Minister di Finansas, Asunto Economico y Sector Primario, mr. Geoffrey Wever, a firma e Landsbesluit cu ta finalisa y formalisa e prestamo cu Gobierno a coloca riba mercado di capital internacional. E prestamo di USD 140 miyon ta destina pa refinancia debenan di pasado y pa garantisa cu Pais Aruba por cumpli cu tur su obligacionnan financiero den luna di december.

Segun Minister Geoffrey Wever, e proceso pa yega n’e financiamento aki a conoce un trayecto largo y rigoroso, encamina dor di e expertonan di Departamento di Finansas, cu un enfoke estricto riba calidad, credibilidad y di finansas publico duradero. “E bon noticia ta cu pa di 31 biaha cu Aruba a acesa mercado di capital, nos a logra e mihor “spread” den henter nos historia di financamento.

Aruba a logra un “spread” di apenas 210 basispunten, e nivel mas abou cu Pais Aruba a registra te na momento aki, loke ta confirma e fortalesa di finansas publico di e pais. E resultado positivo aki ta, segun Minister Geoffrey Wever, consecuencia directo di e reduccion continuo di debe, e presupuesto cu ta conta cu un surplus, y un economia cu ta keda robusto y resiliente.

Un factor importante den e confiansa di mercado t’e hecho cu Aruba ta mantene tres rating di investment grade, otorga dor di Standard & Poor’s, Moody’s y Fitch. “Mercado di capital ta reconoce e trabou cu Aruba ta haciendo y ta confirma cu nos ta un pais solido pa inversion,” Minister Wever a subraya.

E prestamo aki a atrae tambe inversionistanan nobo, incluyendo diferente grupo financiero cu pa prome biaha a participa den un transaccion cu Aruba, y cu a tuma porcionnan significante di e financiamento total. Esaki ta fortifica e posicion di Aruba den mercado di capital y amplia su base di lenders internacional.

E mandatario a anuncia cu e cuenta di Pais Aruba na New York a wordo gefund cu e USD 140 miyon, permitiendo Aruba cumpli cu tur su debe y compromisonan financiero. “Nos ta cera e aña 2025 cumpliendo cu nos responsabilidad y nos ta habri 2026 cla, yen di proyectonan nobo, idea nobo y oportunidadnan nobo pa cada ciudadano di Aruba,” Minister Geoffrey Wever a conclui.

Manera tabata di spera, Director di Elmar Anthony Yrausquin a keda retira

E Director di N.V. Elmar, Anthony Yrausquin a keda retira di su funcion siman pasa. Abogado di N.V. Elmar, mr.David Kock a confirma e noticia aki tambe. 

Despues cu a bin cambio den gobernacion, e tabata conoci cu un di e personanan cu Gobierno nobo di AVP-FUTURO lo no kier traha cune ta cu Director di N.V. Elmar. A cuminsa na suspende, pa cual Anthony Yrausquin tin algun dia caba na cas. E informacion cu ta circula, ta cu Anthony Yrausquin lo no a actua corecto durante su periodo como Director, unda cu ta acuse di a e.o. faborece cierto contracto cu companianan cu cua e lo tin laso personal. 

Nos por a compronde cu Yrausquin lo a para retiro di cierto persona den e compania, y cu esaki lo no a cay bon den tera cerca e accionistanan. Negociacion di su retiro a tuma lugar, pa determina si e por a haya un “golden handshake”, pero ningun hende no kier a confirma esaki. Hecho ta cu Anthony Yrausquin a keda retira y no ta conoci si e lo cuminza un caso den Corte Civil pa bringa su retiro.

Minister di Turismo, Transporte y Labor mr. Wendrick Cicilia, a reuni dia 20 ultimo c’un total di 14 piscador cu ta representa e demas piscadornan na Aruba, acompaña pa tres consehero di su ministerio, p’asina combersa riba siguridad maritimo, e desaroyonan regional y e iniciativanan specifico p’e sector.

Durante e reunion, a informa e piscadornan tocante actividad di siguridad aumenta den e region debi n’e presencia di forzanan militar cu ta den e awanan den cercania. A pone enfasis riba e vigilancia riba lama y e importancia di mantene e canalnan di comunicacion adecua, incluyendo coordinacion pa medio di Aruba Ports Authority (APA).

Autoridadnan a confirma tambe cu lo ofrece un sesion nobo di siguridad duna pa Kustwacht y Directie Scheepvaart, na tur piscador, cu lo atende cu e siguridad general riba lama y comunicacion basico di radio.

Durante e reunion a atende tambe riba e posibel introduccion di un proyecto piloto di Fish Aggregating Devices (FAD), resaltando e uzo, mantencion y entrenamento responsabel. Mester pone e FADnan na profundidad di 600 pia of mas profundo y lo implementa un sistema di registracion anonimo p’asina registra e informacion capta p’e FAD. E datonan aki ta esencial pa garantisa e financiamento continuo y garantisa e sostenibilidad di e proyecto.

Ademas a trata tambe e posibel introduccion di un “assistentietarief” (tarifa di asistencia). Lo sigui revisa e detayenan tocante terminologia y e tarifanan. Minister Wendrick Cicilia a confirma tambe cu a aproba un “decompression chamber”, opera pa un specialista certifica y ta programa pa bira operacional na Dr. Horacio E. Oduber Hospital pa juli di aña 2026.

“Nos piscadornan ta opera den un ambiente cu ta exigi atencion constante pa siguridad, comunicacion, y preparacion. Pa medio di cooperacion, entrenamento, y practicanan responsabel, nos ta fortalece e sector, mientras ta sigura cu esnan cu ta subi lama tur dia por haci esaki cu mas confiansa y sosten”, segun Minister Cicilia.

Gobierno a reafirma su compromiso pa dialogo continuo cu e comunidad piscador y pa keda mehora e leynan p’asina garantisa nan siguridad, sostenibilidad y resiliencia den e sector.

Den presencia di sra. Mervin Wyatt-Ras, Minister di Asunto Social, Salud Publico, Cuido di Adulto Mayor y Adicto, tambe Hunta Supervision di HOH, Hunta Directiva di HOH, representante di IMSAN, famia y amigonan orguyoso, HOH Academy a celebra e graduacion di 29 profesional den cuido. E anochi tabata yena di emocion y orguyo, destacando e crecemento di profesionalnan den cuido na Aruba y alabes e papel importante cu HOH-Academy tin den formacion di nos profesionalnan den cuido.

E anochi a habri cu palabra di orguyo y satisfaccion di Lenie Denteneer, Manager HOH-Academy cu a brinda elogio na cada graduado y tambe e team di HOH-Academy cu ta guia e graduadonan p’asina cada uno logra nan meta.

Gregory Coeze, miembro di Hunta Directiva a expresa: “Mi tin un gran aprecio pa cada graduado pasobra boso ta contribui directamente n’e futuro di cuido na Aruba. Boso profesionalismo ta haci nos sistema di cuido mas fuerte, mas humano y mas resiliente. Aruba por ta orguyuso di boso.”

Diferente estudio, pero cada uno enfoca riba un solo meta cu ta brinda cuido di calidad specialisa cu ta safe pa comunidad di Aruba. E 29 graduadonan, di cual tres di nan ta coleganan di ImSan, a gradua den e siguiente specialisacionnan cu ta operatieassistent, anesthesiemedewerker, dialyseverpleegkundige, oncologieverpleegkundige, intensive care verpleegkundige, sedatie-praktijkspecialist, vaattoegangverpleegkundige, SHE-verpleegkundige, deskundige infectiepreventie y post-HBO echografie abdomen specialist. Nan formacion ta contribui directamente na Departamento di Emergencia, Cuido Cronico, Cuido Compleho y tambe prevencion na nos isla.

E diploma aki ta tambe ta di esnan cu ta mantene cada studiante enfoca durante e trayecto. Pues un danki ta bay na cada miembro di famia y tambe colega cu a sostene e graduadonan durante nan trayecto. Tambe palabra di gratitud n’e docentenan cu a guia e studiantenan te n’e meta final. Estudionan den ramo di cuido ta rekeri dedicacion, disciplina y hopi apoyo pues pabien cu boso gran logro!

Un pabien di curason ta bay na cada graduado di parti di Hunta Directiva di HOH, management y staf completo cu ta super orguyoso di cada uno di boso. Sigui semper t’ey pa nos pashentnan y comunidad di Aruba!

Aruba a prepara pa un anochi yen di tradicion, cultura y orguyo nacional cu celebracion di su 53 edicion di Festival di Dande. E festival a tuma lugar dia 21 di december 2025, na Plaza Inmaculada Curazon di Maria, cu un publico cu a bin sostene cada participante.

Festival di Dande ta un evento cultural emblematico cu a sigui fortalece y transmiti e tradicion di Dande, di generacion pa generacion. E edicion aki a presenta varios agrupacion di dande cu composicionnan tipico y propio, interpreta pa cantante y musiconan adulto cu hopi trayectoria y pasion pa nos herencia cultural.

Prome Minister y Minister di Cultura mr. Mike Eman tambe tabata presente p’e anochi cultural aki caminda e publico a disfruta di presentacion y tur agrupacion. Cu e Festival di Dande, Aruba no solamente ta celebra musica, pero tambe historia, identidad y union comunitario. E evento ta forma parti di e esfuersonan continuo pa preserva y promove e patrimonio cultural inmaterial di nos isla.

Festival di Dande 2025 ta un caminda a habri porta pa henter famia bin gosa, canta y celebra hunto, e tradicion cu ta uni nos como pueblo. Na final di anochi Minister di Cultura Mike Eman a entrega e corona n’e ganadornan absoluto di Rey y Reina di Dande, cu a keda den persona di Robert Maduro y Maria Elena Croes.

Laga nos tradicion keda bibo y ban celebra Dande, un simbolo di nos cultura Arubano.

E premie di 5% di AZV pa pensionadonan cu un ingreso anual te AWG 30.000 ta wordo elimina completamente y ta bira 0%. Esaki ta un cambio concreto cu tin un impacto directo riba e ingreso neto di nos pensionadonan. Promer Minister mr. Mike Eman y Minister di Salubridad drs. Mervin Wyatt Ras a anuncia e bon noticia aki. 

E reduccion aki ta forma parti di e aumento di pensioen manera publica, locual SVb tabata cumpli cune p’e parti di AOV, pero e ta bai tin tambe un efecto positivo p’esnan cu entrada riba 30.000 florin. 

E efecto pa pensionadonan: E eliminacion di e premie di AZV: 1. A wordo incalcula den e aumento di pensioen pa AOV’ers; 2. Y tin tambe un efecto adicional positivo p’e pensionado cu tin un ingreso extra banda di AOV, pasobra e obligacion di afdracht di premie ta wordo alivia. Esaki ta yuda cu pensionadonan cu a sigui activo of cu tin un ingreso complementario wordo penalisa menos financieramente. 

Pakete di remedi di AZV casi completamente restaura. Tambe Minister President mr. Mike Eman y drs. Mervin Wyatt Ras a anuncia cu e pakete di remedi di AZV a wordo restaura, y actualmente casi tur medicamento esencial ta di nobo cubri pa AZV. E restauracion di e pakete ey a contribui pa baha gasto directo di salud pa hopi hende, y particular pa pensionadonan y hende cu un ingreso modesto.

Maneho di salud y social cu direccion

E decisionnan menciona: 1. Eliminacion di AZV-premie pa pensionadonan cu ingreso te AWG 30.000,; 2. Aumento di pensioen; 3. Alivio di carga pa AOV’ers cu ingreso adicional, y 4. Restauracion di e pakete di remedi, ta resultado di un enfoque coherente di maneho social y di salud di Gabinete AVP-FUTURO.

P’e realisacion di e pasonan aki, Minister di Salud Mervin Wyatt Ras y Minister Presidente Mike Eman a haci esfuersonan consistente pa logra un solucion structural cu ta pone bienestar di hende central.

Parti di e Plan di Mehora di Poder di Compra di AVP–FUTURO

Minister President Mike Eman ta enfatisa cu e decisionnan aki no ta aisla. Nan ta forma parti di e Plan di Mehora di Poder di Compra di e Gobierno AVP–FUTURO, cu como meta: Fortalece ingreso neto; baha gasto esencial; y  y garantisa mas seguridad economico pa nos comunidad, especialmente esnan mas vulnerabel.

Cu esaki, e Gobierno AVP–FUTURO ta demostra cu un maneho social hiba cu curason ta sirbi e BON COMUN di nos comunidad.Prima di 5% AZV ta bira 0% pa pensionadonan cu ingreso te AWG 30.000

E premie di 5% di AZV pa pensionadonan cu un ingreso anual te AWG 30.000 ta wordo elimina completamente y ta bira 0%. Esaki ta un cambio concreto cu tin un impacto directo riba e ingreso neto di nos pensionadonan. Promer Minister mr. Mike Eman y Minister di Salubridad drs. Mervin Wyatt Ras a anuncia e bon noticia aki. 

E reduccion aki ta forma parti di e aumento di pensioen manera publica, locual SVb tabata cumpli cune p’e parti di AOV, pero e ta bai tin tambe un efecto positivo p’esnan cu entrada riba 30.000 florin. 

E efecto pa pensionadonan: E eliminacion di e premie di AZV: 1. A wordo incalcula den e aumento di pensioen pa AOV’ers; 2. Y tin tambe un efecto adicional positivo p’e pensionado cu tin un ingreso extra banda di AOV, pasobra e obligacion di afdracht di premie ta wordo alivia. Esaki ta yuda cu pensionadonan cu a sigui activo of cu tin un ingreso complementario wordo penalisa menos financieramente. 

Pakete di remedi di AZV casi completamente restaura. Tambe Minister President mr. Mike Eman y drs. Mervin Wyatt Ras a anuncia cu e pakete di remedi di AZV a wordo restaura, y actualmente casi tur medicamento esencial ta di nobo cubri pa AZV. E restauracion di e pakete ey a contribui pa baha gasto directo di salud pa hopi hende, y particular pa pensionadonan y hende cu un ingreso modesto.

Maneho di salud y social cu direccion

E decisionnan menciona: 1. Eliminacion di AZV-premie pa pensionadonan cu ingreso te AWG 30.000,; 2. Aumento di pensioen; 3. Alivio di carga pa AOV’ers cu ingreso adicional, y 4. Restauracion di e pakete di remedi, ta resultado di un enfoque coherente di maneho social y di salud di Gabinete AVP-FUTURO.

P’e realisacion di e pasonan aki, Minister di Salud Mervin Wyatt Ras y Minister Presidente Mike Eman a haci esfuersonan consistente pa logra un solucion structural cu ta pone bienestar di hende central.

Parti di e Plan di Mehora di Poder di Compra di AVP–FUTURO

Minister President Mike Eman ta enfatisa cu e decisionnan aki no ta aisla. Nan ta forma parti di e Plan di Mehora di Poder di Compra di e Gobierno AVP–FUTURO, cu como meta: Fortalece ingreso neto; baha gasto esencial; y  y garantisa mas seguridad economico pa nos comunidad, especialmente esnan mas vulnerabel.

Cu esaki, e Gobierno AVP–FUTURO ta demostra cu un maneho social hiba cu curason ta sirbi e BON COMUN di nos comunidad.

Minister di Finansas, Asunto Economico y Sector Primario, mr. Geoffrey Wever a entrega e Cuenta Anual 2024 di Pais Aruba na Algemene Rekenkamer. Entrega di e Cuenta Anual 2024 na Controlaria General (Algemene Rekenkamer) ta parti di e proceso legislativo pa responsabilisa entrada y gasto di Pais Aruba.

Pa hopi aña tabatin un retraso cu preparacion y entrega di e cuantanan anual di Pais Aruba, pero e ultimo lunanan a haci un inhaalslag y a entrega e cuentanan anual 2021, 2022, 2023 y awor tambe 2024.

Controlaria General ta encarga cu investigacion riba efectividad y legitimidad di entrada y gasto di Pais Aruba segun e Constitucion di Aruba. Durante nan investigacion riba legitimidad, Algemene Rekenkamer ta investiga si e cuentanan di entrada y gasto den 2024, ta contene tur post cu segun regla mester aparece den nan y/of si e cuentanan ta redacta conforme e proceduranan legal y ley di presupuesto.

E proceduranan aki ta stipula den entre otro e ley di Contabilidad 1989 (Compabiliteitsverordening V 1989) cu ta stipula e forma pa maneha y responsabilisa placa di Pais Aruba). Tambe Algemene Rekenkamer ta averigua si un decision di maneho a logra e obhetivo (eficacia) cu menos uzo posibel di e recursonan (eficiencia) den 2024.

Como parti di e proceso legislativo pa responsabilisa entrada y gasto di Pais Aruba den 2024, Algemene Rekenkamer lo publica un rapport di e investigacion. Banda di duna conclusionnan riba efectividad y legitimidad di entrada y gasto di Pais Aruba, A.R.A. ta haci recomendacionnan cu e meta pa mehora finansa publico y reforsa e supervision financiero riba Pais Aruba. 

Cuenta Annual 2021, 2022 y 2023 a wordo entrega riba respectivamente 15 di mei 2025, 7 juli 2025 y 29 augustus 2025. Minister Geoffrey Wever ta gradici Departamento di Finansas y Centrale Accountantsdienst p’e trabao haci pa entrega e Cuenta Anual 2024 y asina disminui e retraso di entrega di cuentanan anual di Pais Aruba. Un danki tambe na Algemene Rekenkamer cu tin un rol constitucional pa mehora finansas publico di Aruba.

Siman pasa a tuma lugar na HOH Academy e di dos mini DAS Clinic, esta e Dutch Antillean Southamerican Clinic den version mini, organisa dor di dos internistanan di HOH, esta dr. Sandro Waterloo y dr. Bert Rodenburg. E evento aki ta conta cu participacion di diferente specialismo den cuido medico, dokternan di cas, praktijkondersteuners, enfermeronan specialisa y demas profesional den cuido p’asina keda up-to-date. 

Recientemente dokternan di cas y specialistanan a yega na un acuerdo pa loke ta tratamento y referencianan di pashent. Y durante e dia aki a enfoca mas profundo den identifica ki tipo di pashent ta pertenece na cua liña di cuido. Na final esaki ta mas eficiente y na bienestar di e pashent y comunidad di Aruba completo.

Dr. Bert Rodenburg, internista y infecciologo na HOH, a duna di conoce cu e intencion di e acuerdo aki ta pa clarifica cua pashent ta bay dokter di cas y cua pashent mester bay un specialista. E meta ta pa haci uzo mas eficiente di cuido medico na Aruba. Hopi biaha e pashent por keda na su dokter di cas, pasobra e dokter tin e protocol pa duna e tratamento necesario of despues di tratamento na specialista e pashent por bay bek su dokter di cas pa sigui cu control. E pashent asina lo tin mas acesibilidad na cuido, banda di un reduccion di gastonan di AZV.

Durante e dia tabatin presentacion riba diferente area di specialisacion medico e.o. nefrologia, ortopedia, cardiologia, oftalmogia, medicina interno, urologia y mas. Mayoria presentacion tabata den man di specialista hunto cu’n dokter di cas pa papia tocante e protocolnan. Meta tabata pa duna clarificacion di e protocolnan y a papia di diferente ehempel di tratamentonan cu dokter di cas mes por haci y con por mehora e colabracion.

Pa dokter di cas, dr. Dennis Rasmijn, e acuerdo aki a cay den masha bon tera cerca e dokternan. E ta contento cu por a reuni pa hunto papia tocante protocolnan pa uniforma e sistema y hacie mas eficiente. Dr. Rasmijn ta aprecia di a haya mas informacion tocante con e protocol ta hinca den otro, pa siña di otro y keda na altanto di desaroyonan pa bienestar di e pashent.

Nefrologo di HOH, dr. Hardjit Kharagjitsing, a expresa cu e DAS Clinic ta un bon Plataforma mirando cu e ta un brug entre cuido di e prome y di dos liña. Esaki ta hopi importante pasobra mas colaboracion tin den cuido medico, mihor por organisa e cuido tanto riba termino cortico, como tambe a termino largo. Di e manera aki por brinda un mihor cuido n’e pashentnan cronico, cu un maneho mas cla entre e specialista y e dokternan di cas.

Un dia hopi interactivo y cu e meta primordial pa tur esnan cu a participa a siña di e protocolnan cu na final lo hisa e eficiencia y calidad di cuido medico na Aruba. Ta gradici tur orador, Hospital y parti di e team di organisacion p’e trabou duro pa por a logra haci esaki posibel un biaha mas.

Minister di Finansas, Economia y Sector Primario, Geoffrey Wever, a anuncia cu e formulario di declaracion di Inkomstenbelasting proximamente lo bay conoce un cambio grandi y hopi importante. Entrante aña fiscal 2025, e formulario aki lo wordo digitalisa den su totalidad brindando asina mayor eficiencia y rapidez den procesamento di e resultadonan.

“Mi ta sumamente contento cu nos ta cuminsa cu e proyecto importante aki y cu Conseho di Minister di Gabinete AVP-FUTURO a aproba alocacion di Afl. 3.1 miyon pa por ehecuta e proyecto aki y p’e trabou importante cu e profesionalnan di Departamento di Impuesto ta haciendo y lo bay haci pa por logra cu den 2026 tur ciudadano por haci nan aangifte Inkomstenbelasting digital”, segun Minister Geoffrey Wever.

Automatisacion di e proceso di Inkomstenbelasting ta marca un otro paso importante den e trayecto di digitalisacion y modernisacion di Departamento di Impuesto y ta brinda bentahanan significativo, tanto p’e contribuyentenan como pa Gobierno por ehempel:

1. Un sistema di declaracion online cu ta facil pa uza y sigur; 2. Mayor calidad di data y mihor cumplimento pa cu debernan di Impuesto; 3. E procesamento di e declaracion ta sosode den un periodo mucho mas cortico y cu menos gasto administrative; 4. E ta forma un base solido pa digitalisacion di otro procesonan, manera un mailbox digital.

Dentro di poco lo start cu e proyecto di digitalisacion di e declaracion di Inkomstenbelasting cual lo finalisa den transcurso di aña 2026 na momento cu mester otorga e declaracion di Inkomstenbelasting di aña 2025.

Introduccion di e formulario di declaracion digital lo sosode atraves di e portal “BO impuesto” (BOi), den cual ta bay integra datonan di e registro di Censo hunto cu e sistema digital di Departamento di Impuesto. Esaki lo permiti pa henter e proceso, desde entregamento di e declaracion, sosode completamente den forma automatisa y rapido.

Minister Wever tin un relacion di trabou estrecho cu Departamento di Impuesto y conhuntamente a encamina e proceso pa adkiri e fondonan di inversion necesario den presupuesto di Pais Aruba, p’asina por realisa e proyecto importante aki.

Minister Wever ta gradici henter e ekipo di Departamento di Impuesto pa tur e trabounan riba tereno di digitalisacion y pa realisacion di e proyecto di digitalisacion di e declaracion di Inkomstenbelasting den 2026 y ta garantisa henter e pueblo di Aruba cu realisacion di e proyecto aki lo contribui directamente na mehoracion di e eficiencia administrativo, brinda transparencia y servicio di calidad n’e ciudadanonan contribuyente.