Despues di tur bon Conseho y bon deseo pa 2026, por conclui awe cu Aruba a habri 2026 cu un cantidad di tragedia. Bayendo den historia, sigur e ultimo 10 añanan, nunca antes tabatin tanto tragedia manera e aña aki. Tabatin caso di siucidio, como 4 candela di cas, unda varios di nan a kima por complete, accidente cu morto y otronan cu hendee herida. Ta kico ta pasando? Pa cuminsa nos ta bisa cu nos mes mester ta mas responsabel. Pueblo aki mester sa di comporta nan mes mihor. Bin cu mas control policial riba caminda, no t’e solucion. Berdad mester cu mas campaña di informacion, p.e. hinca den cabez: “No bebe, no stuur” y asina tin mas slogan.  Gobierno anterior a hinca un cantidad di placa pa programanan di informacion, a weita resultado di esaki? No, pero hopi placa a ser hinca y awe bo kier puntra, ta kende(nan) a saca beneficio di e campaña aki?

Diahueps 1 januari 2026 pa mas o menos 7:40 di mainta durante un control den celnan na warda di polis Santa Cruz ta topa cu un detenido masculino  cu a pone fin na su bida. Kico a pasa, cu el a dicidi di tuma e decision aki. Pa aclarea, ta bon pa Ministerio Publico despues di haci autospia, informa kico a pasa. El a horca su curpa berdad, of el a muri di e slanan (di kende) el a recibi. E detenido ta un hende homber nacionalidad Colombiano y tabata tin 45 aña.

DI DOS CASO

Central di Polis a haya informacion cu un turista lo a benta su curpa for di balcon di su kamber di hotel. Ambulance no por a haci nada mas p’e persona. Ta trata di un turista hende homber nacionalidad Mericano. Investigacion haci ta indica cu e victima a bula for di e piso mas halto di e hotel y asina a bin na fayece.  

Despues polis y personal di hotel a bay controla e kamber di e victima y a bin encontra un dama, kende tampoco tabata duna señal di bida. Ta trata aki di e casa di e victima. Kende a ser asesina pa su casa, pa despues e homber a dicidi di kita su propio bida. 

Despues autoridad a dicidi di divulga nomber di e victimanan: E turista homber ta B. Jozic, naci 13-11-1980 (45 aña) na Bosnia di nacionalidad Mericano. Su pareha ta: C. Jozic naci 13-11-1973 (52 aña) na Filipina di nacionalidad Mericano. E caso ta bao di investigacion di autoridadnan concerni y no tin mas detayes y ningun hende lo haya sa tampoco kico a pasa.

DI TRES CASO

Diadomingo anochi rond di 12or a sosode un accidente fatal net un tiki pabou di Wind Creek Casino na unda un a chauffeur (dama hoben) a pasa dal dos peaton y sali bay na careda. E resultado lo tabata peor, si mira con un otro pareha a pasa un rato prome.  A bin compronde cu e chaufeur tabata biniendo cu un velocidad basta halto, pa cual a conclui tambe cu e srta. C. Fernandes Pedra. Tabata basta burachi y por ta hasta droga tambe riba dje. El a causa asina e prome dos mortonan den trafico pa aña 2026.

E dos personan fayecido, ambos ta naci na Republica Dominicana. Ta trata aki di un persona femenino, Josely Paulina Vasquez Gonzalez naci dia 09-07-1960 (65 aña) na Republica Dominicana y un persona masculino Carlos David Vialez Valerio naci dia 19-10-1971 (54 aña) na Republica Dominicana.

DI CUATER CASO

Tabata diarazon mainta cu a sosode un accidente pisa riba Green Corridor na altura di Ser’i Teishi, ora e auto marca Toyota modelo Yaris color blauw numera A-69472, a bolter y e chauffeur a resulta gravemente herida. Lamentabelmente pa 8:35 am e chauffeur hoben, Ronal Heredia-Heredia, naci dia 30-04-2008 (17 aña) na Republica Dominicana, a fayece. E la bira e di tres accidente fatal den trafico pa aña 2026. Aki por mira cu e hoben aki a dicidi di coi auto di su tata, kende a yega mas lat for di Republica Dominicana, a sabiendas cu e no tin rijbewijs. Cometiendo un acto di falta di responsabilidad y a coste su bida. 

DI CINCO CASO

Tabata aña nobo mainta, cu e hoben Emilio van der Linde di apenas 18 aña di edad, tabata riba su brommer bayendo su trabao  na Surfside Beach Bar y tabata na altura di Camacuri, ora un chauffeur di nacionalidad Haitiano, burachi, a alcans’e y lag’e gravemente herida. Aki tambe, autoridadnan no a duna sikiera inicial di e chauffeur iresponsabel aki.

E situacion tabata asina grave cu Hospital di Aruba no por a atende y a opta pa laga AZV mand’e cu air ambulance pa Medellin, Colombia, pa ricibi tratamento medico specialisa y avansa. Su mama a compañ’e den e vuelo.

Lamentablemente diamars specialista na Medellin no tabatin mas opcion cu amputa pia di e victima. N’e momento aki ainda e situacion ta di preocupacion, debi cu dokternan ainda no por sera e operacion debi na complicacion den forma di un infeccion. Emilio van der Linde no a fayece, pero si a keda malogra pa resto di su bida.

Cu lagrima na wowo, emocion halto y un sentido inmenso di orguyo y gratitud, Prome Minister di pais Aruba mr. Mike Eman a duna su discurso durante un ceremonia cu pa hopi tabata grandemente na su lugar, pa rindi homenahe na un visionario indiscutibel, pero mas cu tur cos, na su ruman homber grandi cu a fungi como Aruba su Prome Minister-President.

Gradiciendo tur presente, cu a forma parti di e historia, na sr. Tico Croes, Presidente di Fundacion Henny Eman y responsabel p’e iniciativa importante cu a tuma lugar siman pasa diamars atardi.

Premier Eman durante su discurso a menciona e diferente motibo cu su persona a hiba durante e ceremonia, cual t’esun gubernamental/politico pa un persona cu a lidera Aruba den e momentonan di mas dificil di nos pais, pero tambe como ruman, e ruman mas chikito. Su ruman a bin pa pone su schouder y lanta nan bek.

Cu un bos yen di emocion y gratidud por a scucha Prome Minister Eman recorda con den momento mas dificil den nan bida personal, cu fayecimento di nan Tata Shon A Eman, su ruman Henny Eman ta interumpi su estudio y na edad di 19 aña ta regresa Aruba pa duna su rumannan su schoudernan.

“Ta den momento dificil asina ta demostra kico ta biba den curason di un persona manera Henny Eman”, ta locual cu Premier Eman a indica. Henny Eman no a continua cu su estudio te na momento cu e tabata sa cu su rumannan y su mama por a continua cu nan biba, despues di despedida di nan tata.

Algo cu a marca carera politico pa Mike Eman, t’e legado y liderazgo di Henny Eman, conhuntamente cu e forma cu e comunidad a reacciona na momento cu a mira e famia ey den necesidad. Aruba a bini hunto y a pone un dak riba nan cabes.

Partido AVP tabatin mester di un lider

No a pasa mucho tempo despues cu Henny a sinti poco trankilidad cu comunidad a brinda sosten na su famia y a continua cu su estudio, cu ta bay yega un yamada di parti e partido di su tata. Den añanan 70 e partido practicamente a desaparece for di panorama politico.

Un hoben/mucha Mike, tabata corta articulo di corant, manda pa su ruman grandi pa recorde cu e tin un tarea ainda pa haci na Aruba. Henny Eman a responde!

“El a bin bek Aruba y rescata e partido di mas bieu di historia di Aruba”, ta palabra di Premier Eman.

Henny Eman no solamente a pone schouder pa su famia, pero tambe pa su partido cu tabatin mester di liderazgo pa cumpli cu e mision historico cu e organisacion politico ey tin cu pais Aruba te cu awe.

Status Aparte den momento mas critico di nos pais

Henny Eman a pone su schouder pa pais Aruba y a forma su team di rescate y cu un plan nan a sa di rescata pais, bao su liderazgo. Turismo su exito awe ta danki n’e lucha/sacrificio cu Henny y su team a haci na momento cu hopi no a spera.

Premier Eman a subraya durante su discurso cu pa algun, cos por a mustra contradictorio, pero e mes un lider politico cu a construi hotel pa Arubianonan por a haya trabao bek, e mesun lider politico ey a declara casi 30% di Aruba como parke natural, Parke Arikok. Combinacion di vision, locual mester den aspecto economico como tambe den aspecto di identidad y cultura.

Prome Minister Eman ta sumamente honra cu Gobierno a tuma e decision pa duna Henny Eman e reconocimento grandi aki. Palabra di gradicimento na tur cu a cana cune durante su carera politico. E atardi a conta cu hopi cara conoci den e circulo di Henny Eman dfm manera e.o. Alice van Romondt, Secretaria Conseho di Minister, ex-Minister Eddy Croes, ex-Minister Ike Posner, ex-Minister Tico Croes, Rolly Bislik cu a pone nomber di Aruba riba mapa deportivo internacional, un di e prome Presidente di Parlamento di Aruba, Marco Christiaans y no por keda sin mencion Norman Roos cu a cana di generacion pa generacion cu e partido di AVP.

Tabata diamars ultimo, durante e desvelo di Henny Eman Boulevard, cu mr. Mike Eman, den su calidad di lider di partido AVP, a sorprende tur hende, ora cu el a anuncia cu na september proximo e lo tuma su retiro oficial como lider di e partido.  Esey no nifica cu Mike Eman lo retira como Prome Minister di Aruba. E tin mas reto pa cumpli cune. Y manera semper Mike Eman a yega di bisa, e lo no retira, te ora cu e mira e pueblo aki feliz, caba cu pobresa, y cu tin cuminda pa tur hende riba mesa. E ora ey, Mike Eman lo sinti cu el a cumpli cu pueblo.

Di biaha a cuminsa un cantidad di speculacion. Kende ta cla pa bira lider di AVP, pa por sigui guia e partido politico mas bieu di Aruba. Semper oposicion tabata bisa cu AVP ta un partido di famia, di famia Eman, pero ya caba a ser anuncia cu e lider nobo lo keda eligi den un Congreso cu AVP lo organisa. 

Si t’asina cu Mike Eman no a sconde su faboritsmo, y e ta un secreto publico cu su candidato ta Wendrick Cecilia, kende dia di entrega di lista di candidato, Mike Eman a a bolter e lista, loke hopi no a spera tampoco. Pero el a funciona. Nombernan di posibel futuro lider di AVP cu ta ser menciona, banda di Wendrick Cecilia ta tambe  Mike de Meza, e di 3 votegetter di AVP, Stephany Sevinger, Marlon Sneek, Robert Candelaria, Arthur Dowers, Trevor Eman, un sobrino di Mike Eman, maske nunca a mustra interes den politica y tambe nomber di Geoffrey Wever di partido Futuro a keda menciona. Pa loke te ultimo aki, ningun hende ta kere cu esey lo por bira e caso, siendo un lider di Futuro.

Un fecha pa eleccion di lider di AVP ainda no ta stipula, tampoco e cantidatonan cu lo postula nan mes. E unico lider di AVP, cu no ta(bata) un Eman tabata dia cu Tico Croes a keda postula como lider y AVP a bin perde eleccion y no a keda Tico Croes nada otro di retira hasta como politico despues. Otro lidernan cu AVP a conoce tabata Guzman Croes, Rudy Frank, Chibi Croes pa menciona algun.

For di momento cu Mike Eman a dicidi di “bolter cos” dor di haci Wendrick Cicilia como “lijsttrekker”, ya caba Mike Eman a duna indicacion cu cambio grandi “ta na caminda”. Cu mester cuminsa rehubenece AVP. 

Durante e ceremonia di desvelo recien di Henny Eman Blvd, den presencia di varios ex colega y amigonan di Henny, Tico Croes como Presidente di Fundacion Henny Eman, a hiba palabra. Tico Croes a gradici Gobierno pa reconoce y acepta e peticion pa yama e caya entre e retonde di Mahuma te cu e retonde di Divi Tamarijn como Henny Eman Boulevard, cu ta conecta tambe Juancho Yrausquin Boulevard, Avenida Nelson Orlando Oduber y Watty Vos Boulevard. 

Cu e cambio di nomber aki, L.G. Smith Boulevard no ta stop di existi, sino ta keda existi for di retonde na Palm Beach te cu Arashi, mirando e importancia di L.G. Smith den nos historia.

E acto aki no ta solamente un momento historico, sino ta brinda e oportunidad pa bay atras 40 aña, ora cu un lider hoben di apenas 28 aña a haña den su man e confiansa di pueblo di Aruba, no solamente pa su trabao unico cu Henny a haci den e logro grandi di Status Aparte, pero tambe pa dirigi nos pais como e prome Minister President di Aruba.

Aruba tabata para dilanti un crisis grandi cu mas cu 30% di desempleo, hendenan cu tabata bandona Aruba, y un incertidumbre grandi riba futuro di pais. Un cos ta pone un plan riba papel, pero un otro cos ta sinta na mesa cu otro hendenan pa persuadi nan pa pensa mescos, pa kere den e vision y pa confia den e capacidad pa haci realidad loke bo ta bisa.

Henny tabatin un vision cla, un blueprint cla, pero loke mas a impresiona Tico Croes tabata e manera con el ta bay haci e cosnan. Hopi biaha nos ta papia di principionan, pero e “con” ta fundamental. E manera con bo ta logra algo ta mes importante como e meta mes. Riba Henny Eman Boulevard tin tres ehempel cu ta mustra e vision y capacidad di Henny como un manager nacional, specialmente den un periodo crucial di “Nation Building”. Minister Cicilia a menciona pre-clearance: Ora cu nos tabata sinta na mesa na Washington y Henny mester a convence Customs y Immigracion Mericano cu pre-clearance mester bin Aruba. Imagina un isla cu apenas 54 mil hende, bay convence e poder mas grandi di mundo pa bin establece aki y pa pa nan paga e gastonan tambe. Un logro unico cu a cambia e rol di Aeropuerto di Aruba pa semper.

E di dos ehempel importante tabata e manera cu Henny a convence pueblo di Aruba pa cambia di moneda. Imagina abo cu un Florin Antiyano sigur den bo saco, y den tres luna bo mester bay banco, entrega bo moneda conoci y acepta un Florin nobo cu bo no sa si e tin futuro mes. Henny a logra esey den apenas tres luna. Den tres luna tempo, cada Arubiano orguyosamente a cana cu su florin Arubiano den su saco. Un logro unico cu te awe hopi pais y isla ta purba imita y no por logra.

Esey ta mustra cu un lider, ora e ta un visionario y tin poder persuasivo, por cambia motivacion individual den accion colectivo, basa riba identidad y aspiracion. Esey tabata Henny Eman.

E di tres punto importante tabata e strategia economico. Con a logra convence famia Pritska, con a convence Ballast Nedam, con a convence un Banco grandi di Japon pa traha hunto cu un Gobierno cu no tabatin placa. Gobierno tabata bashi, pero cu un vision cla, nan a forma un partnership cu a crea un di e hotelnan di Hyatt Corporation mas exitoso na mundo: e Hyatt cu nos tin awe aki.

Esaki ta locual ta yama vision. No solamente e vision, pero e poder di persuadi: E capacidad pa haci otronan kere den bo aspiracion, den e caminda cu bo ta mustra. Esaki ta hustamente e vision di Fundacion Henny Eman: No solamente pa recorda e trabaonan grandi cu Henny a haci, pero pa siña e manera con pa haci cosnan. Pa inspira e generacionnan di futuro, pa Aruba keda cu e chispa di innovacion cu Henny a laga como legado. Manera Minister Cicilia a bisa: For di lomba di gigantenan nos ta sigui construi. Esey t’e legado cu nos tur mester continua cu ne di Henny Eman, Tico Croes a termina bisando.

Ya for di siman pasa, algun dia despues di apertura di aña nobo 2026, Minister di Finansas, Asunto Economico y Sector Primario, mr. Geoffrey Wever a duna inicio n’e proceso pa traha riba presupuesto 2027 di Pais Aruba.

Hunto cu Departamento di Finansa a duna tur informacion na tur departamento cu ta cay bao di Ministerio di Finansa, Asunto Economico y Sector Primario. Pa coordina y entrega prioridadnan di maneho pa 2027 conforme e normanan presupuestario manera ancra den ley, Departamento di Finansas a presenta e handleiding: “Begrotingsvoorschriften en richtlijnen” cu ta contene e fechanan di loke tur mester wordo entrega segun ley ta prescribi. 

Meta di esaki ta pa Parlamento di Aruba ricibi e Presupuesto 2027 na tempo riba 1 di september 2026. Presupuesto 2027 lo bira e prome presupuesto di Gobierno den cual lo aplica e concepto di “Policy-based budgetting”. Esaki ta encera cu lo presenta banda di prioridadnan di maneho tambe lo presenta cuanto e implementacion di esaki lo costa. Esaki ta un stap importante den un maneho financiero responsabel y duradero den cual lo brinda transparencia riba con entradanan di Gobierno ta wordo uza pa implementacion di maneho na beneficio di desaroyo di Aruba.

Durante e sesion informativo Minister Geoffrey Wever a subraya e importancia di un bon cooperacion y comunicacion entre cada ministerio y su departamentonan pa yega na un presupuesto 2027 cu ta refleha prioridadnan di maneho di Gabinete AVP- FUTURO y ta cumpli cu e normanan di presupuesto manera ancra den ley.

Minister Geoffrey Wever ta gradici Departamento di Finansas pa coordina e proceso pa traha e presupuesto 2027. Ta sumo importante pa hunto cu departamento delinea e prioridadnan di maneho cu ta refleha e vision y maneho di Gabinete AVP-FUTURO. Aruba ta dal un paso nobo den con ta traha presupuesto, un reto pero sigur lo trece e transparencia necesario y na beneficio di desaroyo di Aruba segun Minister Geoffrey Wever.

Despues di e morto tragico di e pareha dilanti di Wind Creek Casino, cu a bira un di tanto caso di hit & run, atrobe voz ta lanta cu mester cambia ley, tuma medida mas pisa, esta bin cu aumento di castigo, etc., etc. Pero ta cuanto biahe caba a cambia ley di trafico, boso a mira cambio? Parlamento por bin cu hopi ley, pero si nan no ta wordo ehecuta, ta kico bal. Mira p.e. ley di cacho: tin mas cacho riba caya cu nunca. Mira e ley di saco di plastic, nan ta sigui duna saco di plastic, anto pakico bin cu ley. Nos ta corda tambe con a bisa cu mester aumenta ley contra abusadornan di mucha. Ainda por corda frase di Evelyn Wever Croes, siendo den oposicion a laga sa, unabes den Gobierno, den 5 minuut lo conoce cambio di ley contra abusadornan. E ley a bin, NO. Evelyn Wever Croes tabata Prome Minister di Aruba como 7 aña y mei, nada di cambio di dicho ley.

Cu mester bin cu cambio di ley, sin duda, pero tambe mester sa di ehecuta nan. No cambio so pa cu casonan di hit & run, pero tur loke cu ta causa peliger den trafico. Laga nos trata di trece nos opinion, ora ta papia di cambio di ley. Den nos trafico, Gobierno mester percura pa tin un bon ingenieria, esta nos infrastructura mester ta bon. Bon caretera, bon iluminacion y mas cu tur bon voorlichting. Pueblo falta di informacion pa sa kico por y kico no riba nos camindanan. Ora papia di bon iluminacion, mira e zebrapadnan, mal ilumina, anto riba high-way. No por!!! 

Minister di Husticia anterior, rocco Tjon a bisa cu a duna un compania di promocion e suma di 700 mil florin, cu e meta pa duna informacion, guia pa cu comportacion den nos trafico. Boso a mira algo di esaki. Parlamento no ta ni cuestiona unda e placa aki a bai. Parlamento no por sigui drumi tampoco y ora cu algo pasa, core yama un reunion despues cu e baca a hoga caba.

Esnan cu no cumpli cu ley, mester por sintie den nan cartera. Hopi hende ta bisa mira con na Corsou medida ta tuma lugar contra esnan cu ta viola ley den trafico. Ta kita tur auto, brommer, etc. for di caminda. Aki na Aruba tin hasta polis cu tin motocycle cu ta haci boroto, y nan superiornan no ta tende of mira esaki. Con un polis, kende tambe forma parti di e comunidad aki, ta haci su mes culpable na violacion di ley, anto si kier pone ley riba otronan (hasta su amigonan).

Cuanto biahe e ley di Hit & Run a ser cambia. Mira p.e. con un polis, Wilfred Besarill, ex Minister Plenipotenciario di MEP a haye den un caso di hit & run, despues di a wak si victima a dicidi di baha na awa pa su dia despues presenta su mes na Alto Comisario. Ya e momento ey no por haci ningun test cune, ya cu 24 ora a pasa caba. El a wordo castiga p’esey, claro cu no. Y asina p.e. den cantidatonan di MEP, a conoce 2 caso mas di hit & run. Nan a wordo castiga? Claro cu no!!! 

Awe por mira con un dama hoben (24 aña) ta tras di trail, no pasobra el a core bai, bandona e sitio di e accidente, pasobra e tabata burachi y por ta haci droga, e ultimo aki, ningun hende por hai dicho test, pero el a dal 2 hende mata. Pesey e ta sera ainda, cu probabilidad di laga den Libertad proximamente. Mira p.e. e caso di hit & run dilanti warda di polis na San Nicolas, unda e dia siguiente e chofer a bai entrega su mes. Si e tabata curachi ora di e accidente ningun hende por a confirma. E no a dal ningun hende mata, pero el a bolbe despues di 24 or. El a comete un delito? Pa loke el a haci, ley ta bisa bin bek, y si bo bolbe den tanto tempo, e hit & run no ta valido. Ley a cambia, si bo baha na awa, anto ley bisabo bo tin cu para. Castigo maximo ta di 2 aña, no tin motibo pa sigui detenebo. Si e delito tin castigo pa 4 aña sera, bo por wordo deteni y encarcela. 

Ehecuta castigo manera ley ta bisa, no bin cu cambio pa hit & run so. Tin 3 origen di causa di un accidente. Buracheria, cu t’e causa mayor, Papia na cel, y no sa di comporta bo mes responsablemente. Si cuminsa na duna p.e. boet di 1000 florin p’e causanan di accidente lo por yuda, pero no t’e solucion 100%. Nos chofernan tambe mester carga nan responsabilidad ora cu nan ta stuur un vehiculo, igualmente un peaton tambe mester sa unda y con e ta cana. 

Y por ultimo, Gobierno mester tuma medida contra e autonan cu right hand drive. MEP ni AVP no tin curahe pa pone un paro na importacion di e autonan aki, pa miedo di perde voto. Wak Bonaire, formando parti di Gemeente Hulanda no tin ningun auto di right hand drive, pasobra ley Hulandes no ta permiti esaki. Anto pakico Aruba no por haci mescos. Di berdad nos politiconan, sea ehecutivo of legislativo kier un Aruba sigur den trafico, haci cambio den ley aki tambe.

Minister mr. Geoffrey Wever, a anuncia un cambio importante den e “expatregeling” fiscal, cu tin como meta central pa stimula y facilita e regreso di profesionalnan Arubiano cu a studia y traha den exterior, pa nan por bin biba y contribui activamente na desaroyo di nan pais Aruba.

Pa hopi aña, e “expatregeling” fiscal a wordo aplica principalmente pa expertonan cu ta bin di afo, cu un salario minimo di Afl. 150.000 y cu experticio cu no ta disponibel riba mercado laboral local. Cu e reforma nobo, Gobierno a tuma un paso consciente pa amplia e alcance di e areglo, asina cu e lo ta aplicabel tambe pa profesionalnan cu un formacion academico minimo di HBO y cu al menos cinco aña di experencia relevante.

Segun Minister Geoffrey Wever, e adaptacion aki ta responde directamente na un realidad claro: Hopi Arubiano cu a crece na Aruba, cu a sigui nan estudio den exterior y cu a traha y haya experencia internacional, kier bin cas bek, pero te awor a haya poco condicion fiscal cu tabata haci esaki atractivo. “Cu e cambio aki nos ta crea un manera concreto pa nos yiunan di tera bin bek, traha, inverti y construi nan futuro na Aruba,” segun Minister Geoffrey Wever.

E “expatregeling” reforma no ta solamente un incentivo fiscal, pero un instrumento di politica laboral cu ta reconoce e balor di capital humano Arubiano. Dor di facilita e transicion p’e regreso di talento local, Gobierno ta apunta pa fortifica conocemento local, productividad y liderazgo profesional den sector publico y priva.

Ademas di amplia e doelgroep, e reforma tambe ta modernisa e tratamento fiscal di condicionnan secundario laboral, pa cu e regeling ta mas alinea cu e mercado laboral actual. Esaki ta inclui actualisacion di sumanan existente y introduccion di facilidad fiscal nobo riba transporte, vivienda, comunicacion, bienestar y desaroyo profesional. Den e contexto aki, e estimulo pa uso di vehiculo electrico y hybrid ta contribui no solamente na mobilidad, pero tambe na sostenibilidad.

Minister Wever ta subraya cu e reforma di e “expatregeling” ta parti di un vision mas amplio pa prepara Aruba pa futuro, caminda talento local ta wordo reteni y reintegra activamente den nos economia. “Si nos kier un economia fuerte y resiliente, nos mester inverti den nos propio hende,” Minister Wever a expresa.

E cambio di e “expatregeling” fiscal a drenta na vigor riba 1 di januari 2026, marcando un paso importante den e esfuerso continuo pa fortifica e mercado laboral y crea mas oportunidad pa profesionalnan Arubiano. E “expatregeling” ta publica riba https://www.gobierno.aw/nl/afkondigingsbladen-2025.

Semper Dr. Horacio E. Oduber Hospitall (HOH) su Departamento di Emergencia ta mas druk cu normal durante dianan di fiesta y ta comparti un analisis cortico cu comunidad tocante incidentenan durante e period aki. Na prome lugar, HOH ta gradici full e team cu a traha incansablemente durante e temporada aki unda cada colega a traha duro pa atende tur pashent cu a yega cu un of otro problema medico. Importante semper pa corda ta cu Departamento di Emergencia t’ey pa tur emergencia y e Dokter na Warda (Huisartsenpost – HAP) t’ey pa casonan cu no por warda te cu e siguiente dia pa wordo atendi dor di bo propio dokter di cas.

Nos na HOH sigur tin comprension cu e ta fastioso pa mester acudi cerca nos durante dianan di fiesta y p’esey un danki na tur hende pa nan pasenshi y cooperacion durante tempo di espera p’asina nos team di profesionalnan por a atende cada un di boso debidamente.

Pasco di nacemento:

E analisis pa loke ta Pasco di Nacemento a cuminsa for di 24 di december pa 12pm y a termina dia 27 di december pa 6am. Durante e periodo aki 315 persona a yega Departamento di Emergencia di cual 33 persona despues di a pasa pre-triage a wordo atendi pa dokter na warda. Di e 282 persona cu a wordo atendi na Departamento di Emergencia, 49% tabata femenino y 51% masculino. Edad di mas chikito cu a atende e aña aki ta un baby di 1 dia y e pashent di mas grandi 95 aña. Y e edad averahe di pashent cu a wordo atendi tabata 46 aña di edad.

Di e 282 persona cu a ser atendi 19 tabatin un of otro herida, 4 persona cu kemadura, 7 pashent di accident di trafico, 6 persona conecta cu incidente di violencia, 11 persona cu tabatin problema pa hala rosea y 3 persona cu intoxicacion. Otro motibonan pa acudi tabata pa dolor na pecho, dolor di stoma, sacamento, reaccion alergico, infeccion y mas.

Durante e periodo aki 65 pashent di e 282 a ser admiti di cual 45% ta femenino y e grupo di edad mas comun cu ser admiti ta di 65 aña bay ariba (43%). P’e total di 315 persona cu a acudi Departamento di Emergencia, e averahe di tempo di espera desde yegada te cu salida of admision tabata 104 minuut.

Cambio di aña:

P’e cambio di aña e datonan comparti ta desde 31 di december 2025 pa 12pm y a termina dia 3 di januari 2026 pa 6am. E cantidad di persona total cu a acudi na Departamento di Emergencia of dokter na warda tabata 321. Di e 321 persona un total di 284 a ricibi atencion medico na Departamento di Emergencia cual 55% ta masculino. E edad di mas abou cu tabatin mester di atencion ta un baby di 24 dia y e pashent di mas grandi tabatin 99 aña. Edad averahe di e grupo cu a acudi tabata 43 aña.

Di e 284 pashentnan cu a acudi na Departamento di Emergencia 15 tabatin herida/lesion, 2 tabata involucra den un accident di trafico, 8 persona relaciona cu violencia, 1 pa motibo di vuurwerk y 2 cu intoxicacion. Mayoria, esta 232 persona, a drenta pa motibo di p.e. caida of cu no tin di haber cu traumanan fisico manera p.e. dolor na pecho, sucu, dolor di stoma, sacamento, infeccion of otro etc.

Di e 284 pashentnan cu a wordo yuda na Departamento di Emergencia un total di 44 pashent a ser admiti den Hospital. Alabes mester bisa tambe cu 61% di pashent admiti ta masculino y e averahe di tempo di espera desde yegada te cu salida of admision den hospital tabata 113 minuut.

Si acaso bo mester di asistencia medico corda tambe cu nos di HOH semper t’ey!