Ta na su lugar pa gradici tur hende, kendenan a reacciona riba e prome edicion di DEN NOTICIA, siman pasa, mustrando cu tin espacio y confiansa grandi pa un tipo di plataforma, cu ta analisa  diferente tipo di noticia. Un reaccion cu a laga nos di DEN NOTICIA altamente sorprendi, pero na mes momento tin cu mustra cu esaki den cierto forma ta bolbe mustra e anhelo di hopi ciudadano pa mira cierto cambio den e area periodistico, den e forma di trece informacion dilanti y no forma parti di e ‘bulto’ di medionan di comunicacion, ta conta c’un variacion minimo den informacion. E proyecto a inicia esaki lo keda exitoso cu e sosten di nos hendenan y p’e confiansa cu e inicio aki no solamente lo conoce un continuacion di e servicio, pero lo conoce un ampliacion den simannan nos dilanti. Masha danki p’e sosten, masha danki p’e confiansa y DEN NOTICIA lo continua riba e rumbo periodistico nobo cu nos a priminti y cu nos lo honra! Esnan cu no a registra ainda, por haci esaki via di dennoticia.com y asina abo tambe lo recibi bo DEN NOTICIA. Y si Abo kier recomenda un amigo(a), bise bai riba dennoticia.com y registra. Te awor DEN NOTICIA ta obtenible solamente si Bo registra. Den un futuro cercano, nos lo por bai amplia nos plataforma. Un biaha mas masha danki p’e reaccion recibi, cu ta motibo pa nos sigui cu nos meta, trece un cambio den periodismo na Aruba. Si tin cualkier sugerencia of comentario, por manda esakinan pa [email protected] of via di [email protected]

E Proyecto di Mike Eman pa reforestacion, ta manera un soño lanta. Durante proximo 4 aña, Eman kier planta 100 mil mata rond Aruba. Mike Eman mester bin afo, y bisa sin rodeo, unda e ta bai planta e 100 mil matanan aki, cu ni tera no tin mas pa yiunan di tera por construi nan cas. Durante un reunion bao di mata di tamarijn na Parke Nacional Arikok, a brainstorm cu un grupo di organisacion no gubernametal riba e topico di reforestacion di tanto e areanan rural como urbano. Sigur e ta un plan ambicioso. Aruba ta conoci pa su clima hopi calor y seco, pa cual mester pensa riba e solucion mas practico y realistico pa por completa e plan di reforestacion exitosamente, segun Mike Eman. Ta importante pa recobra nos naturalesa, pero mester por conta cu contribucion di comunidad completo. E interconexion cu tin entre matanan riba tera y nos lama y e bida marino, cu ta nos atraccion principal, ta di sumo importancia. E reto di secura, e necesidad di awa ta grandi, e posibilidad pa yega na awa recicla, ta tarea principal di AWSS cu e plantanan di purifcacion. Anto stop di papia y pone AWSS den accion. Tin masha perdemento di tempo caba. Na Parkietenbos tin un tanki cu ta carga 300 kub di awa mientras cu ta produci alrededor di 3000 kub di awa recicla. Lamentablemente e mayoria di e awa aki ta bay lama, mirando cu no tin manera pa warda esaki. Segun nos Prome Minister, den e plan di expansion di AWSS ta inclui varios tanki di awa, tanto pa AWSS na Zeewijk como na Barcadera cu lo construi den e siguiente aña. Cu esaki por warda alrededor di 4000 kub di awa cu por uza den plantacion, cu mester taa disponible tambe pa nos cunukero y agricultornan, manera a ser priminti na nan masha aña caba. Segum expertonan di Gobierno, un di e problemanan cu ta surgi na AWSS cu ta haci daño n’e calidad di awa cu mester refina, p.e. tin empresa cu ta tira azeta y quimico den e sistema di riolering cu tin su influencia riba e operacion debido di e planta di purificacion di AWSS na Bubali y Gobierno tin e tarea pa crea maneho pa evita esaki. Nada nobo, tur hende sa esaki caba. Un di e sistemanan mas comun te ainda ta uzo di awa di dam. Esaki ta esencial no solamente p’esnan cu ta planta sino tambe pa logra e proyecto di reforestacion aki. Ta importante pa inventarisa e damnan cu ta funcional ainda y cu ta contene awa di calidad pa irigacion. Mirando e escasez cu tin awo caba, cu e plantamento di 100 mil

mata mas, mester expande e cantidad di damnan, pero tambe sondeo maneranan pa evita cu e awa di yobida ta bay perdi. Un otro posibel solucion pa contene e cantidad di awa di yobida di bay lama, ta pa hustamente no haci e rooinan limpi, mirando cu e matanan cu a crece den e rooinan aki ta wanta e tera hunto, ta mehora e calidad di e tera, ta duna e awa tempo suficiente pa drenta den tera y muha a areanan rond di e rooinan. Ademas e ta reduci e fluho di awa cu ta bay perdi den lama. For di e encuentro aki di diasabra ultimo, a determina cu tin varios pos di molino di biento, cu ta sea seco of e calidad di awa no ta apto pa muha mata. Instancianan di Gobierno lo haci studio di e suela pa determina unda otro tin posibilidad pa coba posnan nobo y instala Molino di biento. Segun Prome Minister Mike Eman, e proyecto di reforestacion ta berdad ambicioso, pero e mandatario no ta para keto tampoco y hunto cu stakeholders, ta busca tur manera posibel pa haci esaki un exito, y den mesun esfuerso, yuda nos agricultornan cu ta depende tanto riba e recurso. 8 Luna ta pasando caba, stop di papia, studia, pero pone man na obra. Sino no ta logra ni mitar di planta 100 mil mata.

Siman pasa, Prome Minister Mike Eman a dicidi di informa Parlamento y despues medionan di comunicacion cu no mester preocupa cu e tension cu Merca ta causando den nos awanan pa cu su relacion cu Merca, dor di manda algun barco di Guerra. Di acuerdo cu e mandatario Arubiano, Mike Eman, e ta den constante contacto cu Ministerio di Relacion Exterior di Reino Hulanda, unda pa colmo su Minister a entrega su retiro pa cu e posicion cu Hulanda tuma pa cu nan relacion cu Israel. Mientras den un di e conferencianan di prensa na Cas Blanco, e periodista McClatchy a cuestiona cu ta masha bunita cu Presidente Donald Trump ta bisa cu presencia militar ta unicamente pa combati e trafico di droga cu tin for di Venezuela pa Merca, di cual Presidente Nicolas Maduro y su hendenan ta forma parti di diferente cartel cu trafico di droga. McClatchy a cuestiona alegando cu esaki ta hopi bon, pero e interes militar Mericano den Caribe no por wordo converti den un posibel intrvencion militar na Venezuela? E Secretaria di Cas Blanco, Karoline Leavitt a admiti cu sigur esaki por ta un posibilidad, pero meta den presencia militar den Caribe ta pa combati traficacion di droga. Donald Trump tabata masha cla y consistente, e kier pone un paro defitivo na trafico di droga y hiba esnan responsabel Merca pa ser huzga. Ademas e Gobierno di Nicolas Maduro no ta uno legal. Maduro ta un fugitivo di varios cartel di droga, kende sigur mester paga pa su delitonan pa cu USA. Con lo detene Maduro y su gang, ta keda e pregunta. Ta via di un intervencion militar so. Informacion cu medionan di Merca a emiti tambe ta cu e 4.5 miyon dollar cu Maduro tin, cu hopi inversion a ser haci na Aruba, Bonaire y Corsou, cu autoridadnan Mericano ta califica como “sleeper cells”. Pa loke te remarke aki, ningun gobernante di e islanan meniona a reacciona. Pesey awor tin algun hende ta cuestiona: “Kico MOT ta haci anto?”. Ta di spera cu ora reunion di Parlamento continua e siman aki, haci e pregunta aki na Gobierno. Ta berdad ehecutivonan di Gobierno Venezolano tin hopi inversion haci nan e ganashinan cu e cartelnan di Maduro ta haci cu traficacion di droga?

Tur hende cu a scucha e reunion publico di siman cu a pasa pa atende Presupuesto Supletorio 2025, sin duda a keda babuca dado momento ora cu algun miembro di Parlamento a dicidi di hiba palabra, no pa duna un aporte n’e cambionan cu Gobierno di AVP-Futuro a presenta, pero pa simplemente haci politica ‘for the sake’ di haci politica. Un rol importante tabata reserva pa ex Prome Minister Evelyn Wever Croes, tambe pa ex Minister Dangui Oduber y algun otro, kendenan a dicidi cu AWOR, na aña 2025, ta nan deber y obligacion pa defende autonomia di Parlamento di Aruba contra di e intencion di Hulanda pa introduci un ‘Rijkswet’ tambe pa Aruba. Kisas e momento mas historico ta na momento cu e lider di fraccion di MEP, Evelyn Wever Croes a bin dilanti y sin ningun clase di berguensa, ta insinua cu e Gobierno nobo actual, lo bay firma n’e “kruisje”, un acusacion cu su persona a bira conoci p’esaki, algo cu varios Secretario di Estado pa Asuntonan di Reino, a confirma na varios ocasion. Cuminsando cu Raymond Knops, kende na varios ocasion a pone e ex Prome Minister di Aruba y lider di MEP na su lugar, exponiendo e hecho cu Evelyn Wever Croes no ta respeta su propio firma, hasta informando cu tin cosnan cu e lider di MEP a firma, cu tabata puntonan cu e mes a trece dilanti. Despues a sigui cu Alexandra van Huffelen, kende dado momento a haya cariño p’e lider di MEP pa despues e mes denuncia cu e ex Prome Minister di Aruba no ta respeta su propio  ideanan  y su firma bou di documentonan cu a wordo presenta su dilanti. Van Huffelen a bin Aruba y a ser ricibi como ‘gran amiga’ di Aruba y di Evelyn, kende a baila cu e mandatario Hulandes, a presente un buki di cultura di e pais, pero na final tabata mesun Evelyn cu a insisti cu van Huffelen ta un gañado. Despues a presenta un Secretario di Estado cu su nomber ta mes complica cu e pensamento politico di e lider di MEP, Zsolt Szabo, kende tambe a sigura cu tur loke ex Prome Minister Wever Croes a firma den nomber di Aruba, lo wordo ehecuta y por ultimo a presenta e di 4 Secretario di Estado, Eddy van Marum, pero prome cu el a bin Aruba di bishita, ya e Prome Minister demisionario Dick Schoof, kende tambe a enfatisa  cu mester respeta acuerdonan “firma” caminda bou di tur e documentonan firma aki, tin nomber di Evelyn Wever Croes. Parlamentario Dangui Oduber ta insisti cu Parlamento di Aruba lo perde su autonomia, pero tempo cu su Prome Minister a biaha pa Hulanda y  a bay di acuerdo cu esaki, Dangui Oduber no a actua, no a lanta para y cuestiona e asunto aki mesora.

Es mas, den e acuerdo di gobernacion cu e lider di MEP Evelyn Wever Croes a firma cu lider di partido RAIZ, Ursell Arends p’asina haci gabinete Wever Croes un realidad, ta pone como punto crucial di e acuerdo aki, cu Gobierno MEP-RAIZ mester respeta tur acuerdo cu a ser firma cu Hulanda. Pesey tin cu considera algo historico cu e ex Prome Minister tin e curashi di lanta para den Parlamento y cuestiona algo cu ainda e Gobierno nobo di AVP-Futuro no a atende ainda. E siman aki, ora cu e reunion publico aki continua, lo tende mas di e famoso Rijkswet, cu Gobierno di MEP-RAIZ tabata na fabor y cu e actual Gobierno AVP-Futuro ta contra y lo bin cu cambio den esaki.

Riba Instagram un biaha mas a keda demostra con grandi e desesperacion di ex gobernantenan di partido MEP ta n’e momentonan aki, caminda hasta e propio lider di e partido, e propio ex Prome Minister Evelyn Wever Croes, simplemente NO por adapta su mes n’e rol nobo cu e tin p’e proximo 4 of hasta 8  añanan na caminda. Evelyn Wever Croesa subi Instagram y kier a comenta e presencia di hopi sostenedornan di AVP y Futuro, kendenan tabata den tribuna publico den sala di Parlamento, cu durante henter e reunion, a tira dos palabra den direccion di miembronan di fraccion di MEP. E post di e  lider di MEP a mustra cu: ‘Tribuna di Parlamento tabata yen di coordinador di Gobierno AVP-FUTURO’ y despues a pone e observacion “Nunca di mi bida mi tabata den un sala cu asina tanto hende cu antecedente penal.” Un observacion cu ta keda pa historia di un di e lidernan politico mas controversial cu Aruba a yega di conoce, ya cu for di 2021 e lider di MEP aki, ta bibando “hunto” cu corupcion den seno di partido, ta saliendo di un caso pa otro y caminda su rol propio, tambe ta lanta duda di su participacion como culpabel di complicidad na actonan penal. Na momento cu Evelyn Wever Croes a post su observacion riba Instagram, ainda su ex Minister y su primo, Glenbert Croes, ta sospechoso ainda den un caso cu ta conoci como Portulaca y cu pa un motibo of otro, ainda no ta ser atende y investiga pa Ministerio Publico. Den e mesun stoel di Parlamento sinta banda di su persona, Evelyn ta tolera un ex Minister Endy Croes sinta banda di dje, un politico cu ta forma parti di un posibel investigacion pa iregularidadnan cometi den su periodo como miembro di Gabinete Wever Croes II como Minisiter di Deporte. Hunto cu su colega ex Minister aki tin tambe otro oficialnan di Fundacion Lotto pa Deporte, cu ta ser sospecha tambe di actonan incorecto, actonan penal, sin menciona mes su ex Minister Plenipotenciario Guilfred Besaril, kende a ser haya culpabel di actonan ilegal cu fondo di Arubahuis. Evelyn Wever Croes prome cu eleccion di 2021 a ser informa cu su Minister na Den Haag ta ser sospecha di a mal uza e fondonan menciona, pero den su calidad di lider di MEP y Prome Minister, Evelyn a dicidi di bolbe pone Besaril riba lista di MEP y ora cu el a forma  su di dos Gabinete, Evelyn a dicidi di BOLBE manda e sospechoso Besaril bek Hulanda como Minister Plenipotenciario.

Esaki ta mustra bon cla di loke ta ser considera un acto di complicidad, ya cu e tabata bon na altura di e situacion den cual Besaril a hinca su mes aden. Parlamento na 2024 a tuma e decision di baha Endy Croes como Minister den e Gabinete demisionario di Evelyn, pero un biaha mas e lider di MEP a dicidi di honra  Endy como candidato number 4 riba e lista  geel di su partido y durante di e reunionnan den Parlamento e siman  cu a termina, Endy tabata sinta banda di Evelyn, ya cu ta su persona practicamente ta mustra di a sostene y reconoce actonan penal cometi pa su colega di partido. Te ainda Ministerio Publico no tin pura di sigui cu interogacion di Glenbert Croes mientras cu tin e caso ainda bou investigacion di ex Minister di MEP,  Chris Romero y Edison Briesen, pero cual nunca e lider di MEP a sikiera yega di menciona, mientras cu tin varios persona yega n’e lider  di MEP aki, cu tabata of ta bou di investigacion ainda. “Hende cu ta biba den cashi di glas, nunca mester hunga cu piedra,” ta dicho cu ta cuadra realmente cu e Instagram Post di Evelyn Wever Croes haci diabierna atardi.

Te awor tres dia di reunion di Parlamento, pa atende y aproba Presupuesto Supletorio di 2025 y cual a bira converti su mes den un “reality show” di politica, pero cu na mes momento a confirma cu den e sala di e Conseho Legislativo mas halto di pais Aruba,  un cambio  politico a inicia. Un banda di un grupo cu ta conoci como esnan di oposicion, y e otro banda tin un banki cu caranan  nobo cu excepcion di dos miembro di fraccion di AVP, pero a keda comproba cu e momento pa un cambio a yega. Na mes momento tambe tabata notabel e nivel di desesperacion di e fraccionnan den oposicion caminda un biaha mas nan no a atende tratamento di e Presupuesto Supletorio aki den un forma serio y corecto, ya cu dado momento e miembronan di oposicion, forma pa fraccion di MEP y PPA, a insisti pa pretende cu e presupuesto den tratamento, ta uno di un Gobierno cu tabatin hopi tempo gobernando e pais caba y no uno cu tin apenas cinco luna na poder. Practicamente henter presupuesto 2025 tin y tabatin di haber cu asuntonan di Gabinete Wever Croes II, cu riba su mes a dicidi di bandona gobernacion di e pais kibrando su relacion cu partido RAIZ. A hiba un atake frontal contra di Minister di Economia y Finansa, Geoffrey Wever, lubidando pa casi 4 aña, su persona tabata forma parti di Gabinete Wever Croes II y riba dje ex Ministernan, kendenan awor ta miembronan di oposicion, a trata henter e proceso aki comosifuera cu nan no  ta responsabel pa tanto e presupuesto 2025 mes y despues e presupuesto supletorio. Aki ta bon pa mustra cu Geoffrey Wever a huramenta dia 20 di september 2021 como Minister di Economia den Gabinete di Prome Minister Evelyn Wever Croes te cu dia 27 di maart ora cu el a huramenta como Minister di Economia y Finansa den Gobierno di AVP-Futuro y riba dje ta tratamento un presupuesto cu a ser hinca den otro p’e Gabinete di e lider di MEP. Tin cu menciona si cu mientras cu ta buscando un forma pa presenta un politica nobo den Parlamento, na mes momento tin cu kibra cu custumber di e politica bieu, entre otro caminda pa tradicion tur miembro di fraccionnan, kier hiba palabra, kier tene un disertacion cu na final di dia, apesar di e papia hopi, mucho no a ser bisa. Realidad di e situacion ta cu fraccion di MEP y esun di PPA no ta realisa cu nan “status” politico a cambia, cu ya nan NO ta den Gobierno, cu awor tur loke nan tin pa haci, ta di sinta keto y contempla e maneho di un Gobierno cu pueblo a sostene.

Tur loke oposicion por haci, ta di defende nan maneho di ocho aña, duna cuenta  na pueblo di gastamento di placa, di mal maneho hiba y un cantidad di  decisionnan cuestionabel y cu ta mustra hasta coruptivo!!

Ta algun aña caba cu Parlamento, via di e tempo ey, Chris Dammers di AVP a bin cu e ley di cacho. E ley aki a haya sosten unanime den Parlamento. Tur hende a cuminsa na tene nan cachonan den cura y si mester sali cana cu nan cacho, esaki semper ta mara na un lis. Aki aya, tabatin cacho cu ta logra sali for di cura, ora cu portanan ta keda habri. Nos por corda un caso serio na Bubali, unda un cacho di raza a sali y a morde hende. Ministerio Publico a laga confisca e cacho pa deshaci di dje. Ni kico e famia a haci, OM no tabatin pordon y menos ainda a tene cuenta cu e famia su peticion. Asina tin mas cacho cu a wordo mata riba orden di OM. Tempo ta bai pasando y mas cacho a subi caya (sin tin doño), pero autoridad no a haci nada mas tampoco. Y hasta awor a bolbe cuminsa un campaña di sterilisacion di cacho y pushi, cu den pasado reciente a yuda. Awor situacion a bira serio atrobe, Ministerio Publico ta bin cu un participacion. Ultimo tempo tin masha incidente ta tuma lugar, unda cachonan los riba caya ta atake cuidadanonan cu sea ta riba biscicleta, ta corre, cana, etc. Ministerio Publico a duna di conoce cu en principio lo persigui tur doño di cacho p.e. den un incidente di mordida. Polis of otro cuerpo di investigacion mester por traha un proces-verbal. E maneho aki ta valido for dia 1 di januari 2023 y ta wordo aplica independientemente di si e victima ta un persona of un bestia (su doño). Cu e maneho aki Ministerio Publico ta busca pa enfatisa e responsabilidad di doñonan di cacho. Na mes momento, Ministerio Publico ta traha pa baha e cantidad di incidente di mordida y pa fortifica seguridad di ciudadano y di bestianan en general. Interesante lo tabata su Ministerio Publico publica cuanto boet a ser parti for di 1 di januari 2023 p’awor.

Un di e asesinato di ultimo dianan na Colombia, t’e esun di e Pre-Candidato Presidencial. Otro aña lo tin eleccion atrobe na Colombia, unda esnan den oposicion awe, ta haci todo por todo pa ningun partner den coalicion (Gobierno) actual bolbe na mando. E tata di e difunto Senador, Miguel Uribe Londoño, dia di entierro a duna un discurso fuerte y tur esnan presente a conclui cu el a punta dede riba e culpable di e atentando fatal, ta Presidente Petro. Un otro Pre-Candidato Presdencial ta Fico Gutierrez, kende a declara publicamente lo siguiente: Mi no por confirma cu e morto di Miguel Uribe ta culpa di Presidente Gustavo Petro, pero loke si mi por segura Boso, cu si Petro no tabata Presidente, awe Miguel Uribe ainda ta bibo” Un declaracion fuerte y cu a haya sosten di tur esnan cu ta contra di Gobierno di Gustavo Petro. Otro cu a critica fuerte tabata di ex Presidente Alvaro Uribe, kende no a sconde su sentimento y a acusa Petro di t’e autor di e asesinato di Miguel Uribe.

Tabata diasabra dia 16 di Augustus ultimo cu Cuerpo Policial Aruba a celebra su 39 aniversario. Manera vocero di Gobierno a laga sa cu nan a celebra e gran dia aki cu un Santo Sacrificio di Misa cu a tuma lugar na Pro-Catedral San Francisco di Asis na Oranjestad. Presente tabata Prome Minister, mr. Mike Eman, den representacion di su Minister di Husticia, mr. ing. Arthur Dowers, kende tabata na Hulanda cu vakantie. Presente tabata tambe Alto Comisario di Polis drs. Ramon Arnhem, algun miembro di staff, y masha poco miembro di un Cuerpo Policial cu tin sigur mas di 500 miembro. Aki aya, por a nota algun pensioenado tambe presente pa celebra e dia importante aki.  Premier Eman den su discurso, a recorda cu e fecha aki ta mara na fecha natalicio di e estadista, Edgard Joaquin “Watty” Vos, naci na Oranjestad, Aruba, riba 16 di augustus 1937, kende ta un figura cu semper lo keda den historia di nos isla. Durante su bida Watty Vos a dedica su mes na servicio y husticia,y a crece como un lider cu un amor enorme p’e comunidad. Su legado ta biba te awe den e nomber di Skol di Polis Arubano, (Academia) Edgar Joaquin (Watty) Vos cu ta un simbolo di seguridad y husticia pa nos pueblo. E celebracion di Korps Politie Aruba su aniversario, ta recorda nos cu e fundeshi di e institucion ta basa riba un hende cual ta Watty Vos: hende cu a pone comunidad prome, cu a traha cu dignidad, y cu a lanta un institucion cu nos por ta orguyoso di dje. Maske despues di crea Skol di Polis di Aruba, intento a ser haci pa hasta cambia e nomber. Si analisa con Cuerpo Policial a celebra nan dia, mester admiti cu e tabata un celebracion sin gracia, uno masha pober, decepcionate . Y si mira e representacion mes den misa, tambe a laga di desea. AVP, partido cu Watty Vos a forma parti di dje, despues di tabata MEP, y funda su propio partido RUBA, no a ni percura pa recorda e lider aki, cu maske un ponemento di krans na su graf. Unico Parlamentario di AVP cu a ser mira den misa tabata Dennerich Kelly. Unda e otro miembronan di e.o. Conseho di Minister, demas Parlamentario tabata? Nan a briya cu nan ausencia, dicon?   Despues di e Santo Sacrificio tabatin un koffiemorgen pa por a pasa un tempo ameno cu otro y recorda e bon momentonan cu otro. Nada mas!! Den oranan di anochi, tabatin un Song Festival, unda atrobe por a nota ausencia di masha polis y ningun representante di Gobierno. Antes despues di misa, tabatin marcha den cayanan di Playa pa mustra cu Polis tey pa defende nos hendenan. Ta di spera cu p’e celebracion di 40 aniversario (otro aña) lo ta uno digno pa tur polis. Cuminsa prepara for di awor.