Tabata Diabierne ultimo, durante e programa di Enfoke, cu voceronan di grupo di kunukero, criadornan di bestia a bin dilanti y sin miedo a anuncia cu nan ta dispuesto pa bay all out contra di ladronnan di cabrito. No solamente di cabrito, pero hasta di carne. E denunciantenan a bisa cu ta basta. 

No esey so, segun Jair Britte, loke tabata mas yamativo ta, cu e denunciantenan a bisa bon cla cu tin Fiscal (Hulandes) na Ministerio Publico cu no ta mira necesidad di detene ningun di e miembronan di e cartel di ladronnan di bestia, pasobra e Fiscal no ta considera loke ta pasando algo serio pa atende.

Pero den mesun rosea e denunciantenan a laga sa, cu den e gang di ladronnan di e.o. cabrito tin yiu muher, kende ta chofer di e ladronnan aki. Cu e damita aki ta yiu di un Polis femenino. Tambe den e gangnan aki tin nieto di un Inspector di Polis, pesey Polis mes no kier actua contra e ladronnan aki. Awor e kunukeronan a dicidi di uni mas ainda, pasobra si husticia mes no kier actua, nan si lo tuma accion y via di video graba, foto saca di e ladronnan aki, a dicidi di expone nan publicamente. Pa no bisa, kico mas nan lo por haci.

Nan ta traha duro pa cria nan bestianan, inverti hopi placa, pa algun ladron ta haya ta bon pa horta nan bestia, gana placa cu benta di carni di cabrito, cu ni a haya keuring di Servicio di Veterinario. Fuera di esaki, nan lo denuncia tur esnan cu ta cumpra e carninan aki horta, pasobra nan tambe e complice den e ladronicia aki. Nan tambe lo keda expone cu nomber y di nan negoshi.

Fuera di e gangnan di ladron, hopi di e kunukeronan ta victima di cacho, cu ta mata nan bestianan. Contra e cachonan aki, cu ta cana los lo tuma accion. Maske e voceronan no a menciona ki accion lo tuma, nos por conclui cu nan lo tira nan mata. Dunando interpretacion n’e denuncianan aki, e Organisacion di Kunukeronan a conclui, si nan no por haya husticia for di esnan responsabel, manera Ministerio Publico y Polis, ta nan mes lo tuma husticia den nan man.'

Ministerio Publico a introduci recientemente un areglo di keho (klachtenregeling) pa ciudadano. E areglo di keho ta inclui tambe un formulario di keho (klachtenformulier). Di awor pa dilanti ciudadanonan tin e posibilidad pa, na un manera relativamente facil y sin mucho obstaculo, entrega un keho. 

Por haya tanto e formulario como e areglo di keho riba website di Ministerio Publico: www.omaruba.com E areglo di keho ta destina pa personanan cu ta sinti cu nan no a wordo trata of yuda corectamente pa Ministerio Publico. 

Por trata di cosnan manera (entre otro): Keda sin contesta telefoon: Keda sin reacciona na tempo riba un carta of no reacciona mes: Keda sin duna informacion of duna informacion onduidelijk: Maneha datonan personal na forma desordena: Keda sin cumpli cu cita y terminonan.

Paga tino: Decisionnan huridico den casonan penal no ta cay bao di e areglo di keho. Pa esakinan tin procedimientonan legal separa, manera keha na Corte Superior di Husticia of apelacion.

Tur keho lo wordo trata cuidadosamente y den termino razonabel. Si despues di esaki e ciudadano ainda no ta satisfecho, e por acudi cerca Ombudsman. Ministerio Publico ta desea pa aumenta transparencia y fortalece confiansa di ciudadanonan: e areglo y e formulario ta un parti importante di e esfuerzo aki.

Den cuadro di su maneho pa cu su cartera di Vivienda y Infrastructura, Minister, drs. Rene (Baba) Herdé a organisa un anochi di informacion. Minister Herde for di momento cu el a asumi e encargo di Vivienda y Infrastructura, el a cuminsa compila tur informacion y hunto cu su Infra Team a sinta pa traha den forma eficiente y structura,riba posibel solucion riba retonan di Vivienda y infrastructura di nos pais. 

Pa por tin un mihor bista  a organisa un encuentro cu personanan clave den e area aki p’asina forma un grupo importante pa yuda mehora e calidad di bida di nos comunidad. Durante e presentacion di “Landschap gestuurde gebiedsontwikkeling” tabatin varios ingeniero, arkitecto, inversionista, desaroyado, experto y habitantenan di diferente bario presente. 

Prof. Paul van Beek a comparti su conocemento di construccion di barionan na Europa. Den su presentacion el a mustra diferente modelo di bario cu el a diseña na Hulanda y un modelo specialmente cu el a diseña pa Aruba. Minister Herdé a menciona cu e encuentro aki ta solamente e comienso di e proceso pa involucra tur hende cu por y kier yuda pa logra resolve e problematica grandi di vivienda.

Mester cuminsa e proceso di identifica tur e elementonan pa por diseña un modelo Arubano. Meta ta pa yega na un acuerdo pa hunto carga responsabilidad, comparti conocemento y experiencia. Hunto mester inverti den e proceso aki y tuma riesgonan pa logra traha casnan pagabel y sostenibel pa Aruba. E proceso no solamente ta encera traha casnan y bario nobo, pero alabes busca un forma pa por renoba barionan exisitente.

“Nos mester identifica ken ta doñonan di tur e casnan decai (verval) y cu ta bayendo perdi pa p.e. uza e terenonan aki pa traha casnan nobo. Minister Herdé a menciona cu e proceso lo ta largo, amplio y lo tarda, pero hunto nos mester yega un madurez pa uni y resolve e problematica di vivienda no obstante nos color politico.

Mester sinta hunto na mesa y scucha bon kico e necesidadnan ta y ta abierto na visionnan nobo. Tin profesionalnan hoben cu a regresa Aruba despues di logra nan estudio cu kier cuminsa un famia, tin pensionadonan cu ta biba den un cas demasiado grandi y kier bay biba mas chikito.

E meta ta pa por diferencia cada ken nan necesidad y traha casnan pa pueblo basa riba nan necesidadnan. Si logra esaki, el o bira algo grandi pa Aruba”, segun Minister drs. Rene (Baba) Herde.

Recientemente Minister di Salubridad, Asunto Social, Cuido di Adulto Mayor y Maneho di Adiccion, sra. drs. Melvin Wyatt-Ras, a presenta oficialmente e ‘Plan Nacional pa Combati Obesidad 2025-2030’, un strategia multi-sectoral dirigi na reduci e tasa di sobrepeso y obesidad na Aruba y pa fortalece salubridad publico. Actualmente, Aruba ta enfrenta un situacion preocupante. 

Durante e ultimo añanan, e cifranan di sobrepeso y obesidad a subi: 79% di poblacion tin sobrepeso (esaki ta igual na 4 di cada 5 persona); 46% ta obeso, aproximadamente 49.382 persona; entre mucha, e cifra ta rond 42.7%. Segun Minister Wyatt-Ras:“Obesidad no ta un asunto secundario; e ta un reto cu ta impacta directamente e salud di nos pueblo y ta manifesta su consecuencia den tur sector di nos sociedad.”

Obesidad ta aumenta significativamente e riesgo pa diabetes tipo 2, malesanan cardiovascular y depresion. Durante e pandemia di COVID-19, un gran porcion di pashent interna den ICU tabata persona cu sobrepeso y obesidad. Esaki a lanta un alerta serio riba e vulnerabilidad di e grupo aki.

E carga economico tambe ta considerabel:  AWG 2.907 di costo di salud pa persona pa aña; Rond di AWG 248 miyon anual den costo relaciona cu obesidad; Aproximadamente 52% di costo total den cuido di salud.

E plan ta forma parti di e Country Cooperation Strategy 2025-2030 cu Organisacion Pan-Americano di Salud (PAHO) y ta alinea cu e Plan Multi-Sectoral Nacional pa Accion pa Malesa No-Transmisibel, cu un enfoke cu ta integra salud den tur area di maneho publico, e concepto di “Health in all policies”.

Meta pa 2030: Reduci e tasa di obesidad cu 3-5%: Crea un ambiente cu ta facilita estilo di bida saludabel: Fortalece prevencion, deteccion y tratamento tempran: E plan ta basa riba cuatro area principal: 1. Promove estilo di bida saludabel: 2. Fortalece atencion y programa pa comunidad: 3. Introduci guia y opcionnan di nutricion mas saludabel: 4. Reforsa maneho y regulacion di alimentacion.

Esakinan ta inclui intervencion di estilo di bida (CLI), programa pa mucha manera Cool2Bfit; guia di dietista accesibel, normanan pa cuminda na scol y horeca, etiketa nutricional y direccion riba oferta y marketing di cuminda. Tambe tin enfoke riba actividad fisico como parti normal di bida y colaboracion cu diferente sector pa amplia oferta di opcionnan saludabel na supermercado, horeca y food trucks.

E plan ta concentra riba medida cu por logra un impacto duradero riba salubridad publico y cu por wordo implementa paso pa paso den nos comunidad. Minister Wyatt-Ras a indica cu ningun plan por logra sin cooperacion amplio di tur sector. “Gobierno por duna direccion y establece e condicionnan necesario, pero nos mester participacion di scol, dunador di trabou, club di deporte, supermercado, horeca, dunadornan di cuido, famia y ciudadanonan pa logra cambio real.”

Minister Wyatt-Ras tambe a elabora riba respet y trato digno pa persona cu obesidad: “Obesidad no ta un berguensa. Personanan cu ta lucha cu obesidad merece respet, comprension y cuido digno.”

Awe ta un paso importante, pero tambe e inicio di un caminda largo pa un Aruba mas saludabel. E plan a wordo aproba den Conseho di Minister y su implementacion lo tuma lugar den periodo 2025-2030.

Den programa di gobernacion di Gobierno AVP-Futuro 2025-2028 den varios pagina e Gobierno nobo aki ta enfatisa cu nan lo aplica norma di transpariencia, ya cu nan ta un Gobierno habri,  pasobra nan si no tin nada di sconde. Gobierno aki si sa d promove transpariencia y lo promove integridad.

Ora cu a bin haya sa cu Minister Gerlien Croes a dicidi di biahe pa Corsou, invita pa su colega di Gobierno di Corsou pa atende actividadnan di clasificacion di Oncena di Corsou pa Copa Mundial, enbes di biaha su dia siguiente, pa cual e mandatario a dicidi di bai un dia prome, pero bulando den un jet priva.

Kende a paga e biahe aki? Ta cu placa di pueblo? Of si el a haye gratis, (un regalo), hecho ta keda cu como gobernante di Aruba, pueblo tin derecho di sa. Despues di varios dia, ata Minister Gerlien Croes a bin afo y declara: Mi bushi tambe a yena”, pero no a bisa nada di su viahe den jet priva. E no mester a bai cuestiona e momento ey, kico dirigentenan di MEP a haci durante nan gobernacion, pero ser responsabel y contesta loke pueblo tin derecho di sa.

Si ta Gobierno a paga e viahe den jet priva aki, e mandatario mester por contesta esaki cu un si of un no y mustra kico ta kico. Si ta gratis el a haya e viahe, tampoco ta bon, pasobra a huramenta mescos cu tur funcionario publico, cu lo no acepta regalo di ningun hende of organisacion. Y si Gerlien Croes a paga e viahe aki for di su propio saco, demostre, no tin nada di sconde. No bira manera esnan di MEP a y tabata haci. Bo no ta mescos cu nan. Awor cu e denuncia a yega na Gobernador, Gerlien Croes tin cu bin afo y bisa e berdad di su biahe den un jet priva. Nada contra, pero pueblo tin derecho di sa.

Durante añas varios habitante di casnan di pueblo rond di Aruba a haya chens pa cumpra e cas cu nan ta bibando aden pa hopi aña largo. Varios a tuma e oportunidad aki y a cuminsa e proceso pa cumpra nan cas for di Fundacion Cas Pa Comunidad Arubano (FCCA). Despues di aña, hopi habitante a logra paga nan cas por completo, pero ora a yega pa haci e traspaso a encontra un contratempo pa logra esey, pues e tereno tabata riba nomber di Pais Aruba y a keda añas asina. 

Desde cu Gabinete AVP-Futuro a sinta a pone como meta pa scucha nos comunidad, pa haya sa kico ta nan preocupacion y pa atende cu nan. Un di e preocupacionnan cu a bin dilanti ta di e habitantenan di e casnan di pueblo.

Mesora Prome Minister mr. Mike Eman a pone man na obra y dia 31 di juli 2025 a yama un reunion cu FCCA, DIP y DLV y na final di e reunion Prome Minister a sali bisa cu e habitantenan lo haya nan acta prome cu aña 2025 caba como regalo di Pasco. Tabata Diabierna 17 di december tabata asina leu cu na Fort Zoutman diesshete (17) doño di cas a firma nan erfpachtakte pa por bira propietario di nan cas. Esaki a sosode mey-mey famia di e doño di e casnan, notario mr. Yarzagaray y su team, y FCCA.

Minister di Infrastructura, drs. Rene (Baba) Herdé a remarca cu casnan di pueblo ta un necesidad, asina por a mira rond di nos isla creacion di diferente bario. Ex-mandatarionan manera Mito Croes, E.J. Watty Vos y Henny Eman d.f.m. tabata personanan cu a cuminsa na pone atencion, pa haci e cambio necesario den Vivienda social.

E no ta facil pa FCCA haya e fondonan necesario pa construi cas. Tur dia FCCA ta labora duro; critica tin hopi for di mantencion y atencion n’e bario; pero e no ta facil pa maneha 45 area cu cas di pueblo rond di nos isla” Premier Eman a finalisa bisando, dunando palabra di elogio na FCCA.

Minister di Finansas, Asunto Economico y Sector Primario, mr. Geoffrey Wever, den calidad su calidad di representante di Land Aruba como unico accionista di Free Zone Aruba N.V. (FZA), a anuncia cu sr. Walter E. Mosher a wordo oficialmente nombra como Director nobo di FZA, cu fecha di inicio 1 februari 2026. E nombramento aki ta representa un paso importante den fortalecemento institucional y modernisacion operacional di un entidad cu tin un rol strategico den diversificacion economico di Aruba.

“Mi ta sumamente contento cu sr. Walter Mosher a haci su mes disponible pa lidera Free Zone den e era nobo y mi tin tur confianza den su profesionalismo y expertisio. Sr. Mosher ta un profesional Arubiano cu hopi experiencia local y internacional y ta hopi bon prepara p’e tarea aki. Mi ta contento cu un Arubiano, cu pa hopi aña tabata biba den exterior, awor ta bin bek cas pa traha pa Aruba”, segun Minister Geoffrey Wever.

Sr. Walter E. Mosher ta un ehecutivo cu un trayectoria amplio y multidisciplinario tanto na Aruba como na Europa. Mosher a inicia su carera como Economista na Banco Central di Aruba, sigui pa ocupa diferente posicion clave na AIB Bank N.V., incluyendo Vice Presidente di Corporate Finance. Ademas, Mosher a fungi como Managing Director di Aruba Aloe, un rol den cual el a fortalece su capacidad di liderazgo y maneho operacional.

Despues di su etapa profesional na Aruba, sr. Walter Mosher a amplia su preparacion internacional cu estudio avansa, incluyendo un Executive MBA for di ESADE Business School, adicional na tres Master’s den International Business, Economics y Digital Business.

Su experencia internacional ta inclui cargonan Senior na Ernst & Young na Dublin, caminda el a guia proyecto y conseho na Gobierno y empresa priva riba tereno di infraestructura y na ESB, e empresa nacional di energía na Irlanda, unda Mosher a traha riba desaroyo y ehecucion di proyecto den energia renobabel.

E combinacion di experencia regulatorio, bancario, retail, infraestructura y energia ta pone

Sr. Walter Mosher den un posicion excepcional pa contribui na fortifica y crecemento duradero di Free Zone Aruba N.V. E nombramento di Walter E. Mosher ta resultado di un proceso riguroso cu a wordo implementa p’e Hunta Comisario di FZA y un HR-Consultant externo. Durante e proceso di solicitacion publico un grupo di candidato prometedor a wordo evalua, incluyendo consulta profesional for di un HR-Consultant externo. Despues di intercambio repetitivo, evaluacion tecnico y consulta interno cu Minister Wever, cu e Hunta Comisario y sr. Walter Mosher a logra un acuerdo riba tur condicion contractual.

Pronto e lista di actividadnan nobo cu por wordo haci for di Free Zone lo wordo anuncia, un paso cu lo habri porta pa compania y projectonan innovador den e eco-sistema economico di Aruba.

December a habri cu algun hende tras di trali. T’asina cu Unit di Narcotica a logra na detene 6 sospechoso, relaciona cu cargamento di droga y arma di candela. Di acuerdo cu informacion recibi for di vocero di Polis, un racha di entrada hudicial a tuma cu a conduci  cu detencion. Esaki den cuadro di un investigacion pisa cu Unit di Narcotica a realisa a termina exitoso cu sla duro pa baho mundo. 

A habri e luna aki cu entrada hudicial na un percela den Bushiri, cu ta ser considera un centro pa bendemento di droga. Na Bushiri a detende un hende homber di inicial J.L.P. di 33 aña di edad y naci na Hulanda. Durante e buskeda a confisca arma di candela cu yen municion. Tambe a haya cargamento di marihuana y cocaina.

Relaciona cu e mesun investigacion aki, Unit Narcotica a sigui despues riba un otro dia, pa otro entrada hudicial, e biahe aki na un percela na Calbas, Pavia y Shiribana. A detene dos hende muher di inicial M.C.K. di 36 aña di edad naci na Aruba y C.M.R.P. di 42 aña di edad naci Republica Dominicana.

Tambe a detene tres hende homber di inicial S.A.F. di 58 aña di edad naci na Aruba tambe un otro hende homber di inicial E.A.T. naci na Aruba di 45 aña di edad y A.J.L.L. naci na Aruba di 33 aña di edad.

Durante buskeda n’e percelanan aki a encontra un cantidad considerabel di marihuana y cocaine. A haci uzo di diferente team di KPA manera; Team di Aresto, K-9 Unit, Flexteam, RRT y Polis Uniforma di Noord.

Unit Narcotica NO ta drumi, lo sigui traha pa mantene Aruba sigur. Cu yudansa di nos comunidad na Tiplijn 11141 nos por sigui investiga, haci detencionnan y pa nos hobennan por tin un futuro sigur liber di esnan cu kier haci nan daño! Di awor caba nos kier yama danki na nos comunidad pa tipnan cu nos ta ricibi.

Minister di Finansas, Asunto Economico y Sector Primario, mr. Geoffrey Wever a expresa su mas profundo agradecimento na sr. Herrick Henriquez, despues cu el a completa su periodo como CEO di Aruba Trade Industry Association (ATIA). E periodo di sr. Herrick Henriquez den e organisacion ta caracterisa pa un liderazgo firme, entrega constante, y un vision claro pa fortalece e sector empresarial di Aruba den un tempo crucial pa nos economia.

Durante su maneho, sr. Henriquez a guia ATIA den un fase cu a conoce hopi desafio, marca pa retonan economico y social despues di pandemia. El a sa di mantene un dialogo constante cu empresanan di diferente tamaño y sector, a duna direccion den adaptacion tecnologico, y a promove reconstruccion gradual di operacion y modelo di negoshi, p’asina proteha stabilidad y stimula un recupracion duradero. Esaki a fortifica e papel di ATIA como voz principal di sector empresarial y como partner indispensabel den discusionnan clave cu Gobierno y otro instancianan relevante.

Den un periodo unda Aruba tabata enfrenta condicionnan instabiel y presion financiero, Herrick Henriquez a fortalece advocacion pa reformanan structural riba tereno di impuesto, legislacion laboral, eficiencia administrativo y competitividad. Cu consistencia y claridad, el a enfatisa necesidad pa un fundamento economico mas agil, transparente y orienta riba crecemento, reconociendo cu un cuadro regulatorio modernisa ta esencial pa un economia mas resiliente. Su liderazgo a contribui pa drecha un caminda unda sector empresarial por opera cu mas certesa, direccion y vision di futuro.

Un otro area importante di su aporte tabata su enfoke riba formacion profesional y desaroyo di talento local. Durante su maneho, ATIA a amplia actividadnan di capacitacion riba tereno financiero, maneho di recurso humano, proceso di Aduana y otro conocemento relevante pa fortalece profesionalismo den sector empresarial. E iniciativa aki a contribui directamente na un comunidad empresarial mas prepara y mas resistente, cu por mantene su lugar firme den un economia global cu ta den movecion constante, segun Minister Geoffrey Wever.

Na mesun momento, Herrick Henriquez a duna un empuhe renoba na cultura di liderazgo y emprendemento. Evento y plataforma formativo den cuadro di ATIA, incluyendo e conferencianan dedica na liderazgo y crecemento personal, a inspira un generacion nobo di profesional y empresario cu ta busca pa agrega balor na nos economia. E enfoke den desaroyo humano y innovacion a reafirma ATIA como un motor central den progreso y renobacion economico.

Durante su periodo, señor Henriquez tambe a amplia relacionnan regional y internacional di ATIA, posicionando Aruba mas fuerte den un red empresarial mas amplio. E vision pa consolida ATIA como un puente cu ta conecta Aruba cu mercado y organisacion den region y mas aya, ta forma parti di un aspiracion nacional mas amplio pa diversifica y fortalice nos plataforma economico.

Ministerio Geoffrey Wever a expresa su reconocemento p’e liderazgo, integridad y dedicacion di Herrick Henriquez durante su periodo na ATIA. Su trabou ta keda caracterisa pa claridad di proposito, firmesa den momentonan dificil y un compromiso profundo cu cooperacion y progreso nacional. E legado cu e ta laga ta sirbi como inspiracion pa sector empresarial y p’e relacion continuo entre sector publico y sector priva.

Minister di Labor mr. Wendrick Cicilia,  dia 1 di september 2025 tabata den Parlamento pa trata e concepto di ley pa cambia e manera cu ta calcula salario minimo. A aproba e ley aki unanimanente den Parlamento. Minister Wendrik Ceclia determina p’e cambio aki ta na vigor desde 1 di januari 2026.

Cu e cambio aki, e empleadonan cu ta traha 40, 42, 44 of 45 ora pa siman lo bay conoce un aumento den nan salario pa motibo cu e manera pa calcula lo ta basa riba un salario minimo di AWG 11.58 pa cada ora cu un empleado traha.

E formula nobo di calcula salario minimo pa luna lo ta di e siguente manera: Ora di trabou pa siman x 11.58 x 4,333. Esaki ta conduci na un salario minimo mas husto y ta elimina e discrepancia cu pa hopi aña tabatin den e calculo di salario minimo.

Minister Wendrick Cicilia tambe a referi na diferente material cu a prepara pa conscientisa, pero tambe prepara nos comunidad p’e cambio aki. Riba e website di Departamento di Labor, https://daoaruba.com/index.php/sueldo/ tin un calculator y tambe diferente material den diferente idioma (https://daoaruba.com/index.php/minimumuurloon/) pa informa e dunadornan di trabou y e empleadonan informacion corecto con pa calcula salario minimo.

Ademas Minister Wendrick Cicilia ta referi tambe na un nota di cambio cu ta garantisa cu “Niet Inwonende Dienstbode” tambe ta cay bou di e ley di salario minimo pa ora. Esaki ta nifica cu e empleado domestico cu no ta biba n’e cas tambe tin derecho riba e salario minimo pa ora pa cada ora cu traha y e mesun metodo di calculacion ariba menciona ta aplicabel p’e.

“Nos a tuma un stap importante den direccion di igualdad den nos mercado laboral. Cada ora di trabou honesto merece su balor y proteccion, e reforma aki ta percura p’e principio ey finalmente ta refleha den nos leynan. Dor di standarisa e calculacion di e salario minimo pa ora, nos ta dunando claridad n’e dunadornan di trabou, creando stabilidad p’e trahadornan y un fundeshi di husticia cu ta fortalece henter nos economia”, tabata expresion di Minister Wendrick Cicilia.