Minister di Finansas, Geoffrey Wever a anuncia cu College Aruba financieel toezicht (CAft) a sigui positivo riba ehecucion di presupuesto 2025 di Aruba. Despues cu Gobierno dia 13 di november a haci entrega tambe na tempo di e Uitvoeringsrapportage kwartaal 3, conforme articulo 17 inciso 1 di e ley di supervision financiero (LAFT), CAft a duna conseho riba e resultado te cu september 2025 di e ehecucion di presupuesto 2025.

Segun CAft, cifranan di e Uitvoeringsrapportage kwartaal 3 ta duna un bista positivo. E crecemento di Aruba su economia ta e.o. un di e motibo cu entradanan di belasting ta mas halto cu loke a wordo proyecta. Resultado preliminario p’e sector colectivo cu ta consisti di Pais Aruba, AZV, SVB, ATA, Serlimar, Stichting EPB y Universidad di Aruba ta mustra un surplus di 473 miyon. Esaki ta igual cu 6.0 porciento di e producto interno bruto.

Basa riba e Uitvoeringsrapportage kwartaal 3, CAft ta indica cu Aruba pa 2025 ta riba e rumbo pa cumpli banda di e norma presupuestario, tambe cu e norma presupuestario pa gastonan di personal. Gastonan di Gobierno ta keda dentro di e cuadro di presupuesto y entradanan di belasting ta resulta mas mihor cu loke ta wordo spera pa ricibi.

Tambe, CAft ta indica cu ehecucion di inversionnan ta kedando atras cu ta causa cu cu fondonan disponibel no ta wordo uza. CAft ta premira extra espacio financiero dor di meevallers y gastonan mas abao di inversion. Basa riba esaki Caft ta recomenda pa paga mas debe y asina yuda baha e nivel di debe y e peso di pagonan na interes.

Den e conseho tambe CAft ta pidi Gobierno pa indica cua medidanan lo tuma pa e.o.  soluciona cu inversionnan publico ta kedando atras, con lo fortalece e capacidad pa por ehecuta proyectonan, mehoracion den planificacion di proyectonan, y pa traha un Agenda di Inversion basa riba prioridadnan di maneho y cu por wordo ehecuta segun e capacidad di ehecucion existente.

Minister Geoffrey Wever ta indica cu conseho di CAft riba e Uitvoeringsrapportage kwartaal 3 ta subraya e resultado di e maneho financiero prudente di Gabinete AVP-FUTURO. Gastonan ta keda drento di e begroting y entradanan di belasting ta resulta mas mihor cu loke ta wordo spera pa ricibi. E cifranan preliminario ta demostra banda di control di gastonan tambe e confianza di inversionista, comerciante y consumidornan. Entradanan extra ricibi na e.o. BBO y Invoerrechten ta muestra di un economia cu ta crece.

Ta un realidad cu ehecucion di inversionnan publico ta keda un reto. Pesey Gobierno desde su huramentacion na maart ta trahando riba crea un Fondo di Inversion y un Agenda di Inversion pa garantiza cu structuralmente aloca fondonan publico y inverti den desaroyo di Aruba. E concepto di ley pa crea e Fondo di Inversion ta na Raad van Advies pa conseho y pronto lo wordo entrega na Parlamento. E Agenda di Inversion ta den fase di finalisacion basa riba prioridadnan di maneho di Gobierno. 

Diadomingo ultimo a presenta un situacion fastioso, unda den oranan di  atardi a keda raporta cu tin un persona perdi riba alta mar. Ta trata aki di e hoben Ecuatoriano di 21 aña, kende  a bay lama cu su amigonan. Nan a bay laman pa test un Sea Doo. Amigonan mes ta conta cu nan a bin baha e prome Sea Doo y a bisa Angel Cedeño kende ta nan amigo pa warda un rato y ta core busca e otro Sea Doo bin bek pa nan sali hunto cu e dos Sea Doonan. Pa ora nan a bolbe no a mira Angel Cedeño mas. 

Cedeño lo a sali for di Fisherman’s Hut, unda el a bay cu su amigonan. E waverunner ta color blanco, cu asiento preto y capa blauw. Diferente unidad policial tabata n’e sitio pa asina busca e hoben y tambe haya mas informacion, mientras cu riba lama dos helicopter, Wardacosta y Marina Real, tabata buscand’e. Informacion cu tin ta cu na cinco miya (8 kilometer) pabou di Aruba, a topa e waverunner, pero no a bin cu ne aden. Esaki ta pasobra esnan den helicopter a mira e waverunner, mientras cu e boto di Wardacosta ta buscando den e area pabou di Aruba pa wak si por topa cu Cedeño mes.

A cuminza bira scur y autoridadnan a dicidi di suspende e busqueda, pa sigui ayera mainta. Pero ayera madruga, algo pasa di 2’or, a drenta informacion cu e hoben di 21 aña, kende ta perdi riba lama cu un waverunner, a landa bin tera. Central di Polis pa mas o menos 2:50 am a haya informacion cu Angel Cedeño, kende tabata perdi a yega tera bek. E mester a landa sigur un 5 miya, loke ta ser calcula sigur un 8 ora, prome di yega tera sano y salvo. Inmediatamente a abisa ambulance y nan a hibe Hospital p’e wordo controla. Su situacion ta bon, pero sigur a pasa den susto cu hamas e lo por lubida.

Den cuadro di su maneho pa cu su cartera di Vivienda y Infrastructura, Minister, drs. Rene Herdé a organisa un anochi di informacion na MFA Noord. Minister Herde for di momento cu el a asumi e encargo di Vivienda y Infrastructura a cuminsa compila tur informacion y hunto cu su Infra Team a sinta pa traha den forma eficiente y structura, riba posibel solucionan riba retonan di Vivienda y infrastructura di nos pais. 

Pa por tin un miho bista, e mandatario a organisa un encuentro cu personanan clave den e area aki p’asina forma un grupo importante pa yuda mehora e calidad di bida di nos comunidad. Durante e presentacion di “Landschap gestuurde gebiedsontwikkeling”, tabatin varios ingeniero, arkitecto, inversionista, desaroyador, expertornan y habitantenan di diferente barrio presente. 

Prof. Paul van Beek a comparti su conocemento di construccion di barionan na Europa. Den su presentacion el a mustra diferente modelo di barionan cu el a diseña na Hulanda y un modelo specialmente cu el a diseña pa Aruba.

Minister Herdé a menciona cu e encuentro aki ta solamente e comienso di un proceso pa involucra tur hende cu por y kier yuda pa logra resolve e problematica grandi di vivienda. Mester cuminsa e proceso di identifica tur elemento pa por diseña un modelo Arubiano. E meta ta pa yega na un acuerdo pa hunto carga responsabilidad, comparti conocemento y experiencia.

Hunto mester inverti den e proceso aki y tuma riesgonan pa logra traha casnan pagabel y sostenibel pa Aruba. E proceso no solamente ta encera traha casnan y bario nobo, pero alabes busca un forma pa por renoba barionan exisitente. Nos mester identifica ken ta doñonan di tur e casnan decai (verval) y cu ta bayendo perdi pa p.e. uza e terenonan aki pa traha casnan nobo.

Minister rs. Reene Herdé a menciona cu e proceso lo ta largo, amplio y lo tarda, pero hunto nos mester yega un madurez pa uni y resolve e problematica di vivienda no obstante nos color politico. Mester sinta hunto na mesa y scucha bon kico e necesidadnan ta y ta abierto na visionnan nobo. Tin profesionalnan hoben cu a regresa Aruba despues di logra nan estudio cu kier cuminsa un famia, tin pensionadonan cu ta biba den un cas demasiado grandi y kier bay biba mas chikito.

E meta ta pa por diferencia cada ken nan necesidad y traha casnan pa pueblo basa riba nan necesidadnan. Si logra esaki, el o bira algo grandi pa Aruba, segun e mandatario.

Corte den Prome Instancia a trata Diabierne ultimo e caso penal contra e sospechoso Johan K. Felicia, kende ta wordo acusa di a causa un accidente di trafico dia 1 di december 2023 na Savaneta, cu consecuencia mortal.
Despues di e accidente el a huy sigui core; e no tabatin rijbewijs tampoco. Un pareha turista cu a caba di yega Aruba a resulta gravemente herida. Un di e victimanan (75 aña di edad) a fayece e dia siguiente di e heridanan cu el a sufri.

E sospechoso a declara cu e tabata core un tiki mas cu 80 kilometer pa ora riba un caminda unda e velocidad maximo permiti ta di 60 kilometer pa ora. Tabata anochi scur y e tabata core cu bentana getint preto preto (cu 6% transparencia enbez di e minimo di 70% cu ta permiti). Fiscal di Husticia a compara esaki cu core cu wowo mara! E sospechoso ni
tin rijbewijs, anto pa colmo el a yega di wordo persigui penalmente mas biaha den pasado pa core sin rijbewijs.
E pregunta huridico den e caso ta:  E accidente a sosode directamente a consecuencia di e erornan cu Johan K. Felicia a comete den trafico?  Of e lo por a sosode cu cualkier otro chofer cu si tabata core cu cuidao?
E hecho y circunstancianan n’e sitio di e accidente ta importante ora di contesta e pregunta aki. No ta suficientemente duidelijk con y na cua momento e pareha a cruza caminda. Dor di esey no por bisa cu seguridad cu e accidente mortal ta a consecuencia di e comportacion peligroso di e sospechoso.

Ministerio Pubico a conclui cu no tin bastante evidencia pa comproba homicidio culposo.
Ministerio Publico ta haya cu ta si comproba cu e sospechoso a core peligrosamente. Ademas ta acus’e di a core sin rijbewijs y di a bandona e sitio di e accidente.
Ministerio Publico ta tuma e sospechoso na malo cu el a comete tanto eror den trafico, mas aun cu el a yega di wordo condena caba pa core sin rijbewijs den pasado. Core sin rijbewijs ta forma un peliger grandi pa seguridad den trafico. Ministerio Publico ta tum’e hopi na malo tambe cu el a huy for e sitio di accidente y a laga e personanan pa nan cuenta. Famia di e fayecido tin cu sigui biba cu e perdida di nan ser stima.

Huez a dicta sentencia mes ora den e caso. El a condena Johan K. Felicia pa un castigo di prison di 10 siman, di cual 8 siman ta condicional, cu un tempo di prueba di tres aña, y 80 ora di trabao pa comunidad y un prohibicion di core auto pa un duracion di 2 aña, pa causa peliger, core sin rijbewijs y bandona sitio di un accidente. E sospechoso a wordo declara liber pa homicidio culposo. Huez a dicidi cu Felicia lo no haya su auto tampoco.

Siman pasa, e sospechoso Izak M. Principal (21 aña) den e caso Last Call a presenta dilanti Corte Superior di Husticia. E caso ta trata di homicidio di e mucha muher Sayuri Petronia, kende a fayece dia 4 di juni 2021, despues cu Izak Principal a los tiro riba dje cu un arma di candela.

E perdida di Sayuri Petronia a laga heridanan profundo cerca su famia y den comunidad di Aruba. Su tata ta sali regularmente den publicidad pa pidi atencion p’e caso y pa expresa su dolor.

Ministerio Publico tin consideracion pa famia di Sayuri Petronia, cu tin derecho riba reconocimento y respet. E sospechoso Principal  tabata menor di edad tempo di e sucedido: “Na aña 2022, den forma di excepcion, Huez a conden’e segun Ley Penal pa adulto. El a wordo condena na un castigo di prison di 9 aña y TBS (E tin cu keda bao guia di Estado) cu obligacion di internacion, pa motibo di homicidio, varios intento di asesinato, robo cu violencia y menasa.

Den Corte di Apelacion na aña 2023, Corte Superior di Husticia a keda sin haci excepcion y a condena e sospechoso segun Ley Penal pa hoben. El a haya un castigo di 4 aña di detencion pa hoben y cu imposicion di medida PIJ (nota fi Red: Tin cu keda bao di guia).

Ministerio Publico a bay den Casacion na Corte di Casacion contra e decision aki, pa motibo cu e combinacion di castigo ta explicitamente exclui segun Codico di Ley Penal. Na 2024 Corte di Casacion a anula e decision di Corte Superior (di aña 2023), pero unicamente e parti cu ta trata e imposicion di castigo. Pues esey t’e parti importante cu Corte Superior di Husticia ta trata siman pasa.

Tin dos pregunta crucial pa contesta

1. E sospechoso mester wordo castiga segun Ley Penal pa hobennan, manera e regla principal ta prescribi?

2. Y/of e mester wordo castigo segun Ley Penal pa adultonan, den forma di excepcion?

Castigo tin varios meta, incluso vengansa. Vengansa ta nifica cu comunidad y famia ta wordo reconoci p’e daño cu nan a sufri. Esaki por scucha claramente den e palabranan di tata di Sayuri Petronia, kende semper a enfatisa cu ni si e sospechoso haya un castigo di bida largo, lo no compensa p’e perdida di su yiu.

Pero ora di impone un castigo, mester tuma den consideracion e persona di e sospechoso.

Kico esey ta nifica pa un sospechoso manera Izak Principal?

Pa un sospechoso manera Izak Principal esey ta nifica cu un castigo di prison so no ta suficiente, pasobra e tin un trastorno severo di personalidad cu ta hiba na comportacion violento y un riesgo halto di recidivista.

Den e tipo di casonan aki, un tratamiento forensico specialisa ta necesario pa evita cu e sospechoso, despues di a sinta su castigo (no importa con largo esaki por ta) bira un peliger di nobo pa sociedad.

E problema na Aruba ta cu pa tanto e medida di TBS como e medida di PIJ no tin ningun clinica forensico. Esaki ta representa un gran reto pa proteccion di comunidad. Ministerio Publico a argumenta cu Ley Penal pa adulto ta aplicabel.

Mirando e seriedad di e caso y e riesgo halto di recidivista, Ministerio Publico ta considera necesario pa Corte Superior di Husticia impone tanto un castigo di prison como un medida. E exigencia ta: 8 aña di prison, combina cu un medida di TBS cu obligacion di internacion.

Corte Superior lo dicta sentencia riba 17 di december 2025.

Siman pasa, Prome Minister mr. Mike Eman, hunto cu Minister di Economia mr. Geoffrey Wever y Minister di Vivienda drs. Rene Herdé, a ricibi un presentacion di un grupo di arkitecto local, relaciona cu e plan pa revitalisa Wilhelminastraat y becindario.

Cuatro (4) arkitecto local bon ekipa cu experencia amplio, a presenta nan plan den cual a trece dilanti e posibilidadnan pa capitalisa riba e pensamento di e revitalisacion di Caya Grandi, specialmente riba e pensamento di Gobierno pa locual ta trata Wilhelminastraat y otro cayanan cu ta conecta cu Wilhelminastraat.

Durante e presentacion, e arkitectonan a presenta diferente concepto hopi interesante cu a capta atencion di Prome Minister Eman. E conceptonan aki ta poni den contexto cu Caya Grandi di con e caya ta bira un solo nivel, y e arkitectonan aki a pone acento riba e parti aki. Ta papia aki di e uzo di otro material den e area cu no ta asfalt, pero tambe e inclusion di hopi mata den e desaroyo nobo aki. 

Cada presentacion tabata mara na un tema cu mester carga e renobacion di Wilhelminastraat, pero tambe e cayanan cu ta conecta cu esaki. No ta trata aki solamente di elementonan nobo, sino mantencion di e historia y cultura di Aruba.

E ta interesante pa mira con pensativo e companianan aki ta, con nan a conecta ideanan di renobacion y inovacion na temanan cu ta conecta na historia di nos centro di, Prome Minister a indica. Ademas Prome Minister Eman a subraya cu nos tin talento local pa yuda carga e vision di Gobierno pa por renoba no unicamente centro di ciudad, pero tambe e barionan. E ideanan aki por hunga un rol importante, pero tambe pa por cuminsa marca e siguiente pasonan cu mester tuma pa duna inicio n’e cambio grandi aki.

Siman pasa dialuna Corte Superior di Husticia a trata e Regiezitting den e caso Flamingo. E caso grandi aki ta referi a complicidad di abuso di funcion, complicidad di engaño y complicidad di corupcion pasivo, y a cuminsa na aña 2022 cu detencion di e sospechoso principal Otmar E. Oduber, ex-Minister y ex-Parlamentario. Banda di e politico prominente aki, siete (7) otro sospechoso a wordo persigui, incluso cuatro (4) funcionario publico.

Durante e tratamento di siman pasa, defensa a entrega varios deseo di investigacion. Corte Superior di Husticia a aproba varios, dos di nan peticionnan pa scucha testigo. Na februari di e aña aki, Ministerio Publico a bay den apelacion contra e sentencianan cu Corte den

Prome Instancia a dicta contra Otmar E.Oduber y contra e sospechoso Eisha F. Esser, un funcionario publico. Defensa a persisti pa scucha 7 testigo, di cual esun mas importante tabata Rachelle Wever di DIP.  Pero Huez a bai di acurdo pa scucha 2 testigo so, ya e otronan a ser atendi caba. Nan dos, plus un tercer sospechoso, tambe a bay den apelacion contra nan sentencia.

Dia 22 di januari 2025, Corte den Prome Instancia a condena Otmar E. Oduber pa complicidad di engaño, intent di engaño contra Pais Aruba y abuso di su funcion como Minister den e periodo 2017–2020. El a haya un castigo di prison di 1 aña, di cual 319 dia ta condicional, y ademas 240 ora di trabao pa comunidad.

Pa algun hecho, incluso corupcion pasivo, Otmar Oduber a wordo declara liber. Corte a declara e sospechoso Eisha F. Esser liber di tur tres hecho di cual e tabata wordo acusa. A keda palabra cu Corte Superior di Husticia lo trata e caso Flamingo den su contenido riba prome di juni 2026. 

Esakk nifica cu por lo pronto Otmar Oduber lo no bolbe como Parlamentario pa fracccion di PPA, cual puesto ta ser cubri awor pa Eduard Pieters. Otmar Oduber un biahe mas a laga sa cu e lo Sali liber den e caso aki, pa despues bira Parlamentario atrobe. Por lo pronto e lo hiba su oposicion pafo di Parlamento, manera un coordinador di su fraccion.

Cu un profundo sentido di respet y gratitud, a keda anuncia anuncia cu sra. Jeanette R. (Jane) Semeleer-Figaroa a bay cu pensioen despues di hopi aña di Servicio como Presidente di Banco Central di Aruba (CBA). Minister Geoffrey Wever a reconoce e contribucion fundamental cu sra. Semeleer-Figaroa a haci pa stabilidad financiero y integridad di nos sector financiero y sistema bancario di Aruba.

Di acuerdo cu nos informacion, te ainda no ta conoci kende lo bira sucesor di Presidente di CBA, maske cu prome cu retiro di Gabinete Wever Croes II tur intento a ser haci dor di ex Prome Minister Evelyn Wever Croes nombra e proximo sucesor  di sra. Jane Semeleer-Figaora. Pero esey a ser para y pa laga e decision aki pa Gobierno AVP-Futuro, unda ya pa algun tempo negociacion ta bin ta tumando lugar. Hecho ta cu nomber(nan) di posibel candidato ta hermeticamente sera.

Hecho ta cu e decision kende lo bira e proximo Presidente di CBA, lo por keda anuncia prome cu fin di aña ainda. Tin diferente nomber menciona, pero nos no kier bai den speculacion.

Jeanette R. (Jane) Semeleer, a inicia su carera den servicio publico como asesora di maneho di Departamento di Asunto Economico y posteriormente den Relacionanan Externo. Na 1990 sra. Semeleer a bay forma parti di CBA, cuminsando como Adjunct Head di CBA su Research Department y despues di esey bira Manager di e departamento, y mas despues na 2000 sra. Semeleer a bira Executive Director di CBA.

Na 2008 sra. Jane Semeleer a keda nombra Presidente di CBA, asina birando e di 8 Presidente y e prome hende muher pa ocupa e posicion aki den CBA. Durante su liderazgo, Sra. Jane Semeleer a logra varios avance relevante pa Aruba.

Gobierno lo despedi di sra. Jane Semeleer den un setting priva unda lo gradici sra. Semeleer pa tur su añanan di trabou na bienester di Banco Central di Aruba y Aruba. A desea sra. Jane Semeleer tur clase di exito cu e siguiente pasonan den cu carrera profesional, sabiendo cu su legado ta representa un periodo di profesionalismo, y progreso pa nos isla.

Departamento di Impuesto (DIMP) a ‘bati alarma’ pa un caso cu a cuminsa mira luz di dia. “Awe personanan no autorisa a cuminsa manda mensahe via SMS uzando nomber y logo di Departamento di Impuesto”, segun un comunidado di DIMP cu ta bisa. “E mensahe ta persuadi personanan pa "no perde tempo" y pa nan pidi nan restitucion fiscal den forma digital. D0en e SMS tin un link pa haya mas detaye”. 

DIMP ta alerta tur contribuyente cu e mensahe di SMS aki no a sali for di Departamento di Impuesto. E ta un ‘scam’ y actualmente investigacion ta tumando lugar. DIMP ta pidi tur contribuyente pa no habri e link. Si acaso a habri e link, por fabor no yena ningun dato den e formulario digital. Esaki ta hopi peligroso, pasobra bo datonan personal lo por cay den man di personanan no autorisa cu mal intencion. 

NUNCA

Departamento di Impuesto a sigura cu nunca nan lo pidi contribuyente pa yena nan datonan personal via tipo di formularionan asina. “Sea ta un SMS of un e-mail, please no habri ningun link. Ta consehabel pa semper verifica cu nos prome. DIMP ta pidi su contribuyentenan pa comparti e mensahe aki cu conocirnan p’asina preveni mas hopi posibel cu datonan confidencial ta cay den man di criminalnan cibernetico cu ta uzando nomber y logo di Departamento di Impuesto”.

Por medio di Noticiacla, nos di Den Noticia a compronde cu Director di Aruba Trade & Industry Association (ATIA), Herrick Henriquez a tuma su retiro. Segun Herrick Henriquez el a dicidi di acepta un otro reto pa 2026. Unda e lo bai, Henriquez no kier divulga nada ainda.  Pa loke ta su susesor, esey no ta determina ainda y ta keda na ATIA pa anuncia nan proximo Director. 

HERRICK HENRIQUEZ

Herrick Henriquez a drenta den servicio di ATIA, dia 1 di maart 2021, esta 4 aña pasa. Durante e periodo ey, el a sa di solidifica e asosacion di tal forma cu e voz cu e tabatin, a bira mas fuerte. Su conocemento di materia tabata sinigual, y semper fuerte y al caso. Nunca a sconde su pensamento como Director di ATIA ni como persona. Tur tema, e tabata domina, y tabata lidera tambe ariba. Henriquez a sa di inova e asosacion, su imagen fisicamente, y tambe structuralmente, p’asina e asosacion keda cu tempo. Cu prensa, semper e tabatin un coneccion sublime. 

Den Noticia ta desea Herrick Henriquez tur cos bon den su reto nobo. Masha danki p’e relacion, cu sigur lo sigui sea cual sea e trabao nobo. 

Aruba por ta un isla chikito, pero su yiunan di tera ta sigui demostra mundo e berdadero forsa di nos hendenan. Recientemente a eligi y apunta Denise M. Hradecky—naci y lanta na Oranjestad – como Huez Honorario.

Esaki ta pa un periodo di 5 aña na Corte Administrativo di Baden-Württemberg na Stuttgart, Alemania. Esaki ta un distinccion di honor pa cualkier profesional, y ainda mas inspirador biniendo di un persona cu ta carga Aruba den su curazon.

Mientras cu e ta sirbi boluntariamente, e lo sigui lidera su empresanan internacional y contribui na cuido di salud global y desaroyo legal. E Corte den su mayoria ta atende asuntonan di inmigracion, ley educacional y decisionnan gubernamental.

E logronan di Denise M. Hradecky ta proba un biaha mas cu Aruba ta produci talentonan di clase mundial. Su exito ta lanta nos bandera te aya riba. Pabien na Denise M. Hradecky – y e por ta sigur cu su isla ta hopi orguyoso di dje.

Ayera dialuna 1 di december a habri cu bon noticia di parti di LATAM Airlines, awor comunidad Arubiano tin mas escogencia pa biaha pa Bogota. “Awe, e esfuerso y trabou cu nos a haci durante nos bishita na Bogota algun luna atras ta duna su fruto positivo pa Aruba”, asina Minister di Turismo mr. Wendrick Cicilia a bisa.

Minister Wendrick Cicilia conhuntamente cu CEO di A.T.A. Ronella Croes y Business Development Executive di AAA sra. Jo-Anne Arends a anuncia cu awor LATAM Airlines ta añadi 3 buelo pa siman for di Aeropuerto El Dorado, Bogota. E logro aki ta importante pa loke ta trata e strategia di diversificacion, pero tambe p’e localnan cu kier conecta cu Colombia.

E ruta nobo aki di Bogota-Aruba, Aruba-Bogota ta un esfuerso colectivo di diferente partnernan den turismo. “Nos ta sigui impulsa e diversificacion di turismo na Aruba. E ruta Bogota-Aruba di LATAM Airlines ta fortalece e conectividad di Aruba y ta expande nos alcance den e region”, asina Minister di Turismo mr. Wendrick Cicilia a finalisa bisando.