Aruba tin como 5 luna sin un representante na Hulanda, como Minister Plenipotenciario. Ta partido AVP, segun formacion di Gobierno, tin cu cubri dicho puesto. E prome candidato di AVP tabata mr. Desiree Croes, kende no a haya aprobacion di e Gabinete AVP/Futuro. Tur hende sa caba e storia tras di esaki.

AVP a propone despues Rene (Baba) Herde, kende a pasa e screening, pero mirando loke a pasa cu e candidato ministerial pa AVP, Mike de Meza, cu por lo pronto lo no keda cla, debi na un denuncia penal, sin por haya sa kico e delito cu el a comete ta, a dicidi di huramenta drs. Rene Herde pa bira Minister temporalmente.

AVP a sigui busca candidato y a haya drs. Jennifer Arends-Reyes, pero despues di a evalua e proposicion aki, a gradici lider di partido y a prefera di keda Aruba, unda e por haci mihor trabao como lider di fraccion di AVP.

E situacion actual na Arubahuis of tambe yama Cas di Aruba a recorda nos riba e ex-Minister Plenipotenciario Juan David Irausquin, kende haciendo su trabao na Cas di Aruba a conclui cu tin demasiado placa ta wordo usa pa maneha Arubahuis. Unda aworaki p.e. tin mas di 30 hende den Servicio. Cas di Aruba mester di tanto hende? Gobierno por spaar hopi placa, haciendo cambio di e structura pa tin un Cas di Aruba na Den Haag.

Ta bon pa nos Parlamentarionan cuestiona e gastonan cu tin, bin cu cambio manera e.o. proponi, habri un oficina chiquito, di p.e. 5 hende cu por atende e problemanan cu Arubianonan (studiante of pacientenan cu ta wordo manda Hulanda) y tambe por representante di Aruba na Bruselas na Union Europeo. 

Y ora cu tin un reunion di Conseho di Minister di Reino y ta requeri un Minister di Aruba ta presente, ta manda e mandatario cu ta cubri e topico pa discuti. Esaki ta sali mas barata, cu opera un Arubahuis cu tin mas di 30 empleado y cu nos sa, 50% ta ni presenta na Cas di Aruba pa traha, pero ta traha for di cas. Pasobra no tin mucho di haci.

Analisa kico Guilfred Besaril a haci durante su estadia na Hulanda, unda e no a biba ni un dia den e edificio cu tabata Cas di Aruba, pero a huur un cas p’e y su famia y uno tambe p’e Director di Cas di Aruba, Glenn Ling. Malgastamento di placa, cu te ainda ta sigui. Surplus tin, mester (mal)gast’e? Nos lo bin bek riba e topico aki di Cas di Aruba, cu ta na nos opinion, benta placa afo, sin mester.

Siman pasa pa di dos ocasion den menos di un aña, mr. Desiree Croes ta dicidi di  bandona su sosten na partido AVP y pa colmo, na ambos ocasion esaki tabatin di haber cu e puesto di Minister Plenipotenciario na Den Haag, cu ainda ta vacante.

Inicialmente AVP lo a dicidi cu drs. Rene Herde lo wordo manda Hulanda pa ocupa e posicion aki, pero na momento cu a surgi e confrontacion entre Parlamentario Mike de Meza y Director di DIMP, partido a haci un apelacion na drs. Herde, p’e acepta e Ministerionan cu de Meza lo mester ta responsabel pa nan, te ora cu tin claridad den su caso y e ora ‘Baba’ por bay Hulanda.

Un decision di partido cu den cierto forma pa comprensivo, ya cu si de Meza keda cla cu su screening, Baba Herde lo entrega su retiro pa despues  biaha pa Den Haag y  tuma e puesto mancha cu a ser laga atras pa Besaril.

Inicialmente ya caba Desiree Croes a informa partido cu su persona lo ta dispuesto pa acepta e posicion na Den Haag, pero tanto den seno di e partido berde y como di e partner di coalicion, Futuro, a surgi obhecion pa nombra Desiree Croes den e puesto aki.

Aki tabata e prome momento cu e abogado conoci aki, a dicidi di  kita su sosten y entrega su miembresia n’e organisacion berde, pero despues di intervencion di varios prominente di e partido, el a dicidi di pone esaki un banda.

Siman pasa despues di e mocion politico barata di Endy Croes, caminda varios miembro di e dos fraccionnan den Parlamento cu ta sostene Gobierno actual a vota contra di mocion di MEP, Desiree Croes a bolbe dicidi di kita su sosten di partido AVP pa di dos biaha den un aña, pa bin afo “colga tur aña sushi” cu e por tin di AVP, manchando su propio reputacion. El a laga masha di desea y dificilmente AVP lo por confia den su persona. 

Su Majestad Rey Willem-Alexander a huramenta Ministronan y Staatssecetarissen nobo riba recomendacion di Minister-Presidente dia 5 september 2025.

E nombramentonan ta cubri: D.M. van Weel, Minister di Asuntonan di Relacion Exterior;  Mr. F. van Oosten, Minister di Husticia y Seguridad;  F. Rijkaart, Minister di Asuntonan Interno y Relacion di Asuntonan Interno y Relacion di Reino;  G. Moes, Minister di Enseñansa, Cultura y Ciencia;  M.L.J. Paul, Minister di Asuntonan Social y Trabou;  Prof. dr. J.A. Bruijn, Minister di Salud, Bienestar y Deporte.

Secretarionan di Estado nobo ta: A. de Vries pa Asuntonan di Exterior;  Mr. A.C.L. Rutte pa Husticia y Seguridad;  Dr. K.M. Becking pa Enseñansa, Cultura y Ciencia; Drs. E.H.J. Heijnen pa Finansa; Mr. S.Th.P.H. Palmen pa Finansa.

Pa motibo di e nombramento, algun Minister y Secretario di Estado, cu tabata den cargo temporario a wordo retira. Entre nan ta M.C.G. Keijzer (Social y Trabou), R.P. Brekelmans (Relacion Exterior), D.M. van Weel (Husticia y Interno), S.Th.M. Hermans (Enseñansa), R. Tieman (Salud) y M.L.J. Paul, kende a sali como Secretario di Estado di Enseñansa.

E cambio aki ta sigui despues di e renuncia di Minister y Secretarionan di Estado di parti NSC dia 22 augustus 2025. For di dia 3 juni 2025, e Gabinete ta den estado demisionario. Su Mahestad a pidi cu nan sigui cumpli e tareanan necesario pa interes di Reino.

E Minister y Secretarionan di Estado nobo a wordo huramenta diabierne mainta na Palacio Huis ten Bosch.

“Ban bolter e cos”, tabata un slogan di AVP den campaña.  Siman pasa Parlamento (18) a pasa un mocion unanimamente, sin cu esaki a ser studia, analisa, manera ta di spera di Parlamento. E biaha aki, ningun fraccion of ningun Parlamentario a pidi pa tin un dialogo cu diferente stakeholder. Esey no a tuma lugar, pero simplemente e caso aki a bira un asunto politico pa gana algun voto, sin tene cuenta cu interes general.

Specificamente e mocion ta papia di reduci e cantidad di oranan di trabou pa siman y tambe ta crea un salario minimo pa ora. Den e reunion siman pasa a papia riba dos tema. E cambio di un salario minimo pa un tarifa minimo pa ora cu lo beneficia 9 mil trahador y tambe a bin cu un proposicion pa baha e cantidad di oranan laboral pa siman, p.e. di 40 ora pa 32 ora pa siman. E mocion aki a haya sosten unanime di 18 miembro di Parlamento. Esnan cu a abstene di vota tabata e miembronan di AVP, Stephany Sevinger, ing. Mike de Meza, y e sindicalista Clifford Heyliger. 

Mester bisa cu Sala di Parlamento ta un lugar caminda historia di pais Aruba semper a bira realidad, siendo e Conseho Legislativo mas halto di nos pais caminda leynan cu a marca historia pa desaroyo y tambe e tabata caminda a aproba tur loke tabatin di haber cu Status Aparte.

Sinembargo na mes momento Parlamento di nos pais, na varios ocasion a wordo maltrata, maluza y manipula pa cierto weganan politico sin sentido, caminda tin miembronan di Parlamento, semper a pone nan interes politico y di nan partido, na prome lugar,  lubidando por completo cu  nan como miembro di Parlamento, ta conoci como “Representante di Pueblo.”

Tabata e momento, caminda  “of all people” e lider di fraccion di MEP,  esta ex Prome Minister Evelyn Wever Croes, a dicidi di entrega un mocion caminda ta pidi pa reduci orarionan di trabou aki na Aruba. Un momento cu ta laga hende pensa, ta kico ta pasando den cabes di algun politico aki na Aruba, ya cu e mesun Evelyn aki for di 2017 te cu 2025, tabata Prome Minister di pais Aruba, caminda e mester a regla tur e cosnan aki, ya cu ta mustra cu ta su “vision” cu el a haya  recientemente pa bin cu e idea aki cu no a cay den bon tera cerca e sector priva.

Ta mesun lider di MEP cu despues di eleccion di 2021, a coregi su colega ex Minister di Labor, Glenbert Croes, kende durante di campaña electoral di e aña menciona, a drenta hopi cas y sigura tur hende cu e lo percura pa su Gobierno aumenta e minimumloon, anunciando cu loke Glenbert a trece dilanti, no tabata factibel y cu esaki lo no wordo introduci.

Awor Evelyn Wever Croes ta presenta un mocion  pa reduccion di orarionan di trabou caminda e ta sugeri pa introduci un siman di cuater (4) dia di trabou cu entre otro lo haci mas atractivo pa ‘talentonan’ haya esaki atractivo pa bin traha na Aruba despues cu nan caba cu nan estudio.

Despues di tuma nota di e mocion aki, combina cu tarifa di sueldo minimo pa ora, sector priva no a keda keto. Ta kico e hendenan aki kier crea. Lo cuminsa cu esnan den sector publico, e ambtenaarnan, cu tin masha previlegio caba, manera e.o. e cantidad di ATV-dagen cu nan ta haya. Y awor MEP y PPA y esnan di AVP-Futuro kier pa nan traha 32 ora pa siman, esta 4 dia pa siman. Di mes ta conoci cu esnan cu ta forma parti di e aparato publico ta (floho) no ta productive, pero si kier gana masha placa.

E.o. e comerciante, director di Super Do-It-Center, Frans Ponson no por caba di compronde pakico di e proposicion aki, sino ta un acto politico pa gana simpatia y voto. E ta bisa esaki, pasobra no ta mucho dia atras cu Gobierno a dicidi di anuncia un cambio di maneho (ley) pa permiti tur esnan cu ta kedando ilegal na Aruba, despues di a drenta legal, pa busca un hende firma pa nan por traha. Y a flexibilisa e sistema pa un persona cu permiso traha dos diferente trabou den diferente tipo di trabou. 

Por tende cu Aruba no tin suficiente trahador, pa cual e maneho pa legalisa e ilegalnan. Si aplica e mocionnan acepta, nifica cu mester bai na importa mas trahador di afo, pasobra e escases ta keda. No tin suficiente cas, ni skol p’e yiunan. Kico berdad a pasa den cabez di e 18 miembro di Parlamento, ora cu nan a pasa e mocion. Manera menciona, no a ni consulta p.e. cu SER y otro organonan di consulta. Esnan cu a vota na fabor no por ta serio.

Awor cu Parlamento a tuma nota di e criticanan cu a surgi, awor ta bin bisa un mocion ta expression di un deseo. E no ta ley ainda. Asina si no por bolter cos, manera e slogan di campaña di AVP ta bisa. Nan ta bolter cos robez, Parlamentonan di partido berde ta demostra falta di vision, no ta studia, analisa nada. Asina si, no por!!!

Mr. drs. Arthur Dowers ta responsabel pa den e gabinete actual, cu Husticia, Integracion y  tambe Transporte Publico, pero cu e aceptacion pa loke el a bin ta haciendo desde cu el a huramenta  como Minister di Husticia, e tin hopi hende decepciona.

Acerca ta bin cierto ceremonianan cu e ta participa na nan cu ta pone hopi hende di e propio partido AVP, cuestiona su maneho, ya cu desde ki tempo 4 oficial di Cuerpo di Bombero cu a pasa un training pa por maneha un truck, ta motibo pa un Minister di Husticia transforma esaki den un noticia grandi.

Hecho ta cu durante di campaña electoral y hopi mas prome cu esey, hunto cu Mike de Meza, semper a papia cu asina cu AVP drenta den Gobierno, lo inicia cu e proceso di investigacion contra cantidad di ex Ministernan di MEP loke te ainda no t’e caso.

Hasta tin e caso ainda di ex Minister Glenbert Croes, kende ta trankilo di dje, mientras cu ta bay cumpli un aña cu el a wordo deteni y despues laga liber pa motibo cu el a bira malo y te dia di awe Landsrecherche ni tampoco Ministeiro Publico a haci algo riba e acusacionnan cu tin contra di e primo di Evelyn Wever Croes. Otro ex-Minister di MEP cu ta cana liber y ta sospechoso, no a ser ni investiga cu ta Edison Briesen, Chris Romero, Endy Croes y manera menciona Glenbert Croes.

Tin investigacionnan cu tin cu inicia riba e maneho di companianan estatal, maneho riba  e planta di purificacion di awa di riool di Bubali,  maneho di WEB Aruba NV y NV Elmar,  maneho di e compania RdA, investigacion relaciona cu desaroyonan cu a tuma lugar riba tereno di refineria. Investigacion den e e proceso caminda a anula e acuerdo cu Gobierno di Aruba tabatin cu  CITGO, investigacion rond di henter e proceso cu Eagle LNG, investigacion riba e proceso di otorgamento di tereno tanto na Barcadera como di e refineria di San Nicolas, pues señor Minister di Husticia, pone otorgamento di  certificado  na tres bombero, algo cu e Hefe di Bombero mes por a haci, cuminsa cu investigacion cu a sigura pueblo cu AVP lo a haci.

‘Don’t  beat around the bush’ cuminsa e proceso contra di Endy Croes y otronan y den e proceso aki tambe inicia un investigacion den e proceso di screening na cual Mike de Meza ta parti di dje y cantidad di otro caso y e forma di proceder di Ministerio Publico y Landsrecherche.

Arhur Dowers como Minister di Husticia ta responsabel pa maneho di henter e cadena di Husticia. E tin tur derecho, sin tin mester di mete, pa convoca un reunion cu e.o. PG mr. Amelien Flanegien, y puntre, “sra. Ta cuanto placa y man power bo mester tin pa den 3 of 4 luna di tempo keda cla cu e procesonan pa hiba e casonan di e.o. e sospechosonan, incluso e caso penal cu tin contra di Mike de Meza, kende te awe no sa di kico Ministerio Publico ta acuse. Ministerio Publico no por sigui drag on cu tanto sospechoso. Manera PG a declara, e falta di placa y man power pa haci e investigacionnan, anto Minister Arthur Dowers mester percura pa Ministerio Publico haya loke e mester pa haci su trabao. Of a lo largo lo haci un denuncia oficial na Hof, pa mustra cu nos sistema hudicial na Aruba no ta funciona. Sea ta manda henter e structura di Ministerio Publico, incluso Landsrecherche cas y trece un grupo di Hulandes pa bin haci e trabao, pasobra na Aruba esnan cu tey no ta sirbi.

Tristo pa mira cuanto mata di coco morto riba Juan Enrique Irausquin Blvd, pa colmo tur ta e "nobonan", Anto net dilanti di low rise hotelnan. 

Awor....esey ta negligencia of kico??? Sea como sea, ta basta placa a bai perdí eynan!!! 

T’esnan dilanti di Ámsterdam Manor so ta bon y bunita keto bai. Kisas nan mes ta cuidanan? Awor cu Prome Minister Mike Eman tin su Proyecto reforestacion di 100.000 mata, lo ta bon pa inclui platamento di mat’I coco na Juancho Enrique Irausquin y tambe na Nelson Orlando Oduber Blvd.

Ultimo tempo, tin varios organisacion cu ta organisa sea un conferencia of congreso, hasta exposicion den un hotel. Loke a hala nos atencion ultimo fin di siman, ora cu tin personanan cu kier atende un actividad den un hotel, bo ta haya un miembro di seguridad di e hotel cu no ta dunabo permiso pa parkeer den e parking-lot di e hotel.

Bo ta puntra bo mes, unda tin cu bai parkeer bo auto anto? Pafo, dilanti di e hotel, ya caba ta ocupa pa autonan di e propio empleadonan di dicho hotel of pa otro bishitante, pero no ta permiti ningun di esnan cu kier participa na un actividad, organisa pa otro organisacion cu no ta di e hotel, pero si ta huur p.e. e ballroom di e hotel.

Fuera di no tin lugar dilanti e hotel, y si tin lugar mes, bo tin cu pasa den e awa di kloaka (awa preto), cu segun DOW a keda elimina cu reconstruccion cu nan a haci algun luna atras, pero a keda confirma cu e no ta ningun solucion.

Esnan cu kier bai tog e actividad den e hotel, mester busca otro parkeerplaats, pero ta haya cu e tin cu paga p’esaki tambe. Kier men, tur e negoshinan cu tin dilanti di e hotel, cu ta varios, ta ganando nan bon pida placa cu nan parkeerplaats cu nan tin. E entrada adicional aki ta wordo declara tambe na DIMP? Djies un pregunta.

Den un di edicion anterior Den Noticia a publica riba e Ley di Cacho, cu tabata un iniciativa di e tempo ey, Chris Dammers di AVP. E ley aki a haya sosten unanime den Parlamento. Tur hende a cuminsa na tene nan cachonan den cura y si mester sali cana cu nan cacho, esaki semper ta mara na un lis. Aki aya, tabatin cacho cu ta logra sali for di cura, ora cu portanan ta keda habri. Nos por corda un caso serio na Bubali, unda un cacho di raza a sali y a morde hende.

Ministerio Publico a laga confisca e cacho pa deshaci di dje. Ni kico e famia a haci, OM no tabatin pordon y menos ainda a tene cuenta cu e famia su peticion. Tempo ta bai pasando y mas cacho a subi caya (sin tin doño), pero autoridad no a haci nada mas tampoco. Y hasta awor a bolbe cuminsa un campaña di sterilisacion di cacho y pushi, cu den pasado reciente a yuda, pero awor e situacion a bira serio atrobe, Ministerio Publico ta bin cu un participacion cu no tin contenido. 

Ultimo tempo tin masha incidente ta tuma lugar, unda cachonan los riba caya ta atake cuidadanonan cu sea ta riba biscicleta, ta jog, cana, etc. Ministerio Publico a duna di conoce cu en principio lo persigui tur doño di cacho p.e. den un incidente di mordida.

Pregunta cu tin di haci na Ministerio Publico, for di dia cu Ley di Cacho a drenta na vigor, cuanto but a ser duna, cuanto cacho a keda confisca y mata. Mescos ta conta p’e Ley di Plastic. Uso di saco di plastic ta birando un hecho atrobe. Parlamento por traha cuanto ley cu nan kier, pero si e no wordo ehecuta , situacion ta keda mescos. Manera a ser bisa: “Nos ta sigui carga awa hiba laman”.

Den nos ultimo edicion di dialuna 1 di September, nos a wordo hala nos atencion riba e publicacion di e acto historico, unda e delegacion di oposicion cu a cana bai Gobernador, den cual tabatin ocho (8) miembro di fraccion di MEP, cu a ser dirigi p’e actual lider di PPA, Otmar Oduber, kende apenas tin un (1) solo asiento den Parlamento. No solamente esey, pero despues tambe tabata e ‘lider’ Otmar Oduber, kende a duna declaracion prome cu lider di MEP, Evelyn Wever Croes, algun cu si corda e historia politico di Betico Croes den feliz memoria, NUNCA lo por a sosode.

Para den Wilhelmina Stadion na ocasion di e lucha pa separacion for di Gobierno di Antiyas (Corsou), e legendario Betico Croes a sigura publico presente, cu HAMAS y nunca partido MEP lo traha hunto cu PPA cu tabata bou direccion di Benny Nisbet den feliz memoria, ya cu e partido oranje aki, no kier a sostene e referendum, cu MEP a organisa, unda pueblo di Aruba tin oportunidad di scoge sea keda den Federacion di Antiyas of bira Independiente. 

Nos di Den Noticia a menciona, pa Aruba haya su Status Aparte. Status Aparte no a ser menciona ningun momento den e referendum, pero tabata durante Conferencia di Mesa Rondo na Den Haag, cu a opta pa Aruba haya e posicion di Status Aparte como transitorio, cu lo desenboca den Independencia di Aruba. 

Den Staten di Antiyas Hulandes e tempo ey, Benny Nisbet y su fraccion tabata opone tur cos loke a conduci cu Betico Croes a considera Benny Nisbet y su partido PPA,  ‘traidornan” di patria, pero diabierna atardi, ata un lider di PPA a logra di pone e lider di MEP cana den e “rijtje” su tras  pa hunga politica barata for di cual ta solamente Otmar Oduber lo saca probecho politico.

Manera e dicho tradicional cu nos conoce aki na Aruba, cu e acto politico aki, a “pone Betico bolter den su graf”.  Ya cu partido, MEP cu semper el a bisa cu e partido(nan) cu no  sostene Aruba den su lucha, ata awor net MEP ta cana tras di un politico (Otmar Oduber di PPA) cu tin solamente un asiento den Parlamento, cu no a sostene e lucha di MEP. No por!!!

Asina mes, e mesun Otmar Oduber di POR (no PPA) a traha den Gabinete Wever-Croes. Y awe PPA ta guia MEP den e rumbo cu e kier bai.