Awe ta Dia di Prensa cu den ultimo decada, e dia aki a haya un nificacion totalmente diferente y aki na Aruba esaki no ta diferente. Tin cu agrega sinembargo cu aki na Aruba tampoco e situacion ta diferente, caminda pa un isla asina chikito, e cantidad di medionan di comunicacion a crece drasticamente y mayoria di e ‘plataforma’, manera cu esakinan ta wordo yama awendia, no ta brindando e tipo di periodismo cu tur hende ta spera di nan.

A resta aki na Aruba solamente tres medio di comunicacion cu ta wordo imprimi, tur tin nan propio problemanan di operacion cu algun di nan luchando pa keda na bida y aunke por debati extensamente riba motibo di esaki.

Ta un hecho cu den varios pais rond mundo, apesar cu e demanda pa medionan di informacion digital,  ainda tin espacio pa complace cu esnan cu kier sinta tene un corant den nan man, cu e por dobla esaki warda un rato pa despues sigui repasa un corant.

Loke tambe ta hungando un rol grandi den e proceso mundial pa loke ta corantnan digital, t’e hecho cu miyones di hende grandi rond mundo, tin problema pa acomoda nan mes lesando un corant of un website digital cu ta brinda oportunidad  pa sigui imprimi un corant di papel. Sinembargo kisas e reto di mas grandi, principalmente aki na Aruba, t’e falta di profesionalnan dedica n’e arte di periodismo, hendenan cu ta stima e trabou periodistico  y kendenan ta motiva pa  brinda comunidad informacion completo y veridico.

Ultimo decada a ripara un aumento formal den e cantidad di plataforma of website cu a ser crea pa eherce e fenomeno di duna informacion, pero na final di cuenta nan ta forma parti di un grupo cu tey pa saca probecho financiero mas cu tur cos.

Kisas e lucha di mas grandi cu medionan di comunicacion tin tanto aki na Aruba como rond mundo, t’e reto di e poder digital ya cu tur hende cu kier manda “algo” rond, ta uza varios red social  pa haci esaki, loke ta conoci como “tira cos den aire” cu e pensamento cu tog tin hende cu lo lesa esaki.

Mientras cu e retonan aki ta grandi  den e mundo periodistico, un berdad cu no ta cambia t’e noticia mes, den e forma con esaki ta ser treci dilanti, kico medionan di comunicacion  ta haci c’un informacion cu el a ricibi of cu e mester a cubri.

E tantisimo medionan di comunicacion cu tin n’e momentonan aki, no ta brinda e lesado un variacion p’e por crea su propio opinion, loke ta pone cu hopi di e medionan aki ta fungi realmente como un tipo di “decor’ cu cual esnan cu ta tras di e proyecto aki, su principal motivacion ta pa saca bentaha financiero cu avisonan di tanto Gobierno como e sector priva.

Sinembargo pa loke t’e nivel di noticia, e variacion cu esaki mester tin pa gara e lesado,  esaki ta keda “more of the same” y den e aspecto aki, e peliger ta sinta cu hopi di e medionan aki, simplemente no por cay bou di e nificacion real di periodismo responsabel.

Celebracion di Dia di Prensa pa algun tempo caba a haya un otro nificacion y ora cu analisa cuanto instancia, tanto di Gobierno como sector comercial y priva y otro organisacionnan cu na tur momento ta haci uzo di prensa pa vocifera loke nan ta pensa y loke nan kier haci, e forma con ta reconoce e trabou aki simplemente no ta cuadra cu e trabou y esfuerso cu solamente ‘algun’ den e ramo aki, ta cumpliendo cu nan responsabilidad.

Asina mes nos kier felicita tur periodista riba e Dia di Prensa aki, cu mester ta motibo di reflexion y analisis, pa mehora nos trabao di informacion mas veridico y veraz. Masha Pabien riba un otro Dia di Prensa.

Tur hende cu fayece y bandona e mundo aki, ta laga un asina yama “legado” atras, di sea logronan grandi, pero tambe otronan cu ta laga cosnan menos bon atras, cual ta cosnan cu nan a haci den nan bida y pa cual tur hende ta sigui corda riba nan.

Diabierna atardi  e scenario politico a marca historia, caminda hopi hende grandi cu conoce e pasado politico di e pais aki, cu conoce e pasado politico di MEP y tambe di PPA, a para mira un scenario politico un tiki ‘macabro’ mirando con henter e delegacion di oposicion cu a atende un reunion publico algun ora prome, a cana bay oficina di Gobernador Alfonso Boekhoudt pa entrega un protesta contra Presidente di Parlamento, Marlon Sneek.

E acto historico tabata e hecho cu e delegacion aki, den cual tabatin ocho miembro di fraccion di MEP, a ser dirigi p’e actual lider di PPA, Otmar Oduber, kende apenas tin un solo asiento den Parlamento. No solamente esey, pero despues tambe tabata e ‘lider’ Otmar kende a duna declaracion prome cu lider di MEP, Evelyn Wever Croes, algo cu si corda e historia politico di Betico Croes den feliz memoria, NUNCA lo por a sosode.

Para den Wilhelmina Stadion na ocasion di e lucha pa separacion for di Gobierno di Corsou, e legendario Betico Croes a sigura publico presenta, cu HAMAS y nunca partido MEP lo traha hunto cu PPA cu tabata bou direccion di Benny Nisbet den feliz memoria, ya cu e partido oranje aki, no kier a sostene e peticion di pueblo di Aruba pa haya su Status Aparte.

Den Staten di Antiyas Hulandes e tempo ey, Benny Nisbet y su fraccion tabata opone tur cos loke a conduci cu Betico Croes a considera Benny Nisbet y su partido,  ‘traidornan” di patria, pero diabierna atardi, ata un lider di PPA a logra di pone e lider di MEP cana den e “rijtje” pa hunga politica barata for di cual ta solamente Otmar Oduber lo saca probecho politico.

Manera e dicho tradicional cu nos conoce aki na Aruba, e acto politico aki, lo a “pone Betico bolter den su graf”, ya cu t’e partido cu semper el a bisa cu no ta partido cu ta sostene Aruba, awor ta cana tras di un politico cu tin solamente un asiento den Parlamento!!! 

“Papia su malo, papia su bon”, pero diabierna ultimo Parlamento a mira dos fraccion di oposicion purbando pa bringa un guera contra dos fraccion cu ta sostene Gobierno, caminda ta perde so nan a perde politicamente, pero tambe nan dignidad.

Presidente di Parlamento, Marlon Sneek, a mustra hopi energico contra un grupo di oposicion cu a insisti pa sigui trata un concepto di ley cu nan a caba di ricibi, pues sin analisa esaki y studia e materia profundamente, a insisti pa sigui uza sala di Parlamento pa haci wega politica cu esaki.

Ta bin acerca cu henter e asunto di Rijkswet cu tin riba mesa n’e momentonan aki ta un ley cu tabata un proposicion di ex Prome Minister Evelyn Wever Croes, ta documentonan cu Gobierno di AVP-Futuro a bin haya caba y cual ley ex Secretario di Estado van Huffelen, a confirma cu lider di MEP a firma p’e ley aki y tabata su proposicion tambe.

Pero diabierna inspira pa un politico cu varios di e miembronan den e fraccion di MEP a liga su persona na negoshi di droga den pasado, dunando e persona aki e apodo di “strawberry”, esta Otmar Oduber,  a guia e agresion contra di Presidente Sneek.

E solo hecho cu awor e Gobierno nobo tin cu atende cu e asunto aki, ta culpa di e lider di MEP, kende a biaha na cantidad di ocasion pa Hulanda su so, a forma cantidad di acuerdo su so, pa despues bin Aruba, ordena e ex Presidente di Parlamento, Edgar  Vrolijk pa yama un asina yama “openbare bijeenkomst” caminda DESPUES cu el a firma na Den Haag ta bin conta Parlamento kico el a firma.

Awor e mesun hendenan aki, cu man teni di Otmar Oduber di PPA, ta pretende cu awor sin nan kier sa tur cos cu e Gobierno nobo ta haciendo, pero tur loke ta tumando lugar, ta EHECUCION di loke ex Prome Minister Wever Croes a firma caba.

Den su desesperacion henter fraccion di MEP awor ta canando tras di Otmar Oduber, loke e lider di PPA bisa, nan ta haci hasta e ridiculez di bay cerca Gobernador pa yora riba un asunto cu Conseho di Minister di Reino, a mustra gran satisfaccion pa motibo cu porfin Aruba tin un Gobierno cu ta cargando su responsabilidad no ta manipulando cu loke a wordo palabra caba.

Despues di tabata den silencio pa como 7 aña, ata Sindicato di Polis a lanta for di su “winterslaap”.  Minister di Husticia, mr. drs. Arthur Dowers no a caba di sinta, ata SPA a cuminsa cuestiona algun topico. E mandatario a invita dirigencia di SPA y a palabra cu si por tin cualkier diferencia, porta di su ministerio ta keda habri pa hiba un maneho di porta habri. Semper y cuando manda e topiconan (agenda) cu e sindicato kier discuti.

Minister Dowers a caba di bolbe for di su vakantie, ata Presidente di SPA, Rodney Solognier, kende sa cu KPA ta na werki awor kier culpa Dowers. SPA a laga sa cu e kier duna un update di e trabou cu SPA ta hacienda. SPA ta admiti cu nan no a hacie más tempran.

SPA a admiti cu varios miembro polis ta indicando cu SPA no ta haciendo nada pa nan. SPA no ta comparti e opinion aki. Segun Rodney Solognier, e sa cu nan nan trabou a topa cu mas reto ultimamente. Hasta nan esfuersonan inmenso, e falta di interes y cooperacion di parti di e Minister di Husticia mr. drs. Arthur Dowers, SPA no por logra nada, pasobra e Minister  no tin interes y tampoco no kier sinta cu SPA. 

P’e motibo di e problemá actual cu Minister di Hustisia, SPA ta preparando un ALV (Algemene Ledenvergadering) p’e sindicato  tende e miembronan nan opinion. Un otro punto cu SPA lo bin cu ne lo t’e herstructuing, mirando cu diabierna awor SPA conhuntamente cu leiding lo bay haya e ultimo versie di dje mirando cu Minister mester cambia algún cos, segun Solognier.

Minister Dowers a pone Solognier na su lugar

E mandatario a reacciona mesora y a lamenta e mal informacion di Presidente di SPA, Rodney Solognier, kende a bin cu un cantidad di insinuacion, pa locual ta trata e relacion cu tin actualmente entre Minister di Husticia y sindicato SPA.

Rodney Solognier a duna di conoce cu tin un falta di interes y cooperacion di parti Minister di Husticia, kende ta nenga di sinta cu nan na mesa y cu p’e motibo aki, diferente proceso pendiente ta pega. Y como tal SPA kier convoca un reunion general pa su miembronan.

Dowers ta lamenta informacion incorecto cu e Presidente di SPA ta suministra publicamente. E relacion cu Cuerpo Policial ta uno semper habri y den bon colaboracion cu otro. No solamente sindicato, pero cualkier miembro policial cu tin pregunta, peticion of tin cu atende cu un of otro asunto, por tuma contacto y ta keda atendi dor di e personal encarga of apunta den e direccion cu mester cana, of ta sinta cu e minister mes si ta necesario.

“Locual ta sigur, cu nunca a nenga di scucha un hende, y esaki ta conta p’e sindicato tambe”. Minister Arthur Dowers a indica cu durante su ausencia den exterior e sindicato a tuma contacto pa un reunion atrobe, caminda a informa nan cu na su regreso lo verifica fecha di reunion. Na su yegada a atende cu Presupuesto Supletorio y den e dianan aki a reanuda su agenda p’asina inicia cu e peticionnan cu a keda pendiente.

Segun e mandatario di husticia, ora a busca pa sa mas cerca un otro miembro riba e comunicado aki, e miembro di SPA a indica cu mas bien nan ta pendiente pa haya un fecha pa por reuni cu Minister. Ademas a informa e miembronan cu nan por manda e puntonan di agenda p’asina por prepara p’e reunion na momento cu haya fecha p’esaki.

Minister Arthur Dowers ta bolbe reitera cu absolutamente no ta berdad cu no tin un bon comunicacion cu SPA, ni tampoco cu KPA. Lamentablemente e lider sindical ta scoge un ruta publico pa trece discordia, enbes di tuma contacto directo cu su bureau of cu su persona. Tin miembro cu tampoco ta comparti e comunicado di SPA y a duna di conoce, despues di tabata drumi pa 7 aña, sostenedornan di ex Minister Rocco Tjon y di Alto Comisario, wega politico a cuminsa. Den e proximo reunion general, tene cuidao cu algun miembro di KPA lo desaproba maneho actual di SPA.

Diaranson mainta, Minister di Husticia mr. drs. Arthur Dowers a duna un declaracion relaciona cu e insinuacion cu presidente di Sindicato di Polis (SPA) Rodney Solognier a haci pa locual ta trata e relacion cu tin actualmente entre Minister di Husticia y e sindicato SPA.

Den un comunicado dirigi na miembronan di e sindicato, Solognier a duna di conoce cu tin un falta di interes y cooperacion di parti Minister di Husticia, cu ta nenga di sinta cu nan na mesa y cu pa e motibo aki, diferente proceso pendiente ta pega.

Basa riba e puntonan aki, e presidente di sindicato ta yama un Algemene Ledenvergadering cu tur miembro di SPA, pa asina por haya tende di nan, como tambe informa riba restructuracion den Cuerpo Policial, una bes cu Minister di Husticia haci su cambionan nesecario.

Minister Dowers ta lamenta informacion incorecto cu e presidente di SPA ta suministra publicamente. E relacion cu Cuerpo Policial ta uno semper habri y den bon colaboracion cu otro. No solamente sindicato, pero cualkier miembro policial cu tin pregunta, peticion of tin cu atende cu un of otro asunto, por tuma contacto y ta keda atendi door di e personal encarga of apunta den e direccion cu mester cana, of ta sinta cu e minister mes si ta necesario.

“Locual ta sigur, cu nunca a nenga di scucha un hende, y esaki ta conta pa e sindicato tambe”.

Minister Arthur Dowers a indica cu durante su ausencia den exterior e sindicato a tuma contacto pa un reunion atrobe, caminda a informa nan cu na su regreso lo verifica fecha di reunion. Na su yegada a atende cu Presupuesto Supletorio y den e dianan aki a reanuda su agenda pa asina inicia cu e peticionnan cu a keda pendiente.

Segun e mandatario di husticia, ora a busca pa sa mas cerca un otro miembro riba e comunicado aki, e miembro di SPA a indica cu mas bien nan ta pendiente pa haya un fecha pa por reuni cu minister. Ademas a informa e miembronan cu nan por manda e puntonan di agenda pa asina por prepara pa e reunion na momento cu haya fecha pa esaki.

Minister Arthur Dowers ta bolbe reitera cu absolutamente no ta berdad cu no tin un bon comunicacion cu SPA, ni tampoco cu KPA. Lamentablemente e lider sindical ta scoge un ruta publico pa trece discordia, enbes di tuma contacto directo cu su bureau of cu su persona.

Despues di tuma nota cu Gobierno di Corsou a anuncia cu debi n’e tension cu tin entre Gobierno Mericano y Gobierno di Venezuela, a laga sera Espacio Aereo cu ta cubri e espacionan aereo di Bonaire, Aruba y tambe di Islanan Riba, ta surgi e pregunta cu te cu awor Aruba no a logra haya su parti di espacio aereo despues di su Status Aparte.

Nos por corda con na 1986, e tempo ey Minister Otmar Oduber (AVP) a bin ta hiba un lucha veraz contra di su colega di Corsou, Charles Cooper, kende no kier a tende nada di reclamo di espacio aereo pa Aruba. Y te awe Aruba no tin e espacio aereo cu e lo desea, ya cu esaki tambe lo genera un cantidad di placa di tur avion cu pasa den nos espacio aereo. 

De facto, segun Constitucion di Reino Hulandes, espacio aereo y tambe e limite maritimo, ta coresponde bao di maneho di Gobierno di Reino Hulandes. Y awor cu Bonaire ta parti di Hulanda, mas ainda Gobierno di Reino ta lucha pa haya su parti di e entrada cu Gorsou ta genera.

Den tur e discusionnan entre Aruba (Otmar Oduber) y Corsou (Charles Cooper), dado momento a yega na un proposicion pa funda un fundacion cu lo maneha espacio aereo di tur e islanan Hulandes, unda Aruba lo haya un porcentahe di dicho entrada. Pasobra Aruba ta un di e islanan Hulandes, cu mas avion comercial ta pasa den su espacio aereo. Pero asina mes, Aruba no a haya y lo no haya un porcentahe mas halto. 

Ex-Minister Edison Briesen tambe a haci intento pa Aruba haya cu su Status Aparte, su propio espacio aereo y no a logra tampoco. Ningun otro Minister despues no a haci intent mas tampoco, pero sigur lo keda un lucha entre Aruba y Corsou. Dia cu a lucha pa Status Aparte y ahaye tambe, a lubida e parti aki di su espacio aereo. Tempo lo bisa si lo surgi un politico Arubiano, cu lo bin demanda p’e derecho di Aruba, pa cual mester negocia cu Gobierno di Reino tambe.

Siman pasa nos a tuma nota con Minister di Turismo, Wendrick Cicilia a honra pioneronan nobo di turismo n’e expansion di monumento di Ike Cohen na Plaza Turismo. Mi no sa kende(nan) of comision ta tuma decision pa honra e pioneronan di turismo. Nada contra, pasobra mester duna cesar loke ta di cesar.

E biahe aki orguyosamente a desvela ampliacion di mas nomber n’e monumento Ike Cohen situa riba Plaza Turismo. A reconoce cinco (5) honrado nobo, nan vision y dedicacion. 

E monumento awor ta inclui nomber manera: Michael Kuiperi, (unico na bida), Roderick ‘Rory’ Arends, Walter Wiggins, Tito Muyale y Alex Nieuwmeyer, kendenan legado ta sigui inspira e crecemento y desaroyo turistico di e isla.

“E tabata un momento special y bunita. A inmortalisa e pioneronan cu a carga nos industria di turismo”, segun Minister Wendrick Cicilia. Originalmente e monumento aki a keda inaugura na aña 2016. Monumento Ike Cohen ta un homenahe duradero n’esnan cu a pone e fundeshi di e sector turistico prospero di Aruba. Cu e expansion aki, Aruba un biaha mas ta honra e resiliencia, vision y spirito pionero di e individuonan cu a kere den e potencial di nos isla como un destinacion premier.

Cu e hecho aki, Minister Cicilia ta reafirma su compromiso pa honra e pasado, mientras ta construi un futuro sostenibel y innovativo p’e industria di turismo di Aruba. Ora mi tuma nota di tur e bunita palabranan aki, ta hibami bek na e era di e cruise-shipnan Santa Rosa y Santa Paula, cu tabata e prome cruceronan cu ta yega haf di Oranjestad tur Diahuebs. 

Y tur Diahuebs, tabatin un agrupacion, conoci como San Fernando Boys ta bin toca ora cu e cruceronan menciona tabata drenta haf, y ora di nan salida. Sigur nan tabata Embahadornan di nos isla y a contribui grandemente na nos turismo. Mi tin miedo cu esnan cu ta dicidi hende pa honra por lubida e agrupacion aki di famia Arrindell, conoci como San Fernando Boys. Ta na su lugar pa den proximo expansion di pioneronan di Aruba pa no lubida e hendenan aki.

For di e conocido cuidadano Milton Ponson, nos a haya un observacion riba e articulo di Den Noticia, titula: “Planta 100 mil mata den 4 aña, “too good to be true”, ni tera tin pa construi cas”, un Proyecto cu Prome Minister Mike Eman a anuncia for di principio di su Gobierno p’e proyecto di reforestacion.

Un Proyecto sumamente ambicioso, pero Mike Eman no ta para keto tampoco y hunto cu stakeholders, ta busca tur manera posibel pa haci esaki un exito, y den mesun esfuerso, yuda nos agricultornan cu ta depende tanto riba e recurso. 

Di acuerdo cu Milton Ponson, no tabatin ningun representante di ningun NGO visible riba e foto aki fuera di Aruba Conservation Foundation. Casi tur NGO ambiental y di naturaleza ta ausente,  locual ta cuadra cu e hecho cu mayoria di nan no ta di acuerdo cu e plan di reforestacion aki di Gobierno di Mike Eman.

Esaki ta motibo pa Prome Minister Eman yama un reunion cu tur demas NGO pa sa nan punto di bista tambe y lo por yuda pa haci e soño aki di Mike Eman posibel. Nos a bisa caba cu planta 100 mil mata den 4 aña, ta “too good to be true”.

For di algun aña caba, San Nicolas Business Association (SNBA) ta bin ta traha riba proyectonan pa San Nicolas. Hasta forum a ser organisa, unda a invita inversionistnan local pa wak kico por ser haci pa crea mas actividad Pariba di Brug. Recientemente Errol de Freitas, Presidente di SNBA a haci entrega di copia di nan proyectonan, cu SNBA ta desea di discuti cu Conseho di Minister. Ta spera cu pronto SNBA tende cu nan a haya un cita cu Gobierno y si por na San Nicolas pa splica y mustra alabes kico nan tin den nan plannan. 

“Pa nos por ta mas cerca, y weita e situacion di mas cerca tambe cu e inversionistanan interesa, of esnan cu ta invertiendo cumprando edificio, etc.” segun de Freitas. No ta intencion pa pidi Gobierno placa, pero si inversionistanan ta sperando mehoracion den infrastructura, tambe pa regla asuntonan di permiso, cu ta hopi importante. 

E cosnan cu SNBA kier haci pa gran mayoria no ta rekeri presupuesto. Nan ta para riba cu hopi inversionista den nan organisacion no t’ey pa pidi Gobierno placa. “Nos a bin duna Gobiernonan proyectonan cu nos por uza anto cu lo ta na beneficio di un y tur,” Errol de Freitas a reteira.

Loke a yama nos atencion t’e Proyecto cu tin pa cu terreno di e refineria. Experto di asuntonan petrolero y gas, Philip de Sousa a afirma cu e compania Mericano Amstrong Petroleum Company cu ta haciendo exploracion ainda cu west di Aruba tin sigur un 93% di gas. Esaki sigur lo crea trabao p’e proximo 20 aña, mirando e cantidad di gas cu tin den nos subsuelo. Y e compania Mericano ta sigui explora den mas pos rond di  Aruba. E logro aki e compania Amstrong tin menciona tambe den nan relato.

Logrando cu sacamento di e gas aki, e por wordo procesa den un refineria masha moderno mes, cu por wordo converti den un “liquid process”, sin require inversion cuantioso. E ta un proceso limpi, cu por traha otro fuels, cu por wordo exporta.  Cu esaki Aruba lo yuda den diversificaacion di economia di nos pais. Ta ser calcula cu e gas descubri na west di Aruba, no ta mucho leu di e Faro na Westpunt y e pos aki tin 14 pia di profundidad, pos tin 1.4 triyon m3 di gas, segun de Sousa.

Philip de Sousa ta kere cu tin 3 alternativa pa cu terreno di refineria, cu tin grandura di 3.7 miyon metro cuadra. E parti pariba, mester desmantela. No tin nada mas di haci cu e parti di e refineria aki. Cu desmantelacion di e parti aki, e lo genera trabao sigur y e terreno aki lo bai pa construccion di mas cas (luhoso). E parti mei-mei di e refineria, cu t’e beach front, ta masha atractivo pa construi un yacht-haven masha luhoso mes. Tin hopi interes di doñonan di yate luhoso, cu sigur lo contribui na nos economia. Pa loke t’e parti pabao, unda Wickland tabata, ey lo mester construi un refineria moderno haciendo uso di tecnologia di liquied gas pa procesa e gas cu lo ser atrai for di nos sub-suelo, cu via di pipa lo ser transporta p’e parti aki. 

E refineria nobo, ta uno masha compact, loke ta haci su construccion mas facil. Segun Philip de Sousa, tin varios compania grandi cu tin masha interes pa construi un planta moderno asina. Ta un team negociador Gobierno mester institui pa cuminza cu negociacionnan. Esaki t’e Proyecto mas grandi cu SNBA tin pa discuti cu Gobierno y mester ta pronto pa no sigui perde tempo.

Analisando e raport di Proyectonan cu San Nicolas Business Association ta mira ehecutable pa Pariba di Brug, ta e.o. mehoracion den Caya Principal, crea mas food courts, Carnival Village, beachnan den Colony, Seroe Colorado mester haya atencion di inmediato. E vision ta enfoca riba pueblo como tambe bishitantenan. Mester corda cu San Nicolas ta e ultimo frontera – y SNBA ta boga pa mantene e herencia y cultura. 

Turistanan no ta bin Aruba simplemente p’e perfeccion, pero pa nos imperfeccion segun Errol de Freitas. Ora mira desaroyo na Noord, Palm Beach, por mira un desaroyo positivo y grandi. Den Caya Grandi, den e prome fase e unico cos cu mester ta iluminacion, verf, y mata. Despues mester haci limpiesa di beachnan.

No por lubida riba e area di Santana di Cacho cu tambe mester atencion. E Santana di Cacho no ta un bista, anto a purba papia cu varios instancia pa haci algo y te ainda no tin movecion riba dje, segun Presidente di SNBA.

Kier mira San Nicolas florece

E vision ta grandi cu varios fase, segun SNBA. E cos importante ta cu inversionista no lo warda pa semper. Loke tabata Glamour ta un propiedad cumpra dor di inversionista Mericano, pero for di momento un ciudadana local Brown a mustra interes di kier contribui n’e aspecto comercial di San Nicolas, awor tin mas cos a bin ta tumando lugar. 

Den e hanchi eybanda tin nuebe (9) parcela di tereno anto lo ta bon pa papia cu doñonan di e bar di e caya ey, ofrece nan pida tereno y pasa nan permiso paden, p’asina tin otro edificio pafo pa otro tipo di desaroyo pa cambia e aspecto di caya. Aki SNBA ta papia di muda e practica di prostitucion, pa cual San Nicolas ta conoci p’e.

Mas atencion pa San Nicolas

“Tur distrito merece atencion, pero SNBA ta para pa San Nicolas. Nos kier weita San Nicolas florece, nos kier weita San Nicolas bira e San Nicolas cu tin mester di bira atrobe,” Errol de Freitas ta bisa. SNBA ta enfatisa cu ta positivo di mira Aruba creciendo, y ta momento pa cuminda enfoca pa crece den calidad y riba ki tipo di bishitante nos kier sigui atrae. 

“Na San Nicolas nos kier ta tiki otro unda ta mantene cultura y herencia di nos isla,” de Freitas ta bisa. SNBA ta spera cu Gobierno tene cuenta cu distrito di San Nicolas awor cu ta trahando riba presupuesto 2026, cu proximamente mester keda entrega na Parlamento.