Esaki t’e sinberguenceria cu pueblo mester rechasa, pa Aruba tin un relacion cu Royal Schiphol Group pa maneha nos Aeropuerto. Esaki t’e prijs cu nos tin cu paga? No por!!! Tabata Diabierne ultimo cu pueblo a haya sa cu Gobierno di Aruba a bai di acuerdo pa pidi un excepcion di e ley Normering Topinomens (LNT) pa por paga e futuro CEO di AAA N.V. un suma di Afls. 1.089.396.00 pa aña cu ta equivalente na Afls. 90.783.00 pa luna. Un salario mas halto cu nos propio Gobernador ta gana pa luna.

Pa colmo t’e Minister di Finansas, Geoffrey Wever a firma e Landsbesluit aki cu tin sosten di tur Minister di Gabinete AVP-FUTURO. Esaki t’e prijs cu nos tin cu paga pa un “stranhero” bin maneha nos Aeropuerto, siendo e mesun grupo aki di Schiphol tambe a comete errornan pa cual e Proyecto di Expansion ta coriendo lat. Pa colmo mesun grupo di Schiphol aki no a cumpli cu algun punto di e convenio, e.o. ningun dia no a permiti pa un Arubiano ta un counter-part pa un dia nos por tin un Director Arubiano na cabez di Aeropuerto. Y awor cu yudanza di Gobierno Hulandes, Aruba su Gobierno ta sucumbi p’e excepcion di ley di LNT.

Bo ta punrra bo mes, pakico Hulanda a impone e Landspakket riba nos Gobierno, unda e.o. tur Minister y Topambtennarnan mester a entrega 20 pa 30% di nan salario. Dicon Hulanda no ta bisa nada awor. No ta pesey Gobierno Hulandes a bin ta impone control riba maneho di nos finanzas? Te cu awor kier bin cu e Rijkswet HOFA riba nos?

Maske cu tur Minister di Gabinete AVP-FUTURO a bai di acuerdo cu e decreto nacional aki, inmediatamente cu a bira conoci e SINBERGUENCERIA aki, ata lider di FUTURO, Minister Gerlien Croes ta bin laba man y declara cu e decreto nacional aki ta un peticion di partido AVP, unda Minister Wendrick Ceclia a haci e peticion na Minister Geoffrey Wever, y cu tin sosten di Prome Minister Mike Eman. Si berdad Aruba ta desea pa Grupo di Schiphol bin maneha nos aeropuerto, e no por bai di acuerdo cu loke nan kier. LNT ta ley pa ser respeta. Ningun hende por para riba ley. Maske den un caso hudicial cu dos funcionario top, esta Director di Hospital y Director di APFA a bin gana nan caso, cu Gobierno no mag mishi cu nan salario, loke ta haci cu awor lo bin mas caso di Corte, unabes cu a haci un excepcion pa tur esnan cu a “entrega” 20 pa 30% di nan salario pa recobra esaki. Esey tambe Minister Gerlien Croes a bisa den su reaccion.

Siman pasa, nos a sigui un charla di Miguel Mansur, ex lider di su partido Accion 21, unda el a elabora riba e forma di hiba politica di miedo na Aruba, cu ta motibo cu pueblo no kier compronde, si berdad pueblo kier cambio. Mesun cos nos por bisa cu ex Minister Ursell Arends, awor di no ta forma parti di Gabinete Wever Croes mas, ta demanda pa haci un investigacion di 200 miyon florin (mal)usa pa un refineria na Aruba cu no ta ni den operacion. Pakico Ursell Arends no a denuncia esaki dia cu el a forma parti di Gabinete Wever Croes? Pa miedo?

E ley di excepcion aki p’e futuro CEO di Aeropuerto lo tin su consecuencia. Parlamento, gremionan sindical y comercial no por keda keto. Mester demanda pa revoca e ley aki, si kier sigui papia di Good Governance Code. Si cuminza na tornu na ley di LNT, anto anule por complete. Aruba ta demanda pa su politiconan/parlamentarionan tin curashi pa demanda un cambio di berdad. Si esaki tin consecuencia cu Schihol Group ta bai, so be it. 

En conexion cu emeritacion di neurociruhano prof. dr. Bart van der Zwan di UMC Utrecht (UMCU), Dr. Horacio E. Oduber Hospital (HOH), tabatin e grato placer di ricibi un donacion sumamente valioso, riba inicitaiva di su persona, di e compania Aleman ‘Peter Lazic’ y e compania Hulandes ‘Circle Medical’. Un momento grandi, pasobra e profesor a baha cu pensioen y a tuma e momento aki pa haci un donacion valioso na Hospital Dr. Horacio E. Oduber.

E donacion ta consisti di un set di instrumento neurovascular, e.o. clipnan di aneurisma di diferente tipo, ‘appliers’, un ‘tray’ y tambe un sistema di tag. E instrumento y implantenan aki ta haci posibel pa realisa operacionnan complica di aneurisma di un manera sigur y efectivo na Aruba mes. Awor pashentnan no mester bay den exterior mas pa un operacion asina, y mihor ainda, pasobra pa hopi di nan, e ta un operacion di urgencia cu ta salba nan bida.

E colaboracion entre dr. Van der Zwan y Niels Weynschenk di Circle Medical ta uno cu ta existi ya pa hopi aña caba y a inicia na UMCU. E team aki a yuda Aruba hopi biaha caba den pasado, sea cu nan conocemento of cu material y cu e donacion importante aki ta fortalece e laso mas ainda. Durante luna di juli di e aña aki, e colaboracion aki a demostra su balor durante un operacion di urgencia riba un turista Mericano, cu asistencia di neurociruhano dr. van der Zwan y HOH su team local, a resulta un exito total. 

Segun dr. van der Zwan: “Esaki no ta solamente confirma cu e colaboracion ta esencial, pero tambe cu HOH tin acceso na un kamber di operacion bon ekipa y tambe un team di kamber di operacion profesional y capaz pa haci operacionnan neurovascular cu ta complica. Ta importante pa corda cu un clip no ta solamente sera, pero ta uni tambe mas ainda!”

Drs. Jacco Vroegop, Presidente di Hunta Directiva di HOH orguyosamente ta mira bek riba e desaroyo di e colaboracion cu UMCU: “Algun luna despues cu mi a cuminsa traha na HOH, nos a start cu’n colaboracion intensivo hunto cu prof. Pierre Robe di UMCU y nos ciruhano local Greg Lacle pa amplia e pallet di neurocirugia, crea un mihor distribucion di trabou pa nos team y pa comparti conocemento y experiencia. Loke a cuminsa cu un solo specialismo a crece bira un red mas amplio cu varios disciplina. Pa mi, e cuido neurovascular tin un aprecio special den mi curason. Mi prome experiencia cu operacionnan di e tipo aki tabata durante mi prome stage na aña 1997 di Dijkzigt Ziekenhuis (awor Erasmus MC) na Rotterdam. Mi ta hopi orguyoso cu a logra crea un legado hunto cu un team entusiasma di HOH y tambe di UMCU. E clipnan pa neuro-aneurisma cu nos a ricibi lo bay salba bida y esey ta simbolisa exactamente loke nos ta para pe: Sigui traha riba un mihor hospital y un mihor cuido pa nos isla.”

HOH ta sumamente agradecido na prof. dr. Van der Zwan, e companianan Peter Lazicy Circle Medical, UMCU y prof. dr. Robe, cu nan donacion valioso contribuyendo asina na un cuido mas Fuerte na Aruba, pa nos comunidad y nos bishitantenan. Niels Weynschenk a conclui: “Na momento di duna pa uno, dos y hopi mas persona lo bira feliz! Esey alfinal ta loke bida ta!”

Recientemente ex Minister Ursell Arends, formando parti di Gobierno di Evelyn Wever Croes a declara publicamente cu mester laga haci un investigacion di e suma di 200 miyon florin cu Gobierno a pone pa tene refineria di Aruba operacional, siendo e no ta produci net nada. E proposicion aki a sorprende tur hende, pasobra Ursell Arends, siendo e Vice Prome Minister, lider di partido RAIZ, mester ta na altura di decisionnan cu Prome Minister Evelyn Wever Croes ta tuma.

Ursell Arends a splica pa Den Noticia, den e Gobierno cu su partido a forma parti di dje, no ta tur asunto ta keda discuti hunto. Manera e decision aki mes, el a bin tende cu un decision a ser tuma, pero decision tuma, ora cu partido RIAZ su Ministernan no tabata presente.

Actualmente tin un investigacion profundo ta tumando lugar, te hasta a conduci pa suspende Director di RdA, Ricky Lacle. E lo a otorga trabao di p.e. na drechamento di haf di San Nicolas, cu tabata cayendo aden, sin a tene un destaho publico. E contratista cu a haya e trabao aki a cobra un dineral di placa, sin ainda e haf a keda 100%, pero mester a lapi’e, de lo contrario Aruba lo por a keda sin suministro di productonan petrolero cu mester p.e. pa WEB, pa fuel avionnan na Aeropuerto y pa benta di gasoline pa tur auto na Aruba. Ta un disaster lo tabatin, pero e drechamento a scapa e situacion, pero a paga un prijs masha halto. Ta di spera cu e investigacion tuma su curso pa e.o. aclarea e 200 miyon pa tene e refineria operacional.

Mester investiga tambe con buffete di abogado Croes, Wever & Ruiz a haya encargo pa termina e contract cu CITGO, exonerando e compania pa su obligacion financiero na razon di 320 miyon dollar. Placa cu tabata destina pa rehabilita terreno di e refineria. Sin mencion haci di dje, Minister Glenbert Croes a cuminsa cu desmantelacion di e refineria, sin anuncia esaki, pero tabata amigonan contratista tabatahaya e trabao pa haci, contra pagonan miyonario. E investigacion aki tambe mester ta tumando lugar, pa cual Glenbert Croes a hay’e obliga di retira como Minister y hasta for di MEP.

 Un caso cu a hala masha atencion, tabata e caso cu 3 trahador den servicio di Gobierno a dicidi di cuminsa un caso hudicial, pasobra Gobierno a nenga di cumpli cu nan di otorga nan respectivo promocion. Nan a bin ta gosa di cierto libertad cu nunca di nan bida nan lo a conoce siendo un trahador den e sector priva y pa algun tempo caba Gobierno a cuminsa actua pa mira con lo yuda baha gasto di personal, dor di elimina algun di e situacionnan cu realmente no tin base legal,  pero a bira un tradicion.

Un di situacionnan aki a wordo trata algun dia pasa den Corte di Prome Instancia caminda un grupo di trahador- y ex trahadornan publico, a acudi na Huez pa atende cu promocion cu e trahadornan ta insisti cu nan mester a ricibi, pero cu Gobierno a dicidi cu nan no tin derecho ariba.

 Pa decadanan caba tin un situacion cu trahadornan di Gobierno  constantemente ta “meld ziek” caminda den mayoria di caso esaki lo por ta corecto, pero na mes momento hopi t’e casonan cu funcionarionan den servicio di Gobierno, ta keda cas un of mas dia, segun cu ley ta permiti y den cierto forma Gobierno ta paga salario n’e hendenan aki, mientras cu no ta tur realmente ta sufri di un malesa of algo por estilo.

Kisas e caso cu mas a hala atencion tabata di demandante a acudi na Corte pa su promocion cu el a anticipa di lo a ricibi, Gobierno no a honra esaki y Huez a bay di acuerdo tambe cu Gobierno y tambe a mustra riba algun situacion cu a surgi cu e trahadornan aki, kendenan mientrastanto a baha cu pensioen.

E funcionarionan aki a keda malo na cas pa un periodo di 551 dia (mas cu un aña) cu na momento di analisa esaki, e demandantenan aki keda mas algun dia mas cu dos aña largo, pero el a haya ta na su lugar cu Gobierno mester a aproba su promocionnan, apesar cu e no a produci.

Den su periodo cu nan tabata na cas e dos añanan aki, e demandante a ricibi beneficio cu semper tabatin como funcionario publico, pero diabierna Huez a mustra e personanan aki cu nan no tin e derecho riba e promocionnan cu nan a pidi, ya cu nan a aplica p’esaki mucho lat y pa colmo su periodo pa baha cu pensioen a yega loke a kita e derecho riba cual nan ta referi na dje.

Varios otro funcionario tambe a  bay Corte pa bringa nan promocion, pero tur tabata trahadornan cu a keda cas hopi sigur pa un periodo largo, pero mayoria di nan no a logra na convence Huez cu nan argumentonan.

Esaki ta un di e motibonan cu Gobierno kier introduci e Sistema di Evaluacion, Produccion di tur empleado publico, loke e sindicatonan a bin ta bringa pa no introduci e sistema aki.

Minister di Finansas, Asunto Economico y Sector Primario, mr. Geoffrey Wever, den su calidad di representante di Land Aruba como unico accionista di Free Zone Aruba N.V. (FZA), a reuni cu e Hunta Comisario di FZA N.V.

Durante e reunion a presenta e cuentanan anual pa aña fiscal 2024 y a elogia e maneho di Hunta Comisario, bao guia di President-Commissaris mr. Patrick Brown y di su directive p’e manera cu nan a cumpli nan tarea y p’e forma cu nan a guia e proceso di transicion.

Despues di un proceso di reorganisacion di Free Zone Aruba NV, cu pa añanan a hiba perdida, e resultado pa 2024 a conoce un incremento di entrada di mas o menos 400 mil (27.5%), compara cu 2023. Un “net result” di 320 mil florin y un “operating result”di 85 mil florin. Por nota cu e cambionan cu a haci den e empresa a duna su frutanan, y tambe e hecho cu companianan nobo a bin establece den Free Zone Aruba NV a trece entradanan adicional, cual ta un desaroyo positivo. Proyeccionnan pa aña 2025 ta mas positivo ainda cu 2024.

Minister Geoffrey  Wever a felicita e Hunta Comisario y e empleadonan di FZA NV pa nan esfuerso pa recupera y fortalece stabilidad financiero di FZA NV y a enfatisa cu e situacion financiero ta demostra un mehoracion significativo, y ta refleha e resultado di un maneho mas estricto.

Hunto cu FZA NV ta den e proceso di formalisacion di un acuerdo laboral nobo cu un Director di Free Zone Aruba NV. A haci un proceso di solicitacion publico caminda cu tur hende por a participa y pronto lo anuncia ken lo bira e Director nobo di FZA NV, cu lo cuminsa maneha e empresa desde 2026 pa hiba e empresa den un era nobo.

E reunion aki ta confirma e compromiso di Gobierno pa fortifica e institucionnan cu ta fundamental pa desaroyo economico sostenibel di nos pais, den linea cu e meta di “Programa di Gobernacion AVP-FUTURO 2025-2028”.

Te cu September ultimo, segun datonan recibi, Aruba tabatin 4994 Airbnb registra, pero un luna despues, esta na October ultimo, loke a hala atencion ta cu dicho cantidad di Airbnb registra a baha te 4073.

Esaki nifica 921 propiedad a cambia di compania di maneho nobo y bo ta puntra kico tin tras di e operacion aki. E construccion aki ta haci’e e.o. masha dificil pa DIMP por cobra loke ta coresponde como entrada di belasting cu e airbndnan ta genera.

Conocedornan di e industra aki ta indica cu esaki ta motibo tambe cu “management companies” na Aruba a redobla di 300 pa 600 ompania registra na Camara di Comercio, debi na falta di un control debido riba entradanan di e cantidad di Airbnb na Aruba.

Un biahe mas, nos ta bisa, cu nos Parlamento/Gobierno no mester inventa e wiel di nobo. Regulacion di mercado a ser haci caba p.e, na Spaña y Francia, unda nan si a mira e urgencia pa bin cu ley pa regula nan respectivo mercado.

Siman pasa, nos a mustra cu Bonaire (Hulanda) a reglamenta e situacion, unda masha hopi hende di e.o. Canada, Merca y hasta for di Hulanda ta trata di cumpra cas of haya terreno pa traha nan Airbnb. Kico nos Parlamentarionan ta warda?

Ya caba ta ser mira cu futuro seguridad pa trabao di mas di than 15.000 trahador emplea den nos resortnan por perde nan trabao, unda Aruba su economia ta depende asina tanto di dje.

 Mientras cu e proceso di formacion di un Gobierno nobo di coalicion a ranca sali caba,  por indica cu e unico berdad cu tin n’e momentonan aki riba mesa durante di e intervencionnan cu a bin ta tumando lugar, t’e hecho cu Geert Wilders, kende su partido PVV a keda na di dos lugar despues di D66, cu mesun cantidad di asiento, lo no forma parti di un Gobierno nobo.

Ora cu analisa tur declaracion cu a ser haci despues di eleccion, por bisa cu e partidonan cu a saca hopi asiento den Tweede Kamer, no tin confiansa cu Geert  Wilders lo no haci loke el a haci algun luna atras, esta di manda gabinete Dick Schoof cas y riba dje su postura arogante con el a trata otro politiconan durante di debatenan, a pone cu e deliberacionnan cu a bin ta tumando lugar, practicamente no tin participacion di Geert Wilders den esakinan.

Manera ta conoci pa loke ta cantidad di asiento, PVV a logra mesun tanto cu e partido ganador di D66 a logra  cu ta 26 asiento, cual sin duda lo tabata casi suficiente pa dirigi e proximo Gobierno, pero e forma di proceder di Wilders, a sera practicamente tur porta pa su participacion den e proximo Gobierno di coalicion.

Fuera di e dos partidonan grandi aki cu a logra 26 asiento, tin  partido VVD cu a logra 22 asiento cu pa hopi tabata un tipo di triunfo mirando cu den tur encuesta prome cu e eleccion di siman pasa,  tur encuesta a duna e partido di e ex lider Mark Rutte, solamente 14 pa 15 asiento, pero e partido a sorprende formalmente y tin un posicion  hopi stabiel pa forma parti di e proximo Gobierno.

GroenLinksPvdA  a logra 20 asiento, pero tampoco ta mustra cu lo no tin mucho posibilidad p’e ta den e proximo coalicion, ya cu apesar cu e lider di D66 lo kier papia cu e lidernan nobo di e partido, e lider di VVD, Dilan Yesilgöz, a sigura cu e posibilidad pa su partido forma Gobierno cu GroenLinksPvdA, no ta existi.

El a mustra cu  esaki ta un punto cardinal riba cual henter e campaña electoral di su partido tabata insisti riba y awor no por bira haci algo cu lo kibra e confiansa cu sostenedornan di e partido.

Por lo pronto lo no logra di forma un Gobierno di coalicion nobo p’e aña aki y kisas e por yega te cu medio di 2026.

Siman pasa Bureau di Investigacion Financiero (BFO) di Cuerpo Policial di Aruba a realisa un accion dirigi, den cuadro di un investigacion financiero cu ta bin andando, y cu ta hiba e nomber di ‘Venkel’.

E accion a tuma lugar den colaboracion estrecho cu otro departamentonan di Polis y cu Recherchesamenwerkingsteam (RST). A detene un total di 4 sospechoso y a lista dos cas y tres local comercial. Durante e accion, a confisca varios cargado di dato, cantidad grandi di placa cash y auto. E sospechosonan ta wordo sospecha di a laba cantidad grandi di placa via cripto valuta.

Cripto valuta ta placa digital, den cual e almacenamento y transaccionnan ta core via un red di computer, sin supervision di banco. Juist pasobra e transaccionnan hopi biaha ta bay anonimamente y atrabes di fronteranan internacional, ta mas dificil pa rastrea di unda e placa ta origina.

E tecnologia di cripto valuta por wordo abusa pa move ganashinan criminal pafo di bista di proveedornan di servicio of di autoridadnan, cu e meta pa cubri e ganashinan procedente di crimen.

Ministerio Publico ta considera labamento di placa como un di e pilarnan principal di criminalidad cu ta mina sociedad. Labamento di placa ta no solamente un delito financiero, sino tambe e motor di crimen organisa. Sin e posibilidad pa uza nan ganashinan ilegal, criminalnan ta perde nan motibo principal pa comete crimennan: placa!

P’e motibo ey, e lucha contra labamento di placa ta no solamente un lucha contra cifranan riba un cuenta bancario of den computer, sino un lucha contra e infrastructura completo di baho mundo. Ministerio Publico ta traha di cerca cu varios partner pa combati labamento di placa na manera efectivo. 

E accion di siman pasa a subraya cu fluho di placa criminal, no matter con sofistica e por ta, no ta fuera di alcance di Polis.