Assistant Commiscioner Leonardo Brown, hefe di departamento tecnologico di Jamaica Constabulary Force (JFC), a haci un presentacion riba desaroyo di recurso digital den JCF. Representando CARICOM IMPACS, Terrance Roopchan, hefe di e unidad di inteligencia contra crimen, arma di candela y gang y di e unidad di apoyo operacional di Regional Intelligence Fusion Centre, y Dale Joseph, analista hefe di Cyber Fusion Unit, a trata e tendencianan actual cu por mira den traficacion di arma di candela, formacion di gang y crimen cibernetico.

Angelo Brete, hefe di FIU Aruba, a presenta un perspectiva financiero, mustrando con transaccion poco usual ta yuda identifica labamento di placa den varios sector, manera di real estate, wega di placa, comercio internacional y mas.

E encuentro tabatin un mensahe central masha cla: Menasa regional ta pidi un acercamento regional. E analistanan ta mira con facil arma di candela ta move di un isla pa otro, con medionan social ta yuda grupo hubenil riba diferente isla drenta den contacto cu otro, con e rutanan di droga ta cambia rapidamente ora presion aumenta y con criminalidad ta probecha di e buraconan cu tin den e colaboracion. 

RNA ta yuda sera e buraconan aki, reforsando e contactonan personal, agilisando comunicacion, dunando mas aceso n’e metodonan analitico cu ta disponibel y dunando un y tur un bista di e patronchinan cu ta desaroyando.

Colegio di Hefenan di Polis a sera e encuentro reafirmando cu lo sigui desaroya RNA como plataforma regional anual. Manera CARICOM IMPACS a expresa: “Colaboracion no ta costa nada, fragmentacion si.” E edicion di 2026 tambe lo wordo organisa den colaboracion estrecho cu e partnernan di nos region.

Un noticia cu a hala masha atencion ultimo dianan tabata e clasificacion di Aeropuerto di Corsou, como nr. 4 di Caribe. Na Aruba hopi a puntra con esaki ta posibel, siendo cu Aruba su Aeropuerto ta ser considera un di mas moderno den Caribe.

For di comentarionan cu nos a haya ta, cu Aeropuerto di Aruba ta laga masha di desea pa loke ta su mantenimento. P.e. den bañonan no ta cos di mira. Tanto den baño di hende homber como esnan di muher.

Aeropuerto di Aruba ta hopi sushi, servicio di facilidadnan di F&B ta laga masha di desea. Y asina tin mas punto, e.o. pa loke t’e servicio  di e balinan di e companianan di aviacion. No tin ningun clase di coordinacion pa cu e fluho di pasaheronan pa nan por move mas rapido pa yega nan gate di salida pa aborda avion, pero tambe e fila largo cu tin ora di yegada.

Ta ser menciona, cu ora un pasahero yega Aruba, e ta tuma sigur un ora, prome cu e sali for di Aeropuerto. Ora di aborda of ora di yegada di un avion, no tin suficiente personal di Immigracion pa yuda e cantidad di pasaheronan. Siendo na Corsou esaki ta bai masha liher mes.

Corda bon, den tur esaki, Grupo di Royal Schiphol a bin ta maneha nos Aeropuerto, cu ta pone nos conclui cu loke Schiphol Group a bin ta haci, no ta bon y e.o. ta causa cu Aeropuerto di Aruba no a ni clasifica den prome 10 top den Caribe.

Awor recientemente, Gobierno a anuncia cu Schiphol a haya un CEO nobo pa Aruba. Y mira kende e ta, Jonny Andersen, kende sigur t’e motor cu Aeropuerto di Corsou a keda nomina n’e di  4 puesto di Aeropuertonan top den Caribe. Mirando e salario cu e lo gana, ta di spera cu e lo haci un mihor trabao cu tur otro dirigentenan cu Schiphol Group a bin cu nan.

Un di esnan mas malo sigur tabata Joost Mijst, kende hasta a ser corri for di Aruba, di acuerdo cu nos fuentenan. Pesey nos mester bisa, cu sigur Schiphol Group tambe tin falta grandi den errornan cu awe ta afecta nos Aeropuerto. Ta di spera cu Jonny Andersen trece e cambio desea, pa cual el a bira miyonario na Aruba. 

TOWNHALL MEETING

Aruba Airport Authority N.V. (AUA) a organisa  dos townhall meeting pa informa e comunidad di aeropuerto tocante e cambionan importante cu lo sosode pronto na Aeropuerto Internacional Reina Beatrix como parti di e proyecto Gateway 2030. A trece hunto diferente partner cu ta opera riba un base diario na Aeropuerto p’asina por haya un splicacion detaya riba e fasenan actual y proximo di construccion como parti di e proyecto Gateway 2030. Lamentablemente di parti di Schiphol Group, nan no a duna nan comentario y bo ta puntra dicon, siendo nan tambe ta responsabel.

“E Townhall Meeting aki ta refleha e compromiso di AUA pa mantene un comunicacion habri y transparente”, asina Barbara Brown, Chief Revenue Development & Communications Officer na AAA, a expresa. Brown a continua bisando: “Mientras nos ta implementa mehoracionnan importante pa eleva e experiencia di aeropuerto, ta esencial pa nos comunidad keda informa, comprometi y involucra.” 

E iniciativanan aki di modernisacion ta sostene AUA su mision a largo plaso pa mehora e eficiencia operacional, engrandece e experiencia di pasahero y fortifica e posicion di Aruba como un gateway regional lider. AUA ta gradici tur su partnernan pa nan pasenshi y sosten continuo, mientras cu Aeropuerto ta avansa dor di e transformacion importante aki, reafirmando su compromiso cu innovacion, servicio y un experiencia di pasahero eleva.

Corte den Prome Instancia a yega na un decision siman pasa den e caso di ontneming contra dos sospechoso cu anteriormente, den e investigacion Flamingo, a wordo condena pa estafa como ‘ambtenaarnan spirito’.

Ministerio Publico a exigi pa nan paga bek e salario cu nan a gana estafando Pais Aruba. Huez a otorga e peticion di ontneming. El a determina cu e sospechoso Laurece B. Philips. mester paga un suma di Afl. 122.644,32 na Pais Aruba y e sospechoso Gilberto L. Tiel un suma di Afl. 82.371,39.

Ministerio Publico ta traha duro riba kita capital criminal, pasobra ningun hende no mag di saca ningun benificio di crimen.

Cu satisfaccion y un sentido profundo di orguyo, ta mira con e hobennan di Formacion Social a acepta e oportunidad cu nan a haya den bida y cu awe nan ta cosecha e fruto di nan esfuerso y sacrificio, ta locual Premier Mike Eman a expresa durante ceremonia di graduacion di e hobennan cu a participa den e programa di Formacion Social (SVT).

A haya oportunidad di combersa cu algun di e graduadonan, cu a comparti nan sentimento despues di a logra finalisa e curso exitosamente. Asina p.ee. G’Dior Tromp, di bario di San Fuego, a indica cu na inicio e tabata dificil p’e. E no tabata comunica cu ningun hende, pero mientras dianan tabata trascuri y a cuminsa convivi cu demas participante, gradualmente a cuminsa papia. El a haya hopi sosten y a siña conoce cada persona mas. Ta di pensamento cu e mihor opcion ta paden formando parti di SVT. E ta nifica un cambio drastico pa bo bida. G’Dior Tromp ta tuma e reto pa continua, e lo uni cu e team di Parke Nacional Arikok pa un periodo di stage, mientras e lo analisa su siguiente paso, cu muy probablemente lo ta na Kazerne mes.

Bradley Werleman, ta bin di bario di St. Cruz cu tambe a forma parti n’e programa Formacion Social. Su experiencia tabata uno positivo, a indica cu mescos cu pa tur otro curcista na comienso ta un etapa dificil. Tabatin un bista di kico por a spera, pero e realidad a surpasa su expectativa. Hopi experiencia nobo!

Gradicido p’e oportunidad y emociona p’e siguiente fase, cu ta ARUMIL. E experiencia aki a habri hopi porta, ademas di habri su wowo pa chensnan cu ta presenta y cu bo no por laga bay perdi. E programa aki ta brinda oportunidad na hopi hoben eyfo. Momento di realisacion ta ponebo mira bida diferente, ausencia na scol, ‘hangout’ henter dia cu brothernan y no busca un trabou tabata e rutina diario, cu awor a cambia. Busca oportunidad pa bay dilanti, sino bo ta bay keda atras, ta locual cu Bradley Werleman a expresa.

A combersa tambe cu hoben Kendrick Yarzagaray di Tanki Leendert. A sigui conseho y awe e ta orguyoso di a finalisa e programa di SVT. Dificultad cu estudio a pone cu a busca alternativa y ta contento di a haya esaki den Kazerne. Luchando pa un mihor bida! Duro na comienso, a adapta y siña na caminda, segun palabra di Kendrick: “Den bida tur cos ta pa siña”. Orguyoso di e logro, di por haci su famia contento bek. Oportunidad pa sigui ta un opcion, stage of forma parti di ARUMIL tambe lo por ta den plan.

Formacion Social (SVT) na Aruba ta un oportunidad pa hobennan entre 17–25 aña pa forma disciplina y prepara nan pa e mercado laboral. E programa ta inclui entrenamento cu ARUMIL y stage den companianan local. A proyecto di SVT ta yuda hopi di e hobennan cu termina e trayecto aki, pa haya un trabao.

ARUMIL: Esaki ta dura mas o menos 16 siman y ta inclui entrenamento fisico, disciplina y respet. Fase 2 (empleo/estudio): Hobennan ta haci curso y stage na companianan local. Atrabes di Enseñansa pa Empleo, SVT ta habri porta pa trabou of estudio. Mas cu 80% di participantenan cu caba e programa aki ta logra haya trabou of sigui un formacion. Originalmente e programa tabata solamente pa hobennan masculino, pero awendia hobennan femenino tambe por participa di forma separa.

Ultimamente por tuma nota cu Gobierno ta masha orguyoso cu crecemento economico di nos pais. Hasta por menciona cu siman pasa Minister Geoffrey Wever a duna un presentacion di e Economic Outlook, cu ta predeci cu Aruba su economia ta bayendo hopi bon. Mihor cu nan mes a spera.

Tur instancia envolvi den sigui nos economia ta di acuerdo encuanto esaki, esey nos no mester discuti. Tur hende contento anto? No, pasobra nunca avance economico general ta nifica mesun prosperidad pa tur hende den un sociedad y esun di nos no ta un excepcion. Y t’aki lo mester traha pa mehora condicion di bida, mas tanto p’esnan cu ta kedando atras den e progreso actual. 

Loke nos por mira actualmente ta cu e estadisticanan general faborable no ta kita e impresion cu publico den gran mayoria tin di e mesun economia. Esey tin su splicacion: E ciudadano ‘averahe’ no ta sigui e cifranan general di aumento di GDP y ingreso gubernamental cu ta mustra mihor, pero ta evalua a base di su situacion individual. Esaki no tin nada straño cune y ademas, mira for di e punto di bista individual ey, nan tin razon. 

Y mas ainda esey ta conta p’esnan cu entrada mas modera, si nan ta mira prijs halto continuamente den loke pa nan ta prioritario pa cumpra: Esey ta cuminda y otro producto di prome necesidad. Esaki ta realidad di bida rond mundo; esun cu no tin hopi pa gasta ta usa mayoria di su placa n’e dos categorianan menciona aki. 

E realidad aki nos ta mira refleha den e cifranan di inflacion na Aruba tambe. Si berdaderamente ta desea di baha costo di energia en general, lo mester bay mas den direccion di energia di biento y solo, tambe pasobra aki tin e oportunidad pa logra prijs mas abao. Pa ilustra esey, ta conoci na publico cu e prijs di energia di biento ta un fraccion di e prijs cu actualmente e consumidor ta paga? Durante Dialogo Social mas di 10 aña pasa a bin resulta cu e prijs – di e tempo ey – pa un KWh di e molinonan tabata na Afl.0,18, un ganga compara cu e prijs casi triple di energia a base di heavy fuel oil. Naturalmente no por conta cu un fuente di energia so, pero si por duplica e contribucion di energia di biento, ya esaki por tin influencia considerable riba prijs di coriente. Tambe energia solar en general ta sali mas barata pa KWh cu produccion a base di fuel oil o gas. Pakico nos politiconan nunca ta papia di e cosnan aki? Pakico a laga nos pega den e mesun situacion aki durante tanto aña, unda practicamente nada a sosode riba e tereno aki, salvo e tremendo fracasonan di tanto LNG como hidrogeno, si e alternativanan renovable ta sali mas barata?

Honestamente, nos no ta mira Gobierno atende e problema di prijs di comestible halto. Pero pa ciudadano di menos recurso tin dos otro area di interes grandi: Vivienda y transporte.Den ambos caso Gobierno lo mester inverti, pa por tin un situacion sano di vivienda y transporte pagable. Ta inaceptable pa bisa awor cu economia a drecha, pero solamente p’esnan cu tabatin perspectiva caba. 

Despues di casi dos aña, finalmente Corte a trata e caso penal contra sra. Solange de Castro y otro tres acusado pa un suma di mas cu tres miyon florin estafa. Ta acusa e grupo aki di desfalco, estafa y labamento di placa den e periodo di 2017 pa 30 di mei 2023. Dia 22 di januari awor Corte lo anuncia su decision den e caso aki, unda Ministerio Publico a demanda un castigo di prison di 4 aña.

Sra. Solange de Castro, siendo un experto den asunto di belasting a podera di placa di clientenan cu el a ricibi pa paga diferente tipo di belasting, pero nunca a realisa e pagonan. Na su lugar, el a uza e placa pa asuntonan personal, y e mes no por bisa durante tratamento di e caso, cual tabata su debenan y con el a haya su mes den situacion cu asina hopi placa gasta.

Tristo den esaki ta cu el a uza su ex-pareha y su dos yiunan, kendenan awor a haya nan mes dilanti mesa berde. Y nan ta nenga rotundamente di a actua deliberadamente hunto cu sra. Solange de Castro. E otro acusadonan ta Micheal Ras, Edmee Arends y Kendrick Farro. 

Na inicio di tratamento di e caso, Huez a splica cu ta trata di un suma di mas cu 3.4 miyon florin cu a estafa of laba den e periodo di 2017 pa mei, 2023. Den e caso di Farro, kende tabata su ex-pareha, e tabata uza e cuenta bancario di dje pa haci transaccionnan y a menciona cu a pasa rond di 100 mil florin p’e cuenta ey y despues tabata sak’e cash. Mesun cos cu el a haci cu su yiunan Ras (mas cu 340 mil florin y Arends (40 mil).  Cu e yiunan, segun nan splicacion, e mama tabata bisa nan cu e tin problema cu su cuenta y pa nan yud’e. 

E ta manda e placa pa nan y nan ta sak’e entrega e suma completo na dje. Ambos ta bisa di no a sospecha nada ilegal y tabata simplemente haci nan mama un fabor, ora cu e tabatin problema cu su cuenta. Ademas, no a sospecha nada, pasobra semper ta mir’e ta traha. Como consehero di Impuesto, e tabata atende e cliente cu ta yega cerca dje, via un compania cu ta poni riba nomber di su mama. 

Pero su mama en realidad no tin nada di haber cu e compania. E tabata haya e placa di e clientenan pa haci e pago. Pero no solamente e no ta haci pago, pero tampoco e trabou. E clientenan perhudica a keda sin nan placa, y banda di esaki a keda cu un cuenta habri na DIMP y boet pa cada pago cu no a haci.  

Kico bo a haci cu tur e placa, Huez a Solange de Castro. E splicacion cu de Castro a duna ta cu el a haya su mes den problema financiero y den su desesperacion a busca e solucion mas facil. Y a bisa tambe cu semper el a keda cu e speransa di por pone e placa bek un dia, pero no a logra. 

Den e investigacion a constata cu e ta gasta basta placa na catochi. Ministerio Publico a calcula cu e ta gasta rond di 73 mil florin pa aña. “Tin biaha mi ta gana tambe,” el a contesta Fiscal y Huez. A detene Solange de Castro y el a keda 114 dia den detencion preventivo. E mes durante e tratamento di e caso a acepta su rol den e caso. 

“Semper mi a acepta mi culpabilidad. A pone beslag riba mi cas caba pa paga e debe y mi lo paga e resto. Pero sera den KIA mi no por traha pa caba di paga e debe,” el a bisa Huez. E dos yiunan a bisa cu nan ta completamente inocente di e acusacionnan y no a traha deliberadamente cu e estafa cometi dor di nan mama.   

Fiscal ta haya tur culpabel y a pidi pa Kendrick Farro 100 ora di trabou a comunidad; Pa Michael Ras castigo di 7 luna; pa Edmee Arends 60 ora di trabou na comunidad y pa Solange de Castro mes a pidi un castigo di 4 aña. Dia 22 di januari proximo lo tin sentencia den e caso aki.

Mas di 40 analista y specialista riba tereno di criminologia di aproximadamente 20 pais y isla di Caribe a bini hunto na Santo Domingo p’e di tres encuentro regional, ‘Regionale Netwerkbijeencomst voor Analisten’ (RNA), e aña aki cu e tema STRATEGIC INSIGHTS: CRIMINAL NETWORKS, FINANCIAL CRIME, DRUG FLOWS AND THE ROLE OF AI. Colegio di Hefenan di Polis di e 4 cuerponan den e parti Caribense di Reino a organisa e encuentro cu e meta di fomenta cooperacion regional den e lucha contra crimen transfronteriso.

Apertura di e encuentro tabata na encargo di Leonne van Vlimmeren, Embahador suplente di Reino Hulandes pa Republica Dominicana; Vice Almirante Jose Manuel Cabrera Ulloa, hefe di Direccion Nacional de Control de Drogas (DNCD); y Raymond Ellis, hefe di polis di Corsou y representante di Colegio di Hefenan di Polis. 

Van Vlimmeren a referi na RNA como “un foro unico caminda analista por siña conoce otro mihor, reconoce cierto patronchi y duna otro sosten transfronteriso.” Cabrera Ulloa a mustra riba e hecho cu crimen organisa ta move rapidamente di un pais pa otro y cu ‘nos reaccion mester ta coordina, bon fundamenta y basa riba informacion cu nos ta intercambia cu otro.’ Ellis a agrega na esaki bisando: ‘Analista ta combina informacion los pa duna un bista cla. 

Ora e analistanan di diferente isla traha hunto, e rednan criminal ta perde un di nan bentahanan di mas importante: Fragmentacion.’ Hunto, tur e contribucionnan a duna un bista amplio y detaya di criminalidad den nos region: Tiroteo, cifra di asesinato, trafico di droga, violencia hubenil, uzo di zona vulnerabel na costa, cooperacion entre e rednan di diferente isla, crimen cibernetico y e rol cada bes mas importante di Inteligencia Artificial (IA) y plataforma online.

Tabatin tambe algun contribucion cu a yuda contextualisa e desaroyonan aki den un perspectiva mas amplio. Dr. Evan Ellis a describi con cambio geopolitico ta afecta region di Caribe di manera cu, mas y mas, nos region no ta solamente un ruta di transito sino mas bien parti di e cadena logistico di cocaina y otro mercancia ilegal. 

E expertonan di Global Initiative Against Transnational Organized Crime (GI-TOC) a mustra con Caribe a desaroya pa bira un plataforma pa almacena, re-empaketa y redistribui cocaina, y a enfatisa e relacion cu tin entre traficacion di droga y arma di candela. E rol di tecnologia y inteligencia a bin dilanti den e contribucionnan di John Bloebaum y Thom Snaphaan. Nan a mustra cu, pa por haci analisis di calidad, mester formula e preguntanan operativo na un manera skerpi, y cu “financial crime scripting” ta yuda detecta operacion di labamento di placa y fraude.

Assistant Commiscioner Leonardo Brown, hefe di departamento tecnologico di Jamaica Constabulary Force (JFC), a haci un presentacion riba desaroyo di recurso digital den JCF. Representando CARICOM IMPACS, Terrance Roopchan, hefe di e unidad di inteligencia contra crimen, arma di candela y gang y di e unidad di apoyo operacional di Regional Intelligence Fusion Centre, y Dale Joseph, analista hefe di Cyber Fusion Unit, a trata e tendencianan actual cu por mira den traficacion di arma di candela, formacion di gang y crimen cibernetico.

Angelo Brete, hefe di FIU Aruba, a presenta un perspectiva financiero, mustrando con transaccion poco usual ta yuda identifica labamento di placa den varios sector, manera di real estate, wega di placa, comercio internacional y mas.

E encuentro tabatin un mensahe central masha cla: Menasa regional ta pidi un acercamento regional. E analistanan ta mira con facil arma di candela ta move di un isla pa otro, con medionan social ta yuda grupo hubenil riba diferente isla drenta den contacto cu otro, con e rutanan di droga ta cambia rapidamente ora presion aumenta y con criminalidad ta probecha di e buraconan cu tin den e colaboracion. 

RNA ta yuda sera e buraconan aki, reforsando e contactonan personal, agilisando comunicacion, dunando mas aceso n’e metodonan analitico cu ta disponibel y dunando un y tur un bista di e patronchinan cu ta desaroyando.

Colegio di Hefenan di Polis a sera e encuentro reafirmando cu lo sigui desaroya RNA como plataforma regional anual. Manera CARICOM IMPACS a expresa: “Colaboracion no ta costa nada, fragmentacion si.” E edicion di 2026 tambe lo wordo organisa den colaboracion estrecho cu e partnernan di nos region.

Un dia grandi pa pais Aruba cu e fase uno (1) di restructuracion salarial p’e veld di enseñansa. Prome Minister mr. Mike Eman cu atencion riba e importancia di reconoce e trabou duro, mas ainda ora ta trata di traha pa bo pais, cu e salario ta husto.

Premier Eman ta mira atras n’e pensionadonan cu tambe a haya un ahuste mereci, ademas di compensacion adicional cu Gobierno a pone. Tur esaki di haber cu e forma husto cu kier distribui salarialmente, na cada un cu ta contribui cu nos pais.

No tabata un tarea facil, a hiba 30 aña pa yega n’e realisacion aki. Palabra di felicitacion na Minister di Enseñansa mr. Gerlien Croes, perserverancia di e sindicatonan p’e reforma salarial, cu awe ta marca historia y ta bira un realidad.

“Sumamente contento p’e maestronan di scol”, ta locual Premier Eman a expresa. Mirando e sacrificio y nececidad cu e comunidad ta pasa aden, ta compromiso di e Gobierno aki pa sigui bringa pa mehora e calidad di bida di tur ciudadano y yega na situacion husto pa un y tur. Kier mira pa e siguiente generacion no tin e retonan aki pa pasa aden pa sobrevivi y enseñansa t’e instrumento fundamental pa haci e diferencia.

Pa garantisa cu e siguiente generacion surpasa e retonan aki, ta importante pa tin bon educacion y pa logra esaki mester tin maestronan di scol cu ta recompensa/compensa debidamente.

Minister di Enseñansa, Gerlien Croes y e sindicatonan SIMAR, TOPA y SEPPA a logra esaki awe. Sin laga afo e espacio financiero cu Minister di Finansas, mr. Geoffrey Wever ta crea p’asina logra e prome fase di e restructuracion aki. Simbolicamente a firma e declaracion aki den e edificio historico di Algemene Rekenkamer cu ta Aruba su prome Scol Publico. Esaki como simbolo di e compromiso di Gabinete AVP-FUTURO pa cu e progreso di Pais Aruba por medio di enseñansa. 

Cu aprobacion di Presupuesto 2026, esaki lo wordo formalisa. Masha pabien na Aruba y tur maestro cu awe ta mira historia tuma lugar.

Dia 3 di December ultimo, Aruba a uni n’e comunidad mundial pa conscientisa riba e Dia Mundial di Personanan cu Limitacion, un dia declara pa Nacionnan Uni. E dia aki ta fungi como un momento di reflexion y accion, resaltando e derecho, talento y oportunidadnan igual cu mester ta accesibel pa tur hende, sin importa e habilidad fisico of cognitivo.

Diarazon mainta, Minister di Turismo, Labor y Transporte mr. Wendrick Cicilia, CEO di Aruba Ports Authority, Marc Figaroa y Caroll Kock di Trampolin pa Trabao a firma un MoU pa brinda un sosten financiero na Trampolin pa Trabao y alabes a entrega un kiosko situa na Welcome Plaza p’asina e hobennan por participa productivamente den nos comunidad.

Aruba ta un comunidad diverso unda creatividad, talento y habilidad ta biba den cada ciudadano. Nos adulto y hobennan cu discapacidad ta contribui di un manera significante na nos sociedad y nos economia, ta nos responsabilidad comparti pa garantisa cu cada persona tin e oportunidad pa participa debidamente.

Minister Wndrick Cecilia a bisa cu: “Iniciativanan manera One of A Kind Cafe situa na MFA Paradera ta demostra nos cu inclusion no ta un lema sino un realidad di bida. Nos hendenan kier participa, sinti nan mes aprecia y haya e oportunidad pa demostra cu ningun limitacion por stop nan creatividad of habilidad.”

Un prioridad central di Ministerio di Labor ta pa fortalece intermediacion laboral y crea trayectonan sostenibel pa empleo p’esnan cu ta enfrenta bareranan pa drenta den e mercado laboral. Proyecto manera Trampolin pa Trabao ta hunga un rol esencial dor di sostene e personanan cu autismo, down syndroom of limitacion fisico pa nan por tin aceso na oportunidadnan laboral. 

“Discapacidad no ta defini loke un persona por of no por haci. Igualdad di oportunidad mester ta accesibel pa tur hende. Trampolin pa Trabao ta un partner esencial pa yuda construi un mercado laboral inclusivo cu nos pais merece”, asina Minister Wendrick Cicilia a declara.

Ministerio di Tursimo den colaboracion cu Aruba Ports Authority (APA), tambe ta tumando pasonan concreto pa integra inclusion den e experiencia di e bishitante. Welcome Plaza, cu pronto lo conoce un renobacion, lo bira un espacio caminda e turistanan por conecta di un manera significante cu e comunidad di Aruba.

Pa medio di Trampolin pa Trabao, e personanan cu limitacion lo mustra y bende nan artesania y recuerdonan traha na man n’e bishitantenan di crucero. Oficialnan asigna di informacion lo guia e turistanan n’e kiosko aki, garantisando visibilidad, compromise y oportunidad economico.

“E iniciativa aki ta trece nos un stap mas cerca di e comunidad inclusivo cu nos ta anticipa, uno caminda adulto y hobennan cu limitacion fisico of cognitivo por participa completamente y haya acceso na oportunidadnan cu ta destaca nan balor”, tabata palabra di Minister Cicilia.

Fin di siman, un delegacion di Gobierno di  Aruba lo mester a sali pa Hulanda pa atende un serie di temanan importante. Prome Minister mr. Mike Eman ta riba programa pa duna un di e principal lecturanan riba relacionan den Reino dia 9 di december durante Inter Expo-Koninkrijk, hunto cu entre otro Ministernan di Estado Balkenende y Hirsch Ballin.

Tambe Prome Minister Eman lo a tene reunionnan cu principalnan di formacion di un Gobierno nobo na Hulanda. Riba programa ta tambe firmamento di un acuerdo nobo cu Grupo Schiphol.

E situacion den region y responsabilidad di Prome Minister mr. Mike Eman pa dirigi e preparacion y evaluacionnan di e scenarionan den region a pone Minister President, Mike Eman yega na e decision aki. Mike Eman ta bisa cu no tin informacion specifico di kico lo por pasa of cu lo pasa of ki dia, pero cu e tension ta palpable y nos tin un responsabilidad na cas n’e momentonan aki den coordinacion cu autoridadnan di Relacion Exterior y Defensa di Reino y nos instancianan local.

Recientemente Minister di Finansa, Asunto  Economico y Sector Primario, Geoffrey Wever a presenta e “Economic Outlook November 2025- 2027” di Departamento di Asunto Economico, Comercio y Industria (DEACI). E “Economic Outlook 2025- 2027” ta contene un ahustacion di e crecemento economico pa 2025 y ta duna un proyeccion pa 2026 y 2027 cu ta basa riba informacion te cu 1 di october riba nos economia.

“Economic Outlook November 2025- 2027” ta mustra cu Aruba su economia den 2025 a premira pa crece mas cu a wordo proyecta den e luna di mei. DEACI ta haci un ahustacion di 3.9 porciento pa 5.9 porciento p’e crecemento di Aruba su economia pa 2025 den termino nominal pa yega na un balor di e producto interno bruto (PIB) di 7.8 miljard florin, e indicador pa midi actividad economico. Pa 2026 e expectativa ta positivo p’e desaroyo economico di Aruba. 

DEACI ta premira un crecemento nominal di 2.6 porciento den 2026 cu un balor pa e product interno bruto di 8.0 miljard florin. Pa 2027 DEACI ta premira cu Aruba su economia lo sigui crece cu 1.9 porciento pa yega na un balor di 8.2 miljard florin den termino nominal.

E expansion di actividadnan economico pa 2025 ta basa riba crecemento di turista cu ta bishita nos isla y crecemento di consumo empuha p’e adaptacion di e tarifa di Inkomstenbelasting di 10 pa 0 porciento, e subida di reparatietoeslag cu 250 florin tur luna na pensionadonan desde 1 di mei 2025. E revision di proyeccion di crecemento di economia di Aruba ta den liña cu e proyeccion di Banco Central di Aruba y Fondo Monetario International. 

Banco Central di Aruba den su economic outlook di november 2025 ta premira pa 2025 y 2026 un crecemento economico di respectivamente 6.2 porciento y 3.3 porciento den termino nominal. Segun e world economic outlook april 2025 , Fondo Monetario International ta premira pa 2025 y 2026 un crecemento economico di respectivamente 3.7 porciento y 4.5 porciento den termino nominal.

Pa facilita proyeccion di e economia di Aruba, DEACI ta haci uzo di e modelo macro-economico MARUBA. E modelo MARUBA ta basa riba e Cuentanan Anual di Pais Aruba publica pa CBS y ta refleha e funcionamento di e economia di Aruba. Maneho di e modelo MARUBA ta cay bao responsabilidad di DEACI. E proyeccionnan economico ta posibel danki na e dialogo continuo cu diferente instancia y expertonan local, y a base di analisis di diferente desaroyo.

Analisis tur luna di entradanan di belasting ricibi na entre otro BBO y Invoerrechten tabata duna un panorama cu Aruba su economia ta creciendo mihor cu na 2024. Awe DEACI den cooperacion cu demas expertonan cu ta forma parti di e Comision MacroModel ta confirma cu pa 2025 nos economia lo crece cu 5.6 porciento compara cu 2024 segun Minister Geoffrey Wever.