Gobierno pa medio di Minister di Finansa, Asunto Economico y Sector Primario, mr. Geoffrey Wever, ta expresa su orguyo y satisfaccion pa mira con Autentico Aruba Culinary Festival 2025 organisa dor di Aruba Tourism Authority (ATA) ta sigui crece y fortalece e posicion di Oranjestad como un centro culinario vibrante y innovativo den Caribe.

E festival, tabata un celebracion di e esencia di Aruba — un mezcla di sabor, cultura y creatividad cu ta uni tanto chefnan local como talent internacional. E evento a completa e esfuerzo di Gobierno pa revitalisa Oranjestad y duna un impulso structural na economia local via turismo, gastronomia y colaboracion publico-priva.

Un plataforma pa innovacion y orgullo nacional

“Autentico Aruba Culinary Festival ta mas cu un evento di cuminda — e ta un movemento cu ta uni nos cultura y ta proyecta e creatividad di nos pueblo. E festival ta un demostracion claro di con nos inversion den revitalisacion di Oranjestad y colaboracion cu sector priva por crea un energia economico vibrante” segun Minister Wever.

E edicion di 2025 a eleva e experiencia culinario na un otro nivel cu introduccion di The Autentico Kitchen y The Autentico Bar, dos espacio nobo unda chefnan y mixologistnan local y internacional a comparti nan maestria via clase practico di cushina y mixologia. E formato inovativo aki a duna tanto bishitante como residente un oportunidad unico pa siña, goza y conecta den un ambiente moderno y accesibel.

E festival a tuma lugar den e area na Wilhelminastraat/Columbusstraat, un espacio urbano modern y habri cu ta simbolisa e renacer di Oranjestad. E evento a logra atrae un gran cantidad di bishitante local y turista, creando un atmosfera di comunidad y energia positivo den e centro di ciudad.

“E meta di Gabinete AVP-FUTURO ta cla: Pa fortifica Oranjestad como un capital culinario di Caribe. E festival ‘Autentico’ ta prueba bibo cu, un vision claro, planificacion y colaboracion, ta conduci cu nos por crea un centro urbano atractivo y prospero,” Minister Geoffrey Wever a agrega.

E evento ta parti di un vision mas amplio di Gobierno pa implementa e proyecto di Revitalisacion di Oranjestad, cu ta sigui avansa den areanan manera Lagoen y Wilhelminastraat. E proyecto ta enfoca riba crea infrastructura moderno, acceso facil y ambiente atractivo pa negoshi y bishitantenan, p’asina sigui stimula e dinamica economico y cultural di e centro di ciudad.

For di algun tempo caba, mayoria compania/servicio estatal di Gobierno y tambe algun priva, tin un Sistema di contesta telefoon cu ta odioso. Ya e contacto cu persona no tin mas, perobo ta haya un mashin cu ta contestabo, cu ta bisa e.o. lo siguiente: “Bo yamada ta importante pa nos, keda na liña y asina nos operador keda liber, lo contestabo”

Wel tin compania, cu ta lago na liña pa un enternidad y pa finalmente e telefoon mes ta sera of abo como cliente ta fada y ta sera e telefoon sin haya e servicio desea. E sistema aki a bira masha inhumano, y ta dunabo un rabia, cu sib o mester haya e recepcionista bo dilanti, lo bo dal’e mata.

Y e mashin cu ta contestabo ta bisa” Bo yamada ta importante pa  nos, asina cu un di nos operadornan keda cla, lo yudabo”. Berdad, bo yamada t’asina importante? Asina berdad nos hendenan ta masha servicial? Pa menciona algun di e departamentonan di Gobierno cu ta laga di desea ta e.o. DIMP, DVG, kendenan ta pidi pa yama pa haya informacion valioso, pero no ta contesta, SETAR como compania nacional di telecomunicacion, DIP y algun mas, pa no menciona algun consultorio di dokter tambe. 

Ta di spera cu sea ta pone mas recepionista na trabao, pa duna servicio di berdad p’asina stop di consumi e cliente.

 Faltando pa conta votonan di Venray y e asina yama ‘briefstemmen” awe lo keda cla cu e conteo  di votonan cu pa hopi di e partidonan ta interesante, ya cu tin e posibilidad cu D66 cu ya a gana e eleccion, lo por haya un ‘restzetel’ ainda cu lo duna e partido di Rob Jetten un total di 27 asiento, uno mas cu PVV di Geert Wilders.

Expectativa ta grandi ya cu si D66 logra di haya un asiento mas, e posibilidad cu Hulanda lo haya un Gobierno totalmente derechista, ta mas grandi mirando cu e posibilidad ta grandi cu lo tin un coalicion forma pa D66, VVD, CDA y JA21, ya cu e coalicion lo conta cu 75 di e 150 asientonan cu tin pa Tweede Kamer.

Lo tin cu  busca dos partner mas p’e coalicion y esakinan  lo por bira FvD cu tin 7 asiento y BBB cu tin 4 asiento sigura p’e ora logra un gabinete cu sosten di 86 asiento den Tweede Kamer.

Hecho cu ta cu Geert Wilders definitivamente  lo ta for di e proximo Gobierno, mientras cu ainda GroenLinks-PvdA ta ser menciona  y pa forma parti di e coalicion nobo, pero aki ta depende kico lider di e partido di VVD, kier defini ya cu for di inicio di campaña el a bisa cu su partido lo no traha cu e partido di Timmermans.

Eleccion di Hulanda a conoce varios desaroyo masha sorprendente mes entre nan e determinacion di Geert Wilders, kende a kere cu su partido cu na 2023 a haya 37 asiento, lo sigui crece caminda PVV lo bira e ganador absoluto y su persona lo dirigi henter e proceso di gobernacion.

Wel Wilders su plan a wordo rechasa pa votadornan y caminda PVV a perde 11 asiento pero asina mes el ta empata ainda den asiento cu D66 como e dos partidonan mas grandi, pero den total di voto ricibi, e partido di Jetten a bira e ganador y lo no tin cambio mas den esey.

E gran sorpresa a bira D66 cu den eleccion di 2023  a ricibi solamente 9 asiento,  awor a logra 26 asiento cu ta un adelanto di 17 y e otro partido cu a  logra un  adelanto grandi, tabata CDA cu for di 5 asiento na 2023, awor a ricibi 18 asiento cu ta un diferencia di 13 asiento.

JA21 tambe a gana den popularidad ora cu for di un asiento a logra 9 asiento den e eleccion di diaranson ultimo,  mientras cu e partido di FvD cu na 2023 a logra 3 asiento, awor el a crece cu cuater asiento cu 7 asiento.

E perdedo di mas grandi a bira e partido di NSC cu na 2023 a ricibi un total di  20 asiento, pero awor no a logra di convence votadornan y a keda sin asiento y lo disparce for di Tweede Kamer.

 VVD  a perde dos asiento, pero sin duda a bira un di e sorpresanan grandi ya cu a anticipa cu e partido lo a perde entre ocho pa dies asiento, pero e partido a retene 22.

Conseho di Ministro di Reino Hulandes diabierna ultimo a bay di acuerdo cu e nombramento di Hans Hoogervorst como Presidente di e 3 Colegionan Supervision Financiero (CFT). Señor Hoogervorst ta sigui Lidewijde Ongering, kende entrante 1 di februari ta stop como Presidente.

Cu e nombramento di parti di Conseho di Minister (di Reino), sr. Hoogervorst ta bira entrante 1 di februari e Presidente nobo di Cft Curaçao y Sint Maarten, Colegio Aruba supervision financiero y Cft Bonaire, Sint Eustatius y Saba. 

Hans Hoogervorst for di 2022 ta miembro di e 3 colegionan representando Hulanda. Hoogervorst tabata Secretario di Estado y Minister den diferente Gabinete Hulandes. Despues di su carera politico, e tabata Presidente di Autoridad Mercado Financiero y di International Accounting Standards Board.

Eddie van Marum, Secretario di Estado di Asuntonan Interno y Relacion di Reino tocante e nombramentoa bisa: “Señor Hoogervorst ya tin un trayectoria solido como miembro di e Colegionan supervision financiero. E ta un excelente sucesor di señora Ongering, kende desde februari 2023 a eherce e funcion aki cu gran profesionalismo. 

Finansa publico sano t’e base pa haci inversionnan cu mester conduci na un mihor bida pa habitantenan di tur e islanan. Na nomber di Conseho di Ministro (di Reino) mi ta gradici Presidente saliente señora Ongering pa su gran compromiso y esfuerso p’e partinan Caribense di Reino.”

Hans Hoogervorst: “Bou di guia di Lidewijde Ongering, nos como colegionan a dal pasonan importante den direccion di dialogo fortifica y mehoracion structural n’e pais- (islanan).” Hoogervorst ta bisa cu e lo sigui e mes rumbo cu Ongering a scoge: “Mi ta spera un colaboracion fructifero cu e diferente pais- (islanan).”

E colegionan supervision financiero ta independiente y ta vigila solides di finansa publico di e paisnan Curaçao, Sint Maarten y Aruba y di e entidadnan publico Bonaire, Sint Eustatius y Saba. E colegionan tin un papel di señala y conseha.

Mañan dia 4 di novemberlo lansa e proyecto di scol “Choices matter, so do you” den un forma festivo na Universidad di Aruba. E programa inovativo aki a wordo desaroya riba iniciativa di Ministerio Publico, en cooperacion cu Universidad di Aruba y cu Bureau Diversion, cu ta specialisa den desaroya programanan educativo tocante temanan cu ta toca comunidad.

Na Hulanda tin un programa parecido,pa 10aña caba, bao di e nomber “Wie grijpt in?” E iniciativa “Choices matter, so do you” ta dirigi riba alumnonan di Ciclo Basico di varios scol secundario. E ta duna nan un chens pa drenta den combersacion cu otro tocante cuestionnan actual, bao guia di peer educatornan di Universidad di Aruba y den cooperacion estrecho cu Ministerio Publico.

E lansamento lo tuma lugar mañan diamars di 4 pa 6’or di atardi den aula di Universidad di Aruba. Procurador-General, mr. Flangien lo hiba palabra y lo papia tocante e importancia cu e proyecto aki tin pa Ministerio Publico. Usualmente e enfoke di Ministerio Publico ta riba e acercamiento penal, mientras cu den e proyecto aki e enfasis lo ta riba yega n’e hobennan y riba prevencion pa medio di educacion y concientisacion.

Di banda di Universidad di Aruba, Ruth Bonnevalle, coordinador di proyecto y docente principal di Derecho Penal y Procesal Penal, lo elabora encuento e rol di studiantenan como peer educator den e proyecto “Choices matter, so do you”. A invita director y docenten di 13 scol secundario tambe pa mañan diamars y lo introduci e peer educatornan y revela e logo y slogan.

Manager di proyecto Juliette van Romondt a bisa: “Cu Choices matter, so do you, nos ta duna hobennan un chens pa haci conoci cu estado di derecho, cu ley y cu e parti cu nan mes ta hunga den esaki, na un manera interactivo, tanto pa nan mes como pa comunidad”.

El a sigui bisa: “Tur mayor y docente ta wak cu hobennan ta wordo influencia constantemente. Social media y presion di grupo ta hunga un rol grandi. Nos kier fortifica e resilencia, percura pa hobennan sigui pensa tocante escogencia y consecuencianan, y keda participa den comunidad”.

E programa ta start e luna aki n’e scolnan secundario na Aruba y lo dura en todo caso e dos añanan escolar cu ta bin. A organisa recientemente sesionnan di informacion cu scolnan pa percura cu e material di les ta cuadra cu e experiencia di alumnonan di Aruba.

E programa lo ta na Papiamento, Hulandes y Ingles. Despues di e parti oficial lo sigui un recepcion y lo tin oportunidad pa invitadonan y prensa papia cu e manager di proyecto y docentenan di Universidad di Aruba, como tambe cu Fiscal di Husticia señora Paesch.

Siman pasa, Minister di Husticia mr. drs. Arthur Dowers a anuncia cu e Proyecto di Hunto pa Progreso ta drentando su ultimo dos lunanan. E maneho temporal di Hunto pa Progreso ta dirigi riba personanan cu a drenta Aruba via aeropuerto y cu a “over stay” nan periodo di bishita na Aruba y a drenta e circuito ilegal. Esaki ta haci cu esnan cu a drenta di forma clandestino via p.e. boto, lancha of hasta crucero, no ta bin na remarca pa ningun di e cuater (4) trayectonan di Hunto pa Progreso.

P’e grupo aki di persona indocumenta, Minister Dowers ta recomenda pa nan haci uzo di e areglo automatico di dispensacion cu ta na vigor p’esnan cu sali boluntariamente for di Aruba. E personanan aki lo no haya prohibicion pa drenta Aruba bek den futuro si nan bandona Aruba boluntariamente y lo por hasta bishita Aruba como turista pa corto tempo. 

Teniendo na cuenta cu na 2026 autoridadnan competente lo intensiva e controlnan migratorio tur rond di Aruba, ta recomenda pa sali boluntariamente, paso esnan cu keda deporta pa autoridad, lo por haya un prohibicion di entrada cu un duracion di te cu 5 aña. Saliendo a base boluntario prome cu fin di 2025, ta duna e persona e posibilidad di drenta e trayecto regular di permiso di DIMAS na 2026.

Minister mr. ing. Arthur Dowers ta recomenda tur persona cu a drenta Aruba prome cu 1 di juli 2025 atrabes di aeropuerto, pa haci uzo di e oportunidad unico di Hunto pa Progreso. Por haci cita riba www.dimasaruba.aw of yega DIMAS sin cita di 5or te cu 8’or di anochi di dialuna pa diabierna. Ademas tin cita diasabra entre 9’or di mainta y 3’or di atardi.

Recientemente a tuma lugar na HOH- Academy di Dr. Horacio E. Oduber Hospital (HOH) e prome simposio organisa pa HOH tocante cuido paliativo na Aruba. Un topico sumamente importante, pero hopi biaha no bon representa mirando e dificultad cu tin pa papia tocante e parti aki di bida. P’e motibo ey e team geriatrico na HOH a tuma e iniciativa pa organisa e simposio aki y trece mas conscientisacion y educacion tocante cuido paliativo pa tur cu ta den sector medico.

Anoeska Wever, nurse geriatrico na HOH tabata contento cu e acogida n’e simposio organisa pa prome biaha cu un total di 133 participante. E ta sigui conta tocante e importancia di papia tocante e tipo di cuido aki pa sigura cu pashentnan, sin importa e etapa di nan bida, ta ricibi e calidad di cuido di mas halto.

“Mayoria biaha ta encera cuido cu tin cu tuma lugar cerca un persona cu tin un enfermedad serio, cronico of enfermedad cu ta menasa bida cu tambe tin efecta riba su famia y sernan keri. E cuido ta enfoca riba mehora e calidad di bida dor di preveni y alivia dolor fisico, psicologico, social y spiritual. Por brinda e cuido aki banda di e tratamento activo y no ta dirigi specificamente riba cura e enfermedad sino mas bien brinda comodidad y sosten n’e pashent y su sernan keri durante e fase dificil aki. Por pensa riba p.e. stress den e fasenan final di bida di e pashent of e planeamento pa ricibi cuido medico den futuro. E meta ta pa haci e bida mihor y mas trankil posibel, mientras cu ta permiti e pashent pa mantene mas control cu ta posibel riba su mesun salud”, nurse Anoeska Wever a conta.

Durante e simposio diferente specialista a duna presentacion y tambe diferente persona den e mundo di cuido paliativo. A trata topiconan manera Advanced Care Planning, Cuido Paliativo na cas, pero tambe conscientisacion y Cuido Paliativo en general na Aruba. A duna charla practico tocante diferente remedi y terapianan cu por uza durante cuido paliativo y a finalisa cu un ‘panel interactivo unda cu a papia e.o. tocante e recursonan cu tin mester na Aruba pa un cuido di calidad manera personal, finanza y un botica specialisa y tambe kico falta na cas y na casnan di cuido pa mehora e calidad di bida den e ultimo fase di bida.

Team organisado di e simposio aki ta gradici miembronan di Parlamento pa nan presencia cu ta demostra e importancia pa cu e tema aki na Aruba. Alabes ta gradici Hunta Directiva di HOH cu a kere den e bunita idea aki y tambe e team di HOH-Academy p’e localidad. No por keda sin menciona specialista di geriatria dr. Sandro Waterloo cu a sostene e iniciativa for di comienso, tur orador y sin falta tambe na tur cu a yuda di un of otro manera pa haci e simposio aki posibel y exitoso.

Tabata durante reunionnan cu Formador di actual Gabinete AVP-Futuro, un di e masha notable punto tabata, cu varios departamento gubernamental ta confronta problema di escases di personal. P.e. esey a keda manifesta pa Sindicato di Polis, pa Sindicato di Aduana, Sindicato di Maestro y mucho mas.

Un di nan cu sigur a hala nos atencion, te version duna dor di PG, mr. Flanegien, kende a laga sa cu berdad tin masha denuncia haci, pero pa falta di personal di e.o. Fiscal, no por haci e trabao eficientemente, pa cual tin hopi denuncia sin ser investiga ainda. P.e. tin e casonan contra ex-Minister Chris Romero, contra di ex-Minister Glenbert Croes, contra di algun funcionario publico.

E caso mas yamativo t’e denuncia di parti di DIMP contra di e candidato ministerial di ing. Mike de Meza, cu segun propio Ministerio Publico por tuma un 2 aña prome cu ser trata pa Corte. Atrobe, pa falta di no tin personal pa atende e casonan menciona.

Y asina por a tende di e reunionnan cu e gremio sindical gubernamental  menciona, cu tin falta di polis, di Aduana, di maestro, di personal di cuido medico, etc. etc. Recientemente mi a atende dos nochi di informacion masha interesante mes. Y aki tambe a bin tende cu debi na falta di personal, p.e. na Departamento di Seguridad Nacional, no por traha optimalmente. Anto e pregunta, kico Gobierno ta haci pa busca e personalnan cu mester.

Tin hopi studiante cu ta terminando nan studio, tanto na UA aki na Aruba como na Hulanda, pero kendenan ta laga sa, cu maske nan kier bin Aruba, no tin vacatura pa nan. Lo ta interesante pa Departamento di Derecho Humano (DRH) e vacaturanan cu tin den henter e aparato gubernamental y kico ta warda pa yena e espacionan aki y asina e buraco di falta di personal.

Aparentemente no tin desempleo na Aruba, pero esey no ta berdad. Yiunan di tera cu ta caba di studia, no por haya trabao, cu ta motibo cu nan ta prefera di keda e.o. Hulanda. Gobierno of Minister di Trabao, Wendrick Cecilia mester bin dilanti y duna claridad di loke sigur e sindicatonan den aparato gubernamental ta bin ta bisa, cu nan falta di personal y cuanto di berdad.

Durante e prome siman di oktober un delegacion di e schisis-team di UMC St. Radboud Nijmegen a bishita Aruba pa di 7 biaha. Dr. Horacio E. Oduber Hospital tin ya pa hopi aña un cooperacion estrecho cu e team di UMC St. Radboud Nijmegen y esaki un bes mas tabata exitoso. 

Meta di nan bishita ta pa brinda e experticio specifico di cuido super-specialisa pa muchanan cu tin un of otro forma di schisis na Aruba y treciendo nan Aruba por preveni unda posibel traslado medico pa exterior.

Durante e siman aki a mira den forma di consulta 30 pashent entre 0 cu 22 aña di edad, cu tin un of otro forma di schisis y banda di esaki tambe a haci operacionnan di e kaak y tambe e parti patras di e garganta yama “farynxachterwand”.

“Na Aruba tin basta mucha cu tin schisis y durante e bishita aki e dokternan ta controla e muchanan pa sa con ta bayendo, e desaroyo y tambe ki tratamento nan tin mester ainda. Y e aña aki ta uno unico, pasobra a logra haci un operacion pa prome biaha cu ta unda a sera e kaak di dos mucha y tur cos a bay super, “ dr. Wicha Wever, Pediatra a conta.

E operacion pa sera e kaak ta importante, pasobra esey t’e ultimo buraco entre boca y nanishi. “Pa e operacion aki ta haci uzo di e weso di e pashent mes. Ta haci un apertura chikito den e boca di e pashent y ta saca un parti chikito di e weso for di e cachete. Djey ta midi y saca e grandura exacto y pone den e kaak,” dr. Marloes Nienhuijs, Kaakchirurg-Schisischirurg di UMC St. Radboud Nijmegen a conclui. 

Y awor cu e operacion aki a tuma lugar exitosamente, pa medio di beugel por logra pa tur djente keda nechi y hunto. E schisisteam su miembronan cu hopi experiencia for di Nijmegen ta consisti di dr. Marloes Nienhuijs, Kaakchirurg-Schisischirurg, dr. Veronique Borstlap – Engels, Orthodontist y Marjan Kloen kende ta Verpleegkundig Schisis Consulent. Y na Aruba e team aki ta wordo re-enforsa cu specialistanan local cu ta dr. Wicha Wever, Pediatria, dr. Steve Cabenda, KNO arts, dr. Howard van Niel, Ciruhano Plastico, Fabiola Jansen, Logopedista y dr. Elvinia Croes, Orthodontist.

Por ultimo, dr. Wever den nomber di e pashentnan y di HOH ta desea di gradici e team di Nijmegen mirando cu e cooperacion aki ta hopi bunita p’e muchanan di Aruba. Y alabes ta spera cu den e siguiente añanan por sigui traha hunto na bienestar di comunidad.

Despues cu Presidente di SMAC, Darren van Ommeren a menasa di retira for di e organisacion, Gobierno Diabierne ultimo a dicidi cu lo otorga un ministeriële beschikking (MB) na Stichting Maneho di Aruba su Carnaval (SMAC) pa dirigi Aruba su Carnaval 72. 

Ta ser masha cuestiona pakico Gobierno mester a tuma asina tanto tempo, a sabiendas cu Carnaval ta tuma lugar tur aña. SMAC a bin ta pidi Minister-President mr. Mike Eman como Minister encarga cu e cartera di Cultura pa tin tur asunto regla y pa accentua e importancia di Aruba su Carnaval, unda e pueblo di Aruba ta uni pa un solo meta y celebra hunto den union.

Pero ni kico a haci, SMAC no por a haya un reunion cu e mandatario. Bo ta puntra bo mes pakico? For di goberna asina, sigur no ta nada positivo pa un partido cu a pidi pa “ban bolter cos” y awor ta bandona pueblo. No ta Prome Minister so, pero asina tin mas Minister cu a lubida pueblo cu a pone nan ey. 

Diabierne ultimo, Conseho di Minister a dicidi pa den cuadro di esaki a palabra cu tur instancia lo duna nan cooperacion pa Carnaval 72 por bira mas cu un exito den e corto tempo nos dilanti. Departamento di Cultura (DCA) lo duna su aporte y sosten financiero p’asina garantisa cu Aruba su Carnaval ta haya e sosten necesario den e parti aki tambe.

Awor pueblo por cuminsa prepara p’asina cuminsa celebra e prome salida cu lo ta dia 11 di november 2025 pa 11:11:11am. Sea diamars of diarazon awor, SMAC lo duna su opinion riba e tanto rogamento pa haya un reunion cu Gobierno. Lo dicidi di Darren van Ommeren lo keda of retira como Presidente di SMAC. 

Tene na cuenta cu “niemand is onmisbaar”, Carnaval ta di pueblo y pueblo lo sa di sigui organis’e.