu de Meza lo hiba.

Awor no ta sigur cu esaki lo t’e problema, pero ta mustra cu e decision di Herde lo tabatin di haber cu envolvimento di “otronan” den e maneho cu e kier a hiba y el a surgi momentonan di discusion caminda probablemente lo tin hendenan di de Meza cu kier a dicidi kico Herde tin cu haci loke no tabata aceptabel pa su persona.

Ta un hecho tambe cu Minister Herde nunca a anhela e puesto aki como Minister di Infrastructura, Energia y Telecomunicacion, ya cu el a bay di acuerdo pa ocupa e puesto di Minister Plenipotenciario na Den Haag tambe como algo temporal y nada mas.

Minister mr. drs. Arthur Dowers ta mira posibel introduccion di “enkelband” pronto na Aruba. E mandatario a amplia riba e presentacion y posibel introduccion di detencion electronico pa medio di “enkelband”. 

Tabata durante un reunion na Stichting Reclassering a delibera riba algun punto importante y mas cu claro si e ta aplicabel na Aruba. E intencion di detencion electronico “enkelband”, cu segun ley lo stipula den cua caso esaki lo ta posibel, como tambe ken lo carga e responsabilidad di ehecuta y monitoria un proyecto asina aki.

E proyecto aki a keda presenta hopi aña pasa durante su maneho, pero a keda drumi, na momento cu e tuma e responsabilidad bek di e cartera di husticia, a hiba combersacion cu Stichting Reclassering y contento cu mesora a tuma rienda y te cu a duna un prome presentacion.

E sistema aki ta brinda persectiva pa por reduci capacidad den prizon, como tambe un sistema sigur pa locual ta traha hoben, den un trato mas humano cu t’e caso n’e momento aki, como tambe reduccion di trauma adicional di tin nan sera den prizon.

Minister Dowers ta mira cu e sistema aki ta brinda un control y limitacion na individuonan cu bo kier tin restringi y asina brinda seguridad na otro hende den comunidad. E ta un  proyecto cu por implementa riba tempo relativamente cortico.

Na Corsou e tarea aki ta bou encargo di camera room di prizon y Minister a menciona cu Aruba tambe tin su camera room, pero mas bien ta mira riba un cooperacion entre diferente departamento manera entre otro CEA, KPA y KIA, pero lo bay sondea e mihor opcion pa su funcionamento sin cu e bira un presion riba un of otro departamento, cu n’e momento aki ta bou di presion caba pa falta di personal.

Minister Arthur Dowers ta convenci cu esaki lo yuda reduci presion den e centro di detencion KIA.

 Buscando argumentonan politico sin sentido y papia djis pa papia ta loke Parlamentario Dangui Oduber a haci siman pasa ora cu el a considera e hecho cu unda Gabinete AVP-FUTURO ainda no a nombra su Minister Plenipotenciario na Hulanda, como un acto bergonsoso.

Manera ta conoci anteriormente, drs Rene Herde tabata e candidato propone pa bay Den Haag y tuma e puesto aki over, pero na momento cu a surgi e problema cu e proceso di huramentacion di Mike de Meza como Minister, partido AVP mester a busca un forma pa “wanta” e ministerionan cu lo a bay pa de Meza ora cu e lo a bira Minister,  a mira den Rene Herde como e candidato mas apto pa cumpli cu loke lider di e partido, Mike Eman a premira.

Baba Herde a pasa dor di e proceso di investigacion p’e por a wordo aproba pa por bay  Hulanda y  ocupa e puesto cu mr. Ady Thijsen a laga vacante, un proceso cu a tuma un tiki mas tempo mirando cu e investigacion tabata envolvi su yiunan y otro miembronan di famia tambe.

Sinembargo na momento cu a “clear” Baba Herde, a surgi e situacion delicado cu Mike de Meza na momento cu Departamento di Impuesto, a dicidi cu tin un investigacion andando contra di e miembro di Parlamento di AVP y cu no a keda cla y hasta a bay  over na entrega keho na Ministerio Publico.

Drs. Rene Herde como un hende leal na partido AVP y sigur na su lider Mike Eman a bay di acuerdo pa asumi e puestonan di Mike de Meza te ora cu e keda cla cu su caso contra di DIMP y nombrando cualkier otro persona, lo por a ocasiona un conflicto grandi na momento cu de Meza aclaria su situacion y kier bira Minister.

Partido y e Prome Minister a calcula cu e caso rond di de Meza lo keda cla mas prome, pero awor ta mustra di lo wordo alarga te den inicio di 2026 y e hecho cu Gobierno di Aruba, di AVP y FUTURO  ainda no a nombra un hende como Minister Plenipotenciario, esaki ta un motibo di preocupacion grandi pa Dangui Oduber cu ta haya e asunto aki algo bergonsoso.

Loke realmente tabata bergonsoso y aki Parlamentario Dangui Oduber no ta tuma na consideracion t’e hecho cu dia 21di September, lider di su partido Evelyn Weaver Croes, ta dicidi di bolbe nombra Guilfred Besaril como Minister Plenipotenciario, sabiendo bon bon cu tin un investigacion pa mal uzo di fondonan di Arubahuis, kende na luna di juni di 2022, a dicidi di entrega su retiro.

Guilfred Besaril a ser haya culpabel pa malversacion di fondonan di Gobierno, no solamente el a baha como Minister Plenipotenciario, pero despues e lider di MEP a retira su persona for di servicio di su Gobierno y despues tambe como miembro di partido MEP.

Si esey no ta mas bergonsoso anto Dangui Oduber tin problema serio.

Stichting ABO a dicidi di bin cu un campaña, “MIRA NOS” cu enfoke riba cancer di pecho. Tabata dia 1 di oktober a lanza e campaña aki, cu ta hiba e nomber di “Mira Nos”. E campaña ta dedica na cancer di pecho, cu ta un iniciativa di Gilliany Oduber, kende a lanse den nomber di Stichting ABO (Aruba Bevolkingsonderzoek). 

“Mira Nos” ta un colaboracion na nivel nacional entre diferente partner cu e solo meta pa aumenta conscientisacion y stimula deteccion tempran entre hende muher bou di 45 aña cu ainda no ta cay den e grupo pa por participa n’e screening preventivo via e programa di BOB.

Diagnostica na October 2024, Gilliany Oduber a conta su experiencia manera un transformacion y ta mira su diagnostico di cancer di pecho como parti di un meta mas grandi. 

“Tur cos ta pasa pa un motibo, y mi a scoge pa haci di e situacion aki un proposito”, asina Gilliany Oduber a conta. ”E campaña “Mira Nos” ta pidi comunidad di Aruba pa uni y empodera e hende muher pa tuma un accion y ta pro-activo den nan salud propio.

Desde 2015, Stichting ABO, anteriormente conoci como Stichting BOB Aruba, ta facilita screening preventivo p’e hende muher entre 45 cu 75 aña di edad. E programa di screening aki a yuda detecta cancer di pecho den hopi hende muher na Aruba, agregando calidad di bida.

Cu e experencia di BOB a desaroya 2 programa di deteccion nobo: Programa BOCA pa screening di cancer na boca di matriz y programa CORESA cu ta screen cancer na tripa. Pa medio di e campaña “Mira Nos”, Fundacion ABO ta continua e mensahe principal di BOB.

Deteccion tempran pa por salba bida, sra. Nanine Ponson, Directora di Fundacion ABO a afirma. Edadnan di mas hoben cu a wordo diagnostica cu cancer di pecho ultimo añanan ta 35 aña, 22 aña, 28 aña y te cu 1 di oktober pa aña 2025 e pashent di mas hoben tin solamente 22 aña. 

“Y pa nos na HOH esaki t’e motibo principal pa join e movemento y encurasha tur hende muher bou di 45 aña pa haci nan chekeo propio. Alabes mi kier gradici di curason ful e team di Mamma di Aruba cu t’ey pe pashentnan for di momento cu nan wordo diagnostica cu cancer di pecho pa brinda nan e guia y fortalesa necesario”, Charlaine Huntington, Hefe di Departamento di Comunicacion di HOH cu orguyo a conclui.

Stichting ABO a uni p’e campaña “Mira Nos” partnernan: Dr. Horacio E. Oduber Hospital (HOH), Directie Volksgezondheid Aruba (DVG), Mary Joan Foundation, Koningin Wilhelmina Kankerfonds (KWF), ImSan Aruba, HAVA, WOW Aruba y Wind Creek Aruba.

“Mira Nos” t’e yamada” pa stimula chekeo propio y pa yama bo dokter di cas si bo ta sinti of mira cualkier cambio den bo pecho. E campaña ta invita tur hende uni den e “Feel Your Titties” challenge, pa reta bo amiga, bisiña, colega, ruman pa haci chekeo propio. 

Recientemente tabatin diferente charla organisa e.o. pa ID Real Estate, pa cual sigur tin un interes grandi. Durante un di e ultimo charlanan, pa ser exacto na MFA Santa Cruz, e pregunta a surgi, ta cuanto compania di real-estate tin na Aruba. Pa sorpresa di tur hende, registra na Camara di Comercio, tin como 600 compania di real-estate registra.

Esaki ta nifica cu tin hopi interes sea pa cas (propiedad) y tereno pa cumpra. Cu ta haci cu pronto lo no tin cas y/of tereno disponible mas, manera ta ser bisa pa yiunan di tera, si nan no hay’e como herencia. P’e topico di herencia, tambe tin hopi interes, pa cual e organisadornan ta pensa pa principio di otro aña, bin cu charla riba e topico aki tambe, pa cual tin basta problema na Aruba tambe.

Mirando e cantidad di companianan real-estate registra, nan mester tin producto pa bende. Ultimamente por a tende cu hopi di nos mesun hendenan ta bende nan cas cu Mericano, Canadiense y hasta Spaño pa converti esakinan den RB&B y asina haci nan ganashi. Pero ora di investiga si no tin Arubiano envolvi como propietario, ta sali na cla cu 60% di RB&B na Aruba, ta di companianan Arubiano, of nan lo ta actua como “stroman” p’e cumpradornan stranhero.

Un topico interesante pa nos Parlamentarionan puntra awor cu lo cuminsa trata presupuesto 2026 ora cu anuncia nan plannan, con frena e ‘over-tourism” na Aruba, y pone un paro na propiedadnan local.

Di acuerdo cu e compania Americano di Bill Armstrong, kende a descubri na Alaska miyones di bari di crudo, a dicidi di prolonga su focus pa Caribe. Manera ta conoci Amstrong Oil& Gas a firma aña pasa un acuerdo di produccion y explotacion cu e compania nacional di Aruba, (CAP).

Tabata durante e EnerCom Conference, teni recientemente na Denver (USA) Bill Amstrong a haci mencion cu e prospecto offshore di Aruba ta uno di mas grandi cu el a yega di mira. (Nota di Red: E sub-suelo mas grandi, sin ainda procesa), segun un reciente publicacion den ArubaNu.

Di acuerdo cu Armstrong e structura ta como 200.000 acres y compara cu e marcanan  geologico di Ekofisk, e terreno petrolero Noruego cu ta produci como 4 biyon bari, e strcutura di Aruba ta 15 bez mas grandi. Si e explotacion bira un exito, e Proyecto Arubano lo ta uno cu cu “lo manda nos luna mes”.

E regio dilanti costa di Aruba ta conoci pa su potencial for di basta tempo caba. Repsol pa 8 aña largo a haci exploracion, borando varios pos, si logra un cantidad di crudo pa haci un explotacion comercial cu lo duna ganashi. Armstrong a mustra si cu tin marca di crudo presente den e posnan explora, pero manera ya menciona, no ta duna indicacion cu e lo bira exitoso. 

Armstrong Oil & Gas ta conoci como un asina yama wildcatter, un empresa cu ta scoge pa haci exploracion riesgoso, cu a lo largo ta bira exitoso. Asina e empresa a descubri na 2013 pos cu a haya nomber di Pikka na Alaska, cu mientrastanto a bira un di 3 descubrimento di crudo den historia Americano.
E interes internacional pa Aruba ta grandi y por menciona asina cu ultimo lunanan empresanan manera ExxonMobil, TotalEnergies, BP, Eni, Repsol y Occidental Petroleum a busca contacto Armstrong pa deibera riba un posibel coopracion y colaboracion, di acuerdo cu publicacion di ArubaNu.

Pa loke nos di Den Noticia sa, cu meramente San Nicolas Business Association (SNBA) den su mas reciente entrega di nan plannan pa cu San Nicolas, ta haci mencion di e descubrimento di Bill Amstrong, y con nan lo por procesa gas for di e crudo aki, di bin un proyecto mas chiquito y eficiente riba terreno di Lago. SNBA a pidi un reunion cu Gabinete AVP-Futuro, sin a haya esaki ainda, mientras cu Prome Minister Mike Eman durante su bishita na Hulanda a toca e topico aki, con Hulanda lo por duna Gobierno asistencia den e operacion nobo aki. 

Recientemente a tuma lugar e di 7 edicion di Island Wound Care Symposium organisa pa Dr. Horacio E. Oduber Hospital, caminda innovacion ta topa cu practica. E aña aki a enfoca riba e paisahe futuristico di cuido di herida, ofreciendo e profesionalnan den cuido di salud un plataforma unico pa siña, conecta y crece. 

Banda di un publico di profesional den cuido di no menos di 225 persona e biaha aki tambe tabatin un publico online di mas o menos 100 persona cu a sigui e simposio di forma virtual. E conferencia di dos dia, a trece hunto diferente experto internacional y local unda a comparti e ultimo perspectiva y strategianan practico den cuido di herida. 

E programa a conta cu discursonan principal di Joel Alleyne y Dokter Paul J. Kim, banda di presentacionnan cu ta cubri innovacionnan den curamento di herida, maneho di ulsera di pia diabetico, terapianan di oxigeno “hyperbaric” y “topical”, imagen termal, clausura reconstructivo, productonan di cuido di herida avansa, nutricion y e rol di sistemanan di sosten den programanan di intervencion di diabetes di Aruba.

Sesionnan practico y interactivo y tambe discusionnan den forma di panel a permiti un intercambio dinamico entre e participante y specialistanan, mientras cu contribucionnan local di Dokter Alex Ponson, Dokter Larry G. Baratta y Nurrianne van de Griend-Arias a destaca e importancia di aplica e mihor practicanan global denter di e propio contexto di cuido di salud di Aruba.

Dokter Yuri Casseres, ciruhano y alabes miembro di Hunta Directiva di HOH, a splica cu esaki t’e di 7 edicion di Island Wound Care Symposium. Ta organisa e simposio aki cada dos aña, caminda ta trata e topico di cuido y tratamento di herida. Cada bes tin desaroyo nobo pa trata herida y ta bon pa tene esnan cu ta atende e simposio sea ta dokter, nurse y tur cu ta trata cu herida bon informa.

Locual cu a resalta durante e dos dianan aki ta cu tin hopi cos nobo, cu actualmente ta den uzo caba na HOH. Actualmente nos ta den proceso pa trece “Hyperbaric Oxigen therapy” pa Aruba, cu tambe tabata un topico durante e simposio.

Por ultimo, dokter Yuri Casseres a gradici e team completo di Wound Care cu a haci nan maximo esfuerso pa haci e simposio aki un exito un biaha mas. 

Siman pasa dialuna, Corte di Apelacion a bolbe duna su veredicto den un di tanto casonan cu e Parlamentario,  ing. Mike de Meza a entama pa clarifica su bon number, mas ainda pa pidi Ministerio Publico trata e caso pa caba. Ya ta 4 luna caba cu Mike de Meza ni a ser interroga pa Ministerio Publico pa acus’e kico el a haci malo pa cual e mester wordo persigui penalmente. Un biahe mas Corte a rechaza su peticion.

Pero Corte di Apelacion a manda un mensahe cla y raspa pa Ministerio Publico, cu OM mester trata e caso aki den un tempo husto. Corte di Apelacion no ta considera e situacion normal, pa laga un politico, eligi pa pueblo den un incertidumbre di kico e ta ser acusa pa persigui’e. No mester lubida cu henter e caso aki di investigacion a sali na cla, ora cu Mike de Meza, siendo candidato pa bira Minister, mester a pasa un sceening. DIMP den Corte a laga sa, cu no tin nada mas contra di Mike de Meza, pa ora Sali for di Corte, e mesun DIMP ta entrega un keho na Ministerio Publico di un hecho castigable, cu a haci Mike de Meza un sospechoso. Di kico exacto, te awe no tin nada concreto.

For di Ministerio Publico, inmedtiamente despues di e verdict aki a laga sa cu OM a actua corectamente den investigacion di Mike de Meza. Corte di Apelacion a dicta sentencia den e apelacion cu Mike de Meza a presenta contra e decision di Corte den Prome Instancia di 15 di augustus 2025. Den e decision ey Corte den Prome Instancia a rechasa e peticionnan di Mike de Meza pa ordena Ministerio Publico pa dun’e informacion detaya tocante e tipo y e base di e acusacionnan contra dje, y pa tuma un decision den su caso pa mas tarda riba 23 di augustus 2025, of dentro di un periodo rasonabel.

Corte di Apelacion a trata e apelacion di de Meza dia 9 di september ultimo y siman pasa el a keda rechasa. Corte Superior a determina cu Ministerio Publico ta hibando e investigacion penal conforme ley. Ministerio Publico tin e responsabilidad pa haci investigacion y hiba persecucion penal, y ta p’e motibo ey cu Corte di Apelacion a haya cu un Huez no por tuma decisionnan di alcance grandi durante e fase aki.

A base di e resultado di e investigacion penal, Ministerio Publico lo dicidi ki decisionnan lo mester wordo tuma contra e sospechoso. Segun voceru di OM, nunca no ta usual cu un sospechoso ta hunga algun rol den e proceso aki. Den e caso excepcional aki, e hecho cu ta trata di un persona cu tabata na punto (y posiblemente ainda por ta) di wordo nombra como Minister, e persona a wordo informa di su status como sospechoso y di e sospecho cu ta cay riba dje.

Corte di Apelacion a determina cu Ministerio Publico a cumpli cu e obligacionnan aplicabel den e situacion specifico aki. Ministerio Publico no ta obliga pa duna mas informacion, ni den e caso concreto aki y sigur no en general. Corte di Apelacion ta enfatisa cu Ministerio Publico ta actua dentro di su funcion legal: Evaluacion di e caso unabez e investigacion finalisa.

Pa cu esey, Corte di Apelacion su consideracion ta cu Ministerio Publico tin un termino rasonabel pa cumpli cu esaki, esta, dos aña en general. Den e contexto aki, mester tene cuenta tambe cu e presion structural cu tin riba capacidad di instancianan investigativo, loke ta influencia avance di hopi investigacion, segun voceru di Ministerio Publico.