Durante su discurso di fin di aña, Prome Minister Eman a anuncia tambe cu na fin di Januari lo wordo organisa na Aruba un conferencia internacional rond di e tema The Common Good. (Bon Comun). N’e conferencia aki lo participa personanan prominente for di mundo academico, circulonan religioso, organisacionnan no gubernamental y politica internacional. 

Cu e encuentro aki, Aruba kier ofrece un plataforma pa reflexion global riba responsabilidad, solidaridad y desaroyo husto, y na mes momento posiciona su propio vision riba e Bon Comun na nivel internacional.

E Prome Minister a detaya iniciativa clave cu Gobierno a cuminsa na 2025 y cu lo continua na 2026, entre otro apoyo pa mayornan, aumento di pensioen, restauracion di cubrimento completo di medicina, presencia semanal di Gobierno den barionan, y un agenda fuerte pa oportunidad economico y sostenibilidad ambiental.

Mirando padilanti, e discurso a presenta un vision pa un Aruba mas fuerte y mas equitativo, incluyendo reforma fiscal pa promove inversion, rescate di scolnan, revitalisacion di San Nicolas, transformacion di e area di refineria, y un cambio di rumbo den turismo for di cantidad pa calidad. El a subraya cu Gobierno ta mira crecemiento economico y bienestar social como dos caminda cu mester cana hunto

Den contexto di tension internacional, Prome Minister a reafirma cu Aruba ta traha estrechamente cu Reino Hulandes y su partnernan pa garantisa seguridad y stabilidad. El a comparti un mensahe di Fe y speransa citando Isaias 51:5, recordando cu “riba Mi e islanan lo warda, y riba Mi brasa nan lo pone nan speransa”.

Finalmente, e discurso a dedica un momento special na memoria di difunto Prome Minister Henny Eman, reconociendo su rol historico y expresando solidaridad cu tur ciudadano cu a pasa pa perdida y dolor durante e aña.

“Dolor ta conecta nos, pero amor tambe. E caminda di e Bon Comun cu Henny a scoge t’e caminda cu nos ta sigui,” Mike Eman a bisa den un mensahe carga di emocion recordando su ruman cu a fayece 6 di januari 2025.

E discurso a sera cu un yamada na union, gratitud y confiansa den futuro di Aruba, reafirmando un tema nacional: “Aruba ta di nos tur.”

Tabata ayera Diadomingo pa 8:44 di mainta Central di Polis ta wordo notifica cu na St.Regis Hotel un persona lo mester a cay di balcon y no ta duna señal di bida. Central di Polis ta manda polis y como tambe ambulance n’e sitio menciona. Na yegada di e unidad di polis enberdad nan ta topa un hende homber cu no ta duna señal di bida mas. 

Personal di ambulance no por a haci nada mas p’e persona. Ta trata di un turista hende homber di nacionalidad Mericano. Recherche, Polis Technico, Dr. Forensico y Departamento di Slachtofferhulp a presente tambe n’e sitio di e sucedido. 

Investigacion haci ta indica cu e victima a bula for di e piso mas halto di e hotel y asina a bin na fayece. Ta trata aki di un turista hende homber nacionalidad Mericano. Despues Polis y personal di hotel a bay controla e kamber di e victima y a bin encontra un dama, kende tampoco ta duna señal di bida. Ta trata aki di e casa di e victima. 

Un caso lamentabel y inusual y Cuerpo Policial Aruba tin tur atencion pa trata di determina kico por a pasa, Polis ta manda palabra di condolencia na famia di e fayecidonan. E caso ta bao di investigacion di autoridadnan concerni y por lo pronto no tin mas detayes. Den  relato policial aki, lamentablemente no a haci mencion di nomber ni nan edad y di ki parti di Merca nan ta.

Diahuebs 1 januari 2026 pa mas o menos 7:40 di mainta durante un control den celnan na warda di polis Santa Cruz ta topa cu un detenido masculino cu a pone fin na su bida. Di biaha a informa Chef van Dienst y na su turno ta pone Central di Polis na altura.

Central di Polis na su turno ta informa tur instancia concerni na altura. Dr. Forensico, Polis Tecnico y Landsrecherche a presenta p’asina haci nan investigacion. Departamento di Slachtofferhulp a presenta tambe p’asina guia e famia den e momento lamentabel aki.

E detenido ta un hende homber di nacionalidad Colombiano, Ruben Dario Conde, naci 10 di februari 1980. Pues, e tabatin 45 aña. Cuerpo Policial ta manda palabra di condolencia na famia di e fayecido.

Kico a pasa prome cu loke a pasa aki, t’asina cu diahuebs a sosode un caso lamentabel caminda a bin haya un persona morto den cel, despues cu el a comete suicidio. Ta trata di di e ciudadano Colombiano Ruben Dario Conde di 45 aña. Su actual pareha, Aireen Tromp a combersa cu nos amigo y colega di 24ora.com Kevvin Valderrama y el a splica cu henter e caso aki a sosode diaranson. Nan a habri aña na un cas unda e señora ta biba na Playa.

Den careda di 4 or di marduga, un pagara a rementa y e homber aki a lanta tur spanta, bula bentana, maltrata su curpa. El a bisa e señora cu el a kere tabatin un tiramento y cu tin hende te persigui’e. Di eynan, el a bira agresivo y a cuminsa reboltia y kibra cos den cas. Aireen Tromp mes a spanta y a cuminsa coy algun cos scondi pa Ruben Conde no ripara.

El a sali bay busca rumannan di e homber pa nan bin papia cu ne, pero sin resultado. Y ora cu cos a escala, el a dicidi di yama polis. Y esey ya caba tabata banda di 5or mas o menos. Ora cu polis a yega nan no a hay’e na cas, pero un poco mas leu di unda e ta biba. Y a deten’e eynan mes. Segun Aireen Tromp ta conta, e homber tabata bisa e polisnan pa no abusa di nan poder, djis paso cu nan ta polis.

Tromp a indica cu dado momento a pidi e polisnan pa laga Ruben bay, y cu e mes lo sigui handle cu ne, riba cual el a ricibi un contesta negativo di parti di e polisnan. Tampoco nan a lag’e bay nan tras direccion warda y a bis’e cu nan mes lo tuma contacto cu ne.

Den careda di 9 or di mainta, e ta ricibi un yamada di Janine Rodriguez di Slachtofferhulp y e sa cu ora cu Janine yama, ta pasobra cu ta morto tin, ya cu el a pasa algo asina caba cu su yiu.

Aireen Tromp ta admiti cu Ruben tabata bou influencia di alcohol, pero si e por a uza un of otro substancia, e no ta na altura di esey. Pero awor, e rumannan di e defunto ta menas’e pasobra cu pa nan, ta su persona (Aireen) t’esun cu a mat’e.

Awor e ta exigi autopsia, pasobra e kier sa si ta di berdad el a horca su curpa of ta kico a pasa. E lo cuminsa cana su caminda p’asina e haya sa di berdad ta kico a pasa.

Gobierno di Aruba cu decision, riba peticion di Stichting Henny Eman, pa cambia un parti di L.G. Smith Boulevard den Henny Eman Boulevard. E trayecto di caminda cu lo haya nombramento nobo ta core for di e rotonde di Mahuma te n’e rotonde banda di Sun Plaza, unda Avenida Nelson Orlando Oduber ta cuminsa.

Cu e decision aki, ta rindi un homenahe duradero na Jan Hendrik Albert (Henny) Eman, e prome Minister-President di Aruba y un di e arkitectonan mas importante di e Estado Arubiano moderno. E escogencia pa, precisamente e parti aki di e boulevard, no ta algo sin mas. E via aki ta forma, manera si fuera, un liña di tempo bibo di e historia moderno di Aruba y ta refleha na diferente punto e vision, e politica y e obranan grandi di bida di Henny Eman, asina tambe e compromiso di generacionnan di su famia pa loke t’e desaroyo di Aruba.

Riba e boulevard aki ta bira visibel e construccion di e industria turistico moderno di Aruba — un sector cu Henny Eman ta reconoci como su fundador. Den relacion cu e expansion di capacidad hotelero despues di Status Aparte, bou di su liderazgo tambe e aeropuerto internacional a wordo modernisa y amplia di manera substancial. Den e proceso aki a realisa innovacion strategico pa Aruba: E implementacion di e servicio di inmigracion Americano (US Pre-Inspection) na Aruba, cu a fortalece considerablemente e posicion internacional y competitividad di Aruba como destino turistico.

Tambe proyectonan grandi di desaroyo teritorial y economico a surgi n’e periodo ey y a wordo realisa a lo largo di e boulevard, manera e ampliacion di tera unda Harbour Town a bini y su construccion, unda awe ta situa e Renaissance Convention Center y Ocean Suites, asina tambe Sonesta Hotel, cu aworaki ta parti di e mesun compleho.

Ademas, e boulevard aki t’e curason administrativo di Pais Aruba. N’e boulevard aki ta situa, entre otro, Parlamento di Aruba, diferente oficina gubernamental importante y Gabinete di Gobernador. E institucionnan aki ta simbolisa Aruba como pais autonomo den Reino di Hulanda — un realidad constitucional cu a tuma forma bou di liderazgo di Henny Eman.

Un elemento historico special ta cu e parti aki di e boulevard ta conecta na dos punto cu Watty Vos Boulevard. E conexion teritorial aki tin un fuerte nificacion simbolico. Watty Vos tabata un bon amigo, contemporaneo y e ‘geestverwant’ di Henny Eman. Ambos a hunga un rol clave den desaroyo politico y social di Aruba y a comparti un conviccion profundo den autonomia, democracia y bienestar general. Cu e boulevard aki ta topa cu otro, ta keda crea un recuerdo tangibel di nan esfuersonan comparti pa Aruba.

E profundidad historico di e boulevard ta reforsa aun mas pa medio di e statuanan di su welo Henny Eman y di su tata Cornelis Albert (Shon A.) Eman, dos figura clave den e lucha largo y principia pa autonomia y bienestar general di Aruba. Ademas, e boulevard ta pasa a lo largo di e waf di Oranjestad, un lugar cu tin un nificacion historico profundo. Un di e portanan den e waf ta yama Cornelis Eman Kade, nombra p’e bisawelo di Henny Eman. Cornelis Eman tabata un defensor progresivo y influyente di e mehoracion y modernisacion di e puerto maritimo di Aruba — un aporte cu a bira di gran importancia p’e desaroyo economico y conexion internacional di Aruba.

Henny Eman a guia Aruba den un periodo hopi dificil, poco despues di ciere di refineria LAGO na 1984. Introduci Status Aparte y na mes momento restora un economia gravemente afecta, tabata un tarea enorme. Cu curashi, vision y determinacion, el a logra duna direccion na Aruba y crea un perspectiva nobo di autonomia y resiliencia economico.

E inauguracion oficial di Henny Eman Boulevard ta tuma lugar mañan dia 6 di januari, presisamente un aña despues di fayecimento di Henny Eman. E fecha aki a wordo scogi conscientemente como un momento di recuerdo nacional y reflexion, unda Aruba ta para pa contempla riba su nificacion historico y su legado duradero. E inauguracion y reconocimiento aki ta pasa, ademas, di un manera special enfoca den e aña cu Aruba ta celebra 40 aña di Status Aparte. Den e logro insuperabel aki ta wordo reconoci e nacimento di Aruba como pais autonomo den Reino di Hulanda, unda e prome Minister-Presidente, Henny Eman, y su antepasadonan a hunga un rol di pionero a lo largo di generacionnan.

Durante e inauguracion, Aruba Airport Authority lo tambe aporta su contribucion social. Den marco di e iniciativa di 100.000 mata di Gobierno, Aruba Airport Authority lo procede cu e plantacion di decenas di mata y planta riba e berm a lo largo di e trayecto aki di e boulevard. Di e manera aki, e acto di recuerdo ta wordo conecta cu un inversion concreto den durabilidad, sostenibilidad y futuro di Aruba.

Gobierno ta expresa su aprecio p’e iniciativa di AAA y di Stichting Henny Eman y ta considera e nombramento aki como un homenahe apropia y digno na un estadista cu a dedica su bida na construccion di un Aruba nobo y na servicio di bienestar general.

Diasabra anochi pa exactamente 8:00 pm, Parada di Flambeu a start sali for di dilanti ex-Kooyman na Avenido Milo Croes. Cuerpo Policial conhuntamente cu SMAC a haci inicio di e parada, pero no a move manera a spera. Polis ni SMAC no a guia net nada, pa cual tabatin buraco den e parada, pero ningun di esnan menciona no a haci nada p’e parada por a sigui na un forma smooth.

KPA tabatin 150 polis di diferente departamento cu a traha e anochi encuestion. Entre otro; Polis Uniforma, K-9, ME, AT, Recherche, Personal Administrativo y personal di CEA. E cabez di e parada a yega pa 00:55 na ex -DOW y pa 02:41 e final a yega.

E aña aki a conta cu solamente 1 detencion pa cu posicion di droga. Aña 2025 e Parada di Flambeu a conta cu 0 detencion. Asina mes nos di KPA ta hopi orguyoso di mira hopi hende persona cu a comporta nan mes prome, durante y despues di parada! Esaki ta di aplaudi. 

Resultado detencion bao di influencia

Di acurdo cu voceru di KPA, Liliana Rasmijn: A detene 8 chofer pa maneha bao influencia di alcohol y un arma di candela confisca. Departamento di Trafico y Unidad Motorisa a haci control prome durante y despues di Parada di Flambeu. Departamento di Trafico a controla na comienso di e Parada di Flambeu pa loke ta trata e papelnan di auto como tambe rijbewijs valido. 

Unidad Motorisa a haci controla na diferente caminda strategico durante parada. Den total a detene 8 chofer pa maneha bao di influencia di alcohol. Polis Motorisa ta wak un auto sospechoso na altura di un cas na den Laurens Costenstraat. E agente di Unidad Motorisa aserca e auto y na unda e chofer a dal e agente su bromer y e pasahero a sali saca un arma di candela. 

E agente a pidi mesora pa refuerso y asina a cuminsa cu un busceda den vecindario. Na altura di RCA ta topa cu un homber cu a saca e arma di candela y a detene. Tambe a confisca un arma di candela.

Aña 2025 a conta cu 8 detecion pa loke ta maneha bao influencia di alcohol. Cuerpo Policial ta haci un apelacion un biaha mas pa no maneha auto bao influencia di alcohol. Usa Bo Amigo Responsabel.

E discurso di fin di aña di Gobernador, Alfonso Boekhoudt e biaha aki a recorda varios di nos hendenan cu a bay laga nos y otronan cu a logra cosnan grandi pa nos pais. Masha bunita, pero lamentablemente den su discurso no ta haci mencion di nos hendenan cu a bai laga nos y menos ainda no ta menciona tampoco esnan cu a logra cosnan grandi pa Aruba. Ta bo mes tin cu averigua kico y kende Gobernador ta referi na dje.

Bo ta puntra bo mes, ta kende t’e speech writer di Gobernador. Ora ta papia di mas transpariencia, mester por ta posibel di reconoce nos hendenan cu mencion di nan nomber y fam, p’asina pueblo sa di kende nos ta papia.

Manera Gobernador Boekhoudt a cuminsa su discurso bisando cu tur aña e storia di nacemento di Hesus, cu a bin pa trece paz y salbacion na mundo henter, ta yena nos cu inspiracion di speransa. Pero cada aña e storia aki por tin un nificacion diferente pa cada un di nos — un storia cu ta recorda nos di e retonan cu ta pone nos na prueba, di momentonan cu ta uni nos, y di lesnan cu ta forma ken nos ta como ciudadano, famia y nacion. Masha bunita!!!

Aña 2026 te aña cu Aruba ta celebra cu 40 aña pasa a logra su Status Aparte. Nada di esaki a keda menciona, siendo un fecha historico pa nos pais. Porcierto no ta falta di Gobernador, pero di Gobierno mes, cu no a haci net nada pa pueblo por a celebra e hecho historico aki. E no ta riba dia 18 di Maart, esey no t’e fecha cu Aruba a haya su Status Aparte. Conmemoracion di 40 aña na 2026 a laga masha di desea.

E nacemento di Hesus ta mustra nos cu grandesa por nace for di humildad, cu renobacion por cuminsa den e lugarnan di mas intransigente, y cu e berdadero poder ta bini di stimacion pa bo prohimo. Den e spirito ey, laga nos mira e lus di Betlehem no solamente como un simbolo di fe, sino como un yamada pa accion — pa trece lus caminda tin scuridad, pa trece comprension caminda tin division, y pa trece bondad caminda tin curason cansa y carga.

Mescos cu e momentonan cu mas a impacta nos isla e aña aki, e mensahe di Pasco ta un yamada p’e tempo cu nos ta bibando aden: Pa nos transforma reflexion den accion, nos compasion den husticia pa tur y pa nos union bira e fundeshi di un mihor mañan, tabata parti di discurso di fin di aña di Gobernador Alfonso Boekhoudt, pa cual nos a sinti cu mester a duna nos observacion.

Prome di januari atardi, na Bestuurskantoor, a tuma lugar e develacion oficial di e escudo di pais Aruba, un acto solemne cu a reuni simbolismo, historia y identidad nacional. E momento ta forma parti di e celebracionnan relaciona cu Status Aparte (masha pober mes: Nota di Red) y e desaroyo institucional di Parlamento di Aruba, y a sirbi como un recordatorio poderoso di e balornan riba cual nos pais ta traha.

Vice-Prome Minister, mr. Gerlien Croes durante su discurso a enfatisa riba e responsabilidad grandi cu henter Gabinete AVP-Futuro tin pa 2026 y cu tin cu laga cada logro historico te cu awor, guia cada Minister den tuma decisionnan corecto pa pais y su futuro. Den union semper nos lo logra.

E develacion a tuma lugar den un ambiente di reflexion y respet, den un edificio cu ta representa gobernacion y continuidad di estado. E escudo di pais Aruba, como simbolo nacional, ta refleha e identidad, fortalesa y aspiracionnan di pueblo Arubiano, y ta para como un señal visible di autonomia, dignidad y responsabilidad colectivo.

E celebracion di e escudo ta conecta directamente cu e historia di Aruba como pais autonomo dentro di Reino, y cu e caminda cu a yega na Status Aparte. Simbolonan nacional manera e escudo, himno y bandera no solamente ta representa pasado, pero tambe ta sirbi como guia p’e decisionnan di awe y p’e futuro di pais, ta locual cu Prome Minister di Aruba mr. Mike Eman a comparti durante su discurco durante ceremonia.

Durante e acto, a tuma momento pa honra e legado di e prome Prome Minister di pais Aruba, mr. Henny Eman, un di e pioneronan di Status Aparte y un lider historico cu a haci contribucionnan duradero na formacion di Aruba como pais. Su vision riba autonomia, responsabilidad y bienestar pa tur ciudadano ta sigui forma parti di e fundeshi moral di nos institucionnan.

E ceremonia di develacion di e escudo di pais Aruba ta simbolo di continuidad: Un puente entre pasado, presente y futuro. Den un periodo caminda Aruba ta prepara pa celebra 40 aña di Status Aparte y 50 aña di Himno y Bandera, e acto aki a reafirma e compromiso cu nos pais tin cu su identidad, su pueblo y e principio di Bon Comun.

Cu orguyo nacional y respet pa historia, e Escudo di Pais Aruba ta keda como un señal duradero di union, perseverancia y esperansa p’e generacionnan presente y futuro.

Durante su prome 9 lunanan den gobernacion, Minister di Salubridad, Asunto Social, Cuido di Adulto Mayor y Maneho di Adiccion, sra. drs. Melvin G. Wyatt-Ras a logra realisa un serie di accionnan concreto cu ta contribui directamente na bienestar social, aceso na cuido di salud y fortalecemento di e sistema di apoyo social na Aruba.

Desde cu Gabinete AVP-Futuro a drenta den funcion na maart 2025 te cu e dia di awe, e ministerio a enfoca riba mehoracion di apoyo financiero y proteccion social, aceso na remedinan esencial, cuido preventivo y reformanan legislativo cu lo tin impacto duradero riba nos poblacion.

Fortalecemento di apoyo financiero y proteccion social

Desde 1 mei 2025: A aplica un aumento di AWG 250 mensual na reparatietoeslag pa tur pensionado di AOV y pa tur beneficiario di pensioen di viudo of huerfano.

Gobierno a confirma cu un di dos aumento di AWG 250 mensual a bay na vigor desde 1 januari 2026, fortaleciendo poder di cumpra di nos adultonan mayor.

Ademas: A aumenta ayudo financiero pa famianan di menos recurso pa cumpra material di scol pa AWG 250 annual: A aumenta contribucion pa mayornan di yiu di famianan di menos recurso pa AWG 250 anual. A aumenta ayudo financiero pa scol na AWG 300 mensual.

A aumenta e suma normativo di bijstand di AWG 450 pa AWG 600, ampliando proteccion p’e famianan vulnerabel.

Aceso reestableci y mehoracion di cuido di salud

Desde 1 mei 2025: Un gran parti di e remedinan cu anteriormente a ser kita for di e lista positivo a wordo poni bek, garantisando disponibilidad continuo na remedinan esencial p’e pashentnan.

Den e area di salud y prevencion:

Conseho di Minister a aproba e plan nacional pa combati obesidad cu a wordo lansa oficialmente: A inicia implementacion integral pa cuido di diabetes, pa cual Aruba a haya subsidio di Hulanda. A logra implementa e protocol di referencia entre cuido di prome y segundo liña, fortaleciendo cooperacion entre e dokternan di cas y e specialistanan, mehorando e calidad di cuido.

Salud mental, adiccion y cuido specialisa

A fortifica lasonan existente y a crea vinculo nobo cu diferente instancia den exterior pa garantisa cu e personanan cu adiccion of problema psikiatrico por ricibi cuido adecua ora cu ta necesario. A revisa y finalisa e protocol di referencia pa cuido di salud mental. A duna informacion n’e mayornan di muchanan cu limitacion tocante introduccion di ley pa ayudo financiero p’e famianan cu yiu cu necesidad di cuido intensivo.

Reformanan legislativo y preparacion pa futuro

A inicia actualisacion di e ley di bijstand. A cuminsa cu cambio di legislacion pa preparacion pa pandemia, fortaleciendo e capacidad nacional. Conseho di Minister a aproba e proyecto di ley pa muchanan cu limitacion. E proyecto di ley a wordo inicia formalmente y entrega na DWJZ, cu e expectativa cu Parlamento lo trata esaki den e prome parti di aña aki.

Responsabilidad y continuacion di trabou

E logronan alcansa durante e prome 9 lunanan den gobernacion ta refleha un enfoke claro riba implementacion di accionnan concreto, cuido sostenibel y refuerso di proteccion social. Minister Wyatt-Ras y Ministerio di Salubridad, Asunto Social, Cuido di Adulto Mayor y Maneho di Adiccion ta comprometi pa sigui traha cu determinacion pa un Aruba mas saludabel, mas fuerte y mas husto pa tur ciudadano.

Den su discurso di Fin di Aña 2025–2026, Prome Minister, mr. Mike Eman a invita pueblo Arubiano pa un momento di reflexion profundo riba pasado, presente y futuro di nos pais. E mensahe, presenta for di e historico Bestuurskantoor y finalisa den e sala nobo di Conseho di Minister, a destaca continuidad di liderazgo, servicio y responsabilidad nacional.

Den su palabra, Prome Minister a subraya e significado historico di Status Aparte, cu lo celebra 40 aña na 2026, y e 50 aña di nos Himno y Bandera como simbolonan bibo di identidad, unidad y compromiso cu Aruba. El a enfatisa cu Status Aparte a crea e vehiculo constitucional pa Aruba por a traha riba e bon comun pa henter e pueblo.

Esaki ta haci cu Status Aaprte ta un responsabilidad continuo pa sigui traha riba un mihor mañan. “Status Aparte ta un responsabilidad diario pa crea un mañan nobo,” Mike Eman a expresa durante e discurso.

Un parti central di e discurso tabata e principio di e Bon Comun, como guia fundamental di Gobierno. Basa riba pensamento di su abuelo, Henny Eman, e Prome Minister a recalca cu prosperidad cu ta wordo duna na Aruba mester wordo comparti di manera husto. El a referi n’e discurso di su abuelo ya na 1929, mustrando riba locual nos haya na prosperidad mester worde mira como cu a bin di “de Hand der Voorzienigheid”.

Locual bin for di Man di Providencia mester wordo hustamente comparti cu e pueblo, e abuelo di Prome Minister a bringa p’e durante su carera como vocero di Pueblo di Aruba. “Loke ta wordo duna na Aruba mester beneficia tur; cu ningun hende no ta invisibel y cu ningun bario no ta lubida,” el a declara siguiendo e pensamen di e ‘Man di Providencia’ cu su abuelo a para p’e, asina Promer Minister Eman a conecta principio moral cu accion concreto di Gobierno.

Diamars siman pasa a tuma lugar e desvelacion di e borchi di construccion di e edificio nobo pa Departamento di Aduana Aruba. E acto aki ta marca un logro importante den e proceso di modernisacion y fortalecemento institusional di Aduana, y ta confirma e compromiso continuo cu profesionalismo y mihor servicio na beneficio di e economia di Aruba.

E edificio nobo lo contribui directamente na bienestar di empleadonan y lo eleva e calidad di servicio cu Aduana ta brinda na sociedad. Durante e encuentro social, tambe a tuma un momento pa reflexiona riba e progreso y metanan cu a logra durante aña 2025 y pa comparti e expectativa y vision pa 2026, cu enfoke riba continuidad, eficiencia y desaroyo organisacional.

E proyecto di construccion di e edificio nobo ta representa un paso visibel den e crecemento y modernisacion di Aduana, y ta subraya e importancia di inversion den infrastructura publico como parti di un aparato gubernamental fuerte y orienta riba futuro.

Dia 29 di december 2025, a tuma lugar e traspaso oficial di e edificio historico “John G. Eman”, un structura emblematico localisa na Caya G.F. Betico Croes 41 cu ta inicio di e historia di Aruba Bank (antes John G. Eman Bank). E evento ta marca un momento crucial den e esfuersonan pa conserva y restaura e patrimonio arkitecnonico di Oranjestad p’e generacionnan futuro.

E edificio, construi na aña 1925 pa fundador John G. Eman, un visionario di su tempo, cu a cana hunto cu Aruba su desaroyo, caminda posteriormente converti na Aruba Bank, a sirbi durante hopi aña como un oficina bancario prominente na nos isla.

Durante momentonan dificil, for di un caya di santo y lanterna como ilumincacion, a duna inicio di un desaroyo di un pais den buskeda di ofrece su comunidad un mihor oportunidad. “Cada cambio y momento di e caya ta un refleho di e desaroyo di nos pais”, ta locual cu Prome Minister mr. Mike Eman a comparti durante su discurso n’e ceremonia di traspaso.

Den un ceremonia oficial, Stichting Monumentenfonds Aruba (SMFA), Aruba Bank N.V., Ministerio di Economia, Finansas y Sector Primario mr. Geoffrey Wever y Prome Minister a formalisa e ceremonia di traspaso di propiedad p’e fundacion. E actividad ta un logro monumental pa proteccion di nos historia y cultura.

E traspaso oficial ta representa un colaboracion fructifero entre Gobierno, sector priva y organisacion pa proteha nos legado historico, crea un balor grandi p’e comunidad, y duna bida renoba na un di nos edificionnan mas representativo.

Premier Eman a indica cu cada bes cu mira reto den desaroyo di Aruba, ta mira cu e mes un Caya Grandi ( un ader di nos pais ) tambe ta conoce un sla. Den su parecer, simbolicamente of efectivamente, no por tin un restauracion completo di Aruba sin restauracion di e ader aki di nos pais. Un vinculo di generacion, entrada di pais Aruba, y becindarionan conecta cu a yuda carga e pais aki.

Nos ta mira dilanti pa cuminsa e trabou di restauracion, revitalisacion di Nassaustraat-Caya Betico Croes centro di ciudad no ta unicamente un empeño, pa un desaroyo di un centro di ciudad vibrante, di historia, cu un mensahe, pero e ta tambe e revitalisacion di e alma di Aruba.

Cada esfuerso haci pa Monumenten Fonds, inversionnan particular tumando lugar n’e momentonan aki, ta iniciativanan sumamente importante tuma durante 2009 pa 2017 caminda a mira cu Caya Grandi mester a ricibi un revitalisacion, pa strategicamente conecta Oranjestad bek na nos waf. Ta mira empeño di Minister Geoffrey Wever, aunke no a haya sosten di e mesun prioridad, pero un bos den desierto a keda resona y dunando e centro di ciudad e balor cu e merece.

Awe un di e proyectonan basa riba e determinacion aki, t’e hecho cu awe ta bay restaura e edificio monumental aki. Premier Eman a indica di ta sumamente orguyoso, naturalmente cu vinculonan di famia, pero semper bou un solo meta di sirbi e bon comun. Hopi exito y bendicion n’e pueblo henter y cu nos tur por drenta un 2026 cu locual nos a crea y locual a wordo crea pa nos, cu un determinacion grandi pa crea un futuro nobo pa Aruba.