Tabata diasabra den oranan di mainta a haya un curpa sin bida na un cas na Solito. Algun medio tabata na altura di esaki, pero Polis a pidi pa por fabor no duna publicidad n’e hecho aki, pa no daa e investigacion. Tabata te diadomingo mainta, vocero di pols, sra. Liliana Rasmijn a duna di conoce, kico tabata pasando.

Polis tecnico, recherche y tambe dokter forensico a presenta n’e sitio p’asina haci nan debido investigacion. E vocero di polis no kier a duna e identidad, ni sexo di e persona, pero a bin resulta cu ta for di dia 2 di November ultimo e señora aki no a presenta na trabao. E tabata traha na Challett Suisse Restaurant na Eagle. Personal di dicho restaurant, mirando cu e señora pa algun dia no a presenta na trabao, a informa esaki na autoridadnan policial. 

Durante e investigacion diferente articulo n’e cas a wordo confisca. E.o. polis a bai hasta cu un freezer, unda e curpa mutila a ser haya. Cuerpo Policial ta pidi esun cu sa algo of a wak algo yama e tiplijn di polis cu ta 11141 y nan ta garantisa cu bo ta keda ANONIMO.

Manera menciona, despues cu e señora aki no a presenta na trabao, sin yama pa duna motibo, a pone gerencia di e restaurant haci denuncia.
Un persona femenino haña den freezer mutilá

Diasabra den oranan di mainta a haya un curpa sin bida na un cas na Solito. Polis tecnico, recherche y tambe dokter forensico a presenta na e sitio pa asina haci nan debido investigacion.

Loke cu por a compronde ta cu e no a acudi na trabou pa algun dia caba, a cual a dicidi di bati alarma na Polis. Ora cu polis a yega n’e cas no a haya reaccion y ora cu a drenta paden, cu yudanza di Cuerpo di Bombero,  no haya reaccion tampoco. A sigui busca, y asina a bin descubri un hecho macabre den freezer. Inmediatamente esnan presenta a manda pidi pa mas autoridad competente, cu tabata motibo cu Ministerio Publico inmediatamente a laga confisca e freezer completo.

Un conoci a bisa autoridadnan cu e ultimo biaha cu a mira e amiga tabata dia 2 di November ultimo. A papia cu famianan na Santo Domingo, y nan no sa ni di e señora ni di e sobrino cu el a adopta manera un yiu. Di e sobrino tampoco sa di dje, ningun hende sa di dje.
Despues cu e caso di asesinato aki a bira conoci, inmediatamente a recibi Informacion cu e persona, kende ta biba n’e cas na Solito for di 1991, ta Luz Divna Paulino, naci na Santo Domingo, kende ta traha na Challett Suisse. Su sobrino, Adriaan Paulino (18), ta biba cerca dje den e cas. El a adopta e mucha aki for di tempo e tabatin 10 aña. E ta un ex alumno di EPB. Ora cu a busca paradero di Adriaan Paulino, algun amigo a bisa cu el a bai Santo Domingo pa mira su mama, kende ta hopi malo.

E prome sospechoso t’e sobrino. A yam’e diasabra anochi pa inform’e cu personanan desconoci a kibra drenta den e cas. El a contesta pa mand’e potret p’e mira. Aparentemente e no ta na Aruba. Di otro banda, tin hende a bisa cu rond di 7 di november, el a informa personanan cu ta biba eybanda cu su tanta a biaha urgente pa Santo Domingo pa motibo cu e mama di dje ta hopi malo. Mientras cu di otro banda un amiga a yama famia na Santa Domingo y nan no sa ni a tende di dje. E investigacion ta sigui y si mester lo envolvi Interpol pa detene Adriaan Paulino, kende ta ser considera como e prome sospechoso.

ASESINATO

Si bai den historia di asesinato na Aruba di e indole aki, ta masha poco. Historia ta hiba nos n’e asesinato cu a tuma lugar na Sabana Bosora, unda un señora a hinca su pareha multiple biahe pa ta sigur cu el mate, pa despues hibe den un garoshi, benta banda si Santana di Sabana Basora. Hopi comentario tabatin cu e señora no por a mata su pareha su so, y cu mas hende mester a yud’e. Nunca esaki a keda prueba.

Otro caso, te caso di Sheraton Hotel, unda un kokki a keda asesina, hinke den un freezer cu e meta pa benta den auto di sushi y benta afo. E forma di asesina e kokki aki tabata cu a usa waya di caha di batata pa choca e victima, hinke den freezer. E asesino, a dicidi di laga pasa cu e kokki a keda secuestra y a pidi un cantidad di placa pa su rescate. Autoridadnan a logra na tap telefoon di e hotel, y a haya sa cu ta un “inside job”, mientras cu e curpa di e victima a cuminsa ondooi, y sanger a cuminsa corre. Habriendo e freezer mobil aki, a bin descubri e kokki morto.

Den e  caso cu Gobierno a entama contra 15 miembro di Hunta Comisarionan di Companianan Estatal, e principal demanda ta bay riba e disputa relaciona cu ehecucion di un sentencia. Tin un situacion nobo a surgi, unda cu a trata di scucha e comisarionan y despues a informa di nan retiro. Awor Corte mester evalua si e actonan nobo aki ta duna motibo pa schors ehecucion di e dwangsom of tuma otro medida. 

Segun decision di Corte den e caso hudicial aki, a tuma un decision cu a causa bastante comentario. Unda Huez a “bolter” decision di veredicto di Corte Sumario y hasta a dicidi su comisarionan no kier retira, nan lo tin cu paga un dwangsom di 2500 florin na Gobierno. Consecuentemente nan retiro a bai aden inmediatamente

Huez a bisa cu no tin nada den statuut cu ta stroba e doño tuma un decision nobo. E statuto ta stipula cu Reunion General di Accionista (AVA) tin e autoridad pa schors of retira cualkier comisario na cualkier momento. Ademas, e Reunion General por kibra e confiansa den e Conseho di Supervisor cu mayoria absoluto di e votonan emiti, representa pa por lo menos dos tercera parti (2/3). E decision di Reunion General ta motiva y ta causa e retiro inmediato di e miembronan di Conseho di Supervision. 

Tin dos opcion, Por retira un comisario individualmente cu mayoria simpel sin mester di motivacion. Tambe por disolve henter Conseho di Supervision (den e nomber "RvC"), pero cu un mayoria di dos tercera parti y cu motibo. Pero Codigo Civil ta duna e posibilidad pa retiro individual, pero no pa retiro di henter e RvC. Ta cla cu ley ta stipula cu AVA tin e autoridad pa schors y retira (e) comisario (nan) ora e ta kere cu e interes di e compania ta rekeri esaki y sin cu tin ningun motivacion prescribi p’esaki, naturalmente bou di e limitacionnan di lo rasonabel y husticia. Ademas, Huez no por sinta riba e asiento di e empresario; na final ta AVA, como e organo principal, ta dicidi en principio kico ta bon p’e compania y kico no ta bon.

Huez lo evalua esaki marginalmente. Tur esaki ta nifica cu no mester pone exigencia demasiado estricto riba e motibo di un decision di suspension of retiro. N’e comisario, nombra pa AVA y cu ta controla den su nomber, ta tin ningun proteccion special di su retiro. E no ta un trahador, un director of un funcionario  sino un supervisor cu ta ehecuta su tareanan di supervision a base di un acuerdo di encargo.

Cu e cuadro legal aki na mente, Corte ta haya cu lo siguiente ta conta. Den e prome sentencia di Caso Sumario a haya cu e motivacion tabata mucho scars, pero den e caso aki, ta parce cu e motibonan mester ta bon skirbi y por bay di acuerdo cu nan. Nan a pone suficientemente cla cu e accionista no tin confiansa mas den e comisarionan y kico t’e causa di esaki. Si e motibonan cu a indica ta corecto of no,  no ta importante den e caso aki. 

Na prome lugar, pasobra den un caso sumario no ta importante pa sa esey bon. Pero mas importante ainda ta si e decision di suspension den caso di control marginal ta comprendibel y esey t’asina si e Comisarionan no ta di acuerdo cu esaki nan por pidi anulacion di e decisionnan di schorsing y di retiro den un bodemprocedure. Aunke nan ta haya cu nan ta bon den esaki, ta dificil pa imagina cu por pone nan bek den e posicion di supervision. 

“Pakico esun cu ta accionista pa 100% (Gobierno), mester wordo obliga pa traha hunto cu e supervisornan aki den su empresanan di utilidad, cu pa diferente motibo no ta haya nan adecua,” Huez ta puntra. 

Finalmente, lo considera lo siguiente. Corte a sinti falta den e documentonan cu e comisarionan a entrega y di loke a wordo treci dilanti den nan nomber, e motibonan of interes di e compania pa nan keda como Comisario.  No ta splica con nan a duna forma na e trabou di supervision, cua plan tin pa futuro y con concretamente nan a cumpli cu nan trabou di controla e director legal retira mientrastanto. No ta indica cuanto biaha nan a reuni y kico tabata e resultado di e reunionnan. Informacion anual of otro prueba cu ta mustra nan contribucion no a ser presenta na Corte.

Nan no a presenta na Corte di Husticia rapportnan anual ni otro prueba cu ta mustra cu nan a contribui.  Ademas, nan no a splica kico nan ta kere cu pais como accionista tin intencion di haci (accionnan) cu ta contra e interes di e compania y cu nan t’asina preocupa cu pa e motibo ey nan mester keda. For di nan envolvimento como supervisor, a spera esaki di nan. Esey ta nifica cu e Corte di Husticia no por haci e control marginal aki.

Esey ta nifica cu Corte lo impone e prohibicion pa ehecuta e sentencia di e Caso Sumario manera ta indica den e decision. Automaticamente ta rechasa e ora e peticion di e comisario, cu a pidi lo contrario.  E sentencia aki ta uno basta profundo, unda cu a bay hopi den detaye pakico a tuma un decision diferente.

Hunta di Supervision riba e posicion di CEO, Minister Wendrick Cicilia a confirma e nombramento di Jonny Andersen, ex-CEO y Managing Director di Curaçao Airport Partners, pa dirigi Aruba Airport Authority N.V.

Jonny Andersen ta trece cu ne mas cu dos decada di experiencia di liderazgo di aeropuerto internacional, incluyendo funcionnan halto na Aeropuerto Internacional di Corsou, Kenya Airports Authority y Avinor AS. Reconoci pa su vision strategico y enfoke fuerte riba excelencia operacional, sostenibilidad y compromiso di stakeholder, ta considera Jonny Andersen como un persona bon ekipa pa guia AAA den e siguiente fase di desaroyo.

Jonny Andersen tin amplio experiencia tambe pa dirigi y implementa cu exito un programa ambicioso di optimalisacion di gasto multi-aeropuerto, logrando un reduccion drastico den e gastonan di henter un grupo di aeropuerto sin afecta e calidad di servicio. E experiencia aki ta specialmente relevante pa Aruba, mirando cu AAA a inicia e siguiente fase di Gateway 2030, unda cu maneho financiero disciplina, continuidad operacional y control cuidadoso di costo lo ta esencial pa entrega un aeropuerto moderno y eficiente.

Como representante di accionista mayoritario, Minister Wendrick Cicilia a enfatisa e importancia di liderazgo y experticio pa garantisa cu Aeropuerto Internacional Reina Beatrix ta keda un gateway confiabel, competitivo y di calidad halto pa futuro di nos pais.

Despues di tur e bunita palabranan di elogio aki p’e CEO nobo, Jonny Anderson, nada a keda menciona cu Royal Schipholl Group lo sa di prepara un yiu di terra pa un dia por tuma e timon over for di RSG. Den pasado, esaki a keda menciona den acuerdo entre Gobierno y RSG, pero RSG no a cumpli y awor parce lo no tin intencion pa prepara ningun yiu di terra tampoco. 

Hunta di Supervision riba e posicion di CEO, Minister Wendrick Cicilia a confirma e nombramento di Jonny Andersen, ex-CEO y Managing Director di Curaçao Airport Partners, pa dirigi Aruba Airport Authority N.V.

Jonny Andersen ta trece cu ne mas cu dos decada di experiencia di liderazgo di aeropuerto internacional, incluyendo funcionnan halto na Aeropuerto Internacional di Corsou, Kenya Airports Authority y Avinor AS. Reconoci pa su vision strategico y enfoke fuerte riba excelencia operacional, sostenibilidad y compromiso di stakeholder, ta considera Jonny Andersen como un persona bon ekipa pa guia AAA den e siguiente fase di desaroyo.

Jonny Andersen tin amplio experiencia tambe pa dirigi y implementa cu exito un programa ambicioso di optimalisacion di gasto multi-aeropuerto, logrando un reduccion drastico den e gastonan di henter un grupo di aeropuerto sin afecta e calidad di servicio. E experiencia aki ta specialmente relevante pa Aruba, mirando cu AAA a inicia e siguiente fase di Gateway 2030, unda cu maneho financiero disciplina, continuidad operacional y control cuidadoso di costo lo ta esencial pa entrega un aeropuerto moderno y eficiente.

Como representante di accionista mayoritario, Minister Wendrick Cicilia a enfatisa e importancia di liderazgo y experticio pa garantisa cu Aeropuerto Internacional Reina Beatrix ta keda un gateway confiabel, competitivo y di calidad halto pa futuro di nos pais.

Despues di tur e bunita palabranan di elogio aki p’e CEO nobo, Jonny Anderson, nada a keda menciona cu Royal Schiphol Group lo sa di prepara un yiu di terra pa un dia por tuma e timon over for di RSG. Den pasado, esaki a keda menciona den acuerdo entre Gobierno y RSG, pero RSG no a cumpli y awor parce lo no tin intencion pa prepara ningun yiu di terra tampoco. 

Gobierno, por medio di su Minister Wendrick Cecilia, a confirma un fase nobo di stabilidad y profesionalismo na Aruba Airport Authority (AAA) pa medio di e nombramento di e CEO nobo, Jonny Anderson y e cooperacion renoba cu Royal Schiphol Group (RSG). Esaki ta marca e fin di e incertidumbrenan recien y ta posiciona e aeropuerto pa acelera e etapa di expansion di Gateway 2030.

Minister Wendrick Cecilia den presencia di Minister Geoffrey Wever a enfatisa cu e lider nobo ta trece experiencia fuerte di aeropuerto y infrastructura internacional. Bou di e cuadro di LNT, e rol di CEO lo opera tambe n’e nivel di costo anual total mas abou den historia di AAA, significantemente bou di e paketenan di compensacion anterior y completamente alinia cu e normanan nacional di husticia y transparencia.

Gobierno a aclarea cu Aruba ta keda 100% doño di aeropuerto. E acuerdo cu Schiphol ta un colaboracion, no un benta, dunando AAA acceso na experticio mundial, gobernacion moderno, y sosten operacional, mientras cu Aruba ta mantene control di tumamento di decision.

Gateway 2030 awo a drenta su fase mas intensivo na capital y sensitivo na riesgo. Un partner internacional fuerte manera Schiphol ta brinda confiansa vital n’e prestamistanan, e aerolineanan, e inversionistanan, e empleadonan y e biaheronan, mientras Aruba ta acelera e proyecto.

E candidatonan Arubiano ta keda completamente eligibel pa futuro rolnan den top, y un prioridad clave bou di e cooperacion nobo ta formacion y desaroyo di gerentenan local. Gobierno tambe a reafirma su ambicion pa establece un di dos director statutario local, di acuerdo cu e Guianan di LNT.

“AAA ta un activo nacional strategico”, Minister Wendrick Cicilia a declara. “Cu e partnership renoba, e proximo CEO, y e fast-track riba Gateway 2030, Aruba lo conta cu un aeropuerto dirigi profesionalmente, un continuidad operacional mas fuerte, y beneficionan a largo plaso pa nos hendenan”, Minister Cicilia a termina bisando.

Dr. Horacio E. Oduber Hospital (HOH) tabatin e honor di ricibi bishita di un pionero den mundo medico dokter Diego Gonzalez Rivas. E ta un ciruhano specialisa den operacionnan di torso y pulmon y a desaroya pa prome bes na aña 2010 un tecnica nobo di “single-port VATS” pa operacionnan complica: Un tecnica di cirugia avansa cu ta menos invasivo haciendo uzo di un incision hopi chikito. Hospital ta masha orguyoso di por a ricibi dokter Gonzalez y di por a siña di e tecnica aki durante un operacion di pulmon.

Ciruhano Yuri Casseres y alabes Miembro di Hunta Directiva na HOH a expresa e honor pa por a opera hunto cu dokter Diego Gonzalez Rivas, un ciruhano cu ta opera rond di mundo. Aruba tabata e di 140 pais cu el a bishita pa opera. Actualmente ta trahando riba un serie na television cu lo pasa riba Netflix cu dokter Diego Gonzalez Rivas pues un bishita special y aunke e ta di un dia solamente, toch algo hopi grandi pa un isla chikito manera Aruba.

Pa mas cu’n aña caba HOH ta den preparacion pa haci e operacion cu e famoso dokter aki posibel, e.o. dor cu mester a trece instrumentonan specialisa na Aruba cu dokter Gonzales Rivas ta uza durante su operacionnan. Dokter Diego Gonzalez Rivas a comparti cu e personal di kamber di operacion e instrumentonan cu e ta uza y alabes e manera con e ta haci un operacion grandi di pulmon atraves di un corta hopi chikito.

Di su banda, dokter Diego Gonzalez Rivas a expresa cu tur cos a bay bon y e ta contento di por a traha mey-mey di profesionalnan na HOH. “E sala di operacion ta un di esnan di mas moderno cu mi a yega di mira, pasobra e ta conta cu tur tecnologia, pero tambe profesionalnan den enfermeria, asistentnan di OK y tambe di anestesia bon educa. Nos a haci un operacion cerca un pashent unda cu a kita pida di pulmon y saca likido excesivo via di un corta chikito di solamente dos (2) centimeter.”

Por ultimo, dokter Diego Gonzalez Rivas a gradici henter e team di HOH pe tremendo cooperacion y pa un operacion exitoso. Ta bon pa remarca cu regularmente HOH ta ricibi bishita di specialistanan internacional cu ta bin opera na Aruba. Dor di continuamente comparti conocemente y experiencia riba tereno di cuido medico cu otro, ta motiva y educa nos profesionalnan tambe p’asina eleva calidad di cuido pa nos pashentnan na Aruba.

Ultimo dianan, specialmente durante reunionnan di Parlamento, por a tuma nota cu Mike de Meza (AVP) ta votando contra mocion di fraccion di AVP y ta sostene esnan di MEP. Di biaha, observadornan ta conclui cu tin un kiebro den AVP, pasobra Mike de Meza no ta ateniendo su mes na disciplina di partido. 

Loke nos por bisa ta, cu tempo cu Henny Eman (q.e.p.d) tabata Prome Minister y lider di AVP, tur diasabra mainta tabatin reunion na Cas di Partido, cu asistencia di TUR Minister y cu TUR Parlamentario di fraccion di AVP. Aki unda ta discuti, temanan di interes di siman y di e siman siguiente. Asina tur miembro sa na kico atene nan mes. Cu Prome Minister Mike Eman, despues di formacion di Gobierno no ta tuma lugar mes. Y sigur no por papia di un reunion di Conseho di Partido.

P.e. den caso di Mike de Meza, no a discuti mes ki paso pa tuma pa yude den su situacion, unda claramente tur hende sa, cu un boycot tin pa Mike de Meza no bira Minister. Otro conclusion no por tin. Te awe, ainda e no a wordo tendi pa Ministerio Publico. Si manpower y placa falta, laga Hulanda yuda den esaki. Huzga un Minister of un Parlamentario di Tweede Kamer, no ta wordo trata asina na Hulanda. Y como tal mi por compronde e postura tuma pa Mike de Meza, pasobra si e por a bira Minister, sigur e lo sa di cumpli cu disciplina di partido. Awor cu partido mes no ta haci un esfuerzo pa yuda pa su caso wordo trata pronto, ta logico cu Mike de Meza sa di bolter cos. 

Manera por a constata, despues cu riba e tema di e ley di Reino pa supervision financiero di finansas publico (HOFA) e fraccion di AVP no tabata uni, awor ta parce cu riba e tema di e ley Landsverordening Normering Topinkomen introduci dor di ex-Prome Minister Evelyn Wever-Croes como e “Wever-Croes Norm”, tampoco tin unanimidad. Fraccion di AVP no ta logrando den “bolter” opinion di Parlamentario Mike de Meza facilmente.

Mike de Meza siendo di dos homber fuerte di Partido AVP no ta compronde con e partido ta cambia di opinion asina liher y asina facil. Aunke e no ta bis’e den tanto palabra, e ta medio insinua cu AVP ta duna e impresion cu ta Futuro ta dirigi gobernacion y tur locual nan kier ta sosode. Con por ta posibel cu AVP a bay eleccion contra Rijkswet y awe ta defende cu alma y curpa. Mescos ta conta p’e medida di Gabinete Wever-Croes II contra nos profesionalnan den funcionnan clave den companianan y entidadnan publico.

Mike de Meza ta insisti cu e no ta bolter di opinion djis pa complace niun otro politico di otro partido of djis pa keda bon den coalicion. Si algun luna pasa Rijkswet tabata malo, awe e ta mesun malo. Mescos ta conta awor p’e discusion riba LNT.

Den su mesun palabranan, Mike de Meza a bisa: “Tin hende kier bira mas hende cu abo y haya mihor trato cu abo, den bo mes cas! E peliger di hinca bo autonomia den man di otro, ta hopi! Haven’t we learned enough or must we again go back to the future?”

Den un otro publicacion, e ex-Vice Prome Minister pa Partido AVP a bisa: “LNT ta un simpel muestra con p.e., e Rijkswet HOFA lo wordo uza contra e Arubiano como un ciudadano di segunda grado den su mes cas. Tambe con decisionnan lo bin for di ariba (lesa Hulanda) y imponi riba Aruba, sin e consideracion local mas adecuado! THINK!”

Ta conoci cu Gobierno di Hulanda tin un masha bon relacion cu e Ministernan di Futuro y como tal Hulanda ta bet riba nan. Den sentido cu via nan por maniobra den decisionnan politico na Aruba. Pasobra tur tempo LNT tabata Sagrado, pero awor cu el a toca Hulandesnan mes of companianan di Hulanda cu interes na Aruba, diripiente awor si por haci excepcion. 

E ora di berdad a yega y ta puntra bo mes cu si e Rijkswet cu tanto cierto Minister ta bringa p’e ta pa yuda Aruba pa haya mihor interes di Hulanda of si ta pa yuda companianan Hulandes bin gana placa na Aruba of trapa riba nos localnan. Entodo caso por ripara di awor caba cu, dia cu mester trata cualkier ley rond di medida di “Wever-Croes Norm” (LNT) den Parlamento di Aruba, cu Gobierno no por conta cu e voto di Mike de Meza tampoco.

Siman pasa Minister di Husticia y Energia, mr. drs. Arthur Dowers, a haci un bishita na WEB Aruba N.V. pa presencia un paso importante den desaroyo di e sector di energia di Aruba: E traspaso di e fundeshi principal y radiatornan na Wärtsilä Finland Oy p’e expansion di e planta di energia RECIP-3.

Durante e bishita, Minister Dowers tabata testigo di e firmamento di e certificado di traspaso entre WEB y Wärtsilä, marcando e prome logro den e proyecto strategico aki. Na augustus 2026, WEB Aruba lo agrega 36 MW di capacidad firme, aumentando e capacidad total na ±250 MW. E expansion aki ta fundamental pa fortifica e capacidad di produccion di WEB, no solamente pa limita y mitiga interupcion di coriente, pero tambe pa duna sosten n’e transicion nacional pa integracion di energia renobabel.

Cu mas capacidad firme y confiabel, lo por integra energia di biento, solo y bateria di manera mas efectivo riba e red. Ora e expansion ta cla, e lo re-emplasa e planta mobil cu a drenta den operacion na augustus 2024 pa cumpli cu e demanda creciente.

E expansion di RECIP-3 ta tuma lugar den diferente fase, y e finalisacion y traspaso di e fundeshi principal y radiatornan ta un paso importante cu a keda completa den un tempo record. Manera WEB Aruba a comunica durante varios ocasion, Aruba ta experimentando un aumento substancial den demanda di energia, ocasiona pa temperaturanan mas halto y turismo creciente. Desde mitar di 2023, esaki a pone presion grandi riba e plantanan di generacion. 

E proyecto RECIP-3 ta parti di e plan strategico pa garantisa cu WEB por sigui cumpli cu e demanda creciente. Combina cu proyectonan di energia renobabel y almacenahe cu ta na caminda, ta spera cu e capacidad lo ta suficiente te cu 2031. Pero nada ta ser menciona cu tur e expansionnan aki, cu pueblo por spera un reduccion di tarifa di awa y coriente. Lo contrario, ta menciona constantemente e presion cu tin riba WEB pa mas demanda. Manera WEB mes a anuncia cu e.o. e proyecto aki.lo tin suficiente capacidad te cu 2031, cu ta dentro di 5 aña, loke ta pasa masha liher.

Durante e ceremonia, CEO di WEB, Alfredo Koolman, a enfatisa cu tin un espirito colectivo fuerte entre tur partido interesa pa realisa e meta ambicioso di 50% energia renobabel. Cu mas claridad recientemente riba proyectonan di biento, solo y almacenahe, e meta ta bira dia pa dia mas realistico. Koolman tambe a comparti cu e apoyo substancial cu Ministerio di Asunto Economico y Clima Hulandes a priminti pa 2025 y e añanan cu ta bini, lo yuda hopi den realisa esaki.

Tur esakki ta posibel solamente door di union y dedicacion continuo di tur e profesionalnan cu ta tras di e proyecto aki. Na final, Minister Dowers ta spera cu e proyecto di expansion di RECIP-3 lo keda cla prome cu e fecha planifica, demostrando e dedicacion di WEB na confiabilidad, eficiencia y servicio na comunidad.

“Ta Reunion General di Accionista  y no un Huez por dicidi kico ta mihor pa doño di un compania”, asina Corte a duna di conoce siman pasa den un caso cu Gobierno a dicidi di entama contra miembronan di Hunta Comisario di companianan Estatal, kendenan a gana un caso hudicial, e.o. cu Gobierno tin cu sigui paga nan y pa cada dia cu Gobierno no cumpli mester paga un dwangsom. 

Corte a yega na un decision unda cu e empresanan di utilidad di Gobierno a haci un peticion pa no permiti e comisarionan cu a gana caso contra nan retiro, di ehecuta e dwangsom pa no cumpli e sentencia. 

Despues di esey, e empresanan a cuminsa e proceso di scucha nan.  Pero e ta un proceso cu ta tuma su tempo. E companianan WEB Aruba N.V.; ELMAR; Aruba Wasterwater Sustainable Solutions (AWSS); Aruba Renewable Energy N.V. (ARE) y Utilities Aruba a cuminsa un caso contra 15 comisario (cu na nan turno a bira cuminsa un caso pa Corte no bay di acuerdo cu e peticion di e empresanan).  

Pa motibo cu e comisarionan aki a haya un carta di e diferente empresanan estatal pa entrega nan retiro (pa falta di confiansa). Despues cu nan a manda puntra kico t’e falta di confiansa, e reaccion cu nan a haya tabata nan carta di retiro. A dicidi di bay Corte y nan a gana e caso contra tur, cu excepcion di Utilities Aruba N.V.

E Hues di caso sumario a schors nan retiro  te ora cu tin un decision final den bodemprocedure riba legalidad di e decision ey. Mester a laga nan drenta nan oficina bek, duna acceso na tur documento y sigui paga nan salario y compensacion. Den e decision aki a bisa cu e splicacion di e comisario cu nan retiro ta basa solamente riba aspectonan politico, ta algo cu Corte por kere t’asina. Solamente pasobra e comisarionan ta di otro pensamento politico, no ta motibo pa duna nan retiro. Esey ta para den e sentencia di e caso sumario. 

Den e caso awor cu e empresanan estatal a cuminsa, a splica cu a bolbe yama un reunion dia 30 di october cu tur e comisarionan y solamente abogado mr.Gabri de Hoogd a acudi. Siguientemente a manda tur un carta dia 3 di november, unda cu a informa cu den e reunion di 30 di october ultimo a tuma e decision pa retira nan inmediatamente. 

Utilities Aruba a indica por medio di nan abogado mr. David Kock cu e empresanan estatal a haci un investigacion y a constata 8 punto di violacion pa cual no por traha cu e comisarionan. Y a base di esey a duna nan e retiro dia 30 di october.

Inmediatamente despues e companianan di utilidad a informa e comisarionan cu nan lo paga e compensacion atrasa cu nan mester haya. Pero e comisarionan kier sigui cu nan trabou, manera ta para den e sentencia di e caso sumario y cu si e companianan no bay di acuerdo, lo cobra e dwangsom.

Corte a bisa cu nan por tuma un peticion den e caso aki mirando cu den e otro caso cu a apela y cu ta den man di Hof, no a tuma un decision ainda. Ademas, e comisarionan kier pidi pa ehecuta e parti di dwangsom. Di e forma aki e Huez di caso sumario a haya e autoridad e ora pa tuma un decision den e peticion haci na nan. 

Durante e sesion  den Corte, a bini dilanti cu den e ‘schorsingsverzoek” na Hof no a menciona di e decisionnan nobo di schorsing y decision di retiro. Y na di tres lugar, Hof, den un situacion di schorsing no tin e autoridad di un “dwangsom rechter.” Pues Hof lo no por dicidi riba esey, pero e Huez di Corte di Prome Instancia di Caso Sumario si. Pues e Huez por atende e peticion aworaki di Gobierno pa no ehecuta e dwangsom. Of pospone su ehecucion.

Huez a splica siguientemente cu despues di e decision tuma den e reunion di schorsing y retiro, cu a tuma lugae despues di e decision di e Caso Sumario di october, a surgi un situacion nobo. P’esey awoe Corte den e caso sumario aki mester husga si dor di e decision nobo ta existi motibo pa pospone ehecucion  of tuma otro medidanan. Y a tuma e medida pa prohibi e comisarionan di ehecuta e sentencia di e caso sumario anterior, cu excepcion di e parti di cobransa di nan salario. Y awor cada un di nan lo mester paga un “dwangsom” di 2500 florin pa cada dia of parti di dia cu nan keda sin cumpli.

Universidad di Aruba, Universidad di Curaçao, Universidad di Utrecht y Universidad di Den Haag ta entusiasma pa comparti nan cooperacion nobo enfoca riba fortificacion di capacidad administrativo den Caribe Hulandes pa medio di siñamento pa henter bida. 

Siman pasa, e partnernan a reuni na Aruba y Curaçao pa start up e proyecto aki cu gruponan di enfoke di varios sector. Durante e gruponan di enfoke aki diferente professional den nan ramo a duna nan input y perspectiva pa loke ta trata e necesidadnan den nan ramo.

Meta di e partnership y proyecto aki ta pa crea un plataforma digital pa Caribe Hulandes. E plataforma aki lo ofrece un bista centraliza di programanan di enseñansa superior pa fortalice capacidad administrativo den  diferente sector riba e islanan pa medio di cursonan, tayernan y masterclass. Esakinan ta consisti di cursonan exsistente cu ta wordo ofreci den diferente programa n’e universidadnan partner. Ademas, cursonan lo wordo ofreci den diferente formato manera den persona, hibrido of completamente online, haciendo esaki mas acesibel.

Pa medio di e proyecto aki nos meta ta pa promove siñamento pa henter bida na tur profesional, cu ta busca pa adkeri conocemento y habilidadnan, desaroyando nan mes mas aleu. 

E forsa di e asociacion aki tambe ta sinta den e diferente perspectivanan entre e paisnan, incluyendo contexto y cultura local, mientras cu ta mantene un bista internacional.