Siman pasa Corte Comun di Husticia (Hof) a dicta sentencia den e caso penal contra e sospechoso Guilfred Francis Besaril, ex-Minister Plenpotenciario di Aruba na Hulanda. E caso aki, conoci como Tulipan, ta trata di malversacion di fondonan publico y abuso di funcion durante e periodo di 2017-2022 na Arubahuis.

Corte den Prome Instancia dia 13 di juni 2025 a declara Gulfred F. Besaril culpable na malversacion y maluso di su funcion y a condene na un castigo di prison di binti (20) luna, di cual diez (10) luna ta condicional, cu un tempo di prueba di tres aña. 

Corte tambe a dicta sentencia tocante e demanda di decomiso (ontnemingsvordering) contra e ex-Minister Plenipotenciario, den cual el a duna ordo na Guilfred Francis Besaril pa paga Pais Aruba e suma di Afl. 138.688 bek.

Como e abogado di e sospechoso e apelacion a wordo entama dia 30 di juni 2025. El a informa anteriormente dia 27 di juni 2025, pa medio di un correo electronico pa Griffie y Ministerio Publico cu e sospechoso kier bai den apelacion. E correo electronico aki a wordo ricibi 5:18 pm.

Punto di bista di Ministerio Publico durante e tratamento di e apelacion entama ta cu como cu e sentencia a wordo dicta dia 13 di juni 2025 contra Guilfred F. Besaril “op tegenspraak”, e sospechoso mester a apela no mas laat cu 27 di juni 2025. 

Segun hurisprudencia constante di Corte Supremo, un recurso legal ta considera den termino di apelacion solamente si e ta entrega den ora di trabou di e Griffie. Segun website di Corte, e Griffie ta sera 4:00pm. Pues Griffie tabata sera caba 5:18pm. Pesey e apelacion a wordo considera di ta entama e siguiente dia di trabou. Esey no ta den e termino den cual e apelacion por wordo entama.

Hof a dicta sentencia conforme e punto di bista di Ministerio Publico y a declara e apelacion di Guilfred Francis Besaril no admisibel. Cu esaki e sentencia di 13 di juni 2025 ta irreversibel.

Mientrastanto abogado di Besaril, mr. Doris Canwood, despues di consulta cu su cliente, a dicidi di apela e decision aki, unda Corte di Casacion lo mester tuna su opinion fira e modus operandi di Ministerio Publico y e decision di Corte den Apelacion.

Aruba Bank a anuncia oficialmente e programa di su Conferencia di Innovacion 2025, “Inspiring the Future”, un evento inspirador cu ta marca un siglo di progreso y ta mira cu confianza pa un futuro yen di posibilidad.

Sra. Tamara Waldron, Regional Manager Branding & Marketing di Aruba Bank a habri e conferencia cu un mensahe inspirativo: “Innovacion no ta solamente tecnologia, bisa e ta un manera di pensa, un manera di traha y un manera di sirbi nos clientenan.

Sr. Rob de Ridder, Managing Director & Chairman di Management Board di Aruba Bank, a revela e tema di e evento: “Innovate Aruba: Inspiring the Future – A Century of Progress with Aruba Bank.” El a enfatisa cu e conferencia ta un plataforma pa conecta idea grandi cu accion, un refleho di e spirito di progreso cu Aruba Bank a tene durante 100 aña.

Sr. Nigel Wix, Regional Manager di IT Innovation & Technology na Aruba Bank, a comparti con Aruba Bank ta usa tecnologia, AI y “digital transformation” pa crea un experienca p’e cliente mas facil y eficiente. “Nos ta kere cu inovacion ta cuminsa cu cultura, cu un deseo pa sigui pensa diferente, y pa crea solucion cu ta duna balor real.” 

Sr. Bruce Harms, Fundador di Full Stack Vision Foundation, a sigui cu e lansamento di e “Youth Coding Workshop”, un programa cu ta inspira nos muchanan di Aruba pa descubri nan talento den tecnologia. E tayer lo ta parti di e conferencia, y lo duna oportunidad p’e generacion nobo pa crea, pensa critico y inova. “Si nos duna e mucha e “tools”, nan lo crea un futuro cu nos por ta orguyoso di dje,” Bruce Harms a expresa. Un evento pa Inspira, Innova y Conecta.

E Conferencia di Innovacion di Aruba Bank lo tuma lugar diasabra, 8 di november 2025 na Renaissance Convention Center, for di 9:00 AM te 2:00 PM, bou di e guia di Rosabelle Illes como Maestro di Ceremonia.

E programa lo uni lidernan internacional y local, incluso Dr. Edward Cheung (Ingeniero Arubiano na NASA), Jairzinno Henriquez (Google Developer Group), y Haime Croeze

(Digital Natives of Aruba Foundation). Nan lo comparti inspiracion riba tecnologia, AI, y e futuro di un Aruba digital.

Ademas di tur esaki Aruba Bank ta lansa un “Youth Coding Workshop” gratis pa muchanan di edad 15–17, dirigi pa Bruce Harms. E tayer lo duna oportunidad pa experimenta cu “coding, AI, y innovation thinking” den un ambiente divertido y educativo.

Cu e lema “Inspiring the Future,” Aruba Bank ta commemora un siglo di progreso y ta reafirma su compromiso pa sigui inverti den inovacion, educacion y comunidad. E conferencia lo ta un dia di inspiracion, conexion y idea cu por cambia e futuro di Aruba.

Corruption Watch Aruba, tin un proyecto di investigacion di corrupcion na Aruba y a constata "konkelmento" cu e cifranan  berdadero di total listings di Airbnb na Aruba. Segun fuentenan fidedigno,  hopi short-term rentals (STRs), di cual hopi ta bay via e plataforma Airbnb a ser "translada" pa otro booking platforms manera Expedia.com, Booking.com etc.

Pasobra tin docenas di booking sites, e argumento cu Departamento di Impuesto ta usa cu ta hopi dificil pa bay tras di tur e negoshinan di short-term rentals tin un granito di berdad. Sinembargo e sector aki ta canibalizando turista for di e sector tradicional di hotels y appartments cu SI ta pagando impuesto y primanan social.

Corruption Watch Aruba (CWA) no ta kere cu Departamento di Impuesto di Aruba ta culpabel di e mesun maneho hiba p’e Director di Impuesto Trona na Curaçao. Pero si tin un falta di seriedad di tanto Minister como miembronan di Staten na Aruba pa duna Departamento di Impuesto di Aruba instruccion y recursonan necesario pa cuminza atende cu e problema.

Segun e mesun fuentenan fidedigno, e mercado di propiedad residencial ta bou presion extremo causando escases di vivienda pa huur y tambe tereno ainda disponibel pa construi cas.

Actualmente negoshi di real estate (tin como 600 compania registra caba na KVK) ta lantando manera paddestoel tur caminda y centenares di comerciante local (sin escrupulo) ta purba cumpra cas existente TUR caminda ofreciendo sumanan casi imposibel pa resisti.

Y aunke nos leynan pa compra y benta di cas ta haci labamento di placa cu real estate (pa Airbnb) dificil, e ta sosode tog y den caso di Airbnb e mercado ta SUPER atractivo, manera e website di Airbnb mes ta indica.

Y pasobra Departamento di Impuesto tin problema pa controla e sector aki, e ta bira mas atractivo y lucrativo, en particular pa inversionista stranhero cumpra cas of apartamento na Aruba pa converti esaki den unidad Airbnb.

Na Aeropuerto Reina Beatrix tin un mal maneho cu por tin consecuencia pa su operacion. Manera ta conoci, prome cu ICAO bin haci su audit, Departamento di Aviacion na Aruba ta cuminsa haci su propio audit y lo demanda p’esnan responsabel mes drecha esaki na tempo.

For di e ultimo audit haci, a constata cu tin “141 finders”, errornan cu no ta permiti na un aeropuerto. Departamento di Aviacion a mustra esnan responsabel, cu te propio Royal Schiphol Group (RSG), bao maneho di Joost Meijs y gerencia di AAA N.V, cu ta nos localnan no kier a drecha nada. Departamento mester a hala nan atencion debidamente, y asina a haya oido, prome di a bolbe haci un audit.

A constata cu hopi di e findernan a keda coregi, pero uno serio tabata e camaranan na Apron, cu no tabata funciona, pa cual hasta menasa a cai, cu si no drecha esaki na tempo, Aeropurto lo core riesgo di wordo “down-graded” y asina a bin cumpli. Joost Meijs, di RSG practicamente a wordo corri for di Aruba, p’e errornan cometi, unda un cantidad di hende califica a keda retira y a mantene e trahadornan sin experiencia na trabao. Pa loke t’e gerencia local, tambe a faya, pa cual a perde confianza den nan. Cuanto biahe por a tende cu nos aeropuerto ta un “cura di porco”, ora cu drenta e bañonan. Si gerencia local no por ni percura p’e operacion ta na ordo, con pa confia nan pa maneha e aeropuerto.

For di dia cu a firma cu RSG, tur biahe a pone como un di e condicionnan, cu mester tin un Arubiano como counterpart. Ningun Gobierno, di MEP y/of AVP, no a percura pa RSG cumpli cu e condicion aki. Ta pesey ex Minister Dangui Oduber no kier tende di un prolongacion di un contrato cu RSG, pero asina cu AVP-Futuro a bin na mando, a firma (atrobe) un MOU, cu mester desemboca den un contrato nobo, cu te ainda no a keda firma.

Nos a tuma nota di un publicacion den NoticiaCla, cu a entrevista e CEO interion, James Facio, kende a laga sa bon cla cu RSG no ta promove hendenan internamente di e compania pa bira CEO. E contesta aki e siman aki di e CEO interino di aeropuerto James Fazio, a clarifica e 'misterio' di hopi aña: Pakico ainda no a pone un hende local na cabez di aeropuerto. Pa basta aña, tabatin e pensamento den comunidad y sigur den esun di aviacion, pakico e compania cu tabata maneha nos aeropuerto e ultimo 14 plus aña, esta Royal Schiphol Group, no a ‘cumpli’ cu e contract cu Gobierno, cu ta specifica cu nan (RSC) mester prepara un hende local pa asumi e funcion di CEO na aeropuerto. 

Un nomber cu constantemente tabata bin dilanti, tabata p.e. di Jurgen Benschop, kende tin mas di 20 aña trahando na aeropuerto y hopi di e añanan ey den funcion di liderazgo. Algo cu nunca a materialisa. Y ora cu e ultimo aña el a dirigi aeropuerto hunto cu dos persona mas, a pensa cu awor e momento ta bin. Pero e siman aki, e contesta a bin porfin. “Royal Schiphol Group no ta promove trahadornan internamente for di e compania, pa bira CEO di e compania”. 

Ademas mirando e ultimo errornan haci den operacion a conclui cu Jurgen Benschop no ta bin na remarke mas. Extra-oficalmente Den Noticia tin entendi cu Gobierno a haya un persona califica, kende proximamente lo keda anuncia di lo bira e counter-part cu RSG lo sa di prepara pa bira e proximo CEO di AAA N.V. 

Dia 18 di december benidero Corte lo trata full un mainta di casonan penal di violencia relacional. Huez lo analisa cinco (5) caso den cual sospechosonan ta enfrenta cargonan pa maltrato di nan pareha, den algun caso varios biaha y cu heridanan grave como consecuencia.

Cu esaki, Ministerio Publico ta desea pa mustra cu ningun momento no t’asina cu violencia relacional no ta haya atencion. Lo contrario, violencia relaciona ta wordo tuma hopi na serio y persegui activamente. Casonan menos grave sa wordo trata den TOM-Zitting, pero casonan serio ta wordo presenta sin excepcion den Corte.

For di aña 2022, Ministerio Publico ta aplica e directiva “Aanwijzing Relationeel Geweld”, den cual ta regula e actuacion di polis y husticia. E directiva aki ta enfoca riba reconoce, stop y preveni violencia relacional, y riba aumenta e disposicion di e victima pa haci denuncia na Polis.

Muchanan tin un posicion particularmente vulnerabel den casonan di violencia relacional. Hopi biahe nan ta testigo di violencia den cas y ta sufri e consecuencianan. Den bista di Ministerio Publico, e muchanan aki semper ta wordo considera como victima.

E termino violencia relacional ta re-emplasa e palabra violencia domestico, pa mustra cu ta trata di violencia den famia of pareha, sin importa si e ta pasa den cas of no. E tipo di violencia aki por ta fisico, sexual, emocional, sicologico y verbal, y e ta inclui tambe stalking y menasa. Tanto muher, homber, menor di edad y hende grandi di edad por cay victima of resulta di ta sospechoso.

Intencion di OM ta pa manda un señal fuerte pa comunidad: violencia relacional mester wordo para y castiga.

Diabierne ultimo a tuma lugar algun actividad di importancia pa Aruba y Merca. Asina p.e. U.S. Customs and Border Protection (CBP) a firma un acuerdo nobo di Pre-Clearance cu Aruba, pa fortalece seguridad y modernisa biahamento entre e dos paisnan. E firmamento di e acuerdo importante a tuma lugar dia 24 di oktober 2025 durante un ceremonia na Hyatt Place. 

E acuerdo nobo a keda firma pa Diane J. Sabatino, Executive Assistant Commissioner di Office of Field Operations (OFO) di CBP y pa Prome Minister di Aruba, Michiel ‘Mike’ Eman. E acuerdo nobo ta re-emplasa e acuerdo di Pre-Clearance di 1994, cu tabata prome cu e formacion di U.S. Department of Homeland Security (DHS) y CBP.

“E acuerdo aki ta un logro pa ambos pais, fortaleciendo nos relacion, seguridad y facilidad di aceso pa ambos nacion,” segun Prome Minister Mike Eman. “Den fondo di e cooperacion aki t’e buskeda di felicidad comparti, e buskeda p’e bienestar comun, cu t’e forsa cu ta uni nos pueblo pa crea oportunidadnan y forma di colaboracion cu ta bay mas leu cu frontera. E idea comparti aki ta locual ta haci aliansa manera esaki posibel.”

Eman a continua: “E firmamento di awe tin un significado hopi personal pa mi. Mi ta corda cu emocion con mi ruman difunto, Henny Eman, Aruba su prome Prome Minister, a trece U.S. Pre-Clearance pa Aruba na 1987. Pa nos para aki awe, firmando un renobacion y modernisacion di e acuerdo historico aki di cooperacion, ta algo profundamente emocional. Ta un tributo na su vision y legado, y un honor pa haci esaki na su memoria, den e aña cu el a fayece.”

“E acuerdo aki ta extende nos cooperacion mutuo den area di seguridad y ta conmemora casi 30 aña di operacion di Pre-Clearance na Aruba,” Diane J. Sabatino, Acting Executive Assistant Commissioner pa Field Operations di CBP a indica durante e ceremonia. “Awe ta representa un punto di referencia importante den nos colaboracion estrecho, ora cu nos ta crea un cuadra modernisa pa operacionnan di seguridad di frontera, aumentando nos alianza integral via aumento di biahe y un experencia mihor pa pasaheronan.”

Operacion di Pre-Clearance a inicia na Aruba na 1996, haciendo Aruba un di e 15 aeropuertonan den 6 pais, cu ta inclui Bahamas, Bermuda, Canada, Irlanda y United Arab Emirates cu tin e pre-clearance Americano. E programa ta permiti oficialnan di CBP pa haci e mes trabao di inmigracion, aduana y control agricola cu normalmente ta tuma lugar na Merca, pero na aeropuerto den otro pais, pa identifica menasanan prome cu nan yega na teritorio Mericano.

E reafirmacion aki entre e dos paisnan ta amplia e relacion fuerte y stabil, habriendo oportunidadnan pa cooperacion mas profundo den seguridad fronteriso cu beneficio mutuo.

Ramón “Chico” Negrón, Consul General di Merca na Corsou y U.S. Mission pa Caribe Hulandes incluso Aruba, a expresa su aprecio p’e cooperacion di hopi aña entre Merca y Aruba, cu p’e ocasion aki lo yuda fortalece seguridad fronteriso y facilita biahe p’e miyones di Mericano cu ta bishita Aruba. E acuerdo aki lo yuda promove un biahe sigur entre Aruba y Merca y lo duna sosten na turismo y aviacion den ambos pais.

MOU

Hunto cu e ceremonia di un acuerdo nobo di Pre-Clearance a tuma lugar tambe un otro acto unda Minister di Husticia, mr. drs. Athur Dowers a firma un MoU cu U.S. Customs and Border Protection, ratado nobo cu U.S. Customs and Border Protection (CBP).

Como mandatario responsabel pa husticia, Minister Dowers hunto cu Diane J. Sabatino, Executive Assistant Commissioner di Office of Field Operations (OFO) di CBP a firma dos MoU cu CBP relaciona cu uzo di forsa preventivo durante di nan trabao.

E prome MoU firma ta regarda e uzo di klop, pepperspray y handboei durante ehecucion di nan trabao. E otro MoU ta relaciona cu e cooperacion entre CBP y Inmigracion Aruba pa medio di e plataforma digital yama Automated Targeting System-Global (ATS-G) pa intercambio di informacion.

TAXIWAY

Tabata den oranan di atardi cu Minister Wendrick Cicilia a haci reapertura di Taxiway Golf cu ta facilita e parti operacional na aeropuerto. Tabata den luna di augustus cu a inicia trabou di rehabilitacion di e Taxiway Golf cu tabata construi na aña 1997. Minister di Turismo, Transporte y Labor, Wendrick Cicilia, tabata presente diabierne p’e cortamento di cinta cu a tuma lugar conhuntamente cu CEO Interino, James Fazio, despues cu a haya aprobacion di parti di Inspectornan di Departamento Aeronautico Civil. 

Siman pasa, Prome Minister Mike Eman hunto cu Minister Geoffrey Wever y Minister Rene Herdé a comparti e bon noticia cu Wilhelminastraat pronto lo mira trabaonan di revitalisacion. Tin 60 miyon aloca caba pa den 2026 yuda mehora e poder di compra di nos hendenan vulnerabel. Cosnan grandi ta na caminda y Gobierno lo duna e sosten necesario pa por percura p’esakinan cana eficientemente.

Masha bunita, pero Gobierno mester por pone su departamentonan move eficiente tambe. Burocracia gubernental ta un obstaculo grandi pa tur Gobierno. Cambio mester wordo haci. Mira p.e. un DOW y/of DIP, cu prome di haya un aprobacion pa un of otro permiso, ta tumbao sigur un 6 luna. No por! Y awor e 3 Ministernan aki ta haci mencion cu nan tin bon noticia, cu pueblo lo mira revitalisacion di Wilhelminastraat. Nos lo vigila e forma di traha di e Gobierno aki, ora cu nan mes ta bisa cu cos grandi lo tuma lugar.

Prome Minister Eman a splica e motibo pa cual continuacion den gobernacion ta vital, pa evita cu esfuersonan pa proyecto y visionnan grandi bay tira afo cu tur consecuencia. Prome Minister a recorda con durante di su ultimo gobernacionnan, a logra trece institutonan renombra Aruba manera TNO, Rotterdamse Scheepvaartschool, Rietveld Academie y Philips cu e meta pa haci di Aruba un hub entre Hulanda y Sur America y region. 

Manera e Gobierno nobo (MEP) e tempo ey a sinta, structuralmente a core cu tur e institutonan menciona. Prome Minister Mike Eman a elogia Minister Geoffrey  Wever cu apesar di tabata forma parti di e gabinete anterior cu a para e trabaonan di inversion den revitalisacion di Caya Grandi, Minister Wever si a persisti y mester a nabega contra di e coriente.

Madures politico ta importante si kier mira progreso real na Aruba y esaki t’e base riba cual e programa di gobernacion di AVP-Futuro ta traha. E meta principal di e Gobierno aki ta pa mehora e capacidad di compra di nos comunidad y hunto cu sector priva, por logra mas di esaki y e renobacion di centro di ciudad y di nos barionan ta esencial p’e bienestar general di nos hendenan.

Recien a anuncia e renobacion di e barionan di Bushiri, Mabon y De Vuyst, creando barionan completo den cual cada habitante lo por biba cu dignidad real y yuda forma nos comunidad. 

Miembronan di prensa a topa siman pasa na sede di Utilities Aruba N.V. cu Parlamentario di AVP,  Clifford Heyliger. Heyliger a expresa su profundo preocupacion tocante e manera iresponsabel y sin transparencia cu a maneha proyecto di renobacion di edificio Edward Cheung Centre for Innovation na Eagle.

Segun Clifford Heyliger, e proyecto cu originalmente tabata presupuesta pa un monto di 4 miyon florin, awor ta costa un total di 16 miyon florin – un incremento di cuater (4) biahe mas cu loke a planifica. “No tabatin un business case, no tin proceso defini, no tin un obhetivo cla. Unda e otro 12 miyon a bay?,” Heyliger a pregunta enfaticamente.

E Parlamentario a bisa cu durante e proceso di construccion, tabatin falta di control y supervision. “Cualkier contratista tabata por yega, ta wordo instrui p’e director, ta cambia e trabou y sigui manda factura cu a wordo paga sin cuestiona. Asina nos ta perde control di placa di pueblo,” Clifford Heyliger a splica.

Heyliger a enfatisa cu e 16 miyon florin ta placa di Gobierno, y como tal, placa di pueblo. El a recorda cu entre 2019 y 2023, Utilities Aruba N.V. a logra un total di 28.4 miyon florin den dividendo, pero ningun sen a bay bek pa Gobierno. Gobierno a sigui impone medida y gasto, mientras pueblo ta sinti presion den supermercado, den hardware store, den restaurant. Pero 28 miyon a disparce sin beneficio pa pueblo. Y ainda e proyecto no ta cla.

E Parlamentario di AVP a agrega cu e problema ta mas profundo. Segun Heyliger, e Hunta Comisario di Utilities Aruba N.V. y su companianan, incluyendo WEB Aruba N.V., a faya den nan tarea di vigila y controla. Na su lugar nan a proteha nan mes, no a proteha interes di pueblo.

Heyliger a menciona cu despues cu Gobierno a cambia, e Hunta Comisario a ahusta statuut pa proteha nan posicion. Esey ta sinberguensura. Tin comisario cu ta pensionado, pero kier siguridad di entrada (trabou), mientras hopi hende ta sin trabou. Nan kier mantene poder, cu consecuencia cu companianan publico no ta move den direccion cu mester.

ARE

Clifford Heyliger a referi tambe n’e caso di Aruba Renewable Energies (ARE), un compania cu Utilities Aruba N.V. a core lanta den otro intento di maniobra politico di parti di Gobiernonan di MEP, cu afortunadamente danki n’e presion di sindicato, pa medio di un keho entrega na Ministerio Publico, a logra stroba. E intencion tabata pa saca WEB Aruba N.V. for di e wega di tur energia sostenibel y asina Utilities Aruba N.V. por a dicidi ken por strica placa na grandi riba custia di pueblo. Mientrastanto, WEB a perde shete (7) aña di desaroyo den energia renobabel; nos ta papia di cientos di miyones di florin cu Aruba por a spaar.

Heyliger a finalisa su declaracion cu un apelacion fuerte: Pueblo a vota pa cambio y transparencia. E manipulacion pa medio di empresa estatal y nombramentonan politico tin cu stop. Si bo ta cu MEP, bo tin cu bay cu MEP; e institucionnan di pueblo no ta propiedad di partido. E cosnan cu ta pasa ta actonan di sinberguensura. Heyliger ta pidi pa investigacion y responsabilidad pa tur e gasto inecesario cu ta costa pueblo 16 miyon florin.

E lider di PPA a sorprende tur hende algun siman pasa, ora cu el a anuncia den oranan laat di atardi, cu el a dicidi di retira “temporalmente”  como miembro di Parlamento pa fraccion di PPA p’e bay  dedica su mes na defende su integridad den e caso  cu ta carga e nomber di Flamingo, cu Ministerio Publico a apela e decision di Corte den Prome Instancia.

El a mustra di mester tempo pa atende cu su defensa, pero pa sorpresa di tur hende, siman pasa a drenta informacion cu e actual lider di PPA a dicidi di tuma e funcion di ‘fraktiemedewerker’ over for di su colega di partido Eduard Pieters, kende porcierto a wordo huramenta como Parlamentario pa fraccion di PPA.

Un decision cu a sorprende tur hende ya cu no tin mucho claridad riba e motibo real di Otmar Oduber su retiro for di Parlamento pa awor e keda den su oficina den edificio di Parlamento caminda siman pasa caba el a dicidi di bira kisas e prome ‘fraktiemedewerker’ cu ta dirigi su mes na prensa den un conferencia di prensa.

Di otro banda ta bon conoci e hecho cu e lider di PPA,  kende tabata fundador di e grupo di Carnaval kisas di mas grandi di Aruba, esta TOB, ya no ta forma parti di e grupo aki mes y awor el a dicidi di bolbe lanta un grupo di Carnaval nobo cu lo por carga e nomber di HEPA pa cual el a inicia caba cu reclutamento  di miembronan nobo y bieu, ta trahando riba diferente aspecto di preparacion di su grupo nobo  caminda sin duda e lider di PPA lo por trata di convence figuranan clave y leal na su ex grupo TOB, pa nan  “Ban Cas Bek” y nan forma  parti di su organisacion di Carnaval nobo.

Ya caba Otmar Oduber tin varios empresa grandi como patrocinador y su retiro practicamente no tin mucho di haber cu  su trabou p’e caso den Corte Superior pero mas tanto e tin mester tempo pa regla su grupo nobo caminda ya pa otro siman por bisa lo anuncia inicio di temporada di Carnaval 2026.

Dr. Horacio E. Oduber Hospital (HOH) ta comparti cu comunidad di Aruba e cifranan di September creando asina confiansa, transparencia y conscientisacion. E cifranan aki di HOH Aruba pa loke ta luna di september 2025 ta un indicacion di cuanto pashent Hospital ta atende mensualmente, e promedio di estadia di pashent na HOH, cuanto operacion ta tuma lugar, cuanto test diagnostico Departamento di Radiologia ta haci y mas. 

Tambe nos ta cuminsa comparti e cifranan cu comunidad cu e meta pa conscientisa comunidad cuanto pashent no ta yega nan consulta cerca specialista emplea pa HOH y tambe cuanto pashent no ta yega nan cita na Departamento di Radiologia.

Na luna di september a hospitalisa 851 pashent di cual 54.4% tabata admision di emergencia. E promedio di duracion admiti na HOH na luna di september tabata 3.6 dia. Ocupacion di cama na luna di september tabata 74% cu ta mas abou cu luna di september 2024 (87.8%). Un total di 643 cirugia a tuma lugar den nos salanan di operacion cu ta mas halto cu september 2024 (579 operacion).

Departamento di Emergencia a atende na luna di september 2693 pashent y a nace na luna september 33 baby mucha homber y 35 baby mucha muhe (total 68 baby). Bloedbank Aruba a conta un total di 170 donacion di sanger na september.

Specialistanan den servicio di Hospital a haci un total di 7512 consulta cu pashent y interesante pa menciona ta cu 1239 pashent (14%) no a yega nan consulta na september . P’esaki por tin diferente motibo manera e pashent a lubida di atende su cita, porta e no por a yega pa via di transport, porta e pashent tabata admiti den hospital of porta e pashent no a cancela su cita of otro motibo. 

Departamento di Radiologia a haci un total di 5514 test manera CT scan, MRI, Echo etc. y tambe lamentablemente un total di 91 pashent no a yega nan cita pa haci nan test.

Pa loke ta order di laboratorio tabatin un total di 16012 peticion cu a drenta. Y na luna di september 872 pashent a sali for di Hospital pa regresa nan cas. Diariamente mas di 1200 empleado di HOH ta haci nan esfuerso pa brinda cuido continuo na nos pashentnan cu ta nos prioridad y ta recorda comunidad cu den cualkier momento no lubida cu HOH semper t’ey pabo.

Ultimamente tin discusion tocante GevMin di Aruba (claro e ultimo caso di Tulipan no ta yuda!) Pero realmente e t’asina straño cu un Minister di Aruba ta representa Aruba den Rijksministerraad? Esaki ta un articulo di Daphne Lejuez, cu a hala nos atencion y cu merece su publicacion. Pasobra den un mas reciente articulo nos di Den Noticia a mustra cu Aruba no mester di un ArubaHuis den su contexto actual, cu ta costa tanto placa. DN ta kere cu mirando cu ta un bez pa luna un Minister Plenipotenciario lo por atende un reunion di Conseho di Minister di Reino, lo sali mas barata pa e Minister concerni biahe pa Hulanda, ora cu tin un punto cu ta regarda su Ministerio. Aruba por keda cu un representacion minimo den un Oficina di ArubaHuis. Corta gasto!!!

Di acuerdo cu Daphe Lejuez, feitelijk un Gev Min ta un verlengstuk di Ministerraad di Aruba, e palabra mes ta bisa cu e ta un “gevolmachtigde minister”, dus e ta actua cu un volmacht y no por tuma niun decision riba su mes y su tarea ta pa facilita y representa decisionnan di Gobierno di Aruba. Y esaki ta adicional n’e representacion di Aruba su ArubaHuis cu tambe tin director y staff …

Reunionnan di RMR (Rijksministerraad) ta 1x pa luna, di cual kizas no tur ora Aruba ta riba agenda. E costo di €357,000 euro (700mil florin pa aña) ta hustifica? (Casi €30 mil euro of 60mil florin pa reunion) Dicon un Minister di Aruba lo no por opta pa biaha ora ta necesario pa ta presente y reduci gasto? 

Na Merca tambe tin un posicion similar cu probablemente un costo similar, pero kizas esey tin un agenda economico? Ta bon cu ta revisa costonan pa wak unda por reduci gasto - paso na final un ta pueblo ta paga?

Riba e remarkenan haci, Minister Gerlien Croes a reacciona bisando: “Mi a wak nan ta grita cu nos Gabinete ta escoge pa nos mesun Ministernan representa Aruba den RMR na Hulanda.

Boso check out akinan cuanto GevMin ta costa Aruba pa aña, nan a paga 2 GevMin 8 aña largo y e resto... nos tur sa. 357 mil EURO pa aña!

Loke tabata di spera, suspencion di Director di RDA, Ricky Lacle

 Siman pasa diamars, Hunta Comisario di Refineria di Aruba y tambe di FMSA, a tuma e decision di suspende e director Ricky Lacle  pa un tempo indefini  p’asina un investigacion  relaciona cu su maneho por tuma lugar.

E suspension a encera cu sr. Ricky Lacle no por subi tereno di refineria mas y tampoco  drenta den e oficinanan di e dos companianan menciona te c’un proximo aviso cual ta un decision cu a ser anticipa caba pa algun tempo, hasta prome cu cambio di Gobierno.

For di algun tempo caba ta un secreto publico di decisionnan cu e dos Gobiernonan di Evelyn Wever Croes a bin ta tumando, entre otro e forma con a hinca cantidad di famia y amigonan den e companianan aki pa cual a bay over na su suspension, cu a bira posibel despues cu a cambia e Hunta Comisario na momento cu Gabinete AVP-FUTURO a tuma mando di e pais.

Tin  indicacion cu a duna orden pa inicia c’un investigacion forensico riba diferente decision di e director a tuma den su periodo na cabes di e dos companianan menciona  y varios otro asunto mas.

Ricky Lacle na luna di maart di 2023 a keda nombra pa  e ex Minister di Energia, Glenbert Croes, kende porcierto ta primo di e director  y tabata un secreto publico cuanto oficialnan den servicio di e cos companianan aki, tabata liga na famia di e ex Minister.

Algun aventura sexual di un pareha y amigo di nan, a conduci cu net un dia prome cu celebracion di Pasco di Nacemento na 2023,  a bin descubri e curpa di e oficial di CEA, Sergio Maduro benta cant’i caminda, cruelmente asesina p’e homber Brian Melo di 29 aña.

Sinembargo no t’e asesino aki a apela decision di Corte den Prome Instancia, caminda el a ricibi un castigo di 17 aña di prizon, pero t’e pareha di e victima Jennifer Gonzalez di 40 aña, a apela decision di Corte den Prome Instancia cu a condena su persona un un castigo di 18 aña di prizon.

E dos personanan menciona, lo a hinca un plan den otro pa elimina e victima, kende pa algun tempo tabata pareha di Jennifer y riba e dia cu el a wordo asesina,  el a bay hunto cu e homber Brian caminda esaki dado momento a dicidi di choca e victima di tal forma, e cu el a stik muri.

Sinembargo esey no tabata suficiente, pero a bin resulta cu e asesino a baha e curpa for di den un auto pa despues pasa na algun ocasion riba e resto mortal p’asina sigura cu el a muri.

Den e proceso den Corte den Prome Instancia a bin haya Jennifer culpabel di complicidad caminda e lo a crea e scenario pa su pareha por a bay di acuerdo pa un trip cu ya nan lo tabata haciendo caba cu envolvimento di un di tres persona  riba e dia di e crimen p’asina haya e difunto den auto cu Brian, kende despues a ehecuta loke a wordo planea.

E caso cu a ser trata pa HOF a dura casi ocho ora largo, pero tabata notabel Jennifer a presenta un otro scenario, insistiendo cu nunca e tabata kier a mata  Sergio Maduro  y loke a resulta siman pasa, t’e hecho cu den celular di e acusado, no a haya indicacion di un of otro combersacion cu tabata duna indicacion di kico tabata su rol den e proceso.

Abogado defensor  Desiree Croes a mustra durante di e proceso con e asesino Brian na varios ocasion a haci declaracion caba cu no tabata cuadra cu realidad cambiando na varios ocasion loke el a declara caba y entre otro cu e tabatin mester di e 2000 florin cu Jennifer lo a paga pa mata Sergio, ya cu e tabatin mester di e placa aki pa su yiu.

Segun abogado ta bin resulta cu e criatura cu Brian ta papia di dje, ta yiu di un Hulandes y no di su persona, enfatisando cu e homber aki, kende a ser yama como testigo, a duna varios version cu no ta cuadra cu realidad, mescos cu el a declara cu ta Jennifer pa  mata e victima.

Despues di un proceso cu a dura casi henter e dia, e tres Huesnan  a sera tratamento di e caso caminda Procurador General a  pidi pa ratifica e castigo di 18 aña di prizon contra di Jennifer y dia 10 di november proximo,  lo dicta sentencia den e caso aki pa 1.45 di merdia.