Den Noticia

Despues di seis luna y 7 dia, Ministerio Publico porfin a informa diabierna cu e proceso di investigacion den e caso di Ayden Lanoy, a termina y cu e dos polisnan oficialmente lo wordo presenta dilanti mesa berde pa Corte tuma un decision riba e caso hopi sensibel aki.

Tabata den oranan di diadomingo 9 di februari alrededor di 5’or, cu a surgi un situacion caminda un patruya di polis a duna chauffeur di un auto ordo pa para pero e persona aki no a cumpli cu e peticion aki y a core bay laga e patruya atras.

A sigui un persecucion caminda auto di polis tabatin ‘zwaailicht’ y sirena zonando den e persecucion caminda e chauffeur, kende a bin resulta di ta Ayden Lanoy di solamente 19 aña, lo a  para den cayanan di Pos Abou pa despues drenta e area di Madiki pa finalmente drenta den un Draaikom’ na Makiki Kavel cu no tabatin salida.

Aki ta caminda e drama a bin finalisa ora cu Lanoy cu lo a sinti cu el a wordo changa, a maniobra cu su auto pa trata di laga e dos polisnan kendenan abaha for di nan auto cu loke ta mustra cu arma den man y ora cu a nota cu Lanoy a maniobra un forma cu e por a bolbe bay laga nan atras, e dos polisnan kendenan a resulta di ta Maurice Violenes y Righer Dirksz, a los tiro riba e auto.

Inicialmente a pensa cu esakinan lo por tabata tironan di advertencia pero na momento cu a bin resulta cu e polisnan a los 20 tiro riba e auto cu Ayron Lanoy den dje, e caso a cambia por completo cu a hinca ambos polis y henter Cuerpo di Polis den un situacion sumamente delicado.

Un di e tironan aki a alcansa Ayron den su pecho loke a conduci na su morto, mientras cu e tabata sinta ainda den e auto, cu a sigui avansa te ora cu el a pega riba un cura di cas caminda asistencia medico pa atende cu e hoben, no a duna resultado.

No a haya arma di candela den e auto, no a haya droga den e auto loke a bin mustra pues cu e victima en realidad su unico eror cu el a comete, tabata di no para pa polisnan y informacion cu su auto lo tabata falta un luz patras, tampoco tabata un hustificacion pa yena e auto di e hoben cu bala.

E situacion aki a bira mas serio ora cu a bin resulta cu e auto a conta cu entre cinco pa seis perforacion di bala, loke ta mustra e falta di responsabilidad di e dos polisnan, ya cu  caminda e incidente a sosode, tabata rondona pa casnan di famia y e resultado lo por tabata mas pio.

A dura varios accion di protesta di famia y amigonan pa presiona Ministerio Publico bin dilanti y duna informacion riba loke a sosode pero a tuma mas cu seis luna pa e investigacion a keda cla y Ministerio Publico diabierna a anuncia pa medio di un comunicado di prensa, cu e caso lo yega Corte diabierna 7 di november caminda e lo ser trata como un ‘regiezitting’ loke ta nifica cu e caso lo no wordo trata den su totalidad riba e fecha aki.

E dos polisnan ta sigui den libertad apesar cu nan ta sospechoso pa Ministerio Publico, nan ta suspendi si for di tur actividad policial pero ta sigui den servicio ainda di Cuerpo Policial y ta despues cu e caso wordo trata y un decision cay, lo por determina si nan lo ricibi un castigo y si nan lo wordo retira como miembro di Cuerpo di Polis di Aruba.

Ministerio Publico a sorprende hopi hende, ora a admiti cu porfin caso Caret ta kedando cla y asina mes, e aña aki, lo no wordo trata den Corte di Prome Instancia. Pero loke a hala nos atencion sigur t’e hecho cu Ministerio Publico ta admiti cu pa falta di recurso durante hopi aña dor di falta di placa, ta causa cu otro investigacionnan andando a confronta tardanza. Mihor bisa, ni a wordo inicia mes. Esaki lo conduci sigur na p.e. MP lo bai “seponeer” tur esakinan, despues di 5 aña. Pero cu mientrastanto a mancha number di tur sospechossonan, cu ni a ser interroga pa Landsrecherche pa falta di placa y manpower. Esaki ta sigur ta NO-ADMISIBLE. Denuncianan haci y cu OM ni a cuminsa investiga nan ta di e.o. ex-Ministernan ing. Edison Briesen, Chris Romero, Glenbert Croes y awor e denuncia haci contra Mike de Meza, kende ta lucha pa sa e delito penal cu el a comete, pa haci’e un sospechoso. Si ta pa falta di placa y recurso humando, Gobierno mester tuma accion den esaki, pasobra OM no por keda acepta denuncia, y no por ni investiga nan.

CASO CARET
Siman pasa, Ministerio Publico a emiti un declaracion, den cual a duna di conoce cu “Interogacionnan den ‘Caret’ a finalisa. Esaki t’e investigacion penal di e tiroteo di 9 di februari 2025 den cual A.C. Lanoy di 19 aña a perde su bida pa motibo di un tiro di polis. E dos agentenan policial envolvi a bolbe wordo scucha como sospechoso. Despues di e interogacionnan aki, e ultimo actividadnan di investigacion lo tuma lugar y e investigacion a finalisa. Mester admiti, manera Ministerio Publico mes ta declara cu debi na presion cu tin den comunidad, a dicidi di duna e caso aki prioridad pa investiga. Imaginabo, si no ta pe presion den pueblo, e caso aki lo no a haya atencion. Por constata asina mes, cu e investigacion tuma hopi largo. Cu el a haya number di “Caret”, y caba ta un indicacion, cu e ta un caso fragil, sin mucho peso, cu a pone Ministerio Publico anuncia anteriormente cu ambos agente policial lo wordo persigui penalmente. Nan lo wordo acusa di complicidad di homicidio. Ora cu Landsrecherche keda cla, cu su compilacion, e raport lo wordo entrega na Ministerio Publico, p’e asina yama ‘regiezitting’ cu ta programa pa diabierna 7 di november 2025. Loke nifica cu e caso aki lo keda trata te otro aña. No por!!!!

Manera ya menciona, pa motibo di e seriedad di e incidente den cual un hoben a fayece, e investigacion aki a wordo trata cu prioridad dor di Landsrecherche. Na mesun momento e falta di recurso durante hopi aña dor di falta di placa, ta causa cu otro investigacionnan andando a confronta tardanza.

Secretario di Estado  pa Relacionnan di Reino Hulandes, sr Eddie van Marum, a efectua un bishita  cu a bira un tipo di ‘kennismaking’ cu gobierno di Aruba pero el a bishita tambe Sint Maarten y lo a finalisa su bishita na Corsou.

Tabata un bishita “diferente’ compara cu loke otro Secretarionan di Estado a bin haci den pasado caminda por menciona Raymond Knops for di 2020 pa 2022, Alexandra van Huffelen di 2022 pa 2024, sigui pa Zsolt Szabo for di 2024 pa 2025 y awor ta toca turno na Eddie van Marum pa atende cu asuntonan di relacion di Reino Hulandes.

Notabel di e biahe di van Marum na Aruba pa tres dia, tabata e hecho cu gobierno di Aruba a firma “otro” acuerdo cu gobierno Hulandes pero contrario na loke gabinete Wever Croes I y II a haci for di 2018 bin ariba, na e ocasion aki cu van Marum, gabinete AVP-FUTURO a firma un documento cu ta “yuda”  Aruba.

Ex Prome Minister Evelyn Wever Croes for di 2018 a firma cantidad di acuerdo cu entre otro Raymond Knops  cu ta documentonan cu no a trata prome cu Parlamento di Aruba pero ta despues cu el a firma esakinan, el a bin informa Parlamento caminda entre otro practicamente a entrega autonomia di Parlamento na gobierno Hulandes.

E lider di MEP a firma pa introduccion di e Landspakket, a firma pa introduccion di Rijkswet y cantidad di otro documentonan caminda semper el a biaha su so na momento cu e mester a firma e documentonan aki.

Despues di Knops e ex Prome Minister Wever Croes a firma tambe cu Alexandra van Huffelen pa despues e contradeci e mandatario Hulandes, kende tabata Secretario di Estado for di 2022 te cu 2024 y for di 2024 te cu 2025  a toca turno na Zsolt Szabo pa atende cu asuntonan aki caminda el  a insisti den nomber di gobierno Hulandes, cu Aruba tin cu cumpli cu loke ex Prome Minister Evelyn Wever Croes y su gobiernonan a acorda y hasta a sugeri.

 Yegada di e Secretario di Estado na turno awor, esta Eddie van Marum, ta duna indicacion cu a inicia un otro etapa den e relacion entre Aruba y Hulanda,  caminda e actual gobierno a presenta diferente punto di su programa di gobernacion cual a ser ricibi cu hopi bon reaccion.

Prome cu van Marum a bandona Aruba, diabierna Prome Minister Mike Eman, Vice Prome Minister Gerlien Croes y Minister di Finansa Geoffrey Wever a logra di firma un acuerdo cu e Secretario di Estado, cu a carga e nomber di un ‘Borgstelling MKB’ cu lo yuda empresanan chikito haya financiamento pa nan proyectonan.

Na mes momento a yega a firma un acuerdo cu Hulanda pa ehecucion di diferente proyecto  manera di re-imprimi un buki valioso riba historia di sclavitud na Aruba, ademas tambe lo pone fondo disponibel pa creacion di un estatua conmemorativo, lo bay organisa tambe un evento pa aumenta conscientisacion riba e tema di sclavitud y tambe lo haya financiamento pa remodela y expande un centro nobo pa Archivo Nacional di Aruba, cu lo bira e tankinan di awa na Kibaima.

Un proyecto historico cu lo wordo remodela y reconstrui pa asina tur hende corda e parti di historia aki di pais Aruba.

Pues despues di hopi tempo un Secretario di Estado a bishita Aruba sin cu a papia riba problemanan financiero, sin cu a papia cu gobierno no ta cumpliendo cu palabracionnan haci cual ta poni den e acuerdo di gobernacion di e dos partidonan di coalicion, esta AVP y FUTURO.

Proximamente ICAO lo bin haci su audit di nos Aeropuerto. Awor aki tin un coremento pariba pabao pa pone AAA N.V. den condicion pa por pasa e audit di ICAO. Ultimo biaha cu e audit a ser haci tabata na 2023, unda e tempo ey caba a señala algun punto cu mester drecha. Awor nos ta tende cu Schiphol Group a haci mas daño cu bon, unda e compania Hulandes no a cumpli cu su propio contrato cu e tabatin cu Gobierno di Aruba. No ta pornada Gobierno di MEP no kier a prolonga nan contrato. Schiphol Group a core cu varios di profesionalnan di AAA N.V. pa cual maneho di nos Aeropuerto a cai atras, te ta corre riesgo di baha di categoria 1 pa 2, loke ta funesto pa economia di Aruba. Esnan cu sa, lo compronde kico esaki lo nifica baha den categoria. Turismo, cu te unico pilar economico di Aruba lo sufri gravalmente. Aworaki practicamente e profesionalnan cu tin na Aeropuerto ta trahando dia y anochi, diasabra y diadomingo pa prepara p’e audit di ICAO. Nos kier menciona djes un ehempel cu ta peligroso. Algun dia pasa, Bomberonan na Aeropuerto, tabatin dos auto di paga candela daña. Esaki no por!!!. Si ICAO sa esaki, inmediatamente lo baha categoria di nos Aeropuerto. A traha riba e Proyecto Gateway 2025, unda e ala nobo a haya e parti Mericano completamente nobo y cu un sala di yegada nobo, unda e sistema di maleta tambe ta “State of the Art”. Ora a pone esaki den ehecucion, tur hende tabata testigo di e mess. Sistema a daña y no por a conecta bek cu e sistema bieu, y tur cos mester a bai manual. No por!!! Y asina tin hopi mas cos cu no ta bon, cu mester drecha, prome cu ICAO haci su audit. E team di Arubiano cu a sigui maneha Aeropuerto, despues cu Joost Mijts a bandona Aruba, a bin ta haci un bon trabao, pero asina mes Schiphol, sosteni pa Gobierno no kier ningun un di nan como counterpart. A dicidi di emplea un dama, recien gradua pa cuminsa den operacion, pero ta hopi hoben ainda pa keda nombra como CEO di Aeropuerto, pero un caminda tin cu cuminsa. Nos lo sigui monitor e situacion aki.

Nos ta kere cu Schiphol tambe mester worde gescreen, pasobra nan sigur no a atene na mes n’e contract firma y a haci hopi blunder den e Proyecto di Gateway 2025.

Loke ta un novum, te decision cu Parlamentario di PPA, Otmar Oduber a tuma, esta di cuminza un caso sumario contra di Presidente di Parlamento, Marlon Sneek y contra tur lider di fraccion den Parlamento, esta contra di Evelyne Wever Croes (MEP), Jennifer Arends Reyes (AVP), Gino Goeloe (Futuro), pasobra Parlamento a tuma un decision, cu siendo sospechoso, Otmar Oduber no por representa Parlamento di Aruba den ningun delegacion cu bai den exterior. Te un decision cu e.o. e mesun Otmar Oduber a vota pa Benny Sevinger, siendo sospechoso, no por biaha tambe den ningun delegacion di Parlamento pa repesenta Aruba. E Parlamentario di PPA a califica e hecho aki como anti- constitucional y pesey awor a dicidi di bai busca su derecho den Corte. Sigur e lo bira un caso di Corte masha interesante mes, pa sa con Huez ta pensa di e caso aki, unda un Parlamentario eligi pa pueblo, no por representa Aruba den biahenan pa exterior, pero si lo por atende p.e. tur reunion di p.e. IPKO cu tuma lugar na Aruba como Parlamentario.

Awor cu Mike de Mea a bira sospechoso, e tambe lo no por biahe den ningun delegacion di Parlamento. Mike de Meza, mescos cu Otmar Oduber ta den mesun boto. Decision di caso di Otmar Oduber contra Parlamento di Aruba lo ta valido tambe pa Mike de Meza, maske mester bisa cu e Parlamentario aki, no ta interesa pa atende reunionnan di Parlatino, pasobra nos a bin ta bisa for di hopi tempo, e reunionnan aki no tin ningun balor agrega. E ta mas bien un Paranda Latino (malgastamento di Placa).

PPA su lider, Otmar Oduber ta insisti pa forma un Frente Nacional, pa bay atende cu e asunto di Rijkswet cu Gobierno Hulandes, dunando e impresion cu fraccion di PPA lo ta conta cu mas c’un miembro di Parlamento.

Pero ta mesun lider di e partido di Benny Nisbet den feliz memoria, a keda for di politica pa mas cu 5 aña caminda como “ciudadano” pero mas cu tur cos, como “comerciante” el a sinta keto mira su ex colega den Gobierno, Evelyne Wever Croes, firma acuerdo tras di acuerdo cu Hulanda, firma na tres ocasion pa Aruba haya un Rijkswet sin cu el a lanta y bisa algo.

Awor ta Gobierno actual t’esun cu lo ta entregando independencia di Parlamento di cual e ta formando parti di dje, dunando e impresion cu el a caba di spierta y haya e asunto aki andando.

Ta prome bes den historia, c’un fraccion di un asiento, ta organisando reunionnan cu realmente e no tin sosten pa organisa, ya cu tin un Gobierno legitimo cu pueblo a eligi pa atende cu e asuntonan aki y pa sinta den dialogonan pa yega na cualkier palabracion.

Y manera a bira conoci caba, e caso di apelacion di Mike de Meza a bira uno no ta admissible, pasobra e peticion a wordo entrega laat. E team di abogado mester por sa mihor. Of e honeymoon di Desiree Croes a pone lubida riba su cliente? Kico ta bai pasa awor? Ta di sinta spera ki dia OM lo ta cla pa manda e caso aki pa Corte di Prome Instancia pa trata. E lo por dentro di 5 aña, mirando cu OM no tin sufiiente hende pa traha. 

Awor e team di abogadonan a dicidi di bolbe entama un caso sumario contra di OM. Unabes haya un veredicto, si e no ta na fabor di Mike de Meza, lo apela na Corte di Apelacion.

Un eror costoso di e team defensor di Parlamentario Mike de Meza den su caso contra di Ministerio Publico, caminda HOF a señala esaki tambe, ya cu abogadonan di e politico, no a entrega nan peticion di apelacion, den e periodo stipula p’esaki.

Ta mas cu claro cu Mike de Meza ta decepciona y ta logico, ya cu un proceso cu pa algun luna a keda cla, awor ta sigui wordo alarga manera un cakiña sin cu realmente e sistema legal por hustifica esaki.

Siman pasa Corte di Apelacion a trata e veredicto den caso di Mike de Meza vs DIMP, unda a keda constata cu el a cumpli debidamente cu tur Impuesto, pa despues di e veredicto aki, mesun DIMP a entrega un keho penal na Ministerio Publico cu a hacie un sospechoso, cu ta motibo cu por lo pronto Mike de Meza no por bira Minister. Un persona eligi pa Pueblo, mirando e cantidad di voto cu el a haya.

Kico tin tras di tur e manipulacion aki, cu ta haci cu Mike de Meza no por bira Minister ainda? Su votadornan ta masha rabia, cu ta pone cu Mike de Meza mes ta masha desapunta. Dependiendo di e casonan hudicial cu lo tin, e Parlamentario aki lo tuma su decision si lo sigui sostene AVP of no. Y bira independiente, maske cu Otmar Oduber kier haya Mike de Meza na su banda pa fortifica PPA, cu tabata cuna politico di de Meza.

Ta un berguensa cu for di 4 di juni caminda Corte den Prome Instancia no a mira ningun argumento legal pa Prome Minister Mike Eman entrega documentonan pa Mike de Meza wordo huramenta como Minister, e mesun anochi ey ata, for di nada ta presenta carta di Ministerio Publico, indicando na Prome Minister y despues na Mike de Meza, cu e ta un sospechoso dor di keho cu DIMP lo a entrega pa persecucion di su persona.

Diabierna ultimo tabata HOF cu tambe a dicidi cu e apelacion di de Meza contra e decision di Corte den Prome Instancia, no ta admisibel mirando cu abogadonan di e Parlamentario, a entrega esaki mucho laat.

Hecho ta cu te diabierna ultimo, ainda  Ministerio Publico no por bisa e Legislador de Meza, di kico e ta ser acusa, di kico e ta ser sospecha y awor tin cu spera aparentemente ora cu personal di Ministerio Publico bin bek di vacacion e siman aki, pa e ora nan bay atende cu e asunto aki.

E ta mahos, hasta e ta hopi vies, ya cu bou di ningun circunstancia,  nos sistema legal por ridiculisa nan bon nomber cu pa hopi tempo nan tabata carga, pero cu ultimo decada, a keda decai ta n’e nivel cu e ta n’e momentonan aki.

Pero den e caso aki no por culpa otro hende cu t’e propio abogadonan, unda Desiree a dicidi di casa, lubida completamente riba su cliente. No tin ningun hustificacion p’e blunder aki.

VIOLACION DI DERECHONAN DI MIKE

Ki paso tin pa tuma awor. A bisa cu si ta necesario, si Mike de Meza no haya razon den su peticion, lo sigui si ta necesario pa Corte Europeo. Esey si Hof ta apoya Ministerio Publico den e violacionnan continuo y grave di e derechonan di Mike de Meza.

E violacionnan, nan ta bisa, ta consisti di nenga di notifica de Meza, manera art. 6 lid 3 di EHRM ta stipula, na un manera detaya di locual ta sospecha e politico di dje, y tambe di viola su derecho riba un proceso husto, sin retraso inecesario y menos sin retraso intencional di e proceso penal, cu tur e consecuencianan cu esaki tin pa de Meza, y tambe p’e interes general di Aruba. 

“E postura di Ministerio Publico di viola e derechonan di Mike de Meza riba un proceso husto n’e manera grave aki ta un biaha mas incomprendibel y tambe ta sigui alimenta e desconfiansa cu ya ta biba den nos comunidad.”

Keto bay partido MEP ta insisti riba rednan social, cu no por retira “su” Comisarionan cu nan a nombra den diferente Hunta Directiva di companianan estatal y hasta ex Presidente di Parlamento, siman pasa a cuestiona nombramento di Rondel Heyliger como ‘District Advisor.’

E ex Presidente di Parlamento kier sa unda transparencia a keda loke ta bolbe mustra riba un tipo di mentalidad contradictorio pa no bisa meskino cu politiconan sa mustra di tin.

Ministernan di MEP pa ocho aña largo, a nombra famia- y amigonan, a nombra swa y primo, omo y tanta na cantidad di posicion sin cu nunca a tene un solicitud habri  pa no menciona e decision di nombra Ton Rojer como  Director di Utilities NV pa no papia mes di decisionnan tuma na WEB, Elmar, DIMAS y Departamento di Infrastructura!!!

Un grupo grandi di studiante (184) a sali pa Hulanda pa sigui nan studio tin un pregunta, cu e.o. Minister di Educacion por contesta. Cuanto di e estudiantenan cu a bai Hulanda den pasado recien, cuanto di nan a bolbe nan pais? Ta interesante pa sa esaki, pasobra na nos opinion, ni 50% a bolbe y si tin di nan a bolbe mes, hopi a bin bek sin logra nan meta pa cual nan a bai studia. Pero si a haya nan mes cu un debe pa paga.

Frits van Eerd, conocido personahe na Hulanda, kende tabata ex gerente general di cadena di supermercado Jumbo, a keda sentencia na 24 luna di prison. El a ser haya culpabel di labamento di placa, y hasta a defrauda su mes compania pa medio di falsificacion.

Frits van Eerd su complice a haya un castigo mas halto esta di 3.5 aña di prison. Lectornan por corda algun aña pasa, unda Aduana di Aruba a bin descubri un of mas container di galiña congela, yena cu cantidad di Euro y Dollars? Nunca a tende nada mas di e caso aki. No lubida cu tin supermercado na Aruba, cu ta afilia cu supermercado Jumbo y ta bende nan productonan na Aruba y tambe na otro supermercado na Corsou y Bonaire.

Esnan cu kier haya Den Noticia gratis, por fabor manda bo e-mail adres na [email protected] of na [email protected]. Mi ta aprecia tambe cualkier comentario, cu lo yuda nos trece mas noticia veredico, manera mi a sa di haci, pa cual a ponemi bin bek. Un biaha mas danki p’e sosten.